Bõe yĩng tɩ neb wʋsg pa mi vʋʋsem sõngã?

VƲƲSEM SÕNGÃ yaa bõe? Sok-kãngã wõnda nana, la a leokr yaool n tõe n yɩɩ toogo. A Pap Benoît XVI sõsa ne kʋʋng Ostrali n yeel-b woto: “Wõnda d pa tol n tõe n bãng vʋʋsem sõngã sẽn yaa bũmb ningã takɩ ye.”

Hakɩka, vʋʋsem sõngã sẽn yaa a soabã wɛɛngẽ, nebã tagsg yaa toor-toore. Wala makre, ad neb kẽer sẽn nong n yetẽ:

• Vʋʋsem sõngã yaa ned sẽn be Kiristã karen-biisã pʋsẽ.

• Yaa ne vʋʋsem sõngã maasem la Wẽnnaam be dũniyã zugu.

• Vʋʋsem sõngã naaga Wẽnnaam ne a Zezi tɩ b tãabã fãa yaa nin-yɛnga.

Bõe yĩng tɩ nebã tagsg yaa toor-toor woto? Yellã sɩnga hal yʋʋmd 300 soabã sẽnese. Yaa wakat kãng la tũudmã yɛl mitb kẽer yik n yetẽ tɩ vʋʋsem sõngã yaa neda, la t’a zema Wẽnnaam. La Biiblã yaool n pa yet woto ye. Kiristã pipi karen-biisã me ra pa tẽed woto ye. Sebr a yembr (Nouvelle Encyclopédie catholique [ãngil]) yeela woto: “Ãnsɩẽ tɛstama wã sɛb pa tol n yetẽ tɩ Wẽnnaam vʋʋsem sõngã yaa ned ye . . . Vʋʋsem sõngã yaa Wẽnnaam pãngã.” Seb-kãng paasa woto: “Nuuvo tɛstama wã sɛbã fãa la bal pʋsẽ, b wilgdame tɩ vʋʋsem sõngã yaa bũmbu. B pa yet t’a yaa ned ye. Bũmb sẽn wilgd rẽ yaa tɩ zĩis kẽere, b boond-a lame tɩ vʋʋsem sõngo, la b boond-a zĩis sãnda tɩ Wẽnnaam pãnga.”

Woto kɩtame tɩ neb wʋsg pa wʋmd b sẽn yet tɩ Wẽnnaam pãngã yaa nedã võor ye. Etazĩni, sẽn nan pa kaoose, b sogsa neb n na n bãng b tagsg rẽ wɛɛngẽ. La wʋsg leokame tɩ bãmb pa tẽed tɩ vʋʋsem sõngã sɩd yaa ned wall “bũmb sẽn vɩ” ye. Sẽn pa tẽed-b woto wã tara bʋʋm bɩ? Bɩ d segd n tẽe tũudmã yɛl mitb sẽn pẽdg n dat tɩ d sak n deeg tɩ “vʋʋsem sõngã yaa ned wala Ba wã ne Biigã”?

Biiblã wilgda vʋʋsem sõngã sẽn yaa a soabã vẽenega. Woto yĩnga, sẽn na yɩl n bãng vʋʋsem sõngã sẽn sɩd yaa a soaba, yaa tɩlae tɩ d vaees Biiblã sẽn yaa Wẽnnaam Gomdã. Sɩd me, tʋm-tʋmd a Poll yeela woto: “Sebr sõngã zãng yii Wẽnnaam nengẽ la a yõod ya a sõng-fo tɩ f zãmse, tɩ f gom n lubi, tɩ f rems sẽn golme la f wilg sẽn be neere.”—2 Tɩmote 3:16, Sebr Sõngo.

Bõe yĩng tɩ y segd n bao n bãng vʋʋsem sõngã sẽn sɩd yaa a soabã? A bʋʋmã yaa tɩ y sã n bãng rẽ, tõe n kɩtame tɩ y tõog n paam Wẽnnaam sõngre. Rẽ yĩnga yell ning pʋgẽ, y mi n wa tagsdame tɩ looga y nug tɩ y rat sõngr bɩ? A Zezi ra yeela a karen-biisã woto: ‘Bɩ y kose tɩ b na kõ-yã . . . A sã n yaa woto tɩ yãmb . . . bãng tɩ kõ yãmb kambã kũun sẽn yaa sõma; dẽ, sẽn yɩɩda yãmb saasẽ Ba kõn kõ neb nins sẽn kot bãmbã sɩɩg sõng bɩ?’—Luk 11:9, 13.

Sõsg ning sẽn pʋgdã pʋgẽ, d na n basame tɩ Biiblã wilg-d vʋʋsem sõngã sẽn sɩd yaa bũmb ninga. La rẽ poore, d na n wilga a sẽn tõe n sõng-d d vɩɩmã pʋgẽ to-to.

[Goam sẽn tar pãnga, seb-neng a 3]

Biiblã wilgda tõnd vʋʋsem sõngã sẽn yaa bũmb ningã