D maan a Zeova raabã ne d sũur fãa
“Yãmb sẽn maand bũmb ning fãa, bɩ y maan ne y sũyã fãa Zusoabã yĩnga.”—KOL. 3:23.
1-3. a) A Zezi sẽn ki tõnd yĩngã, rat n yeelame tɩ maoong buud fãa pa le tar yõod a Zeova nifẽ bɩ? Wilg-y y leoorã võore. b) Tõnd sẽn kõt maand ninsã wɛɛngẽ, sok-bʋg la d segd n sok d mense?
PIPI kiris-nebã wakate, a Zeova kɩtame t’a nin-buiidã bãng vẽeneg t’a Zezi maoongã sẽn yɩ rondã kɩtame tɩ b pa le segd n tũ a Moiiz tõogã ye. (Kol. 2:13, 14) Maand nins zʋɩf rãmbã sẽn sɩng n maandẽ wã fãa pa le yaa tɩlae, la b pa le tar yõod me ye. Tõogã sẽn da yɩ wa “karen-saamb n na n tall [zʋɩf rãmbã] n wa Kirist nengẽ” wã pidsa a tʋʋmde.—Gal. 3:24.
2 La woto pa rat n yeel tɩ kiris-nebã pa le tõe n maan maand ye. Bala, tʋm-tʋmd a Pɩɛɛr yeelame tɩ d ‘kõ maand sẽn yaa sɩɩg sõng rẽnda, Wẽnnaam sẽn deegd a Zezi Kirist maasem yĩnga.’ (1 Pɩɛ. 2:5) Sẽn paase, tʋm-tʋmd a Poll wilga vẽeneg tɩ ned sẽn dɩk a meng n kõ Wẽnnaam n lebg kiris-ned vɩɩmã nens fãa yaa wa ‘maoongo.’—Rom 12:1.
3 D sã n kõt a Zeova bũmb kẽere, wall d sã n sakd n mongd d mens bũmb kẽer a yĩnga, yaa maoong la d kõt-a. Wãn to la bũmb nins d sẽn mi Israyɛll nebã maand toor-toorã zugã tõe n sõng-d tɩ d bãng tõnd sẽn kõt a Zeova maand nins rũndã-rũndã wã sã n tata a yam?
D DAAR FÃA TƲƲMÃ PƲSẼ
4. D daar fãa tʋʋmã pʋgẽ, bõe la d pa segd n yĩmi?
4 Tõe n yɩɩ toog tɩ d bãng bũmb ning sẽn kɩt tɩ d tõe n yeel tɩ d daar fãa tʋʋmã yaa wa maand d sẽn kõt a Zeova wã. Wala makre, tõe n yɩɩ toog tɩ d ges zak pʋgẽ tʋʋmde, lekollẽ tʋʋmde, teed raab wall tʋʋm a taab wa tʋʋm sẽn tar loees ne Wẽnnaam tũudmã. La y sã n dɩka y meng n kõ a Zeova, pa rẽ bɩ y segenda y meng n na n maan woto, y sẽn tʋmd y tʋʋm toor-toorã ne yam ningã tara yõodo. Tõnd yaa kiris-neb wakat buud fãa, n segd n tũud Biiblã noyã d vɩɩmã nens fãa pʋsẽ. Rẽ n so tɩ tʋm-tʋmd a Poll sagl kiris-nebã n yeel woto: “Yãmb sẽn maand bũmb ning fãa, bɩ y maan ne y sũyã fãa Zusoabã yĩnga, la ka nebã yĩng ye.”—Karm-y Kolos rãmb 3:18-24.
5, 6. Bõe n tõe n sõng-d tɩ d bãng d sẽn tog n zã d mens to-to la d sẽn tog n manegd d mens to-to wã?
5 Yaa sɩd tɩ kiris-ned daar buud fãa tʋʋmã pa naag Wẽnnaam tũudmã tʋʋm ye. La tʋm-tʋmd a Poll sẽn sagl-d tɩ d tʋmd ne d “sũyã fãa Zusoabã yĩngã,” tẽeg-d-la d manesem sẽn segd n yɩ to-to wakat buud fãa wã. Woto wã, wãn to la d tõe n tũ a saglgã? Bɩ d ned kam fãa sok a meng woto: ‘Rẽ yĩnga mam sẽn zãad m meng to-to wã la m sẽn manegd m meng to-to wã yaa sõma wakat buud fãa bɩ? M sã n wa tʋmd m daar buud fãa tʋʋmã, m sẽn zãad m meng to-to wã wall m sẽn maneg m meng to-to wã kɩtame tɩ m pa rat tɩ b bãng tɩ m yaa a Zeova Kaset soab bɩ?’ D modg t’a buudã ra tol n paam-d lae! D pa tol n dat n maan bũmb n kɩt tɩ nebã paoog Wẽnnaam yʋʋrã ye.—Ezai 43:10; 2 Kor. 6:3, 4, 9.
