Ka la bilfu tẽngã na n lebga arzãna!

“Tõnd Ba sẽn be [saasẽ], tɩ yãmb yʋʋr yɩ ne waoogre, tɩ yãmb soolem wa, tɩ yãmb daab maan dũniyã zug wa sẽn maand [saasẽ wã].”—Matɩe 6:9, 10.

NEB wʋsg mii pʋʋs-kãngã ne zugu. A yaool n wilgdame tɩ tẽngã zug vɩɩm na n wa yɩɩ noogo. Bõe yĩng tɩ d yet woto?

Bala pʋʋs-kãngã pʋgẽ, b wilgdame tɩ Wẽnnaam Rĩungã sã n wa, Wẽnnaam daabã na n maana tẽngã zug wa sẽn maand saasẽ wã. Wẽnnaam daab yaa a kɩt tɩ tẽngã ye lebg arzãna. (Wilgri 21:1-5) La Wẽnnaam Rĩungã yaa bõe, la wãn to la a na n kɩt tɩ tẽngã lebg arzãna?

Goosneema sɩd-sɩda

Wẽnnaam Rĩungã yaa goosneema sẽn zoe n lugli. Goosneem buud fãa tara a nanambse, a noyã, la a poorẽ dãmba. Rẽ yĩnga yaa woto ne Wẽnnaam Rĩungã bɩ a goosneema wã bɩ? Ges-y Biiblã sẽn yet bũmb ninga:

Ãnd dãmb la Wẽnnaam Rĩungã nanambse? (Ezai 33:22) Wẽnnaam a Zeova yãka a bi-ribl a Zezi Kirist t’a na n yɩ Rĩungã Rĩma. (Matɩe 28:18) Ne a Zeova sor-wilgri, a Zezi tũusa neb sõor bilf buud goam toɛy-toɛya, soolem la buud toɛy-toɛy pʋsẽ, tɩ b na n tɩ naag-a saasẽ ‘n dɩ naam dũniyã zugu.’—Wilgri 5:9, 10.

No-bʋs la Wẽnnaam Rĩungã lugl a poorẽ dãmbã yĩnga? Wẽnnaam noy kẽer wilgda tõnd d sẽn segd n maanã vẽenega. A Zezi wilga noor ning sẽn yaa kãseng n yɩɩdã. A yeela woto: “ ‘Nong Zusoabã fo Wẽnnaam ne f sũur fãa, la ne f sɩɩgã fãa, la ne f yam fãa. Ada yaa pipi tõogo, la a yaa tõog sẽn yaa kãseng n yɩɩd tõodã fãa. La ad a yiib soabã sẽn wẽnd yẽnda: Nong f yak wa f menga.’ ”—Matɩe 22:37-39.

Noyã kẽer me wilgda Rĩungã poorẽ dãmb sẽn pa segd n maan bũmb ninsã. Wala makre, Biiblã yeta vẽeneg woto: “Da belg-y y mens ye. Nin-yoaadbã ne bõn-naands pʋʋsdbã, la rap sẽn maand tɩ yɩ wa pagba, la raglem dãmbã, la wagda ne zoe-bõn dãmbã, la rã-yũudbã, la nin-tʋʋdbã ne fãadbã ka na n paam Wẽnnaam soolem ye.”—1 Korẽnt dãmba 6:9, 10.

Ãnd dãmb la Wẽnnaam Rĩungã poorẽ dãmba? A Zezi maka Wẽnnaam Rĩungã poorẽ dãmb ne piisi. A yeela woto: “Bãmb na n wʋma mam koɛɛga. La a na yɩ yãgr a yembre, la pe-kɩɩm a yembre.” (Zã 10:16) Sẽn na yɩl n yɩ Wẽnnaam Rĩungã neda, f pa segd n yet ne noor bal tɩ f tũuda pe-kɩɩm sõng a Zezi ye. F segd n maana a sẽn yetã me. A Zezi yeela woto: “Ka neb nins fãa sẽn boond maam tɩ Zusoaba, Zusoaba! n na n kẽ arzãn soolem ye. Yaa ned ning sẽn maand mam Ba sẽn be [saasẽ wã] raabã bala.”—Matɩe 7:21.

