B yeela yãmb bũmb tɩ y wa bãng tɩ yaa ziri bɩ?

NED y sẽn kɩs sɩd sã n togs-y bũmb tɩ y wa bãng tɩ yaa ziri, zabda wʋsgo. Y sũur tõe n yikame, bɩ y tõe n tagsame t’a paoog-y lame, wall t’a zãmba yãmba. Pʋ-yagb sãamda zoodo, la kãadem menga. Nebã sẽn yagd ziri n belgd b taab n dɩt ligd sõor taa milyaar dãmba.

La y sã n bãng tɩ bũmb b sẽn yeel-y Wẽnnaam zug yaa ziri, y manesem na n yɩɩ wãna? Sã n mikame tɩ y tũuda y tũudmã ne y sũur fãa, na n zab-y-la wʋsgo. Ad neb yel-kãngã buud sẽn paam sẽn yeele:

● “Ne mam tagsgo, m tũudmã taoor dãmb zãmba maam.”—A DEANNE.

● “Mam sũurã puugame. B belga maam. Mam sẽn da tẽedã, la m sẽn da rat n maan bũmb ninsã fãa lebga zaalem.”—A LUIS.

Tõe n yɩɩ toog ne-y tɩ y sak n deeg tɩ bũmb b sẽn yeel-y Wẽnnaam zug yaa ziri. Tõe tɩ yaa ned y sẽn kɩs sɩd ne n togs yãmba, wala makre, y roagda, prɛtre, pastɛɛr wall y zo-nongre, tɩ y miẽ t’a pa na n sak n maan bũmb sẽn na n zab yãmb ne pʋ-toog ye. Yãmb tõe n tẽeda bũmb hal daar zãra. La rẽ yĩnga, neb wʋsg sã n tẽed bũmbu, rat n yeelame tɩ pa tõe n yɩ ziri sɩda? A Franklin D. Roosevelt sẽn da yɩ Etazĩni perzidã wã yeela woto: “Baa b sã n togs ziri n yɩlem to-to fãa, pa tõe n lebg sɩd ye.”

La y maanda wãn n bãng tɩ bũmb b sẽn yeel-y Wẽnnaam zug yaa ziri? A Zezi ra pʋʋsa Wẽnnaam n yeel-a woto: “Yãmb goamã yaa sɩda.” (Zã 17:17) Sɩd me, d sã n karem Wẽnnaam Gomdã sẽn yaa Biiblã, na n sõnga tõnd tɩ d bãng sɩdã ne ziri wã n bake.

D ges bũmb a nu b sẽn yet Wẽnnaam zugu, tɩ Biiblã wilgd tɩ yaa ziri. Y sã n bãng sɩdã yel-kãensã zugu, y na n yãa rẽ sẽn tõe n maneg y vɩɩmã to-to.