6 Bɩ d bao n bãng d sẽn tʋll n maan bũmb fãa ne d “sũyã fãa Zusoabã yĩngã” sẽn tog n kɩt tɩ d manesem wall d tagsg yɩ to-to yell buud fãa taoorã. D vaeesgã pʋgẽ, bɩ d tẽegdẽ tɩ yaa Israyɛll nebã sẽn da tar bũmb nins tɩ yaa sõma n yɩɩdã la b ra segd n yãk n maan maoongã.—Yik. 23:19.
RẼ SẼN KƖT TƖ D SEGD N VƖ TO-TO
7. Rɩk f meng n kõ Wẽnnaam n lebg kiris-nedã rat n yeelame tɩ bõe?
7 Y sẽn dɩk y meng n kõ a Zeova wã, yaa vẽeneg tɩ y maana rẽ ne yamleoogo. Bɩ bõe? Y pʋlmame tɩ y vɩɩmã nens fãa pʋgẽ, y na n lʋɩɩsa a Zeova raabã taoore. (Karm-y Hebre dãmb 10:7.) Y sẽn yãk yam n maan woto wã yaa bõn-sõngo. Sãmbg sẽn ka be, y yãame tɩ yell buud fãa pʋgẽ, y sã n bao n bãng a Zeova raabã la y tũ raab-kãnga, baasda neere. (Ezai 48:17, 18) Wẽnnaam nin-buiidã yaa yɩlem la b tar sũ-noogo, b sẽn dɩkd b Karen-saambã togs-n-taarã yĩnga.—Maan. 11:44, MN; Yɩɩl 104:31.
8. Bõe yĩng tɩ tar yõod tɩ d tẽeg t’a Zeova ra geta Israyɛll nebã maand toor-toorã wa bũmb sẽn welge?
8 Wẽnnaam da geta maand nins Israyɛll nebã sẽn da kõt-a wã wa bũmb sẽn welge, bɩ sẽn yaa sõngo. (Maan. 6:18; 7:1) Sɩd me, hebre wã gom-bil ning b sẽn lebg tɩ “sõngã” rat n yeelame tɩ sẽn welg toore, bɩ sẽn yaa Wẽnnaam dẽnd bala. D sã n dat tɩ d maand ta a Zeova yam, d segd n zãaga d mens ne dũniyã n yɩ toore, la d ra sɩɩs a rẽgd buud fãa ye. D pa segd n nong bũmb baa a yembr a Zeova sẽn kis ye. (Karm-y 1 Zã 2:15-17.) Woto rat n yeelame tɩ d segd n laka d mens fasɩ ne ned wall bũmb ning fãa sẽn tõe n wa kɩt tɩ d lebg rẽgd Wẽnnaam nifẽ. (Ezai 2:4; Wil. 18:4) Leb n dat n yeelame tɩ d pa segd n ges bũmb nins sẽn yaa rẽgd Wẽnnaam nifẽ wã, wall d tagsd bõn-kãens yell ye.—Kol. 3:5, 6.
9. Bõe yĩng tɩ d manesem sẽn yaa to-to ne d taabã tar yõodo?
9 A Poll sagla a tẽed-n-taasã woto: ‘Bɩ y ra yĩm tɩ maan neere, la sõng nebã ye, tɩ bõe, maan-kãens nooma Wẽnnaam sũuri.’ (Heb. 13:16) Rẽnd d sã n yaa nin-sõng n maand d taabã neere, a Zeova geta rẽ wa maoong sẽn tat a yam. D sẽn baood d taabã neerã wilgdame tɩ d yaa kiris-neb hakɩka.—Zã 13:34, 35; Kol. 1:10.
MAAND NINS D SẼN MAAND D TŨUDMÃ PƲGẼ WÃ
10, 11. Wãn to la a Zeova get tõnd koe-moonegã, la d sẽn tũud-a to-to wã, la rẽ segd n kɩt tɩ d maan bõe?
