Vʋʋsem sõngã sõnga tõnd tɩ d pids d pʋlengã
“Bɩ y kẽn ne sɩɩg sõngo, la yãmb kõn sak yĩngã ratem ye.”—GAL. 5:16.
1. Lisg bugs a yiib bʋs n zĩnd Pãntekotã sasa wã?
YƲƲMD 33 Pãntekotã sasa wã, yaa a Zezi karen-biisã sẽn paam lisg vʋʋsem sõng pʋgẽ wã poor la b tõog n gom gom-zẽnã. Woto yɩɩ yel-solemd a ye vʋʋsem sõngã sẽn sõng-b tɩ b maane. (1 Kor. 12:4-10) Yel-solemd kãng n paas tʋm-tʋmd a Pɩɛɛr sõsgã maana neb wʋsg bõe? ‘Kẽe b sũyã.’ Tʋm-tʋmd a Pɩɛɛr sẽn yeel-b tɩ b segd n teka yam n kos sugr la b reeg lisgã, b sɩd sakame. Biiblã yeta woto: “Neb nins sẽn deeg a Pɩɛɛr goamã paama koom lisgu. La baraare, karen-biisã paasa sẽn kolg tus a tãabo.” (Tʋʋ. 2:22, 36-41) Wala a Zezi sẽn da wilgã, b lis-b-la koomẽ, Ba wã la Biigã la vʋʋsem sõngã yʋʋr yĩnga.—Mat. 28:19.
2, 3. a) Welg bʋg n be reeg lisg vʋʋsem sõngã pʋgẽ wã ne reeg koom lisg vʋʋsem sõng yʋʋr yĩngã sʋka? b) Bõe yĩng tɩ sẽn dat-a n lebg kiris-ned fãa segd n deeg koom lisgu?
2 La rẽ yĩnga welgr n be reeg lisg vʋʋsem sõngã pʋgẽ wã ne reeg lisg vʋʋsem sõngã yʋʋr yĩngã sʋk bɩ? N-ye. Neb nins sẽn paam lisg vʋʋsem sõng pʋgẽ wã paama rogem paalga, n lebg Wẽnnaam kamb a sẽn zae ne a vʋʋsem sõngã. (Zã 3:3) Woto wã, Wẽnnaam yãk-b lame tɩ b na n wa tɩ yɩ rĩm dãmb la maan-kʋʋdba, n sõng Kiristã saasẽ Rĩungã pʋgẽ. Yaa nin-kãens sullã neb zãng la b sẽn boond tɩ Kiristã yĩngã. (1 Kor. 12:13; Gal. 3:27; Wil. 20:6) Dẽnd Pãntekotã sasa la rẽ tɛk n tar n watẽ, b sã n da wa yeel tɩ ned reega lisg vʋʋsem sõngã pʋgẽ, rat n yeelame t’a Zeova yãk-a lame t’a naag sul-kãngã nebã sẽn na n dɩ naam ne Kiristã. (Rom 8:15-17) La reeg koom lisg vʋʋsem sõng yʋʋr yĩngã yẽ? Bala, rũndã-rũndã, a Zeova Kaset rãmbã tigis-kãsemsã sasa, d yãta b sẽn lisd Kiristã karen-bi-paalsã vʋʋsem sõng “yʋʋr yĩnga.”
3 Ned sã n wa rat n lebg kiris-neda, a segd n deega koom lisgu, n wilg t’a rɩka a meng n kõ Wẽnnaam a Zeova n na n maan a raabã. Kiris-neb nins sẽn paam saasẽ boolgã me reega koom lisgu. Rũndã-rũndã neb milyõ rãmb nins me sẽn baood n na n wa vɩɩmd wakat sẽn kõn sa tẽngã zugã segd n deega koom lisgu. Kiris-ned sã n na n wa tɩ vɩɩmda saasẽ t’a na n zĩnda tẽngã zug me, sẽn na yɩl n ta Wẽnnaam yam, yaa tɩlae t’a reeg koom lisg ne Ba wã la Biigã la vʋʋsem sõngã yʋʋr yĩnga. La Wẽnnaam datame tɩ kiris-nebã fãa sẽn deeg koom lisgã “kẽn ne sɩɩg sõngo.” (Karm-y Galat dãmb 5:16.) Rẽ yĩnga yãmb kẽnda ne sɩɩg sõng tɩ kɩtdẽ tɩ y tõogd n pidsd bũmb ning y sẽn pʋlem Wẽnnaamã bɩ?
