Tõnd yaa ‘sãamb’ dũni-kãngã zugu
‘Nin-kãens fãa kii ne tẽebo . . . B ra miime tɩ bãmb yaa sãamba, la pa-wet dũniyã zugu.’—HEB. 11:13.
1. Bõe la a Zezi yeel tɩ wilgd a karen-biisã sẽn segd n zã b mens to-to dũniyã pʋgẽ wã?
DAAR a ye, a Zezi goma a karen-biisã yell n yeel woto: “Bãmb bee dũniyã pʋgẽ.” La a paasa woto: ‘Bãmb ka dũniyã rẽnda, a wa mam sẽn ka dũniyã rẽndã.’ (Zã 17:11, 14) A Zezi sẽn yeelã wilgda a karen-biis hakɩkã sẽn segd n zã b mens to-to dũniyã pʋgẽ wã vẽenega. Yaa a Sʋɩtãan la “dũni-kãngã wẽnnaam.” (2 Kor. 4:4) Baa kiris-nebã sẽn vɩ dũniyã pʋgẽ wã, b ka dũniyã rẽnd ye. Rẽ n so tɩ Biiblã yeel tɩ b ‘yaa sãamb la pa-wetã.’—1 Pɩɛ. 2:11.
B vɩɩmda wa ‘sãamb la pa-weto’
2, 3. Bõe yĩng tɩ d tõe n yeel t’a Enok ne a Nowe n paas a Abrahaam la a Saara fãa vɩɩmda wa ‘sãamb la pa-weto’?
2 Hal pĩnd n tãag masã, neb nins sẽn tũud a Zeova ne pʋ-peelmã yaa toor ne dũniyã nebã. Wala makre, sẽn deng sa-kãsengã, a Enok ne a Nowe fãa “tũu Wẽnnaam.” (Sɩng. 5:22-24; 6:9) Bãmb b yiibã fãa ra moona ne raood n wilg t’a Zeova na n wa sãama a Sʋɩtãan dũniyã. (Karm-y 2 Pɩɛɛr 2:5; Ziid 14, 15.) B ra maanda sẽn yaa tɩrga, baa b wakatẽ nebã sẽn da maand wẽngã. Rẽ n kɩt t’a Enok ‘ta Wẽnnaam yam,’ t’a Nowe me ra pa ‘tar yell a zãmaanã neb sʋkã.’—Heb. 11:5; Sɩng. 6:9.
3 D gom a Abrahaam ne a Saara me mak-sõngã yelle. Wẽnnaam da wa n yeel-b lame tɩ b yik n bas naar vɩɩm ning b sẽn da tar Uur tẽngã sẽn da be Kalde nebã soolmẽ wã, tɩ b sake. B sakame n tɩ vɩɩmd tẽn-sãanga, n da vɩ fu-rot pʋsẽ. (Sɩng. 11:27, 28; 12:1) Tʋm-tʋmd a Poll yeela woto: “Ne tẽebo, b sẽn bool a Abrahaam t’a yi n kẽng zĩig ning a sẽn yaool n paam tɩ yɩ a rẽndã, yẽ sakame. La yẽ yiime n ka mi a sẽn dabd zĩig ning ye. Ne tẽebo, yẽ siga tẽng ning Wẽnnaam sẽn kãab yẽ wã wa tẽn-sãanga, n zĩnd fu-rot pʋsẽ. La a Izaak ne a Zakoob me sẽn tar pʋɩɩr ne kãabg a yembrã, bãmb me maana woto.” (Heb. 11:8, 9) A Poll goma nin-kãensã sẽn tũ a Zeova ne pʋ-peelmã yelle, n yeel woto: “Nin-kãens fãa kii ne tẽeb n ka paam bũmb nins Wẽnnaam sẽn kãab bãmbã ye. La bãmb yãa bõn-kãens n beel bãmb yɩɩga. La bãmb miime tɩ bãmb yaa sãamba, la pa-wet dũniyã zugu.”—Heb. 11:13.
