Bõe n tõe n sɩd sõng-y tɩ y wa paam tɩ y beoog yɩ neere?

Wa d sẽn yã sõsg ning sẽn loogã pʋgẽ wã, neb wʋsg teega zu-noogã, karengã, arzɛkã, la b modgd n yaa nin-sõngo, n tẽed tɩ rẽ n na n kɩt tɩ b beoog yɩ neere. Ned sã n teeg bõn-kãensã n dat n paam t’a beoog yɩ neere, yaa wa a sẽn dat n kẽng zĩig a sẽn ka mi, n yaool n zãad kart sẽn pa wilgd so-sõngã ye. Woto rat n yeelame tɩ bũmb kae n tõe n sõng-d tɩ d bãng d sẽn tõe n maan n paam tɩ d beoog yɩ neer bɩ? Ayo, bũmb beeme.

BÕE N TÕE N SÕNG-D N TƖ YƖƖDA

Naoor wʋsgo, d sã n wa rat n yãk yam n maan bũmbu, d baooda sagls ned yam la a yʋʋm sẽn yɩɩd tõnd nengẽ. Woto me, d tõe n paama sagls sẽn na n sõng-d tɩ d beoog yɩ neere, soab ning yam la a yʋʋm sẽn yɩɩd tõnd hal zĩig sẽn zãrã nengẽ. A saglsã bee sebr a sẽn kɩt tɩ b gʋls na maan yʋʋm 3500 woto pʋgẽ. B boonda seb-kãng tɩ Biiblã.

Bõe yĩng tɩ y tõe n tẽ Biiblã sẽn yetã? Bala yaa soab ning yʋʋm la a yam sẽn yɩɩd tõnd hal zĩig sẽn zãrã n kɩt tɩ b gʋls-a. B boond-a lame tɩ “wakat fãa naaba,” la soab ning “sẽn be wakat sẽn ka sɩngr tɩ ta wakat sẽn ka sɛɛbo.” (Dãniyɛll 7:9; Yɩɩn-sõamyã 90:2, Wẽnnaam Sebre, 1983) Yẽ la “saasã naandã,” la “dũniyã naanda.” (Ezayi 45:18) A yeelame t’a yʋʋrã meng yaa a Zeova.—Yɩɩn-sõamyã 83:18, MN.

Biiblã pa wilgd tɩ buud n be n yɩɩd a to ye. Bala yaa sẽn naan-a ninsaalbã fãa wã n kɩt tɩ b gʋls Biiblã. A saglsã nafda wakat fãa, la sõngd ned buud fãa. A bee ne buud-goam wʋsg n yɩɩd sebr buud fãa. Sebr a to me kae, tɩ b yiis-a wʋsg n ta Biiblã ye.a Woto rat n yeelame tɩ ned buud fãa tõe n paam-a lame n karme, tɩ sõng-a. Ad Biiblã meng sẽn yete, tɩ wilgd rẽ:

“Wẽnnaam pa tũusd neda, la tɩ buud fãa pʋgẽ, ned ning sẽn zoet bãmb la a maand sẽn yaa tɩrg tata bãmb yam.”—TƲƲMA 10:34, 35.

Wa roagd sẽn nong a kamb sẽn sagend-bã, Wẽnnaam a Zeova sẽn yaa d Ba sẽn nong-dã me tũnugda ne Biiblã sẽn yaa a Gomdã n sagend tõndo. (2 Tɩmote 3:16) Y tõe n kɩsa a Gomdã sɩda. Bala Wẽnnaam n naan tõndo, n mi bũmb ning sẽn tõe n kõ-d sũ-noogo.

D TÕE N TẼE BIIBLÃ SẼN YETÃ

D tõe n kɩsa sɩd tɩ Biiblã tõe n sõng-d lame tɩ d wa paam tɩ d beoog yɩ neere. Bala na maan yʋʋm 2000 woto, a pĩnd n togsa yɛl sẽn na n zĩndi, la nebã yel-manesem sẽn na n yɩ to-to, tɩ d ne rẽ vẽeneg rũndã-rũndã.

YƐL SẼN NA N ZĨNDI

“Buud na n yika zabr ne buud a to, tɩ rĩung me yik zabr ne rĩung a to. Tẽn-digimd-kãsems na n zĩndame, tɩ kom la bã-longds me zĩnd zĩig-zĩiga.”—LUK 21:10, 11.