“Kẽn ne sɩɩg sõngã” võore
4. “Kẽn ne vʋʋsem sõngã” rat n yeelame tɩ bõe?
4 “Kẽn ne sɩɩg sõngã” rat n yeelame tɩ y sakdẽ tɩ vʋʋsem sõngã toeemd-y-yã, la a sõngd-y. Rat n yeelame me tɩ y sak tɩ vʋʋsem sõngã soog-yã, n wilgd-y sẽn segd bũmb fãa pʋgẽ. Galat rãmb sak a 5 wã sõngdame tɩ d bãng welgr ning sẽn be ned vʋʋsem sõngã sẽn so, la ned ning yĩngã ratem sẽn so sʋka.—Karm-y Galat dãmb 5:17, 18.
5. Vʋʋsem sõngã sã n so neda, a maoodame n pa tʋmd tʋʋm bʋse?
5 Vʋʋsem sõngã sã n so neda, a soab modgdame n pa tʋmd yĩngã ratem tʋʋm ye. Ad yĩngã ratem tʋʋm kẽere. Yaa “yoobo, la nin-yoolem la raglem la bõn-naands pʋʋsgo, la bagre, la beem la mo-beedo, la sũ-kiiri, la kisgri, la no-koɛɛma, la welgre, la tẽeb toɛy-toɛya, la zoe-bõne, la rã-tɩgre, la yão-beedo.” (Gal. 5:19-21) Dẽnd d tõe n yeelame tɩ vʋʋsem sõngã sõngda ned t’a tõog n “kʋ yĩngã tʋʋmã.” (Rom 8:5, 13) A sã n so neda, a kɩtdame t’a tagsd bũmb nins sẽn zems pẽgrã yelle, la a sakd a sõngrã, tɩ kɩtdẽ t’a soabã yĩnsã ratem pa so-a ye.
6. Rɩk-y makr n wilg d sẽn segd n maaneg n paam zʋg-sõma nins vʋʋsem sõngã sẽn kõtã?
6 Vʋʋsem sõngã sã n so-yã, y tara zʋg-sõma toor-toor sẽn tat Wẽnnaam yam, b sẽn boond tɩ vʋʋsem sõngã bila. (Gal. 5:22, 23) La yaa vẽeneg tɩ y miime tɩ zʋg-sõma kãens paoong baoodame tɩ yãmb me maan modgre. D rɩk makr ne ned sẽn kood zẽedo. Wĩntoog la koom sã n kaẽ, a pa na n tol n paam bũmb ye. Wala zẽedã sẽn dat wĩntoog n tõog n womã, yaa tɩlae tɩ tõnd me paam vʋʋsem sõngã n tõog n paam zʋg-sõma nins a sẽn kõtã. La baa koom la wĩntoog sã n beẽ tɩ zẽ-koaadã pa wɩsg a meng n tʋme, a na paam wʋsg sɩda? (Yel. 10:4) Rẽnd yaa yãmb me sã n tʋmd ne y sũur fãa la y na n gal zʋg-sõma nins vʋʋsem sõngã sẽn kõtã. La y sã n tʋmd yaal-yaale, y pa na n gal ye. Bɩ y sok y meng woto: “Rẽ yĩnga m basdame tɩ vʋʋsem sõngã so-ma, tɩ kɩtdẽ tɩ m paamd zʋg-sõma nins a sẽn kõtã bɩ?”