Wẽnnaam da keooga Israɛll nebã
4. Nand tɩ Israɛll nebã kẽ b tẽngẽ wã, keoog-bʋg la a Zeova kɩt tɩ b taas-ba?
4 Israɛll nebã sẽn yaa a Abrahaam yagensã wa n lebga wʋsgo, tɩ Wẽnnaam sigl b buudã, n kõ-b noy la tẽng tɩ b sooge. (Sɩng. 48:4; Tõo. 6:1) Israɛll nin-buiidã ra segd n tẽegda wakat fãa tɩ yaa a Zeova la b tẽngã Soaala. (Maan. 25:23) Baa a Zeova sẽn da kõ-b tẽngã, a ra kõ-b-la noy me tɩ b segd tũ. Sẽn paase, Israɛll nebã ra segd n tẽegdame tɩ “ninsaal ka na n vɩ ne rɩɩb bal ye.” B ra pa segd n bas tɩ bõn-sõma nins b sẽn paamd tẽngã pʋgẽ wã kɩt tɩ b yĩm a Zeova ye. (Tõo. 8:1-3) Rẽ n so tɩ nand t’a Zeova kõ-b tẽngã, a kɩtame tɩ b keoog-b woto: “Zusoab a Wẽnnaam sã n kɩt tɩ yãmb kẽ tẽng ning bãmb sẽn da yeel y yaab rãmb a Abrahaam ne a Izaak la a Zakoob tɩ b na n kõo yãmbã, yaa tẽng sẽn tar tẽn-kãsems ne tẽn-bõoneg yãmb sẽn ka me, la rot sẽn pid ne bõn-sõma yãmb sẽn ka bĩngi, la buls yãmb sẽn ka tu, la viyn tɩɩs ne Oliiv tɩɩs yãmb sẽn ka selã tɩ y rɩ, bɩ y gũus y mens n da wa yĩm Zusoabã yell ye.”—Tõo. 6:10-12.
5. Bõe yĩng t’a Zeova zãgs tɩ Israɛll nebã kõn le yɩ a nin-buiidu, la bu-paal-bʋg la a yãk-yã?
5 La Israɛll nebã maana bũmb ning a Zeova sẽn da keoog-b tɩ b ra maanã bal kɛpɩ. A Nehemi wakatẽ wã, Levi neb n tẽeg Israɛll nebã sẽn maan bũmb ning b sẽn kẽ kãabg tẽngẽ wã, hal tɩ yãnd da tar-ba. Nin-buiidã sẽn paam rot sẽn pid ne bõn-sõma la rɩɩb ne rãam sẽn sekd-bã poore, “bãmb dɩɩme n tɩg n nobe.” B wa n kɩɩsa Wẽnnaam, hal n kʋ no-rɛɛsdb nins a sẽn da tʋm tɩ b keoog-bã. Rẽ n so t’a Zeova bas tɩ b bɛɛbã tõog-ba. (Karm-y Nehemi 9:25-27; Oze 13:6-9) Kaoosg zugẽ, Rom dãmbã sẽn wa n dɩt naam Israɛllã, zʋɩf rãmbã kʋʋ Mesi ning Wẽnnaam sẽn da pʋlmã menga! Woto kɩtame t’a Zeova tõdg tɩ b kõn le yɩ a nin-buiidu, n yãk bu-paalg b sẽn boond tɩ “Israɛll sẽn yaa Wẽnnaam dẽnda.”—Mat. 21:43; Tʋʋ. 7:51, 52; Gal. 6:16.
Kiris-nebã “ka dũniyã rẽnd ye”
6, 7. a) Wãn to la a Zezi wilg a karen-biisã sẽn segd n zã b mens to-to dũniyã pʋgẽ? b) Bõe la a Pɩɛɛr yeel tɩ wilgd bũmb ning sẽn kɩt tɩ kiris-nebã pa segd n yɩ a Sʋɩtãan dũniyã rẽndã?