NEBÃ YEL-MANESEM SẼN NA N YƖ TO-TO

“Yaoolem wakatã, yɛlã na n yɩɩ kãn-kãe hal tɩ vɩɩmã lebg toogo. Bala nebã na n yɩɩ beed dãmba, neb sẽn nong ligdi, wuk-m-mens rãmba, waoog-m-mens rãmba, neb sẽn nong tʋya, ba-rãmb la ma-rãmb kɩɩsdba, sõm-zɩtba, neb sẽn pa maand sɩda, neb sẽn pa tar nonglem, neb sẽn pa baood laafɩ, ten-kãn-neba, neb sẽn pa tar yõk-m-menga, nen-kɛglem dãmba, neb sẽn kis sẽn sõmbe, zãmb dãmba, tʋb-pa-wʋmdba, neb sẽn pid ne wuk-m-menga, neb sẽn nong yõ-noogr n pa nong Wẽnnaam ye.”—2 TƖMOTE 3:1-4.

Y sẽn ne tɩ Biiblã sẽn pĩnd n togs bũmb nins hal daar zãrã sɩd pidsda rũndã-rũndã wã, y na n yeelame tɩ bõe? Sãmbg kae tɩ y na n sak n deegame t’a Leyung sẽn yit Hõng Kõng sẽn yeel bũmb ningã yaa sɩda. Ad a sẽn yeelã: “Biiblã bãngr-gomã gʋlsa hal daar zãra. Ninsaal kae n tõe n pĩnd n togs gom-kãens tɩ sɩd wa pids kɛpɩ ye. Dẽnd soab ning sẽn vẽneg neb tɩ b gʋls Biiblã yʋʋm la a yam yɩɩda ninsaal hal zĩig sẽn zãre.”

Sɩd me, bũmb wʋsg la Biiblã pĩnd n togse, tɩ sɩd pidsi.b Rẽ wilgdame tɩ Biiblã sɩd yaa Wẽnnaam Gomde. Ad a Zeova mengã sẽn yeele: “Mam yaa Wẽnnaam la mam ka tar mak-n-taag ye. Hal sɩngrẽ, mam dengd n togsa bũmb ning sẽn na n wa zĩndã.” (Ezayi 46:9, 10) Dẽnd y tara bʋʋm sẽn seke, n na n tẽ Biiblã sẽn yet bũmb ning d beoogã sẽn tõe n yɩ to-to wã wɛɛngẽ.

BIIBLÃ TÕE N SÕNG-Y-LA MASÃ MENGA, LA WAKAT FÃA YĨNGA

Y sã n tũud sagls nins sẽn be Wẽnnaam Gomdã pʋgẽ wã, nafd-y lame. Ad sagls a wãna:

TƲƲMÃ LA LIGDÃ WƐƐNGẼ

“Nug-pʋg pʋgẽ vʋʋsg n são nug pʋs a yiib pʋgẽ tʋʋmd sẽn wẽnd f sẽn digd sebgo.”—KOƐƐG SOABA 4:6.

ZAKÃ PƲGẼ VƖƖM

“Ned kam fãa segd n nonga a pag wa a sẽn nong a meng to-to wã. La pagã me segd n waoogda a sɩdã ne a sũur fãa.”—EFƐƐZ RÃMBÃ 5:33.

ZEMS-N-TAARÃ WƐƐNGẼ

“Zãgs sũ-yikri, la f bas sũ-puugri. Sik f sũuri, t’a ra wa kɩt tɩ f maan sẽn yaa wẽng ye.”—YƖƖN-SÕAMYÃ 37:8.

Y sã n tũud Biiblã sẽn yetã, na n naf-y-la masã menga, la sõng-y tɩ y wa paam tɩ y beoog yɩ neere. Wẽnnaam pʋlma Biiblã pʋgẽ tɩ d na n wa paama bark buud toor-toore. Wala makre,

LAAFƖ LA BÃANE

“B na n paama vɩ-bãane, ne sũ-noog meng-menga.”—YƖƖN-SÕAMYÃ 37:11.

ZAKA, LA RƖƖBO

“Bãmb na n mee rot n zĩnd b pʋse. B na n sela tɩɩs n dɩ b biisi.”—EZAYI 65:21.

BÃAS LA KŨUM PA NA N LE ZĨND YE

“Kũum pa na n le zĩndi, sũ-sãanga, yãbr wall toog pa na n le zĩnd ye.”—VẼNEGRE 21:4.

Bõe la y segd n maane, n wa paam bark-kãensã? Bɩ y karem sõsg ning sẽn pʋgdã.

a Y sã n dat n paam kibay a taab n paas Biiblã lebgrã la a sõorã wɛɛngẽ, bɩ y kẽ www.jw.org n kilik BIIBLÃ SẼN YETE > KƲDEMDÃ NE BIIBLÃ.

b Y sã n dat kibay a taab n paas bɩ y ges La Bible: Parole de Dieu ou des hommes? sebrã a Zeova Kaset rãmbã sẽn yiisã. A bee tõnd sɩt wɛɛbã sẽn yaa www.jw.org pʋgẽ. Kẽ-y BIBLIOTHÈQUE > LIVRES & BROCHURES.