7. D sã n dat zʋg-sõma nins vʋʋsem sõngã sẽn kõtã, bõe tɩ Biiblã zãmsgã la bʋgsgã yaa tɩlae?
7 La zẽ-koaad sã n dat t’a zẽed yɩ sõma me, rẽnd a mao tɩ koom seke. Sẽn na yɩl n paam zʋg-sõma nins vʋʋsem sõngã sẽn kõtã, rẽndame tɩ d me paam koom buudu. Ko-kãng yaa koɛɛg ning sẽn be Biiblã pʋgẽ tɩ d tõe n paam-a ne kiris-neb tigingã maasmã. (Ezai 55:1) Yaa vẽeneg tɩ yãmb meng zoe n wilga neb wʋsg tɩ yaa ne vʋʋsem sõngã maasem la Wẽnnaam vẽneg neb tɩ b gʋls Biiblã. (2 Pɩɛ. 1:21) Sẽn paase, tʋm-tʋmd sẽn tũud sɩd la sẽn tar yamã sõngd-d lame tɩ d wʋmd Biiblã goam b sẽn mak ne koomã võor sõma. (Mat. 24:45-47) Dẽnd yaa vẽeneg tɩ d sã n dat tɩ vʋʋsem sõngã soog-do, d segd n karemda Wẽnnaam Gomdã la d bʋgsd a zugu. Y sã n maand woto, y rɩkda no-rɛɛsdbã mak-sõngã. Bala b ra “baoa ne b sũyã fãa n dat n bãng” yɛl kẽer Wẽnnaam sẽn vẽeneg võore. D tẽeg tɩ baa malɛgsã meng ra baoa ne b sũy fãa n na n wʋm goam kẽer sẽn be Biiblã pʋgẽ võore. Wala makre, b bao n na n wʋma bãngr-goam nins sẽn gomd yagengã la kiris-neb nins sẽn paam vʋʋsem sõngã zaeebã yellã võore.—Karm-y 1 Pɩɛɛr 1:10-12.
Vʋʋsem sõngã sõngr paamda wãn to?
8. Bõe yĩng tɩ y segd n kot a Zeova a vʋʋsem sõngã?
8 Biiblã zãmsgã la bʋgsgã bal pa sek ye. Y segdame n kot a Zeova sõngr bũmb fãa pʋgẽ. A Zeova ‘tõe n maana hal wʋsg n yɩɩd tõnd sẽn kosã la d sẽn tagsã.’ (Ef. 3:20; Luk 11:13) La nina tõe n sokda a meng woto: “Sẽn mik tɩ Wẽnnaam zoe n mii ‘mam sẽn datã tɩ m nan pa kosã,’ bõe yĩng tɩ m segd n le kose?” (Mat. 6:8) Y sẽn segd n kell n kos vʋʋsem sõngã võor yaa tɩ woto wilgdame tɩ y miime tɩ yaa a Zeova la y segd n teege. Wala makre, ned sã n kos yãmb tɩ y sõng-a, y na n maana y sẽn tõe fãa n sõng-a. Bõe yĩnga? Bala, a sẽn kɩs sɩd tɩ y tõe n sõng-a lame tɩ kɩt t’a kos-yã, yaa zu-zẽkre. (Ges-y Yelbũn 3:27.) Dẽnd yãmb me sã n kot a Zeova a vʋʋsem sõngã, noom-a lame, t’a na n sak n kõ-yã.—Yel. 15:8.
9. Bõe la y segd n maan tɩ tigissã sõng-y tɩ y paam vʋʋsem sõngã sõngre?
9 Bãng-y me tɩ tigissã la tigis-kãsemsã sõngd-d lame tɩ d paamd vʋʋsem sõngã sõngre. Rẽnd y segd n maanda y sẽn tõe fãa n kẽnd-b la y kelgd sõssã neere. Woto maaneg na n sõngd-y lame tɩ y bãngd Wẽnnaam Gomdã yel-zulumsã. (1 Kor. 2:10) Y sã n modgd wakat fãa n kõt leoor sõssã sasa me, na n sõng-y-la wʋsgo. Tags-y tigiss nins y sẽn kẽng kiuug ning sẽn loogã pʋgẽ wã yelle. Naoor a wãn la y zẽk y nug n kõ leoore? Bala d sẽn yet bũmb ning tigissã sasa wã wilgda d tẽebã. Rẽ yĩnga y neeme tɩ y segd n demsa bũmb rẽ wɛɛngẽ bɩ? Remsg sã n beẽ, bɩ y mao n maan dẽ tigiss nins sẽn watã sasa. A Zeova na n yãa y sẽn modgd n dat n kõ leoor tigissã sasa wã, la a na n kõ-y-la a vʋʋsem sõngã tɩ kɩt tɩ y tõog n dɩ tigissã yõod sõma.
