Bõe yĩng tɩ d segd n tũ Biiblã sẽn yetã?
RẼ YĨNGA Biiblã sẽn yet kãadmã la yoobã zugã sɩd yaa bũmb sẽn pa le tõe n tũ, la sẽn weoogd ned zaalem bɩ? Ayo. Biiblã sẽn yetã pʋd n tõe n sõnga tõnd tɩ d gill yɛl wala:
▪ Sɩda wã la taoor bãase.
▪ Pʋs rɩkr sẽn pa tũ ne kãadem.
▪ Kãadem sãoongo.
▪ Sũur-kaset sẽn ningd-f taale.
▪ Yãnde, ned sẽn paam-f n maan a sẽn dat yĩnga.
Wẽnnaam a Zeovaa sẽn yaa d naandã ratame tɩ bũmb nins fãa a sẽn kõ-dã naf-do, la kõ-d sũ-noogo. A ‘zãmsda tõnd d meng sõngr yĩnga.’ (Ezai 48:17) Ned sã n tũud Biiblã sẽn yet kãadmã la yoobã wɛɛngẽ wã, na n naf-a lame.
▪ A na n paam n taa Wẽnnaam yam.
▪ A yamã na n gãee bãane.
▪ A kãadmã na n talla sũ-noogo.
▪ A na n paama yʋ-noogo.
▪ A na n nanda a menga.
La sã n mik tɩ y pa tũud Biiblã sẽn yet bũmb ning kãadmã la yoobã wɛɛngẽ wã, y tõe n tekame bɩ? La rẽ yĩnga, Wẽnnaam na n kell n sɩbg-y-la y pĩnd tʋʋmã yĩng bɩ?
Bãng-y tɩ pipi kiris-nebã kẽer da yɩɩ yoaadba, rap sẽn gãe rap la raglem dãmba. B sakame n bas rẽ fãa, la Wẽnnaam kõ-b-la sugri. (1 Korẽnt dãmba 6:9-11) Rũndã-rũndã, dũniyã gill zugu, neb tusa me sak n teka b vɩɩmã. B tõog n basa minim wẽnse, la b tũ Biiblã sẽn yet bũmb ningã, tɩ naf-ba. A Sarah d sẽn gom a yell sɩngrẽ wã me maana woto. D ges a sẽn yeele.
“Mam paama m menga”
A Sarah wa n bãngame t’a sẽn yãk yam n maand a sẽn datã, pa kõ-a sũ-noog wa a sẽn da tẽedã ye. A yeelame: “M sũurã ra ningd-m-la taal wʋsgo. Yãnd n da tar maam. Mam da yɛɛsda m na n wa rɩk pʋg bɩ n paam bãase. M da ket n miime tɩ Wẽnnaam beeme, la tɩ m sẽn maandã sãamda a sũuri. Mam da miime tɩ m tʋmda tʋʋm-dẽgdo, tɩ woto ra namsd-m wʋsgo.”
A Sarah wa n tõog n tekame. A kosa a roagdbã sẽn yaa a Zeova Kaset rãmbã, la b tigingã kãsem-dãmbã me sõngre. A yeela woto: “Mam roagdbã la kãsem-dãmbã sẽn sak n sõng-m la b wilg tɩ b nong-m lame wã yɩ-m-la noog wʋsgo. Mam paama m menga.”
A Sarah tara kamb a yiibu. A yeela woto: “Mam togsda m kambã m sẽn maan bũmb ninsã. Mam datame tɩ b bãng m sẽn pa tũ Biiblã sẽn yetã sẽn nams-m to-to. M sẽn dat yaa sõng-b tɩ b bãng tɩ Wẽnnaam noyã tũub kãadmã la yoobã wɛɛngẽ wã sõngdame tɩ d gill bãase, sũ-sãams la zu-loees a taaba. M kɩsa sɩd tɩ Wẽnnaam sẽn kõt tõnd noyã yaa a sẽn pa rat tɩ d namsã yĩnga.”
Yãmb me sã n tũ Wẽnnaam noyã, na n naf-y lame. Biiblã yeta woto: “Zusoabã noor yaa tɩrga, a kõta sũ-noogo. Zusoabã tõog bʋʋd yaa sõma zãnga, a yaa wa vẽenem nin yĩnga. . . . Bãmb sakr tara yõod wʋsgo.”—Yɩɩl Sõamyã 19:9, 12.b
[Tẽngr not rãmbã]
a Zeova wã yaa Wẽnnaam yʋ-peell sẽn be Biiblã pʋgẽ.
b Y sã n dat n bãng Biiblã sagls a taab sẽn nafd tõndo, bɩ y yã a Zeova Kaset rãmbã. Y tõeeme me n ges seb-neng a 4 zĩigẽ, n yãk b adɛrs a ye n gʋls-ba, wall y tɩ ges www.watchtower.org sẽn yaa d sit wɛɛbã pʋgẽ.
[Goam sẽn tar pãnga, seb-neng a 8]
Ned sã n pa tũ Biiblã sẽn yetã, nong n wata ne sũ-sãamse
[Goam sẽn tar pãnga, seb-neng a 9]
Neb nins sẽn tũud Biiblã sẽn yetã yam gãee bãane, tɩ b kãadmã me tar sũ-noogo