Karemdbã Sogsgo . . .

Wẽnnaam talla sɩngr bɩ?

▪ Biiblã wilgdame tɩ Wẽnnaam pa tall sɩngr ye. Wẽnnaam sɩng n beeme. B sẽn yeel tɩ Wẽnnaam sɩng n beeme wã võorã wʋmb sẽn yaa toogã pa segd n kɩt tɩ d yeel tɩ woto pa sɩd ye.

Rẽ yĩnga d tõe n tagsame tɩ d tõe n wʋma Wẽnnaam yɛlã fãa võor sɩda? Tʋm-tʋmd a Poll yeela woto: “Ges Wẽnnaam yam la b bãngr sẽn ka tɛka. Ned ka tõe n bãng bãmb yam-yãkrã ye, la a ka tõe n fees n bãng bãmb sẽn maand bũmb ninsã me ye.” (Rom dãmba 11:33) Wala biig sẽn pa tõe n wʋm a roagd sẽn maand bũmb ninsã fãa võorã, tõnd me pa tõe n wʋm Wẽnnaam bãngrã la a yamã võor zãng ye. Sẽn yɩɩd fãa, gom-kãensã Wẽnnaam sẽn vẽneg a Poll t’a togsã wilgdame tɩ Wẽnnaam yamã la a nimbãan-zoeerã ka to ye. Leb n wilgdame tɩ d pa tõe n bãng bũmba fãa Wẽnnaam a Zeova zugu, la d pa tõe me n wʋm tʋʋm kẽer a sẽn tʋmd võor ye. D tõe n yeelame tɩ Wẽnnaam sẽn pa tall sɩngrã bee yel-kãensã sʋka. Baa ne rẽ, d tõe n kɩsa sɩd zãng ne Biiblã sẽn yet bũmb ning Wẽnnaam zugã. A Zezi Kirist goma Gʋlsg Sõamyã yelle, n yeel woto: “Yãmb goamã yaa sɩda.”—Zã 17:17.

A Moiiz pʋʋsa a Zeova n yeel woto: “Yãmb yaa Wẽnnaam wakat sẽn ka sɩngr tɩ ta wakat sẽn ka sɛɛbo.” (Yɩɩl Sõamyã 90:2) A Moiiz gomdã wilgdame tɩ Wẽnnaam ka sɩngre, la t’a ka saab me ye. A sẽn yeel t’a ka saabã rat n yeelame tɩ yaa yẽ a ye bal la “sẽn vɩ-a wakat sẽn ka sɛtã.” (Wilgri 4:10) Dẽnd a Zeova na n kell n paa wakat sẽn ka saabo. A Moiiz sẽn yeel t’a ka sɩngrã rat n yeelame tɩ Wẽnnaam pa tall naanda, la t’a sɩng n beeme bala. Rẽnd Wẽnnaam sɩd ka sɩngre, a sɩd ka saab me ye.

Rẽnd zemsame tɩ yaa Wẽnnaam a ye bal la b tõe n bool tɩ “Rĩm sẽn so zãmaan fãa” wã. (1 Tɩmote 1:17) Yãmb we n tags n gese: A Zezi, malɛgs tus ka tɛkã, la nebã sẽn be tẽngã zugã fãa talla sɩngre, bala b fãa tara naanda. (Kolos rãmba 1:15, 16) La Wẽnnaam yẽ nengẽ pa woto ye. Ned sã n baas n tagsdẽ tɩ Wẽnnaam talla naanda, a soab na n wa rat n bãnga ãnda n naan Wẽnnaam sẽn yaa Naandã. Woto pʋd n yaa yalemdo. Sãmbg sẽn ka be, a Zeova a ye bal n “yaa Wẽnnaam wakat sẽn ka sɩngr tɩ ta wakat sẽn ka sɛɛbo.”—Yɩɩl Sõamyã 90:2.

Bãng-y me tɩ b sẽn yeel tɩ Wẽnnaam pa tall sɩngr la a pa tall saabã võor tagmame. D sã n maag d yĩng n tags a Moiiz sẽn yeel bũmb ning a pʋʋsgã pʋgẽ wã zugu, d yãtame tɩ Wẽnnaam sẽn be wakat fãa wã kɩtdame tɩ d maneg n kɩs sɩd ne a sẽn pʋlem tõnd vɩɩm sẽn pa sɛtã. Rũndã-rũndã, tõnd vɩɩmã yaa koɛɛga, la Wẽnnaam yẽ nengẽ pa woto ye. A Moiiz yeela Wẽnnaam woto: “Yãmb yaa tõnd laafɩ zĩig zãmaan fãa.” A Zeova sɩng n beeme, la a na n kell n paa wakat sẽn ka saab a nin-buiidã sõngr yĩnga. Rẽ yĩnga gom-kãensã pa kengd y raood sɩda?—Yɩɩl Sõamyã 90:1.