6 Wa d sẽn zoe n yã wã, a Zezi sẽn yaa kiris-neb tigingã taoor-soabã wilga vẽeneg t’a karen-biisã segd n yɩɩ toor ne a Sʋɩtãan dũniyã neba. A kũumã sẽn wa n kolgã, a yeela a karen-biisã woto: “Yãmb sã n yaa dũniyã rẽnda, dũniyã na nong a meng rẽnda. La yãmb ka dũniyã rẽnd ye, la mam tũusa yãmb dũniyã nebã sʋka; yaa woto n kɩt tɩ dũniyã kis yãmbã.”—Zã 15:19.
7 La kiris-nebã sõor sẽn wa n paasdẽ tɩ kɩt tɩ b wa be tẽns wʋsg pʋsẽ wã, rẽ yĩnga b ra segd n dɩka neb a taabã togs-n-taar masã n lebg dũniyã rẽnd bɩ? Ayo. B sẽn da beẽ fãa, b segd n yɩɩ toor ne a Sʋɩtãan dũniyã nebã. Na maan yʋʋm 30 Kiristã kũum poore, tʋm-tʋmd a Pɩɛɛr gʋlsa lɛtr n tool kiris-nebã sẽn da be Rom soolmã tẽns fãa pʋgẽ wã n yeel woto: “Mam zo-nongdse, mam kota yãmba, yãmb sẽn yaa sãamb la pa-wet dũniyã ka wã yĩnga, tɩ yãmb da sak yĩngã ratem wẽng sẽn zabd ne sɩɩgã ye. Bɩ y kɩt tɩ yãmb yel-manesem yɩ sõma neb nins sẽn ka pʋʋsd Wẽnnaamã sʋka.”—1 Pɩɛ. 1:1; 2:11, 12.
8. Bõe la kʋdemd yɛl-mit a ye yeel tɩ wilgdẽ tɩ pipi kiris-nebã ra pa dũniyã rẽnda?
8 Kʋdemdã yɛl-mit a yembr wilgame tɩ pipi kiris-nebã sɩd ra vɩɩ wa “sãamb la pa-wet” Rom soolmẽ wã, n yeel woto: “Kʋdemdã yɛl-mitb fãa sak n deegame tɩ kiris-nebã tũudmã sɩngr poore, b tall-b-la namsgo, la tɩ wakat ninga, yɩɩ ne wẽnem sẽn loog noor menga . . . B ra rõt-b-la yɛl toor-toore. B sẽn da pa naagd bõn-naands pʋʋsdbã n maand b rog-n-migsã yĩnga, nebã ra yetame tɩ b pa tẽed Wẽnd ye. Yɛl wʋsg me la b ra pa lagemd neb a taabã n maandẽ, wala b tigã, b reem toor-toorã kiris-nebã sẽn da get tɩ pida ne tẽeb sẽn pa sɩda, wẽn-zɩɩlem yɛl la yoobã. Rẽ kɩtame tɩ b ra yetẽ tɩ b kisa nebã.”
Tõnd pa rɩt dũniyã yõod tɩ pitẽ ye
9. Wãn to la d wilgd tɩ d pa ‘kis nebã’?
9 La yaa wãn to yẽ rũndã-rũndã? Tõnd me wilgda wa pipi kiris-nebã tɩ d pa “rũndã zãmaan wẽngã” rẽnd ye. (Gal. 1:4, Sebr Sõngo) Woto kɩtame tɩ neb wʋsg pa wʋmd tõnd sẽn zãad d mens to-to wã võore, tɩ kẽer pʋd n kis tõndo. La yaool n yaa vẽeneg tɩ tõnd pa ‘kis nebã’ ye. D sẽn kẽnd zak-zak n moond ‘Wẽnnaam Soolem koe-noogã,’ n maand d sẽn tõe tɛk sẽn na yɩl tɩ ned kam fãa wʋmã n wilgd rẽ. (Mat. 22:39; 24:14) D maanda woto, bala d kɩsa sɩd tɩ ka la bilfu, a Zeova Rĩungã sẽn yaa goosneema a sẽn bobl Kiristã na n sãama ninsaalbã goosneema rãmbã, la a lugl dũni-paalg tɩ tɩrlem zĩnd a pʋgẽ.—Dan. 2:44; 2 Pɩɛ. 3:13.