10 Bũmb a ye kiris-nebã sẽn maand tɩ nafd neb a taabã yaa b sẽn ‘kɩt b tẽebã kasetã.’ Yãmb tũnugda ne segb buud fãa n moond koɛɛgã bɩ? A Poll boola tʋʋm-kãngã kiris-ned fãa sẽn segd n tʋmã tɩ maoongo. A yeelame tɩ d “kõ Wẽnnaam maand daar fãa sẽn yaa pẽgre, sẽn dat n togs tɩ d kɩs kaset ne noor goam [Wẽnnaam] yʋʋrã yĩnga.” (Heb. 10:23; 13:15; Oze 14:3) Yɩta sõma tɩ d tags sẽk ning d sẽn dɩkd n moondẽ wã yelle, la d sẽn tõe n paas d moonegã sõmblem to-to wã me yelle. Tʋʋmdã tigissã sõss wʋsg yaa sẽn na n sõng-d tɩ d maan dẽ. La d sẽn segd n tẽeg n yɩɩd yaa tɩ koɛɛgã mooneg zak-zakã la kasetã kũun sẽn pa yãk wakatã yaa ‘maand sẽn yaa pẽgre,’ n yaa d tũudmã tʋʋm kẽere. Rẽnd d tog n maanda d sẽn tõe fãa maan-kãens kũunã pʋgẽ. Baa d yɛlã sẽn pa yembrã, sẽk ning d sẽn dɩkd n moondẽ wã wilgda d sẽn nand Wẽnnaam tʋʋmdã tɩ ta zĩig ningã.
11 Kiris-nebã rɩkda sẽk n tʋmd b tũudmã tʋʋm b zagsẽ wã wall b tigimsã pʋsẽ. Yaa a Zeova n dat tɩ d maand woto. Baa a sẽn pa yãk vʋʋsg daar n kõ tõnd la a pa yeel tɩ d kẽnd Zerizalɛm n maand tigã, yɛl la d maand rũndã-rũndã tɩ wõnd rẽ. Wẽnnaam ket n datame tɩ d mi n bas d tʋʋmã, n dɩk sẽk n zãms a Gomdã, n pʋʋse, la d kẽnd tigissã. Sẽn paase, zak-soben-dãmbã maanda zak pʋgẽ zaabr Biibl zãmsgã ne b zagsã rãmba. (1 Tes. 5:17; Heb. 10:24, 25) Rẽnd tõnd ned kam fãa tõe n soka a meng woto: ‘Rẽ yĩnga m tõe n maana Wẽnnaam daabã sõma n paas bɩ?’
12. a) Tɩdarã b sẽn da yõogd pĩnd wẽndẽ wã makda bõe rũndã-rũndã? b) Bõe la d tõe n maan tɩ d pʋʋsgã yɩ wa tɩdare?
12 Rĩm a Davɩɩd ra pʋʋsa a Zeova n yeel woto: “Bɩ mam pʋʋsg zems wa tɩdar sẽn yõogd yãmb taoore.” (Yɩɩl 141:2) Rẽnd yɩta sõma tɩ d tags d pʋʋsgã yelle. D nong n pʋʋsdame bɩ? Bõe la d pʋʋsd n kotẽ? Wilgr sebrã pʋgẽ, b yeelame tɩ “Wẽnnaam nebã pʋʋsg” yaa wa tɩdare, bala pʋʋsg nins sẽn tat Wẽnnaam yamã noom-a-la wa yũ-noogo. (Wil. 5:8) Israyɛll nebã ra segd n tũ noy takɩ n maan tɩdar ning b sẽn da yõogd a Zeova tẽn-kugrã zug wakat fãa wã. Yaa b sã n da kõ a Zeova tɩdar kãng tɩ zems ne a noyã bal la a sakd n deege. (Yik. 30:34-37; Maan. 10:1, 2) Tõnd me sã n pʋʋsd a Zeova tɩ zemsd ne a sẽn wilg-dã, d tõe n kɩsa sɩd t’a na n deegame.
D SÃ N YAA KÕT-BA, WẼNNAAM NA N DOL-D LAME
13, 14. a) Bõe la a Epafordit ne Filip tigingã neb maan n sõng tʋm-tʋmd a Polle, la a Poll tagsg yɩɩ wãna? b) Wãn to la d tõe n dɩk a Epafordit ne Filip tigingã neb togs-n-taare?
