Yãmb sogsgã leoore
◼ Saam-biis sã n dat Rĩungã Roog n maan b kãadem sõsga, bõe ne bõe zug la b segd n sõs ne kãsem dãmbã?
B sã n maan kãadem tɩ zems ne Biiblã noyã waoogda a Zeova. Sẽn yɩɩd fãa b sã n maan kãadmã sõsg Rĩungã Roogẽ, segd n sigla sõma, bala sakã neb getame tɩ bũmb nins sẽn maand be wã fãa yaa siglgã yʋʋr yĩngã. Dẽnd sẽn na yɩl tɩ “bũmb fãa maan tɩ zems tɩ bʋrg [bɩ zũnd-zãnd] ra zĩndi,” saam-biis sã n wa kos Rĩungã Roog n na n maan b kãadem sõsga, segdame tɩ kãsem dãmb kẽes b toogo.—1 Kor. 14:40.
Saam-biis sã n dat Rĩungã Roog n maan b kãadem sõsga, b segd n gʋlsa kãsem dãmbã sull n kose. B segd n gʋlsa lɛtrã n kɩs n wilg daarã la lɛɛr ning b sẽn dat Rĩungã Roogã tɩ nan ket n zãra. B segd n ninga b yamẽ tɩ kãsem dãmbã pa tõe n toeem tigissã lɛɛr bãmb kãadmã yĩng ye. Sẽn paase, sẽn dat-b n kẽ kãadmã segd n yɩɩ neb sẽn kõt mak-sõngo, la sẽn tũud a Zeova noyã sõma.
Sẽn na yɩl tɩ bũmb ning fãa b sẽn na n maan Rĩungã Roogẽ wã waoog Wẽnnaam, sẽn dat n kẽ-b kãadmã segd n tɩ sõsa ne kãsem dãmbã sull b kãadmã segls zugu, n yaool n yãk b sẽn na n maan bũmb ninsã takɩ. Yaa sɩd tɩ kãsem dãmbã pa na n modg-b tɩ b maan yɛlã wa sẽn zems ne bãmb mens raab ye. La sã n mikame tɩ sẽn dat n kẽ-b kãadmã ra rat n maana bũmb tɩ kãsem dãmbã yeel tɩ pa segde, b segd n toeemame. Yaa mélodies du Royaume dãmba bal la b tõe n kelge, bɩ yɩɩl nins sẽn be tõnd yɩɩllã sebr pʋgẽ wã bal la b tõe n yɩɩl Rĩungã Roogẽ. B sã n dat n nags Rĩungã Roog la b maneg zaoosã me dɩgl wa b sẽn dat to-to, gɩdgr kae ye. B sã n na n yõga foto rãmb bɩ n filim b sẽn maand bũmb ninsã, b pa segd n yĩm tɩ bũmb fãa segd n waooga Wẽnnaam ye. Kãsem dãmbã tõe n kõ-b-la sor tɩ b segl bũmb wala yɩɩlã Rĩungã Roogẽ, sã n pa na n tiis tigissã. B pa segd tabl booll sebr tigingã tablo zug ye. Tʋʋmdã tigisg sasa, kãsem dãmbã tõe n kɩtame tɩ b togs tigingã neb tɩ kãadem sõsg la b na n maan Rĩungã Roogẽ.
Baa ne sẽn pa tɩlae tɩ neb nins fãa sẽn na n naag kãadmã yɛlẽ wã yɩ neb sẽn deeg lisgã, d pa segd n naag ned sẽn tar vɩɩm manesem sẽn kɩɩsd Biiblã noyã, n tʋmd tʋʋm-dẽgdo, bɩ ned sẽn tar manesem sẽn na n kɩt tɩ nebã maand sãmb-sãmb ne nin-kãng ye. Kãsem dãmb sã n bee tigingã pʋgẽ, yaa kãsem soab n segd n maan kãadmã sõsgã. Kãsem dãmbã yaa Wẽnnaam Gomdã karen-saam dãmb sẽn mi neb zãmsg sõma. Dẽnd b mii noy nins b sẽn segd n wilg vẽeneg sasa kãngã wã.—1 Tɩm. 3:2.
Sẽn mik tɩ kãsem soab ning sẽn na n maan sõsgã yʋʋr tõe n manegame bɩ sãam kãadmã yĩnga, yẽ me segd n bãnga segls nins b sẽn dɩkã. A segd n sõsa ne raoã la pagã n bãng b sã n talla manesem sẽn yaa sõma b sẽn wa dood taabã sasa. B segd n pelga b pʋs n togs sɩda. B ned a ye sã n da zoe n kẽe kãadem, a segd n wilga a sã n tara sor Wẽnnaam taoor la goosneemã taoor masã n tõe n ye kẽ kãadem. (Mat. 19:9) A segd n wilga kãsem soabã kãadmã kaoob sebre.
Sẽn dat-b n kẽ kãadmã sã n sak n pelg b pʋs n sõs ne kãsem dãmbã la b tũ b saglsã, nebã fãa sũur na n yɩɩ noog ne bũmb nins fãa sẽn na n maanã.—Yel. 15:22; Heb. 13:17.