Vʋʋsem sõngã yaa bõe?

DAAR a yembre, a Zezi soka a karen-biisã yaa: “Ãnda n be yãmb sʋka, a biig sẽn na n kos-a buri, t’a rɩk kugr n kõ-a? Walla a sã n kos-a zĩifu, a na rɩk waaf n kõ-a n ka kõ-a zĩif bɩ? Walla a sã n kos-a gelle, a na rɩk nang n kõ-a bɩ?” (Luk 11:11, 12) Galile kom-bõonegã ra nonga gɛl ne zĩm. Dẽnd b ra mii bũmb nins b sẽn kotã sõma.

A Zezi yeelame tɩ d segd n pẽdgda ne vʋʋsem sõngã kosg wa kom sẽn tar biig t’a kot rɩɩbo. (Luk 11:9, 13) D sã n bãng vʋʋsem sõngã sẽn yaa bũmb ningã, d na n wʋma d sẽn segd n kos-a Wẽnnaamã võore, bala d na n mikame t’a sɩd tara yõod wʋsg d vɩɩmã pʋgẽ. Woto yĩnga, bɩ d reng n bao n bãng Biiblã sẽn yet bũmb ning vʋʋsem sõngã wɛɛngẽ wã.

‘Sẽn-ka-to soabã pãnga’

Gʋlsg Sõamyã wilgda vẽeneg tɩ vʋʋsem sõngã yaa Wẽnnaam pãng a sẽn tar n maand bũmb ning fãa a sẽn date. Malɛk a Gabriyɛll sẽn da wa n na n togs a Maari tɩ baa ne a sẽn nan pa mi raoã, a na n doga biigã, a yeel-a-la woto: “Sɩɩg sõng na n waa fo zugu, la Sẽn-ka-to pãng na n buii foom. Woto yĩnga, bi-sõng ninga fo sẽn na n dogã, b na n boonda yẽ tɩ Wẽnnaam Biiga.” (Luk 1:35) A Gabriyɛll goamã wilgdame tɩ Wẽnnaam sã n kõ ned a sɩɩg sõngã bɩ vʋʋsem sõngã, a soab paamda pãng ning sẽn yit ‘Sẽn-ka-to soabã’ nengẽ wã.

Biiblã goam a taab me sɩd wilgda rẽ. Wala makre, no-rɛɛs a Mise yeela woto: “Zusoabã sɩɩgã kõo maam pãnga.” (Miise 3:8) A Zezi me ra yeela a karen-biisã tɩ sɩɩg sõng sã n wa b zutu, b na n deega pãnga. (Tʋʋma 1:8) Tʋm-tʋmd a Poll me goma “sɩɩg sõng pãng” yelle.—Rom dãmba 15:13, 19.

Woto fãa yĩnga, bõe la d tõe n yeele? D tõe n yeelame tɩ vʋʋsem sõngã sã n sig ned zugu, a soab paamda Wẽnnaam pãngã. A Zeova tara a vʋʋsem sõngã n wilgd a pãngã. Dẽnd koɛɛg-koɛɛga, Wẽnnaam vʋʋsem sõngã yaa a pãngã, a sẽn wat n maand bũmb sasa. La a sɩd yaa pãng sẽn ka to! Bala d pa tol n tõe n bãng ãndũniyã naaneg sẽn tũ ne pãn-kãseng ningã ye. Ne no-rɛɛs a Ezai maasem, a Zeova sagenda tõnd tɩ d bʋgs a pãn-kãsengã zugu. A yeela woto: “Zẽk-y y nens yĩngr n gese. Yaa ãnda n naan ãdsã la a mi b sõore; la a pʋd bãmb fãa b yʋya? Yaa bãmb pãn-kãsengã ne b noorã yĩng n kɩt tɩ bãmb fãa beẽ.”—Ezai 40:26.

Dẽnd Biiblã wilgdame tɩ yaa Wẽnnaam sẽn ka to wã n naan yĩngr la tẽng bũmba fãa tɩ yaa sõma woto wã ne a “pãn-kãsengã” maasem. Vẽenega, pãng ning Wẽnnaam sẽn tar n tʋmdẽ wã sɩd ka to ye. La tõnd fãa teega pãn-kãng me n vɩya.—Ges-y zĩ-gũbr ning gom-zug sẽn yaa: “Wẽnnaam sẽn tʋm ne a vʋʋsem sõngã to-to” wã pʋgẽ.

A Zeova tõe n talla a vʋʋsem sõngã n naan bõn-kãsems wʋsgo. Wala makre, ãndũniyã a sẽn naanã. La a leb n tõe n tall-a lame n sõng ninsaalbã. Biiblã tara kibay wʋsg sẽn wilgd Wẽnnaam sẽn kõ a tʋm-tʋmdb a vʋʋsem sõngã tɩ b paam pãnga.

