Sogsg Biiblã sẽn leokde

Yãmb mii Wẽnnaam sõma bɩ?

Wẽnnaam yaa sɩɩga. Yẽ n naan saasã, tẽngã la bõn-vɩɩsã fãa. Pa ned n naan Wẽnnaam ye. A pa tall sɩngr ye. (Yɩɩl Sõamyã 90:2) Wẽnnaam datame tɩ nebã bao yẽ la b bãng-a sõma.—Karm-y Tʋʋm 17:24-27.

D tõe n bãnga Wẽnnaam yʋʋre. D sã n tags Wẽnnaam sẽn naan bũmb ninsã zugu, tõe n sõnga tõnd tɩ d bãng bũmb kẽer Wẽnnaam zugu. Wala makre, a nonglmã, a pãngã la a yamã. (Rom dãmba 1:20) La d sã n dat n bãng-a sõma, yaa tɩlae tɩ d karem a Gomdã sẽn yaa Biiblã. Biiblã wilgda tõnd a sẽn yaa Wẽnnaam ning buudã.—Karm-y Yɩɩl Sõamyã 103:7-10.

Yel-kɛgã sẽn be wã nooma Wẽnnaam bɩ?

A Zeova sẽn yaa d Naandã kisa kɛgre. (Tõodo 25:16) A naana ninsaal a meng wẽnego. Yaa rẽ n so tɩ neb wʋsg pa nong kɛgrã. Yel-kɛgã sẽn be zĩig fãa wã pa Wẽnnaam yell ye. Wẽnnaam naana ned fãa t’a tõe n yãk yam n maan a sẽn date. La bʋko, neb wʋsg yãka yam n maand yel-kɛga. B sãamda a Zeova sũur wʋsgo.—Karm-y Sɩngr 6:5, 6; Tõod 32:4, 5.

A Zeova nonga sẽn yaa tɩrga. A pa na n ket n sĩnd n get yel-kɛgã ye. (Yɩɩl Sõamyã 37:28, 29) Biiblã yetame tɩ ka la bilfu, Wẽnnaam na n kɩtame tɩ yel-kɛg ra le zĩnd ye.—Karm-y Ezai 26:21; 2 Pɩɛɛr 3:13.