10, 11. a) Wãn to la d rɩt dũniyã yõodo? b) Wãn to la d wilgd tɩ d pa rɩt dũniyã yõod tɩ pitẽ?
10 D sẽn yaa a Zeova nin-buiidã, d miime t’a Sʋɩtãan dũniyã saab sẽn kolgã yĩnga, pa masã la d segd n bao naar dũniyã pʋgẽ ye. D tũuda tʋm-tʋmd a Poll sagl-kãngã: “M ba-biisi, mam yeta yãmb woto tɩ wakatã lebga bilfu. La sẽn sɩng masã bɩ neb nins sẽn . . . daadã yɩ wa b sẽn ka so ye. La bɩ neb nins sẽn baood dũniyã bũmbã maan wa b sẽn ka baood ye. Tɩ bõe, dũni-kãngã loogdame.” (1 Kor. 7:29-31) La wãn to la rũndã-rũndã kiris-nebã rɩt dũniyã yõodo? B tʋmda ne te-paalã buud toor-toor dũniyã bãngdb sẽn yiisdã, n sõngd nebã dũniyã gill zug tɩ b bãngd Biiblã. B maanda rẽ buud-goam kobs pʋsẽ. B tʋmdã dũniyã pʋgẽ me sẽn na yɩl n ges b mens yelle. Sẽn paase, b raada bũmb nins sẽn yaa tɩlae ne-bã dũniyã pʋgẽ. La baasgo, b pa rɩt dũniyã yõod tɩ pitẽ, bala b modgdame tɩ dũniyã bũmb toor-toorã baoob ra wa pak-b n yɩɩd ye.—Karm-y 1 Tɩmote 6:9, 10.
11 Karengã wɛɛngẽ me, kiris-neb nins sẽn yaa gũusdbã maoodame n pa rɩt dũniyã yõod tɩ pitẽ ye. Dũniyã nebã wʋsg getame tɩ ned segd n karmame n zãage, n paam tʋʋm-sõng la ligd wʋsgo. La tõnd a kiris-nebã yẽ vɩɩ wa sãamba, n pa tagsd woto ye. D pa baood “bõn-kãsems ye.” (Rom 12:16; Zer. 45:5) D sẽn yaa a Zezi karen-biisã yĩnga, d tũuda sagl ning a sẽn kõ-dã. A yeela woto: “Bɩ y gũus y mens neer n da maan zoe-bõn ye. Tɩ bõe, ned ka tar vɩɩm a paoong sẽn yaa wʋsg yĩng ye.” (Luk 12:15) Rẽ n so tɩ kom-biis nins sẽn yaa kiris-nebã segd n yãk bũmb b sẽn dat n wa maand Wẽnnaam tũudmã pʋgẽ. B segd n gesame tɩ b karengã tek sẽn yaa tɩlaeyã bala, tɩ kɩt tɩ b wa tõe n get b mens yell la b tũud a Zeova ‘ne b sũur fãa, ne b sɩɩgã fãa, ne b pãngã fãa, la ne b yamã fãa.’ (Luk 10:27) B sã n maan woto, b na n yɩɩ arzɛgs rãmb Wẽnnaam nifẽ.—Luk 12:21; karm-y Matɩe 6:19-21.
D ra maan yɩɩr ne dũniyã yɛl tɩ wa koms d raood ye
12, 13. Wãn to la d sẽn tũud a Zezi goam nins sẽn be Matɩe 6:31-33 wã kɩt tɩ d yaa toor ne dũniyã nebã?
