Sõma la wẽngã: Y segd n yãka yam rẽ wɛɛngẽ
D sẽn yãkd yam n tũud sagls ninsã tõe n naf-d lame wall wã-do. A Zeova mii rẽ. Yaa rẽ yĩng la a sẽn dat tɩ d tũ a noyã.
A Zeova ratame tɩ d paam laafɩ la sũ-noogo.
“Mam yaa a Zeova, fo Wẽnnaamã, soab ning sẽn zãmsd foom f meng nafr yĩnga, la soab ning sẽn wilgd foo sore, sor ning zug fo sẽn segd n kẽnã. Fo sã n da tũudẽ mam noyã, fo bãanã ra na n yɩẽ-la wa kʋɩlg koom, la fo tɩrlmã ra na n yɩɩ wa mogrã ko-pɛma.”—Ezayi 48:17, 18.
Wẽnnaam sẽn yaa d Naandã yĩnga, a mii d sẽn segd n vɩɩmd to-to tɩ naf tõnd n yɩɩda. A ratame tɩ d tũ a saglsã, bala yaa tõnd nafr yĩnga. D tõe n muma d nin n tũ Wẽnnaam saglsã, n pa maan sãmbs sã n na n naf-d lame ye. D sã n tũud Wẽnnaam saglsã d sã n wa na n yãk yam fãa, yɩta sõma. Na n kɩtame tɩ d yam gãe bãane, la kõ-d sũ-noogo.
A Zeova pa yet tɩ d maan bũmb sẽn yɩɩd d pãng ye.
“No-kãngã mam sẽn taasd yãmb rũndã wã pa toog wʋsg ne-yã, bɩ n yɩɩd yãmb nug ye.”—Tõodo 30:11.
Sẽn na yɩl n tũ Wẽnnaam noyã, tõe n yɩɩ tɩlɛ tɩ d toeem d tagsa wã la d tʋʋm-tʋmdɩ wã. La a Zeova sẽn dat tɩ d maan bũmb ninsã pa yɩɩd d pãng ye. Sɩd me, a sẽn yaa d Naandã a mii tõnd sẽn tõe. D sã n bãng a Zeova, d na n yãame t’a “noyã sakr . . . pa toog ye.”—1 Zã 5:3.
A Zeova yeelame t’a na n sõnga neb nins sẽn tũud a noyã.
“Maam a Zeova sẽn yaa fo Wẽnnaamã gãta fo nug-rɩtgo, la m yet foom yaa: ‘Da zoe rabeem ye. Mam na n sõnga foom.’”—Ezayi 41:13.
D tõe n tũu Wẽnnaam noyã. Bala a na n sõnga tõndo. A tõe n tũnuga ne Biiblã sẽn yaa a Gomdã n sõng-do. Biiblã goamã kengda d raoodo, la kɩt tɩ d tẽed manegre.
Dũniyã gill zugu, neb wʋsg mikame tɩ b sẽn tũud Biiblã noyã kɩtame tɩ b vɩɩmã tar barka. Y tõe n bao n bãnga Biiblã saglsã sẽn yaa sõma wã n paase. Sẽn na yɩl n sɩnge, y tõe n karma Vɩɩmd-y wakat sẽn kõn sa! borsiirã sẽn tik Biiblã zugã. Y tõe n paam-a-la jw.org pʋgẽ n telesarz zaalem. Ad a gom-zut kẽere:
Wãn to la Biiblã tõe n sõng-yã?
Biiblã goamã kɩtdame tɩ d tẽed manegre
D tõe n tẽe Biiblã goamã bɩ?
Y sã n zãms Biiblã sẽn yaa Wẽnnaam Gomdã y na n bãngame t’a ket n tara yõod rũndã-rũndã. Y na n yãame tɩ d ‘tõe n teeg-a-la wakat fãa. Masã, la wakat fãa yĩnga.’ (Yɩɩn-sõamyã 111:8) Yaa d sã n tũud Biiblã sẽn yet sõma la wẽngã wɛɛngẽ wã la d vɩɩmã yɩt sõma n yɩɩda. La Wẽnnaam pa na n modg-d tɩ d maan dẽ ye. (Tõodo 30:19, 20; Zozuwe 24:15) Yaa tõnd ned kam fãa n segd n yãk yam.