13 D sã n kõ ligd n na n teel koe-noogã mooneg dũniyã gill zugu, paoodame tɩ waoogame me, yaa maoong d sẽn kõ a Zeova. (Mark 12:41-44) Pipi kiris-nebã wakate, Filip tigingã neb tʋma a Epafordit Rom t’a tɩ sõng a Polle. Yaa vẽeneg tɩ b toola ligd me. La pa yɩ pipi b sẽn sõng a Poll ye. B sẽn da maan-a neerã yɩɩ sẽn na yɩl tɩ ligd zu-loees ra nams-a, t’a tõog n paam sẽk wʋsg n moon koɛɛgã. Wãn to la a Poll ges kũunã? A goma rẽ yell n yeel tɩ yaa ‘yũ-sõngo, la maoong Wẽnnaam sẽn deegda.’ (Karm-y Filip rãmb 4:15-19.) Filip nebã kũunã yɩɩ a Poll noog wʋsgo, la a Zeova sũur me yɩɩ noogo.
14 Rũndã-rũndã me, a Zeova sũur nooma wʋsg ne kũun nins d sẽn kõt n teend a tʋʋmdã b sẽn tʋmd dũniyã gill zugã. Sẽn paase, a pʋlmame tɩ d sã n lʋɩɩs a Rĩungã yɛl taoore, a na n kõ-d-la bũmb nins fãa sẽn yaa tɩlae ne-dã, la a sõng-d tɩ d tõog n kell n tall tẽeb sẽn tar pãnga.—Mat. 6:33; Luk 6:38.
WILG-Y Y MI-BEOOGO
15. Bũmb kẽer a Zeova sẽn maan tɩ d tar mi-beoog ne-a wã la bʋse?
15 D pa tõe n sõd bʋʋm nins sẽn kɩt tɩ d tar mi-beoog ne a Zeova wã n sa ye. Rẽ yĩnga beoog sẽn vẽeg fãa, d pa pʋʋsd-a bark a sẽn kõ-d vɩɩmã sɩda? A kõt-d-la bũmb nins fãa sẽn yaa tɩlae ne-dã. Wala makre, rɩɩbo, futu, ro-gãaga, la baa pemsmã d sẽn vʋʋsdã. Sẽn paase, d sũur yaa noog a sẽn sõng-d tɩ d bãng Biiblã sẽn yetã. Rẽ kɩtame tɩ d tar tẽeb la saagre. Dẽnd sɩd zemsame tɩ d maan a Zeova raabã la d kõt-a pẽgr maando, a sẽn yaa d Naandã yĩnga, la bũmb nins a sẽn maan n kõ-dã yĩng me.—Karm-y Wilgr 4:11.
16. Wãn to la d tõe n wilg Wẽnnaam d mi-beoog Kirist maoongã yĩnga?
16 Sõsg ning sẽn loogã pʋgẽ, b tẽeg-d lame tɩ Kirist maoongã yaa kũun sẽn ka to Wẽnnaam sẽn kõ ãdem-biisã. Kũun-kãng wilgd-d-la Wẽnnaam sẽn nong tõnd tɩ ta zĩig ningã. (1 Zã 4:10) Bõe la d tõe n maan n wilg d mi-beoogo? A Poll yeela woto: ‘Kirist nonglem n so tõndo, tõnd sẽn mi sɩd tɩ yembr kii nebã fãa yĩnga. A kii nebã fãa yĩnga, tɩ neb nins sẽn vɩ wã kõn vɩ b mens yĩng yɛs ye, la b na vɩ sẽn ki-a bãmb yĩng n yaool n vʋʋgã yĩnga.’ (2 Kor. 5:14, 15) A Poll gomdã wilgdame tɩ d sã n tar mi-beoog ne Wẽnnaam a sẽn maan bũmb ningã yĩnga, d na n maana d sẽn tõe fãa n pẽg-a la d pẽg a bi-riblã. D sã n yaa sakdb la d nong koɛɛgã mooneg la karen-biisã maanego, d wilgdame tɩ d nonga Wẽnnaam la Kiristã, la tɩ d tara mi-beoog ne-ba.—1 Tɩm. 2:3, 4; 1 Zã 5:3.
17, 18. Wãn to la kẽer paas pẽgr maand nins b sẽn kõt a Zeova wã? Rɩk-y makr n wilgi.