10. Kẽn ne vʋʋsem sõngã baoodame tɩ d taas nebã bool-bʋgo?
10 Kẽn ne vʋʋsem sõngã baoodame me tɩ d maan Wilgr 22:17 wã sẽn yetã. Be b yeta woto: “Sɩɩg Sõng ne pʋg-paalã yetame tɩ yaa: “Wa-y-yã” la ned ninga sẽn wʋmd-a, bɩ yẽ yeele: “Wa-y-yã.” La ko-yũud sẽn tar a soaba, bɩ a wa. La ned ninga sẽn dat-a, bɩ a reeg vɩɩm koom zaalem.” Ne kiris-neb nins sẽn paam zaeebã sull b sẽn boond tɩ pʋg-paalã maasem, vʋʋsem sõngã boonda nebã fãa tɩ b wa reeg vɩɩm koom. Yãmb sã n zoe n saka boollã, rẽ yĩnga y me modgda ne y sũy fãa n na n bool nebã tɩ b ‘wa’ bɩ? Ad d sẽn paam n tõe n naag n tʋm tʋʋm kãngã sẽn fãagd nebã, yaa zu-zẽkr tɛkẽ!
11, 12. Wãn to la vʋʋsem sõngã sõngd koɛɛgã mooneg pʋgẽ?
11 Rũndã-rũndã, yaa vʋʋsem sõngã n sõngd tɩ b tʋmd fãagr tʋʋm kãngã. Biiblã tara kibay sẽn wilgd vʋʋsem sõngã sẽn tees pipi kiris-nebã wakatẽ misioneer dãmbã zĩis kẽer koɛɛgã sẽn da nan pa ta tɩ b tɩ moone. Wala makre, vʋʋsem sõngã gɩdga tʋm-tʋmd a Poll ne a tũud-n-taas “tɩ b ra moon Wẽnnaam koɛɛgã Aazi” la Bitini soolmẽ wã ye. Yaa sɩd tɩ d pa mi vʋʋsem sõngã sẽn maan to-to n gɩdg-bã ye, la d mi a sẽn maan to-to n kɩt tɩ b kẽng Erop soolmã sẽn labsã pʋgẽ wã. Kibarã yeelame tɩ yʋng a ye, a Poll yãa bõn-makre. Bõn-makrã pʋgẽ, Masedoan dao a ye n wa a nengẽ, n kos-a t’a wa sõng-ba.—Tʋʋ. 16:6-10.
12 Rũndã-rũndã me, yaa a Zeova vʋʋsem sõngã n sõngd tɩ b moond koɛɛgã dũniyã gill zugã. Pa le yaa ne bõn-makr la a Zeova wilgd a nin-buiidã b sẽn segd n moonẽ wã ye. La yaa ne a vʋʋsem sõngã maasem la a sõngd sẽn paam-b zaeebã tɩ b get a tʋʋmdã yelle. Yaa vʋʋsem sõngã me n kõt saam-biisã raood tɩ b maand b sẽn tõe fãa n moond koɛɛgã la b zãmsd nebã. Yaa vẽeneg tɩ y zoe n sõngd n tʋmda tʋʋm kãngã sẽn fãagd nebã. La rẽ yĩnga bũmb bee y sẽn tõe n maan tɩ paas sũ-noog ning tʋʋmdã sẽn kõt-yã bɩ?
