Koe-noog ning b sẽn dat tɩ yãmb wʋma
A ZEZI sẽn da wa n be tẽng zugã, a karen-biisã wa n sʋk-a lame: “Bõe n na n yɩ fo belmã la zãmaanã yɛl baasg bãnde?” A leokame n yeel tɩ tẽn-tẽns wʋsg ne taab zaba, kom, bã-longdse, tẽn-digimdgu, tõogã kɩɩsg paasgo, ziri karen-saam dãmbã sẽn na n tudg neb wʋsgã, b sẽn na n kisg la b nams a karen-biis hakɩkã, la neb wʋsg nonglem ne tɩrlmã sẽn na n maagã n da na n wa. Bõn-kãensã sã n sɩng waoongo, wilgdame tɩ Kirist beeme tɩ ninsaal nif ra pa tõe n yã-a, la tɩ yĩngr Rĩungã kolgame. Woto ra na n yɩɩ koe-noog tɛkẽ! Sẽn paase, a Zezi rɩka gom-kãensã n tɩ naag bãndã: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Matɩe 24:3, NW, 4-14.
Yɛl nins sẽn zĩnd sẽn pa kaoosã yɩɩ wẽnse, la rẽ sẽn wilgd tɩ yaa Kirist belmã yaa koe-noogo. Yɛl nins yell b sẽn gom yĩngrã sɩng n yaa vẽenes yʋʋmd 1914, sẽn yɩ yʋʋmd ning b sẽn da reng n moon zĩis wʋsgã! Yʋʋm kãng yɩɩ bu-zẽmsã wakat saabo, la toeeng sɩngre, ninsaalbã naam sẽn na n sa tɩ Kirist yʋʋm tusr Naama wa reeg a zĩiga.
Yɩɩl Sõamyã 110 soaba, verse a 1 la a 2, la Wilgri 12:7-12 wilgdame tɩ toeeng n da na n zĩndi. Be b wilgame tɩ Kirist ra na n zĩnda Wẽnnaam dɩtg saasẽ hal tɩ ta wakat ning a sẽn na n lebg Rĩma. Rẽ poore, zabr n da segd n yik saasẽ tɩ b rig a Sʋɩtãan n sik tẽng zugu, tɩ rẽ wa ne toog n kõ tẽng zug rãmbã, la Kirist ra na n dɩɩ naam a bɛɛbã sʋka. “Toog kãseng” sẽn na n wa tall n ta Armagedõ n na n kɩt tɩ wẽnemã sa zãnga. Rẽ poore, yaa Kirist Yʋʋm Tusr Naamã sẽn na n wa ne laafɩ wã n na n sɩnge.—Matɩe 24:21, 33, 34; Wilgri 16:14-16.
Biiblã yeta woto: “Bɩ f bãng tɩ yaoolem wakate tood na n zĩndame. Tɩ bõe, neba na n yɩɩ beed dãmba, ligd noangdba, wilg-m-mens rãmba, tɩtaam dãmba, Wẽnnaam tʋʋsdba, ba rãmba la ma rãmb kɩɩsdba, zɩ-beoog rãmba, nin-zaalse, neb sẽn ka tar nimbãan-zoeere la sũto neba, tẽng-kãn neba, neb sẽn ka tar yõk-m-menga, pʋto rãmba, nin-sõamyã kisgdba, zãmb dãmba, neb sẽn ka gũusda, la wuk-m-mens rãmba sẽn nong dũniyã sũ-noog n yɩɩd Wẽnnaam. Bãmb wẽnda wa b sẽn sakd Wẽnnaam, la b yaool n kɩɩsda bãmb pãnga. Lak ne bãmb dãmba.”—2 Tɩmote 3:1-5.
Kẽer tõe n yeelame tɩ ninsaalbã vɩɩm pʋgẽ, bõn-kãensã sɩng n bee hal sẽn kaoose. La yaa nin-kãens bãng tɩ yɛlã zɩ n zẽn n ta woto ye. Wa pĩnd yel-mitbã la kɩba-kɩtbã sẽn yetã, wakat nan pa zĩnd tẽngã zug wa wakat ning sẽn sɩng yʋʋmd 1914 tɛkã ye. (Ges-y seb-neng a 7.) Yel-beedã yɩɩ wʋsg n yɩɩg pĩndã menga. Sẽn paase, sã n yaa ne yɛl a taab Kirist sẽn wilg tɩ ra na n yɩɩ yaoolem dayã bãndã wɛɛngẽ, d segd n bãnga woto: B zɩ n moon Kirist belmã la Rĩungã dũniyã gill zug woto ye. B zɩ n nams a Zeova Kaset rãmbã koe-noogã yĩng tɩ ta woto ye. Bãmb kobs wʋsg la b kʋ Nazi rãmbã nams-toaag zĩisẽ. Hal tɩ ta rũnd kãngã, b gɩdga a Zeova Kaset rãmbã zĩis kẽere. La zĩis a taabẽ, b yõg-b lame n kẽes bãense, n nams-b nams-toaaga, la b kʋ-ba. Woto fãa bee bãnd ning a Zezi sẽn kõ wã pʋgẽ.