12 Tagsg ning a Zeova nin-buiidã sẽn tar bũmb nins sẽn yaa tɩlaeyã zugã yaa toor ne dũniyã neb tagsgo. Rẽ wɛɛngẽ, a Zezi yeela a karen-biisã woto: “Bɩ yãmb da maan yɩɩr ye, la y ra yeele: ‘Tõnd na n dɩɩ bõe? Tõnd na n yũu bõe? Tõnd na n yeelga bõe?’ Tɩ bõe, bõn-kãens la neb sẽn ka pʋʋsd Wẽnnaamã baood wakat fãa. Yãmb Ba sẽn be [saasẽ] miime tɩ yãmb data bõn-kãense. Bɩ y reng n bao Wẽnnaam soolem ne bãmb tɩrlem, la bõn-kãens fãa na paas yãmba.” (Mat. 6:31-33) Tõnd tẽed-n-taas wʋsg yãa yɛl toor-toor sẽn wilgd tɩ d Ba sẽn be saasẽ wã sɩd getame tɩ d paamd bũmb nins sẽn yaa tɩlae ne-dã.
13 Biiblã yeelame tɩ “Wẽnd tũudum sɩd bee yõod ne ned ning sẽn tagsd t’a sẽn tarã sek-a lame.” (1 Tɩm. 6:6, Sebr Sõngo) Rũndã-rũndã nebã yẽ pa tagsd woto ye. Wala makre, kom-biis wʋsg sã n kẽ kãadem, b tʋll n paama bũmb toor-toor zĩig pʋgẽ. B tõe n data roog sẽn pid ne te-neeba, mobil-neer la teed a taab ligd sẽn toe. La kiris-nebã sẽn vɩ wa sãambã pa basd tɩ b raab toor-toorã soog-ba, tɩ wa kɩt tɩ b wa baood bũmb b sẽn mi tɩ b pa tõe n paam ye. Sɩd me, kiris-neb wʋsg sẽn basd yɛl sãnda baoob sẽn na yɩl n paam sẽk n tʋm a Zeova tʋʋmdã ne yẽesmã seka pẽgre. Kẽer lebga so-pakdba, Betɛllẽ tʋm-tʋmdba, yel-gɛtb sẽn yaa so-toagdba, wall misioneer dãmba. Ad d fãa sũy nooma ne d tẽed-n-taasã, b sẽn maand a Zeova raabã ne b sũy fãa wã yĩnga!
14. Yam-bʋg la d tõe n dɩk a Zezi yel-bũnd ning sẽn gomd ka-fẽrgd yellã pʋgẽ?
14 A Zezi yel-bũnd ning pʋgẽ a sẽn gom ka-fẽrgd yellã, a yeelame tɩ “yɩɩr ne dũniyã yɛl la arzɛgsã belgr” tõe n dɩɩ Wẽnnaam goamã ned sũurẽ t’a pa wom biis ye. (Mat. 13:22) D sã n getẽ tɩ d sẽn tarã sek-d lame n vɩ wa sãamb dũni-kãngã pʋgẽ, na n sõng-d lame tɩ yel-kãngã buud ra wa paam-d ye. Pʋd n na n sõng-d lame tɩ d tall nif sẽn yaa sõma. Tall nif sẽn yaa sõma wã rat n yeelame tɩ Wẽnnaam daabã maaneg n paas a Rĩungã yell n pak-d n yɩɩda.—Mat. 6:22.
‘Dũniyã loogdame’
15. Bõe la tʋmd-tʋmd a Zã yeel tɩ wilgd kiris-nebã sẽn segd n zã b mens to-to dũni-kãngã pʋgẽ?
15 Bʋʋm-kãseng a ye sẽn kɩt tɩ kiris-nebã vɩ wa ‘sãamb la pa-wetã,’ yaa b sẽn mi t’a Sʋɩtãan dũniyã na n saa ka la bilfã. (1 Pɩɛ. 2:11; 2 Pɩɛ. 3:7) Yaa d sẽn vɩ to-to wã, rat n yeel tɩ bũmb nins d sẽn maand wall d sẽn datã, la d magbã toor-toorã n wilgd tɩ d sɩd tẽeda woto. Tʋmd-tʋmd a Zã sagla a tẽed-n-taasã tɩ b ra nong dũniyã wall bũmb nins fãa sẽn be a pʋgẽ wã ye. Bala, “dũniyã ne a ratem wẽngã me loogdame, la ned ning sẽn maand Wẽnnaam daab paada wakat sẽn ka sɛta.”—1 Zã 2:15-17.
