Wẽnnaam Rĩungã yaa bõe?
A Zeezi yeela a karen-biisã tɩ b sã n na n pʋʋse, b tõe n yeelame yaa: “Tõnd Ba sẽn be saasẽ, bɩ yãmb yʋʋr paam waoogre. Bɩ yãmb Rĩungã wa. Bɩ y raabã maan tẽngã zugu, wa sẽn maand saasẽ wã.” (Matiye 6:9, 10) La Wẽnnaam Rĩungã yaa bõe? Bõe la Wẽnnaam Rĩungã maanda? Bõe yĩng tɩ d segd n pʋʋs n kos tɩ Wẽnnaam Rĩungã wa?
A Zeezi n yaa Wẽnnaam Rĩungã Rĩm.
Luk 1:31-33 yetame: “Fo segd n pʋda a yʋʋr t’a Zeezi. Yẽ na n yɩɩ kãsenga. B na n bool-a lame tɩ Sẽn ka-a to wã Bi-ribla. Wẽnnaam a Zeova na n kõo yẽ a yaab a Davɩɩd geerã. A na n yɩɩ Rĩma, n dɩ naam a Zakoob yagensã zug wakat sẽn kõn sa, la yẽ Rĩungã pa na n tol n tall tɛk ye.”
Wẽnnaam Rĩungã yell la a Zeezi ra gomd n yɩɩda.
Matiye 9:35 yetame: ‘A Zeezi ra saagda tẽn-bɛd la tẽn-bõones fãa, n zãmsd nebã b karen-dotẽ, n moond Rĩungã koe-noogã, la a sãoogd bãas la komslem buud fãa.’
A Zeezi togsa a karen-biisã yɛl buud toor-toor sẽn na n wa yɩ bãnde, n sõng-b tɩ b bãng tɩ Rĩungã waoongã kolgame.
Matiye 24:7 yetame: “Bala buud na n yika zabr ne buud a to, tɩ rĩung me yik zabr ne rĩung a to. Kom la tẽn-digimdg na n zĩnda zĩig-zĩiga.”
Rũndã-rũndã, a Zeezi poorẽ dãmbã moonda koɛɛg dũniyã gill zugu, n gomd Wẽnnaam Rĩungã yelle.
Matiye 24:14 yetame: “Rĩungã koe-no-kãngã na n moona dũniyã tɛk fãa tɩ yɩ kaset buud fãa yĩnga. Yaa rẽ poor la saabã na n ta.”