4 Namsgã la yel-kɛgã yaa Wẽnd yelle—Yaa sɩd bɩ?

Tõe tɩ y wʋma b sẽn yet tɩ: “Wẽnnaam n so dũniyã. Bũmb nins fãa sẽn maandã yaa yẽ raabo. Dẽnd nebã sẽn kis taabã, n maand taab pãngã, tɩ wẽnemã ne yel-kɛgã me pid zĩig fãa wã yaa Wẽnd yelle.”

Biiblã sẽn yete: Pa Wẽnnaam n kɩt tɩ dũniyã pid ne yel-kɛgã ye. Biiblã pʋgẽ, b yetame t’a Zeova ‘tʋʋmã zemsa zãnga,’ la t’a ‘soayã fãa yaa tɩrse.’—Tõodo 32:4.

Wẽnnaam maanda nebã fãa neere, baa neb nins sẽn pa tog ne rẽ wã. Wala makre, “bãmb kɩtdame tɩ bãmb wĩntoog zẽk nin-wẽns la nin-tɩrs yĩnga, la bãmb tʋmda saagã nin-tɩrs la nin-wẽns yĩnga.” (Matɩe 5:45) Wẽnnaam pa bak buud n nongẽ ye. Tʋʋm 10:34, 35 yetame tɩ: “Wẽnnaam ka tũusd neb ye. La buud fãa sʋka, ned ninga sẽn zoet bãmba, la sẽn maand tɩrga, yẽ soab tata bãmb yam.”

La maana wãn tɩ yel-kɛgã wa beẽ? Neb wʋsg pa maand sẽn yaa tɩrg wa Wẽnnaam ye. B yãka yam n maand yel-kɛga. (Tõodo 32:5) Sẽn paase, Biiblã wilgdame tɩ Wẽnnaam basame t’a Sʋɩtãan sẽn yaa a bɛ wã so dũniyã.a (1 Zã 5:19) La ka la bilfu, Wẽnnaam pa na n le bas tɩ dũniyã kell n pa a Sʋɩtãan nugẽ ye. A zoe n yãka bũmb ning a sẽn na n maan n “sãam Sʋɩtãanã tʋʋmã.”—1 Zã 3:8.

Sɩdã bãngr sẽn na n sõng yãmb to-to: Tõe tɩ y sokda y meng bõe yĩng tɩ maan f to pãngã, la wẽnemã ne yel-kɛgã tar paasgo. Y sã n bãng bũmb ning sẽn kɩt tɩ yaa woto wã, na n sõng-y lame tɩ y wʋm yɛlã sẽn tar kengrã võore, la y bãng bũmb ning sẽn kɩt tɩ baa ne nebã sẽn modgd n dat tɩ sa wã, pa yãkd nengã. (Yɩɩl Sõamyã 146:3) Y sẽn na n kɩs sɩd ne Wẽnnaam kãabsã, tɩ sõng-y tɩ y tall bas-yard tɩ beoog daarã na n yɩɩ neerã, n são y sẽn na n dɩk y sẽkã la y pãngã n modgd n na n maneg dũniyã yɛlã, tɩ yaool n pa na n kaoosã.—Wilgri 21:3, 4.

D sã n bãng bũmb ning sẽn kɩt tɩ yel-kɛgã beẽ wã, tõe n sõnga tõndo, sẽn yɩɩd fãa sã n wa yaa tõnd meng n tar zu-loeese. B sã n wa maan-d pãnga, tõe tɩ d tags wa wẽn-sakd a Habakuk. A yeela woto: “Tõogã kiime. Bʋʋdã ka kaood tɩrg ye.” (Habakuk 1:4) A Habakuk sẽn yeel woto wã, Wẽnnaam pa zab-a ye. A pʋd n kɩtame t’a bãng vẽeneg t’a yãka wakat n na n dems yɛlã. A sõng-a lame me t’a kell n tall sũ-noog baa ne zu-loeesã. (Habakuk 2:2-4; 3:17, 18) Yãmb me sã n kɩs sɩd tɩ Wẽnnaam na n demsa yel-kɛgã, tõe n sõng-y lame tɩ y yam gãand bãane, baa ne dũni kãngã sẽn pid ne yel-kɛgã.

[Tẽngr note]

[Goam sẽn tar pãnga, seb-neng a 7]

Yaa Wẽnnaam n kɩt tɩ namsgã la yel-kɛgã beẽ wã bɩ?

[Fotã soaadba seb-neng a 7]

© Sven Torfinn/Panos Pictures