Rẽnd Wẽnnaam Rĩungã poorẽ dãmbã waoogda Wẽnnaam yʋʋrã sẽn yaa Zeova wã, la b pʋt yʋ-kãng b pʋʋsgã la b koe-moonegã pʋgẽ wa a Zezi sẽn maanã. (Zã 17:26) B sakda a Zezi noorã, n moond ‘Wẽnnaam rĩungã koe-noog’ la b zãmsd nebã. (Matɩe 24:14; 28:19, 20) Sẽn paase, b nonga taab ne nonglem hakɩka.—Zã 13:35.

B na n ‘sãama neb nins sẽn sãamd tẽngã’

Yɛl nins sẽn maand dũniyã zug rũndã-rũndã wã wilgdame tɩ ka la bilfu, Wẽnnaam Rĩungã na n wa kɩtame tɩ tẽngã toeeme. D maana wãn n bãng rẽ? Yʋʋm 2000 sẽn looge, a Zezi wilga yɛl wʋsg sẽn na n yɩ bãnd n wilg tɩ ‘Wẽnnaam Rĩungã waoong kolgame.’ (Luk 21:31) Wala d sẽn wilg sõsg ning sẽn loogã pʋgẽ wã, d nee yɛl nins a sẽn togsã sẽn sɩd pidsd vẽeneg dũniyã gill zugu.

Yel-kãensã pidsg poore bõe n na n maane? A Zezi yeela woto: “Wakat kãngã, to-kãseng na n zĩndame, toog sẽn yaa woto nan ka zĩnd dũniyã zug ye, la a kõn leb n zĩnd yãoã zugẽ abada.” (Matɩe 24:21) Pa ninsaalbã n na n wa ne to-kãseng kãngã ye. Yaa Wẽnnaam meng n na n wa ne-a, sẽn na yɩl n ‘sãam neb nins sẽn sãamd tẽngã.’ (Wilgri 11:18) A “na n yiisa nin-wẽnsã tẽngã pʋgẽ,” sẽn dat n yet tɩ neb nins sẽn sãamd tẽngã ligd-baoorã yĩngã. La pʋ-peelem dãmbã, sẽn yaa neb nins sẽn tũud Wẽnnaam wa a sẽn dat to-to wã “n na n zĩnd a pʋgẽ.”—Yelbũna 2:21, 22.

Wẽnnaam a Zeova bee bʋʋm a sẽn na n maan woto wã. Bõe yĩng tɩ d yet woto? D rɩk makre: Yaa wala yãmb sẽn na n dɩk y zak n luaase. Neb kẽer n be zakã pʋgẽ n yaa nin-sõma, n sakd n yaood b rotã ligdi, la b zãad rotã sõma. La neb a taab n be zakã pʋgẽ tɩ yaa b mensã yell bal n pak-ba, n yaa nin-yood tɩ b zĩnd-n-taarã me yaa toogo. B pa zãad b rotã sõma, la b pa sakd n yaood rotã ligd me ye. Baa ne yãmb sẽn keoog-b naoor wʋsgã, b ket n maanda sẽn pa sõma. Bõe la yãmb na n maane? Yaa vẽeneg tɩ yãmb sẽn yaa zakã soabã, y na n yiis-b-la zakã pʋgẽ.

Wẽnnaam a Zeova me sẽn yaa tẽngã la bũmb nins fãa sẽn be a pʋgẽ wã naandã, a tara sor n na n yãk neb nins buud a sẽn dat tɩ zĩnd tẽngã zugu. (Wilgri 4:11) A Zeova wilgame tɩ yẽ raab yaa a menes neb nins sẽn pa sakd n maan yẽ sẽn datã, la b namsd neb a taabã.—Yɩɩl Sõamyã 37:9-11.