16. Wãn to la d tõe n wilg tɩ d naaga neb nins a Zeova sẽn welg toor dũniyã pʋgẽ wã?
16 A Zeova ra yeela Israɛll nebã tɩ b sã n sak-a, b na n lebga yẽ “neb buudã fãa sʋka.” (Yik. 19:5) Israɛll nebã sã n da wa sakd Wẽnnaam, b tũudmã yɛl la b sẽn vɩ to-to wã ra kɩtdame tɩ b yaa toor ne buud a taabã. Rũndã-rũndã me, a Zeova welga nin-buiid sẽn yaa toor fasɩ ne a Sʋɩtãan dũniyã nebã. Biiblã yeelame tɩ d “bas Wẽnnaam kɩɩsgo, la dũniyã ratem sẽn yaa wẽnsã, la d gũus d mens dũniyã ka masã, n maan tɩrg la d sak Wẽnnaam, tõnd sẽn gũud tõnd tẽeb pidsg ne sũ-noogo, la Wẽnnaam sẽn yaa kãsengã ne tõnd Fãagda, Kirist a Zezi naam pukrã. Bãmb kõo bãmb meng tõnd yĩnga, n fãag tõnd ne yel-wẽnã fãa, la b kɩt tɩ tõnd lebg bãmb neb b sẽn pek tɩ yɩ sõma, la tɩ tõnd wɩng ne tʋʋm-sõma maanego.” (Tɩt 2:11-14) Rũndã-rũndã, a Zeova nin-buiidã yaa kiris-neb nins sẽn paam vʋʋsem sõng zaeebã, n paas neb milyõ rãmbã sẽn sõngd-b la b teend-b tɩ b boond-b t’a Zezi “piis a taabã.”—Zã 10:16.
17. Bõe yĩng tɩ sẽn paam-b vʋʋsem sõng zaeebã ne b tũud-n-taasã pa na n tol n wa maan b bãngẽ, b sẽn vɩɩmd wa sãambã?
17 Kiris-neb nins sẽn paam vʋʋsem sõng zaeebã sẽn gũud tẽeb ning ‘pidsg ne sũ-noogã’ yaa wa tɩ rɩ naam ne Kiristã saasẽ. (Wil. 5:10) Sã n yaa ne kiris-neb nins b sẽn boond tɩ “piis a taabã,” bãmb tẽebã pidsg yaa wa vɩɩmd wakat sẽn kõn sa tẽngã zugu. Wakat kãnga, b na n paama ro-neeb la rɩɩb tɩ seke. (Yɩɩl 37:10, 11; Ezai 25:6; 65:21, 22) B pa na n tol n yĩm a Zeova yell wa Israɛll nebã sẽn da maanã ye. B na n tẽegda wakat fãa tɩ bõn-sõma kãens fãa yita a Zeova sẽn yaa “dũniyã fãa Wẽnnaamã” nengẽ. (Ezai 54:5) Sẽn paam-b zaeebã la “piis a taabã” fãa pa na n tol n wa maan b bãngẽ, b sẽn sak n vɩɩmd wa sãamb dũni-kãngã pʋgẽ wã ye.
Y na n leokame tɩ bõe?
• Bõe la pĩnd wẽndẽ wẽn-sakdbã maan n wilg tɩ b ra vɩɩ wa sãamba?
• Wãn to la pipi kiris-nebã ra zãad b mens dũniyã pʋgẽ?
• Wãn to la kiris-neb hakɩkã pa rɩt dũniyã yõod tɩ pitẽ?
• Bõe yĩng tɩ d pa na n tol n wa maan d bãngẽ, d sẽn vɩɩmd wa sãamba?
[Foto seb-neng 21]
Pipi kiris-nebã ra zãagda b mens ne reem nins sẽn naag ne nen-kɛglem la yoob yɛlã