Wa b sẽn deng n togs Wilgri 11:18 pʋgẽ wã, ‘soolem toɛ-toɛ neb sũy ra yika’ ne a Zeova Kaset rãmbã sẽn yaa kɩs-sɩd rãmbã, la rẽ wilgdame t’a Zeova ‘sũur na n puuga’ ne tẽn-kãens nebã. Verse kãng me yetame tɩ Wẽnnaam na n “sãama neb nins sẽn sãamd [tẽngã, NW ].” B sãama tẽngã tõnd wakatã n yɩɩd pĩndã. Rẽ kɩtame tɩ sã n pa gũusi, ned pa na n ye wa tõog n vɩɩmd a zug ye. La masã, yɛlã zẽname! Bãngdb wʋsg yeelame tɩ ninsaal sã n ket n dẽgemd tẽngã, neb pa na n ye wa tõog n zĩnd a zug ye. La a Zeova “naan-a lame tɩ neb zĩnd a zugu,” la a na n yiisa neb nins sẽn dẽgemd tẽngã tɩ b nan pa sãam tẽngã zãng ye.—Ezai 45:18.
BARK SẼN NA N WA TẼNG ZUG RĨUNGÃ NAAM DƖƖB WAKATE
Neb n na n vɩɩmd tẽng zug n yɩ Wẽnnaam Rĩungã zẽemba. Tags-kãngã sakr yaa toog ne neb wʋsg sẽn tẽed Biiblã. B tagsdame tɩ neb nins fãa sẽn na n paam fãagrã na n kẽnga saasẽ. Biiblã wilgdame tɩ yaa neb sõor bilf n debd saasẽ. La neb nins sẽn na n vɩɩmd wakat sẽn kõn sa tẽng zugã na n yɩɩ kʋʋng kãseng sõor sẽn pa yãk koaka. (Yɩɩl Sõamyã 37:11, 29; Wilgri 7:9; 14:1-5) A Daniɛll bãngr-gomd n wilg tɩ Wẽnnaam Rĩungã Kirist sẽn dɩt naam a pʋgẽ wã na n buiya tẽngã gilli. A paasame tɩ Rĩung kãng na n dɩɩ naam tẽngã zugu.
Bãngr-gom-kãng pʋgẽ, b bilga Kirist Rĩungã wa kugr sẽn yit a Zeova naam sẽn ka to wã sẽn wõnd tãngã pʋgẽ n tɩ wẽ bõn-naandgã sẽn makd tẽngã tẽn-tẽns sẽn tar pãngã n sãam-a. La “kugr ninga sẽn wã bõn-naandga lebga tãng kãseng n pid dũniyã zĩiga fãa.” Bãngr-gomdã kẽngda taoor woto: “Rĩm dãmb kãens sẽn dɩt naam wakate, Wẽnnaam sẽn be yĩngra na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãens fãa tɩ b menem n bas-a t’a yaas wakat fãa.”—Daniɛll 2:34, 35, 44.
Ad a Zeova Kaset rãmbã sẽn dat n togs yãmb bũmb ninga: Rĩung kãnga, n paas vɩɩm sẽn pa sat n wate, tẽng b sẽn yɩlg tɩ lebg neer zugu. Saagr kãng yita Gʋlsg Sõamyã pʋgẽ. Neb milyõ rãmb sẽn vɩ masã, la neb milyõ rãmb wʋsg sẽn be yaadẽ masã na n wa paama sor n vɩɩmd beenẽ wakat sẽn kõn sa. Rẽ, Kirist a Zezi Yʋʋm Tusr Naamã rɩɩb sasa, a Zeova pipi raabã a sẽn da wa n naan tẽngã n ning pipi raoã ne a pagã be wã na n pidsame. Tẽng zug arzãn kãng pa na n tol n tall yam-yiisg ye. Wa b sẽn kõ a Ãdem tʋʋmd Edɛn zẽedẽ wã, ãdem-biisã me na n paama tʋʋm sẽn be yamleoog sẽn yaa ges tẽngã, tɩɩsã la rũmsã yelle. B “na n paama b tʋʋma nafre.”—Ezai 65:22; Sɩngre 2:15.
Verse rãmb wʋsg wilgda yɛlã sẽn na n yɩ to-to, Wẽnnaam sã n wa reeg pʋʋsg ning a Zezi sẽn zãms tõndã: “tɩ yãmb soolem wa, tɩ yãmb daab maan duniyã zug wa sẽn maand [saasẽ wã, NW].” (Matɩe 6:10) La nananda d zoe n tõe n bãnga woto: “Mam wʋma koe-kãseng sẽn yi geerẽ wã n yeele: ‘Gese, Wẽnnaam yir bee neba sʋka. La bãmb na n zĩnda ne bãmba, la bãmb na n yɩɩ bãmb neba, la bãmb menga na n paa ne bãmba. Bãmb na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.’ La sẽn zaoa geera yeelame yaa: ‘Gese, mam maanda bũmb fãa paalse.’ La b yeela maam yaa: ‘Gʋlse! Tɩ bõe, gom-kãens yaa sɩda la b zemsa reegre.’”—Wilgri 21:3-5.
[Goam sẽn tar pãngã, seb-neng 15]
‘Wakat tood na n zĩndame,’
LA ‘dẽ, la sɛɛbã na n yaool n ta’
[Foto, seb-neng 18]
Peyiba
[Foto, seb-neng 18]
Nizeria