13. Bõe la y tõe n maan n wilg tɩ y sakda vʋʋsem sõngã sõngrã? Kõ-y makre.
13 Y sã n dat n paas y sũ-noogã, bɩ y sakd vʋʋsem sõngã sõngrã, n tũud sagls nins Wẽnnaam sẽn kõt a nin-buiidã. Ges-y saam-bi-poak a Mihoko sẽn yit Zapõ wã makrã. A sẽn wa n lebg so-pakd paalmã, a ra tagsdame t’a pa tol n tõe n lebg n tɩ kaag ned tɩ yɩ sõma ye. A leb n da tagsdame t’a pa tõe n bãng n sõs ne ned tɩ kɩt t’a soab tʋlg n bãng koɛɛgã n paas ye. La wakat kãnga, b kõo sagls Rĩungã Tʋʋmd pʋgẽ, n wilg d sẽn tõe n tɩ kaag ned n sõs ne-a koɛɛg-koɛɛg to-to. Yaa rẽ poor bal la b sẽn yiis seb-bil ning gom-zug sẽn yaa Une vie pleinement satisfaisante : Comment ? wã. Zapõ saam-biisã tʋma ne seb-kãngã wʋsg koe-moonegã pʋgẽ. A Mihoko tũu b sẽn sagl koe-moondbã tɩ b tʋm ne sebrã to-to wã. Sẽn yɩɩd fãa, b sẽn wilg b sẽn tõe n tall sebrã n lebg n tɩ kaag ned koɛɛg-koɛɛg to-to wã. Pa yã n kaoos la a sɩng Biiblã zãmsg ne neb a sẽn da pa na n tõog tɩ b tʋlg n zãms Biiblã ye. A Mihoko yeela woto: “Mam paama karen-biis wʋsgo! Hal sẽn ta bãmb 12, tɩ yɩ tɩlae tɩ m kos kẽer tɩ b maag b yĩng nanda.” Hakɩka, y sã n kẽnd ne vʋʋsem sõngã n tũud sagls nins a Zeova sẽn kõt a nin-buiidã, y koe-moonegã na n woma biis wʋsgo.
Teeg-y Wẽnnaam vʋʋsem sõngã
14, 15. a) Bõe n tõe n sõng tõnd sẽn yaa pãn-komsem dãmbã tɩ d tõog n pids d sẽn pʋlem Wẽnnaam bũmb ningã? b) Wãn to la y tõe n paam zo-sõma?
14 Wẽnnaam sẽn yãk-y tɩ y lebg a tʋm-tʋmdã tɛka, a bobl-y-la a tʋʋmdã. (Rom 10:14) La tõe tɩ y tagsdame tɩ y pa tar tʋʋmdã minim sõma ye. Sã n yaa rẽ bɩ y tẽeg tɩ wa Wẽnnaam sẽn sõngd sẽn zae-bã, a na n sõnga yãmb me tɩ y paam minim. (Karm-y 2 Korẽnt dãmb 3:5.) Y sã n tʋmd tʋʋmdã ne y sũur fãa la y teeg Wẽnnaam vʋʋsem sõngã, y na n tõog n pidsa bũmb ning y sẽn pʋlmã.
15 Yaa sɩd tɩ d sẽn yaa koangdbã yĩnga, yɩl n tõog n vɩɩmd tɩ zems ne bũmb ning d sẽn pʋlem d Wẽnnaam a Zeova sẽn zems zãngã pa nana ye. Bũmb a ye sẽn kɩt tɩ sɩd pa nana ne-yã, yaa tɩ y sẽn sak a Zeova n toeemã, tõe tɩ linga y pĩnd zo-rãmb kẽere, tɩ kɩt tɩ b ‘gomd-y wẽnga.’ (1 Pɩɛ. 4:4) La tẽeg-y tɩ y lebs n paama zo-rãmb a taaba, la tɩ sẽn yɩɩd fãa, y paama a Zeova ne a Zezi Kirist zoodo. (Karm-y Zak 2:21-23.) Tara yõod me tɩ y bao n minim y tigingã neb fãa, bala b fãa yaa a Zeova siglgã sẽn be ãndũniyã gill zugã neba. (1 Pɩɛ. 2:17; Yel. 18:24) A Zeova na n kɩtame t’a vʋʋsem sõngã sõng-y tɩ y paam zo-rãmb sẽn na n sõng-y tɩ y kell n tũ-a wakat fãa.
