Bõn-kãensa fãa võor yaa bõe?

A ZEZI KIRIST yeelame tɩ yaa zabã, komã, bã-longdsã la tẽn-digimdgã n na n kɩt tɩ b bãng ‘dũniyã sɛɛb wakate.’—Matɩe 24:1-8; Luk 21:10, 11.

Yʋʋmd 1914 tɛka, tẽnsã ne taab la buud toɛy-toɛyã ne taab zabã sãama vɩɩmã. Naoor wʋsgo, bũmb ning sẽn wat ne rẽ wã yaa tũudmã taoor dãmb sẽn kẽes b toog politikã pʋgẽ wã, n paas terorismã sẽn piuug rũndã-rũndã wã.

Baa ne koodã sẽn paas wʋsgã, kom bɛɛg n ket n namsd neb milyõ kobs dũniyã gill zugu. Yʋʋmd fãa, koma kʋʋda neb milyõ rãmba.

Bã-longdsã me bee bãnd ning a Zezi sẽn kõ wã pʋgẽ. Dũni gill pipi zabrã poore, fõosrã sẽn yaa bã-loangdgã kʋʋ sẽn yɩɩd neb milyõ 21. Pĩnda, yaa zĩis kẽer bal la bã-longdsã ra be. La bã-kãngã taa tẽns wʋsg dũniyã gill zugu la ko-sʋk tẽnse. SƖDA wã yelgda dũniyã gill zug masã, la bãas wala kõs-kʋdgã, weoogã, kʋɩlg noor zondã la kũnungkũngã ket n yõkda nebã tẽns nins sẽn pa tar ligd wʋsga pʋsẽ.

Kɩbayã wilgdame tɩ tẽn-digimds sẽn yaa bɛd la bãaneg tus pi-gĩn n maand yʋʋmd fãa. Baa tʋʋm teed sã n beeme n tõe n deng n wilg tẽn-digimdsã la b pãngã sẽn na n yɩ to-to, tẽn-digimdsã sẽn wat ne yel-beed zĩis nins nin-buiidã sẽn yaẽ wʋsgã kɩtame tɩ b gomd rẽ yell kɩbayẽ wã wakat fãa.

Biiblã reng n togsa woto me: “Bãng tɩ yaoolem wakate tood na n zĩndame. Tɩ bõe, neba na n yɩɩ beed dãmba, ligd noangdba, wilg-m-mens rãmba, tɩtaam dãmba, Wẽnnaam tʋʋsdba, ba rãmba la ma rãmb kɩɩsdba, zɩ-beoog rãmba, nin-zaalse, neb sẽn ka tar nimbãan-zoeere la sũ-to-neba, tẽnkãn-neba, neb sẽn ka tar yõk-m-menga, pʋto-rãmba, nin-sõamyã kisgdba, zãmb dãmba, neb sẽn ka gũusda, la wuk-m-mens rãmba sẽn nong dũniyã sũ-noog n yɩɩd Wẽnnaam. Bãmb wẽnda wa b sẽn sakd Wẽnnaam, la b yaool n kɩɩsda bãmb pãnga. Lak ne bãmb dãmba.”—2 Tɩmote 3:1-5.

Y pa sak n deeg tɩ d vɩɩ ‘wakat sẽn yaa toog’ sɩda?

Yãmb pa yã tɩ nebã nonga b mensã la ligdã, la b yaa tɩtaam dãmb tɩ loog sɩda?

Ãnd n na n kɩɩs tɩ dũniyã pa pid ne neb sẽn yaa rat-m-yembr dãmba, zɩ-beoog rãmba, neb sẽn pa zemsd taaba, la neb sẽn pa sɩd rãmba?

Yãmb miime tɩ pa zĩis a wãn pʋsẽ bal la roagdbã kɩɩsg ne nonglmã kaalem paas wʋsgo, la tɩ yaa dũniyã gill zug bɩ?

Sãmbg sẽn ka be, y neeme tɩ yõ-noogrã yamleoog kẽe dũni kãngã wʋsgo, t’a nebã pa nong sẽn yaa neer ye.

Yaa woto la Biiblã bilgd manesem nins sẽn na n zĩnd ‘yaoolem wakatã.’

D rata kaset sẽn yɩɩd woto sẽn na n kɩt tɩ d bãng wakat ning d sẽn vɩyã bɩ? A Zezi leb n deng n togsame tɩ wakat kãng pʋgẽ me, Wẽnnaam Rĩungã koe-noog na n moona tẽngã gill zugu. (Matɩe 24:14) Yaa woto n maand bɩ?

Gũusg Gasgã sẽn yaa zʋrnall b sẽn tik Biiblã zug n gʋlsã moonda a Zeova Rĩungã koe-noogo. B sẽn yiisd-a buud-goam sõor nins pʋsẽ wakat fãa wã yɩɩda zʋrnall buud fãa.

Yʋʋmd fãa, a Zeova Kaset rãmbã rɩkda sẽn yɩɩd lɛɛr dãmb milyaar n kõt neb a taabã kasetã Wẽnnaam Rĩungã wɛɛngẽ.