Tẽngã gill na n lebga arzãna

A Zezi Kirist la Wẽnnaam Rĩungã Rĩma, la ka la bilfu, a na n dɩɩ naam dũniyã gill zugu. A Zezi boola sasa kãng tɩ “bũmb fãa manegr wakate.” (Matɩe 19:28) Sasa kãngã, vɩɩmã na n lebga wãn to? Ges-y Biiblã sẽn yet bũmb ningã:

Yɩɩl Sõamyã 46:10. “Bãmb kɩtdame tɩ zabr sɛ hal dũniyã tɛk fãa.”

Ezai 35:1. “Weoogã ne zĩ-koɛɛngã na n maana sũ-noogo, la rasempʋɩɩgã na n kɩdmame n ning puud wa sõs puudu.”

Ezai 65:21-23. “Neb nins mam sẽn yãkã na n paama b tʋʋmã nafre. Bãmb ka na n tʋm zaalem ye. La b ka na n dog kamb tɩ b sãam b nifẽ ye.”

Zã 5:28, 29. “Wakat watame tɩ fãa sẽn be yaad pʋsẽ na n wʋm [a Zezi] koɛɛg n yi.”

Wilgri 21:4. “[Wẽnnaam] na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbr walla toog kõn le zĩnd yɛs ye.”

D tara bʋʋm n na n tẽ

Rẽ yĩnga yãmb tẽeda kãabs nins sẽn be Biiblã pʋgẽ wã bɩ? Biiblã pĩnd n togsame tɩ neb wʋsg pa na n tẽ ye. A yeela woto: “Yaoolem wakate, neb sẽn laad neba, la neb sẽn sakd bãmb mens wẽngã ratem na n zĩndame. La bãmb na n yeelame: ‘Bãmb waoong kãabg bee yɛ? Tɩ bõe, hal tõnd yaab rãmbã sẽn ki tɩ ta masã, bũmb fãa ket n yaa wa dũniyã naaneg wakate.’ ” (2 Pɩɛɛr 3:3, 4) La nin-kãensã sɩd tudga wʋsgo. D ges bʋʋm a naas sẽn kɩt tɩ d segd n tẽ Biiblã sẽn yetã:

1) Pĩnd wẽndẽ wã, Wẽnnaam kẽesa a toog ninsaalbã yɛlẽ. A Nowe wakatẽ sa-kãsengã yaa kaset sẽn wilgd rẽ.—2 Pɩɛɛr 3:5-7.

2) Wẽnnaam Gomdã pĩnd n togsa yɛl nins tõnd sẽn ne dũniyã zug rũndã-rũndã wã.

3) Bũmbã fãa pa “ket n yaa wa dũniyã naaneg wakatã” ye. Nebã manesmã, tẽn-gãongã, tɩɩsã la pemsmã sãoong sẽn ta zĩig ningã buud zɩ n zĩnd ye.

4) B moonda Wẽnnaam Rĩungã koe-noog dũniyã gill zugu, tɩ wilgdẽ tɩ dũniyã saab na n yɩɩ ka la bilfu.—Matɩe 24:14.

A Zeova Kaset rãmbã ratame tɩ y sak tɩ b zãms-y Biiblã, sẽn na yɩl tɩ y tõog n bãng yɛl wʋsg vɩɩm sẽn pa satã Wẽnnaam Rĩungã sẽn na n wa ne wã zug n paase. (Zã 17:3) Vẽenega, d gũuda beoog daar sẽn yaa sõma. Vɩɩmã na n sɩd wa lebga noog ka la bilfu! Yãmb na n zĩnda wakat kãngã sasa bɩ?

[Goam sẽn tar pãngã, seb-neng a 7]

Neb nins sẽn yet tɩ yɛlã na n kell n yɩɩ wa sẽn sɩng n yaa to-to wã tudga wʋsgo.

[Foto, seb-neng a 8]

Yãmb na n zĩnda wakat kãngã sasa bɩ?