‘A Zeova sɩɩgã bee mam zugu’

A Zezi koe-moonegã kibay wilgda Wẽnnaam sẽn tõe n kõ a tʋm-tʋmdbã a vʋʋsem sõngã tɩ b paam pãng to-to wã, hal tɩ sɩd be yamleoogo. A Zezi ra yeela Nazarɛt nebã woto: ‘A Zeova sɩɩgã bee mam zugu.’ (Luk 4:18) A Zezi sẽn pid ne “sɩɩg sõng pãngã” kɩtame t’a tõog n maan bõe? (Luk 4:14) A maaga bãas buud toor-toore, a tãsa mogr sebg sẽn da rãmbd tɩ sigi, a rɩlga neb tusa ne bur a wãn la zĩm bilfu, la a vʋʋg neb sẽn da ki menga. Tʋm-tʋmd a Pɩɛɛr goma a Zezi yell n yeel woto: “Wẽnnaam kɩsa [a Zezi] kaset . . . ne bõn-bãna la yel-soalma la bãna.”—Tʋʋma 2:22.

Rũndã-rũndã, vʋʋsem sõngã pa le kɩtd tɩ neb maand yel-soalem a woto ye. La a ket n tõe n maana bõn-kãsems d vɩɩmã pʋgẽ. Wa a Zezi sẽn da yeel a karen-biisã, a Zeova sɩd sakd n kõta a vʋʋsem sõngã neb nins sẽn maand a raabã. (Luk 11:13) Rẽ n so tɩ tʋm-tʋmd a Poll tõog n yeel woto: “Mam tõee fãa ne ned ning sẽn kõt-a maam pãngã.” (Filip rãmba 4:13, Sebr Sõngo) Vʋʋsem sõngã tõe n sõnga yãmb me woto bɩ? Sõsg ning sẽn pʋgdã na n leoka sok-kãngã.

[Zĩ-gũbri/Foto, seb-​neng a 5]

Bũmb ning sẽn wilgd tɩ vʋʋsem sõngã pa nedã

Biiblã pʋgẽ, b mi n maka vʋʋsem sõngã ne koom. Wẽnnaam da wa n kãaba a nin-buiidã t’a na n ning-b-la barka, n yeel-b woto: “Mam na n pʋdga koom zĩ-koɛɛng zĩigẽ la m kɩt tɩ kʋɩlsã koom zoe tẽn-koɛɛng zugu. Mam na n pʋdga m sɩɩgã yãmb yagensã zut la m ning m barkã yãmb kambã zutu.”—Ezai 44:3.

Wẽnnaam sã n pʋgd a sɩɩgã a tʋm-tʋmd zugu, b yetame t’a ‘pida ne sɩɩg sõngã,’ wall b yeel tɩ ‘sɩɩg sõngã pid-a lame.’ Yɩɩ woto ne a Zezi, a Zãmbatiis, a Pɩɛɛre, a Polle, a Barnabas la karen-biis nins sẽn da tigim taab yʋʋmd 33 Pãntekotã raarã.—Luk 1:15; 4:1; Tʋʋma 4:8; 9:17; 11:22, 24; 13:9.

Bɩ y tags n gese. Rẽ yĩnga b tõe n pʋdga ned neb a taab zut wa koom sɩda? B sã n yeel tɩ ned n ‘pid’ neb sulli, tara võor sɩda? Vẽenega, woto pa tar võor ye. Yaa sɩd tɩ Biiblã goma neb kẽer yell n yeel tɩ b pida ne yam wall ne Wẽnnaam daabã bãngre, pa rẽ bɩ ne vẽnegre, bɩ ne yɛl a taaba. La Biiblã zĩig baa a yembre, b pa tol n gom ned sẽn pid ne ned a to yell ye.—Luk 2:40; Kolos rãmba 1:9.

Gɛrkã gom-bil ning b sẽn lebg tɩ “vʋʋsmã” yaa pneuma, la gom-bi-kãngã bilgda pãng buudu. Biiblã gom-biis võor bilgr sebr a ye (Expository Dictionary of New Testament Words) wilgame tɩ pipi, pneuma wã “makda sebgo, . . . a leb n tõe n yɩɩ wa noor pemsem. Dẽnd vʋʋsem sõngã sẽn yaa wa pemsmã yĩnga, d pa tõe n yã-a ne nifu, la a pa bũmb d sẽn tõe n sɩɩs me ye.”

Rẽnd sɩd yaa vẽeneg tɩ vʋʋsem sõngã pa ned ye.a

[Tẽngr note]

[Fotã soaadba]

Photodisc/SuperStock