16. Bõe yĩng tɩ y tõe n ‘maan sũ-noog y pãn-komsem pʋgẽ’ wa a Polle?
16 Baa y sã n tar zo-rãmb wʋsg tigingã pʋgẽ tɩ b sõngd-y-yã, vɩɩmã zu-loees tõe n wa kɩtame tɩ y ket n getẽ tɩ pa nana ye. Y tõe n wa tagsdame meng tɩ y zu-loeesã pa tol n satẽ ye. Sẽn yɩɩd fãa, yaa sasa kãens la y segd n pʋʋs a Zeova ne y sũur fãa, n kos-a a vʋʋsem sõngã. Tʋm-tʋmd a Poll yeela woto: “Mam sẽn ka be pãng wakate, yaa wakat kãng la mam paamd pãnga.” (Karm-y 2 Korent dãmb 4:7-10; 12:10.) A Poll da miime tɩ Wẽnnaam vʋʋsem sõngã tõe n sõng-a ãdem-biig a zu-loɛɛg buud fãa sasa. Woto wilgda vẽeneg tɩ wakat ning fãa y sẽn na n wa rat sõngre, Wẽnnaam na n kõ-y-la a vʋʋsem sõngã tɩ keng y raoodo. A Poll da yeelame tɩ yẽ ‘maanda sũ-noog a pãn-komsem pʋgẽ.’ Bõe yĩnga? Bala vʋʋsem sõngã ra sõngd-a-la a sẽn da wat n ka pãnga. Yãmb me tõe n paama sõngr a woto!—Rom 15:13.
17. Wãn to la vʋʋsem sõngã tõe n sõng-d tɩ d tõog n tũ a Zeova wakat fãa?
17 Sẽn na yɩl n tõog n pidsd d sẽn pʋlem Wẽnnaam bũmb ningã, rẽnda d paam a vʋʋsem sõngã sõngre. D rɩk makr wa y sẽn na n togd sor ne koom koglg ning sẽn kẽnd ne sebgã pãngã. Vʋʋsem sõngã yaa wa sebgã, n na n sõng yãmb tɩ y paam y sẽn datẽ wã tɩ bũmb pa maan-y ye. Tõnd sẽn datã yaa d tõog n tũ a Zeova wakat fãa. D pa rat t’a Sʋɩtãan sɩɩgã a sẽn kõt a dũniyã nebã, sẽn wõnd sebg me wã leng-d tɩ d tees yaare, n pa tõog n ta d sẽn datẽ wã ye. (1 Kor. 2:12) La rẽndame tɩ d reng n bãng seb-sõngã sẽn yaa vʋʋsem sõngã n welge, la d bas t’a sõng-d tɩ d ta d sẽn datẽ wã. Ne Wẽnnaam Gomdã la a siglgã maasem, vʋʋsem sõngã na n sõng-y lame tɩ y tõog n pids y pʋlengã.
18. Y yãka yam n na n maan bõe, la bõe yĩnga?
18 Y sã n zãmsda Biiblã ne a Zeova Kaset rãmbã, n kẽnd b tigissã la y yaool n nan pa maan bũmb ning sẽn tar yõod n yɩɩdã, sẽn yaa rɩk y meng n kõ a Zeova la y reeg lisgã, bɩ y sok y meng woto: “Bõe n kɩt tɩ mam yam yooda?” Y sã n sakame n deeg tɩ rũndã-rũndã me, a Zeova pidsda a raabã ne a vʋʋsem sõngã maasem, la y ne a sẽn sɩd sõngd siglgã to-to wã, bɩ y mao n maan bõn-kãngã sẽn tar yõod wʋsgã. Y sã n maan woto, a Zeova na n ning-y-la bark wʋsgo. A na n kõt-y-la a vʋʋsem sõngã tɩ sõngd-yã. Sã n mik tɩ y reega lisgã sẽn kaoos wall sẽn nan pa zãage, yaa vẽeneg tɩ y mii vʋʋsem sõngã sõngrã yõodo. Y zoe n yãa Wẽnnaam sẽn kõ-y a pãngã tɩ sõng-y to-to. A tʋll n sõng-y-la wakat fãa yĩnga. Bɩ y maan y sẽn tõe fãa n ket n kẽnd ne vʋʋsem sõngã.
Y tẽrame bɩ?
• “Kẽn ne vʋʋsem sõngã” rat n yeelame tɩ bõe?
• Bõe n na n sõng-y tɩ y ket n “kẽnd ne vʋʋsem sõngã”?
• Bõe la y segd n maan n tõog n pids y pʋlengã?
[Foto, seb-neng 17]
Yɩl n paam zʋg-sõma nins vʋʋsem sõngã sẽn kõtã wʋsgo, baooda modgre
[Foto rãmba, seb-neng 19]
Yaa Wẽnnaam vʋʋsem sõngã n so yãmb bɩ?