B yiisda sɛb sẽn wilgd Biiblã võore, sẽn zems buud-goam 400 pʋsẽ, baa buud-goam neb sõor bilf sẽn be zĩ-zãrsẽ sẽn karemde. A Zeova Kaset rãmbã moona koe-noogã tẽnsã fãa pʋsẽ. Sẽn paase b moona ko-sʋk tẽns la zĩis a taab pãn-soaadbã sẽn get tɩ yaa kɩds wʋsgã. Tẽns wʋsg pʋsẽ, b sigla Biibl zãmsg sẽn pa vaand bãmb mens la neb a taabã yĩnga.

Sɩda, b moonda Wẽnnaam Rĩungã dũniyã gill zugu, pa sẽn na yɩl n tuub dũniyã gill ye, la yaa sẽn na yɩl n kõ kaseto. Zĩig fãa, nebã paamda sor n na n wilg b sã n dat n bãnga sẽn naan-a saasã la tẽngã, la b sã n na n tũu a noyã la b wilg tɩ b nonga b taabã.—Luk 10:25-27; Wilgri 4:11.

Ka la bilfu, Wẽnnaam Rĩungã na n yɩlga tẽngã n yiis nin-wẽnsã fãa la a kɩt tɩ tẽngã gill lebg arzãna.—Luk 23:43, Sebr Sõngo.

[Zĩ-gũbri, seb-​neng a 6]

Bõe yaoolem daya?

Pa ãdem-biisã yaoolem day ye. Biiblã yetame tɩ neb nins sẽn maand Wẽnnaam daabã na n paama vɩɩm sẽn pa sate.—Zã 3:16, 36; 1 Zã 2:17.

Pa tẽngã yaoolem day ye. Wẽnnaam Gomdã yetame tɩ tẽngã na n paa wakat sẽn pa sate.—Yɩɩl Sõamyã 37:29; 104:5; Ezai 45:18.

La yaa zãmaan-wẽng kãngã sẽn pid ne nen-kɛglem, n pa tar nonglmã, la neb nins sẽn tũud a soayã yaoolem daya.—Yelbũna 2:21, 22.

[Zĩ-gũbri/Foto, seb-​neng a 7]

Biiblã sɩd yaa Wẽnnaam Gomd bɩ?

Biiblã no-rɛɛsdb togsa woto n yɩlem: “Ad a Zeova sẽn yeele.” (Ezai 43:14, NW; Zeremi 2:2, NW ) A Zezi mengã sẽn yaa Wẽnnaam Biriblã wilga vẽeneg tɩ ‘yẽ ka gomd ne a meng pãng ye.’ (Zã 14:10) Biiblã meng yeta woto vẽenega: “Gʋlsg Sõamyã zãng yaa Wẽnnaam n kõ tõndo.”—2 Tɩmote 3:16.

Sebr a to ka be b sẽn yiis buud-goam wʋsg pʋgẽ wa Biiblã ye. Biiblã lebgr sosiete a yembr (l’Alliance biblique universelle) wilgame tɩ b yiis-a-la ne sẽn yɩɩd buud goam 2 200. Sebr a to ka be b sẽn pʋɩ t’a sõorã yɩɩd milyaar a naas masã wa Biiblã ye. Pa woto la y gũud ne koɛɛg sẽn yit Wẽnnaam nengẽ ãdem-biisã fãa yĩng sɩda?

Sẽn na yɩl n yã b sẽn wilg n fasem tɩ Biiblã yita Wẽnnaam nengẽ, bɩ y ges sebr ning sẽn yaa La Bible : Parole de Dieu ou des hommes ? a Zeova Kaset rãmbã sẽn yiisã.

Y sã n karem Biiblã la y sak n deeg t’a sɩd yaa Wẽnnaam Gomde, na n naf-y-la wʋsgo.

[Zĩ-gũbri/Foto rãmba, seb-​neng a 8]

Wẽnnaam Rĩungã yaa bõe?

Yaa guvɛrnema sẽn be saasẽ sẽn dɩt naam sɩd Wẽnnaam a Zeova sẽn yaa saasã la tẽngã Naandã yʋʋr yĩngã.—Zeremi 10:10, 12.

Biiblã wilgdame tɩ ya a Zezi Kirist la Wẽnnaam kõ sor t’a rɩ naamã. (Wilgri 11:15) A Zezi sẽn da wa n be tẽng zugu, a ra zoe n wilgame t’a paama tõog wʋsg sẽn yit Wẽnnaam nengẽ. Tõog kãng sõng-a lame t’a tall pãn-tõog sebgã la mogrã zugu, t’a sãoog bãas buud toor-toore, la a vʋʋg kũum menga. (Matɩe 9:2-8; Mark 4:37-41; Zã 11:11-44) Biiblã bãngr-goam reng n togsame me tɩ Wẽnnaam na n wa kõ-a-la “soolem ne waoogre la naam, tɩ tẽnsa fãa neb sẽn yaa soolem toɛy-toɛya n gomd goam toor-toora sak-a.” (Daniɛll 7:13, 14) B boonda guvɛrnema kãng tɩ saasẽ Rĩungu. A Zezi Kirist bee saasẽ masã n dɩt a naamã.

[Foto rãmba, seb-​neng a 7]

Koe-noogã mooneg dũniyã gill zugu