Sõma la wẽngã: D tõe n kɩsa sɩd ne Biiblã sẽn yet rẽ wɛɛngẽ wã

D sã n tikd tõnd mengã wall neb a taabã tagsg bal n yãkd yam sõma la wẽngã wɛɛngẽ, d pa tõe n kɩs sɩd tɩ na n baasa neer ye. Biiblã wilgda bũmb ning sẽn kɩt tɩ yaa woto wã. La pa rẽ bal ye. A tara sagls sõma la wẽngã wɛɛngẽ d sẽn tõe n bas d yam ne. Sagl-kãens tõe n sõng-d lame tɩ d vɩɩmã tall barka.

D RATA SAGLS SẼN YIT WẼNNAAM NENGẼ

Biiblã pʋgẽ, Wẽnnaam a Zeovaa wilgame t’a pa naan ninsaal t’a tõe n wilg a meng sor ye. A naan-a lame t’a segd n baood sagls yẽ nengẽ. (Zeremi 10:23) Rẽ n so t’a kõ tõnd sagls sõma la wẽngã wɛɛngẽ tɩ be Biiblã pʋgẽ. A nonga ninsaalbã, n pa rat tɩ d yãk yam sẽn pa sõma tɩ wã-do, la kɩt tɩ d vɩɩmã yɩ toog ye. (Tõodo 5:29; 1 Zã 4:8) Sẽn paase, a sẽn yaa d Naandã yĩnga, a tara yam la bãngr sẽn sek a na kõ-d sagls sẽn yaa sõma n yɩɩda. (Yɩɩn-sõamyã 100:3; 104:24) Baa ne rẽ, Wẽnnaam zɩ n modg ned t’a tũ a noyã ye.

A Zeova kõo d yaab a Ãdem ne a Awa bũmb nins fãa sẽn yaa tɩlɛ sẽn na yɩl tɩ b paam sũ-noog hakɩɩka. (Sɩngre 1:28, 29; 2:8, 15) Sẽn paase, a kõ-b-la noy tũub sẽn pa toogo, n da rat tɩ b tũ rẽ. La a bas-b lame tɩ b yãk b sã n na n tũu noy-kãense. (Sɩngre 2:9, 16, 17) Zu-bʋko, a Ãdem ne a Awa yãka yam n bas Wẽnnaam noyã, n na n tũ bãmb mensã raabo. (Sɩngre 3:6) Rẽ baasa wãna? Ninsaalbã sẽn yãk yam n na n maand b sẽn tagsd tɩ yaa sõma ne-bã kɩtame tɩ b vɩɩmã noomẽ bɩ? Ayo. Hal pĩnd n tãag masã, ninsaalbã yɛlã sẽn yaa to-to wã wilgdame tɩ Wẽnnaam noyã kɩɩsg pa wat ne bãan la sũ-noog hakɩɩk ye.—Koɛɛg soaba 8:9.

Baa d sẽn vɩ zĩig ning wall d buudã sẽn yaa a soaba, Biiblã sagls tõe n sõng-d lame tɩ d bãngd n yãkd yam sõma la wẽngã wɛɛngẽ. (2 Tɩmote 3:16, 17; ges-y zĩ-gũbrã: “Sebr nebã fãa yĩnga.”) D ges Biiblã sagls sẽn tõe n sõng-d to-to.

Bao-y n bãng-y bũmb ning sẽn kɩt tɩ b boond Biiblã tɩ “Wẽnnaam gomdã.”—1 Tesalonik rãmbã 2:13. Kẽ-y jw.org n ges video ning gom-zug sẽn yaa: Ãnd n so Biiblã?

BÕE YĨNG TƖ NEB KẼER TAGSDẼ TƖ BIIBLÃ PA TÕE N NAF-BA?

Neb kẽer yetame tɩ Biiblã pa tõe n kõ-b sagls sẽn yaa sõma ye. Ad bũmb kẽer b sẽn yete:

Neb kẽer sẽn yete: “Biiblã goamã kɩɩsda taaba.”

Sɩdã: Tõe n wõnda Biiblã goam kẽer kɩɩsda taaba. La y sã n bao n bãng yɛlã sẽn da yaa to-to wakat ning b sẽn gʋls-bã, wakat kãng nebã minimdã, la b gʋlsdbã sẽn get yɛlã to-to wã, y bãngdame tɩ pa kɩɩsd taab ye.

Y sã n dat n bãng makr a wãn sẽn wilgd rẽ bɩ y kẽ jw.org n karem sõsg ning gom-zug sẽn yaa: “Y a-t-il des contradictions dans la Bible ?”

Neb kẽer sẽn yete: “Neb wʋsg sẽn yet tɩ b tũuda Biiblã noyã tʋmda tʋʋm-wẽnse. Wilgdame t’a pa kõt sagl-sõma ye.”

Sɩdã: Neb kẽer sẽn yet tɩ b tũuda Biiblã noy n yaool n tʋmd tʋʋm-dẽgdã pa Biiblã yell ye. Biiblã pĩnd n togsame tɩ neb wʋsg na n yetame tɩ b tũuda a noyã, n yaool n maand bũmb kẽer a sẽn gɩdge, la tɩ baa tũudum taoor dãmb n na n maand woto. B yeelame me tɩ rẽ na n kɩtame tɩ “nebã gom sɩdã sorã wẽnga.”—2 Pɩyɛɛr 2:1, 2.

