A Zezi manesem yɩɩ wãn ne politikã?

EVÃNZILL-DÃMBÃ gʋlsdb wilgame t’a Zezi sẽn wa n moond koɛɛgã, a paama sor n wilg a tagsg sẽn yaa to-to ne politikã. Wala makre, a sẽn deeg lisg a sẽn wa n tar yʋʋm 30 wã poor bilfu, a Sʋɩtãan pʋlem-a-la dũniyã naam. Rẽ zugẽ, kʋʋng n wa n dat t’a yɩ b rĩma. Neb me n wa n dat t’a teel politikã. La a Zezi manesem yɩɩ wãna? Bɩ d gom kiba-kãensã yelle.

Dũniyã naam. Evãnzil-dãmbã wilgame t’a Sʋɩtãan pʋlma a Zezi “dũniyã soolem fãa” naam. Tags-y n ges-y-yã a Zezi sẽn da na n wa ne yolsg ning n kõ ãdem-biisã sẽn namsdã, a sã n da sak n yɩ dũniyã naaba. Rẽ yĩnga, ned sẽn dat ãdem-biisã neer la a tẽed tɩ politikã tõe n welga b zu-loeesã na zãgs dũniyã naam sɩda? La a Zezi yẽ zãgsame.—Matɩe 4:8-11.

Rĩma. A Zezi wakatẽ wã, neb wʋsg ra tʋlla ne b sũy fãa n paam naab sẽn tõe n welg zu-loees nins b sẽn da tar laogã la politikã wɛɛngẽ wã. B sẽn yã tõod nins a Zezi sẽn da tarã, b tʋlgame t’a yɩ b rĩma. A manesem yɩɩ wãna? Evãnzill-gʋlsd a Zã yeela woto: “A Zezi sẽn mik tɩ bãmb na n wa modga bãmb tɩ b yɩ rĩma, bãmb leb n kẽnga tãng zug b yembr bala.” (Zã 6:10-15) A Zezi zãgsa fasɩ n pa kẽes a toog politikã pʋgẽ ye.

Ned sẽn teend politikã. D gom bũmb a ye sẽn maan rasem a wãn sẽn deng a Zezi kũumã yelle. Fariziẽ-rãmb ne Herodiẽ-rãmb n wa a Zezi nengẽ. Fariziẽ-rãmbã ra ratame tɩ zʋɩf-rãmbã paam b mens ne Rom naamã. Herodiẽ-rãmbã yẽ ra teenda Rom naamã. B ra ratame t’a Zezi yãk sull n teele. Rẽ n so tɩ b sok-a sã n zemsame tɩ zʋɩf-rãmbã yao Rom naabã yõor-yaoodo.

A Mark wilgame t’a Zezi leoka woto: “‘Yaa bõe tɩ yãmb makd maam? Wa-y ne denie a ye tɩ m gese.’ La b talla a ye n wa kõ bãmba. La a Zezi soka bãmb yaa: ‘Maasmã ne gʋlsmã yaa ãnda rẽnda?’ Bãmb leokame: ‘Yaa Sezaar dẽnda.’ Dẽ, a Zezi yeela bãmb yaa: ‘Bɩ y kõ Sezaar bũmb nins sẽn yaa Sezaar dẽnda, la y kõ Wẽnnaam bũmb nins sẽn yaa Wẽnnaam dẽnda.’” (Mark 12:13-17) Sebr a ye (Church and State—The Story of Two Kingdoms) goma bũmb ning sẽn kɩt t’a Zezi leok woto wã yelle, n yeel t’a “Zezi ra pa rat n yɩ nin-kãseng goosneema pʋgẽ, la t’a wilga vẽeneg tɩ goosneema wã tara noy d sẽn segd n tũ, tɩ Wẽnnaam me tar noy d sẽn segd n tũ.”

Zu-loees nins ninsaalbã sẽn tarã ra namsda Kiristã. Wala makre, naongã, zãmbã la tʋʋm-kɛgã. Sɩd me, Biiblã wilgame t’a sẽn yã nebã sẽn namsdã, b nimbãaneg yõk-a lame. (Mark 6:33, 34) La a Zezi pa bao n na n menes tʋʋm-kɛgã fãa dũniyã zugu, baa kẽer sẽn bao n na n kɩt t’a kẽes a toog b politikã no-koɛɛmã pʋgẽ wã.

Vẽenega, wa kiba-kãensã sẽn wilgdã, a Zezi zãgsame n pa kẽes a toog politikã pʋgẽ ye. La yaa wãn yẽ ne kiris-nebã rũndã-rũndã? B manesem segd n yɩɩ wãna?