17 Y tõe n manega pẽgr maand nins y sẽn kõt Wẽnnaamã tɩ yɩ sõma bɩ? Neb wʋsg sẽn bʋgs bõn-sõma nins fãa a Zeova sẽn maan n kõ-bã zugu, b maana toeeng toor-toor sẽn na yɩl n paam sẽk n tõog n moon koɛɛgã n paas wall b tʋm Rĩungã tʋʋm a taaba. Kẽer tõogd n dɩkda sõngr so-pakrã kiuug bɩ sẽn yɩɩd rẽ yʋʋmd fãa, tɩ sãnda tõog n lebg wakat fãa so-pakdba. Kẽer me tõog n tɩ sõng n mee rot a Zeova tʋʋmdã yĩnga. Woto fãa yaa bũmb toor-toor d sẽn tõe n maan n wilg Wẽnnaam d mi-beoogo. D sã n tʋmd tʋʋm-kãensã ne yam-sõngo, rat n yeel tɩ sẽn na yɩl n wilg Wẽnnaam d mi-beoog la d pʋʋs-a barka, a sũur nooma ne rẽ.
18 Kiris-neb wʋsg sɩd gesame tɩ yaa tɩlae tɩ b wilg a Zeova b mi-beoogo. Wala makre, d saam-bi-poak a Morena. B wub-a-la katolik tũudmã pʋgẽ, t’a ra tar sogsg wʋsg Wẽnnaam zugu, la a rat n bãng vɩɩmã võore. A bao n na n bãnga sogs-kãens leoorã katolikã pʋgẽ, la Aazi soolmã tũudum kẽer pʋgẽ, n pa paam ye. Yaa a sẽn wa n sɩng Biiblã zãmsg ne a Zeova Kaset rãmbã bal la a paam a sogsgã fãa leoore. Bũmb nins a Morena sẽn bãng Biiblã pʋgẽ wã kɩtame t’a ra tar mi-beoog wʋsg ne a Zeova, bala, kõ-a-la sũ-noog hakɩka. Rẽ n so t’a tʋlg n dɩk a keelmã n tʋm Wẽnnaam tʋʋmdã n wilg-a a mi-beoogo. A Morena lisgã poor bala, a sɩnga sõngr so-pakrã tʋʋmd n pa vaandẽ ye. A sẽn wa n ges t’a tõe n lebga wakat fãa so-pakdã, pa yã n kaoos la a sɩng ye. Yʋʋmd 30 la woto, la a Morena ket n tʋmda Wẽnnaam tʋʋmdã. A lebga Betɛllẽ tʋm-tʋmda.
19. Wãn to la y tõe n paas maand nins y sẽn kõt a Zeova wã?
19 Yaa sɩd t’a Zeova nin-buiidã kẽer yɛl sẽn yaa to-to wã pa kõt-b sor tɩ b tõe n yɩ so-pakdb ye. La d tõe n lebga so-pakd tɩ d pa tõe me, tõnd ned kam fãa tõe n kõo Wẽnnaam maand sẽn tat a yam. Wala makre, ne d sẽn zãad d mensã to-to wã. D tũuda a Zeova noyã sẽn yaa tɩrsã, n tẽegdẽ tɩ d yaa a Kaset rãmb wakat buud fãa. Ne d tẽebã me, d tõe n kõo Wẽnnaam maando, d sã n kɩs sɩd t’a na n pidsa a pʋlemsã fãa. Sẽn na n baase, d tõe n kõo Wẽnnaam maand ne d tʋʋm-sõma wã, d sẽn na n sõngd n moond koe-noogã. D sũy pida ne mi-beoog ne a Zeova, bũmb nins fãa a sẽn maan n kõ-dã yĩnga. Woto yĩnga, bɩ d ket n maand a raabã ne d sũur fãa.
Y TÕE N LEOKAME BƖ?
․․․․․
D daar fãa tʋʋmã pʋgẽ, wãn to la d tõe n waoog a Zeova?
․․․․․
Wẽnnaam tũudmã pʋgẽ, maan-bʋs la d kõt-a?
․․․․․
Wãn to la d tõe n yãk d paoong n kõ a Zeova?
[Foto seb-neng 27]
A Zeova sẽn maand-d neerã kɩtame tɩ y rat tɩ y pẽgr maandã yɩ sõma n paas bɩ?
[Foto seb-neng 25]
Yamb tũnugda ne segb buud fãa n kõt kasetã bɩ?