Y sã n dat n bãng bũmb ning sẽn kɩt tɩ d tõe n yeel tɩ tũudmã taoor dãmb wʋsg kɩɩsda Biiblã sẽn yetã, bɩ y kẽ jw.org n karem sõsg ning gom-zug sẽn yaa: “La religion n’est-elle qu’une entreprise commerciale de plus ?”

Neb kẽer sẽn yete: “Neb wʋsg sẽn yet tɩ b tũuda Biiblã noyã kisa neb nins sẽn pa maand wa bãmbã.”

Sɩdã: Biiblã sagend-d lame tɩ d waoogd d taabã. A pa sagend tõnd . . .

tɩ d tagsdẽ tɩ d yɩɩda neb a taabã ye. —Filip rãmbã 2:3.
tɩ d paoogd neb nins sẽn pa tũud noy nins tõnd sẽn tũudã wall tẽeb sẽn yaa toor ne tõndã ye.—1 Pɩyɛɛr 2:17.
tɩ d modg neb a taabã tɩ b toeem tɩ zems tõnd sẽn datã ye.—Matiye 10:14.

Biiblã wilgdame tɩ Wẽnnaam manesem sẽn yaa a soab ne ninsaalbã wilgda wakat fãa t’a yaa sõmblem soab la tɩrlem soaba, la t’a ratame tɩ d rɩkd a togs-n-taare.—Rom dãmbã 9:14.

Y sã n dat vẽenem n paase, bɩ y kẽ jw.org n karem sõsg ning gom-zug sẽn yaa: “La tolérance : Quelle aide la Bible peut-elle apporter ?”

BIIBLÃ WILGDA TÕND WẼNNAAM SẼN DAT TƖ D MAANE

Biiblã wilgda Wẽnnaam manesem sẽn yaa a soab ne ninsaalbã hal pĩnd n tãag masã. Biiblã sẽn yet bũmb ningã sõngd-d lame tɩ d bãng Wẽnnaam sẽn get tɩ yaa sõma n nafd neda, la sẽn yaa wẽng n tõe n wã neda. (Yɩɩn-sõamyã 19:7, 11) Bũmb nins d sẽn bãngd a pʋgẽ wã yaa sɩda, n tõe n sõng-d wakat fãa tɩ d bãngd n yãkd yam sõma la wẽngã wɛɛngẽ.

Wala makre, ges-y saglg ning sẽn be Yel-bũn 13:20 pʋgẽ wã. Be b yetame yaa: “Sẽn kẽnd-a ne yam dãmb na n lebga yam soaba, la sẽn tũud-a yalemb na n paama zu-loeese.” Hal pĩnd wẽndẽ n tãag masã, gom-kãensã yaa sɩda. Biiblã pida ne goam a woto sẽn yaa sõma la sẽn nafde.—Ges-y zĩ-gũbr ning gom-zug sẽn yaa: “Biiblã saglsã yaa wakat buud fãa yĩnga.”

La y tõe n soka y meng yaa: ‘Bõe n wilgd tɩ Biiblã saglsã tõe n nafa maam?’ Sõsg ning sẽn pʋgdã pʋgẽ, d na n goma neb sẽn tũ Biiblã sagls tɩ naf-b yelle.

a Zeova wã yaa Wẽnnaam yʋ-peellã.—Yɩɩn-sõamyã 83:18.

BIIBLÃ SAGLSÃ YAA WAKAT BUUD FÃA YĨNGA

Baa b sẽn gʋls Biiblã n sa na maan yʋʋm tus a yiib rũndã wã, a saglsã ket n tara yõodo. Ninsaal halhaalã pa toeem ye. Nebã fãa ket n baooda sũ-noogo, la vɩɩm sẽn yaa sõma. (Koɛɛg soaba 1:9) Biiblã saglsã sẽn tar yõod wakat buud fãa wã tõe n sõng-d lame tɩ d paam rẽ.

Pʋ-peelem

“D sẽn dat n zã d mens ne pʋ-peelem bũmb fãa pʋgẽ wã yĩnga.”—Ebre-rãmbã 13:18.
“Bɩ sẽn da zuud-a ra le zu, la bɩ a wɩsg a meng n tʋme.”—Efɛɛz rãmbã 4:28.

Zems-n-taare

“Bɩ ned baa a ye ra baood a meng nafr ye. La bɩ a baood a taabã nafre.”—1 Korẽnt rãmbã 10:24.
“Bɩ y maand sũ-mar ne taaba, la y sakd n kõt taab sugri.”—Kolos rãmbã 3:13.

D sẽn tõe n bãngd n yãkd yam to-to

“Ned sẽn pa tar minim tẽeda gomd buud fãa, la gũus-m-meng soab tagsda a sẽn na n maan bũmb ningã zug neere.”—Yel-bũnã 14:15.
“Gũus-m-meng soab yãta yell n solge, la sẽn pa tar-b minimã kelld n kẽngame, n bao yell n kõ b mense.”—Yel-bũnã 22:3