Dũniyã tar n debda yɛ?

B sã n sok yãmb tɩ dũniyã tar n debda yɛ, y na n leokame tɩ bõe?

Y na n leokame t’a tar n debda

a) a manegr zĩigẽ bɩ?

b) a kengr zĩigẽ bɩ?

d) bɩ a na n kell n paa woto?

RẼ YĨNGA yãmb tẽedame tɩ beoog daarã na n yɩɩ sõma bɩ? Woto tara yõod wʋsgo. Bãngdbã vaeesame n mik tɩ neb nins sẽn saagd tɩ beoog daarã na n yɩɩ sõma wã yam-wekrã la b yĩns laafɩ wã yɩɩda neb a taabã. B maana vaeesg rap a wãn zug yʋʋm wʋsg pʋgẽ, n mik tɩ b sʋkã neb nins sẽn da saagd tɩ beoog daarã na n yɩɩ sõma wã pa nong n bẽed sũur bãag tao-tao n tat neb nins sẽn pa tar saagrã ye. La rẽ zemsa ne bũmb Biiblã sẽn togs hal yʋʋm wʋsgo. A yeta woto: “Sũ-noog wata ne laafɩ. La sũ-sãoong boogda yĩns keelem.”—Yelbũna 17:22.

Bũmb nins bãngdbã sẽn yet tɩ na n wa paama tẽngã kɩtame tɩ neb wʋsg yɛɛsdẽ, tɩ lebg toog ne-b tɩ b tẽ tɩ beoog daarã na n yɩɩ sõma. D ges yel-beed kẽer bãngdbã sẽn yeel tɩ watame.

Yel-beed n na n paam tẽngã

Yʋʋmd 2002 wã pʋgẽ, siglg a ye sẽn be Stockholm n get tẽn-gãongã, tɩɩsã la pemsmã yell keoogame tɩ b sã n pa tõog tɩ nebã boog b sẽn sãamd tẽn-gãongã la pemsmã ligdã baoob yĩngã, tõe n wa kɩtame tɩ saagã pa le niid sõmã, tɩ tɩɩsã la rũmsã me pa le tõe n vɩɩmd sõma ye. B leb n paasame tɩ naongã la wẽgbã sẽn tat zĩig fãa tɩ nebã keed tɩɩsã la b kʋʋd rũmsã yaar la b sãamd tẽngã tõe n waa ne yel-beedo.

O.N.U. wã kɩtame tɩ bãngdb 1 360 sẽn yit tẽns 95 pʋsẽ maan vaeesg yʋʋm a naas pʋgẽ, n na n ges tẽngã sãoong sẽn ta zĩig ningã. Yʋʋmd 2005 wã pʋgẽ, bãngdb kãensã wilgame tɩ “nebã sẽn tʋmd tʋʋm ninsã kɩtame tɩ tẽngã sãamd n debda, tɩ kɩt tɩ d pa mi neb sã n na n wa tõog n vɩɩmda a zug ye.” B paasame tɩ sẽn na yɩl tɩ yel-beed ra wa paam tẽngã, rẽndame tɩ nebã toeem yam, noyã, la manesem, la tɩ zu-bʋko, pa woto la nebã maand ye.

A Anna Tibaijuka sẽn yaa O.N.U. wã will ning sẽn get nebã sẽn vɩ zĩis ninsã yellã dirɛktɛɛrã wilga bãngdb wʋsg sẽn tagsd to-to beoog daarã wɛɛngẽ. A wilgame tɩ b wʋsg yetame tɩ “d sã n ket n maand wa raasenkamã, d beoog daarã pa na n yɩ sõma ye.”

D sẽn tõe n tẽ manegrã võore

A Zeova Kaset rãmbã me tẽedame tɩ ka la bilfu, yel-kãsem n na n zĩnd dũniyã gill zugu. La b kɩsa sɩd tɩ yel-kãens pa sẽn na n sãam ãdem-biisã beoog daarã ye. Yaa sẽn na n kɩt tɩ vɩɩmã lebg noogo, t’a sẽn na n yɩ noog to-to wã buud zɩ n zĩnd ye. Bõe yĩng tɩ b tẽed woto? Bala b kɩsa sɩd ne kãabs nins sẽn be Wẽnnaam Gomdã sẽn yaa Biiblã pʋgẽ wã. Ges-y Biiblã sẽn pʋd n yet bũmb ninga: “A keta bilf bala tɩ nin-wẽng kõn tol n zĩnd ye. Yãmb na bao tɩ bãng a zĩiga, la a ka be ye. La sũ-maasem dãmbã na n sooga dũniyã n maan sũ-noog laafɩ wʋsg yĩnga.”—Yɩɩl Sõamyã 37:10, 11.

Rẽ yĩnga woto yaa bũmb sẽn pa tol n tõe n yɩ bɩ? Nand tɩ d leok sok-kãngã, bɩ y tags n gese: Biiblã reng n togsa hal na maan yʋʋm tusa, tɩ yel-beed nins sẽn sãamd tẽngã la namsd ãdem-biisã rũndã-rũndã wã watame. Karm-y verse nins b sẽn sõdg sõsg ning sẽn pʋgdã pʋgẽ wã, la y mak rẽ ne yɛl nins sẽn maand dũniyã zugã n gese. Woto na n sõng-y lame tɩ y kɩs sɩd n paas tɩ bũmb nins fãa Biiblã sẽn deng n togsã sɩd pidsda kɛpɩ.