B tũuda Wẽnnaam la b tʋmd b tẽnsã neer yĩnga: Wãn to la b maand rẽ?

A ZEZI koe-moonegã sasa, bũmb a yiib la a ra maanda. Bõn-kãens la bʋse? Pipi, a bao n na n sõnga nebã tɩ b toeeme, pa politikã sigls la a bao n na n toeem ye. Wala makre, tags-y bũmb nins yell a sẽn gom a sẽn wa n sõsd ne nebã tãngã zugã. Nand t’a yeel t’a karen-biisã segd n yɩɩ wa yamsem la wa vẽenemã, a yeela a kɛlgdbã tɩ yaa neb nins sẽn mi tɩ b segd n baoa Wẽnnaamã n tar sũ-noog hakɩka. A paasame tɩ yaa “sũ-maasem dãmbã,” “pʋ-peelem dãmbã” la “zab-paasdbã” n tar sũ-noogo. (Matɩe 5:1-11) A Zezi sõnga a karen-biisã tɩ b bãng tɩ tara yõod tɩ b maneg b tagsa wã la b sẽn get yɛlã to-to wã, tɩ zems ne noy nins Wẽnnaam sẽn gãneg sõma la wẽngã wɛɛngẽ wã, la tɩ b segd n tũu Wẽnnaam ne b sũyã fãa.

Yiib-n-soaba, a Zezi sã n da yã ned sẽn namsde, a nimbãaneg yõkd-a lame t’a yols-a. La a pa bao n na n menes bũmb nins fãa sẽn da namsd nebã ye. (Matɩe 20:30-34) A maaga bãad-rãmb kẽere, la a pa menes bãasã ye. (Luk 6:17-19) A yolsa neb nins b sẽn da wẽgdã, la b ra ket n wẽgda neba. A rɩlga neb kom sẽn da tare, la a pa menes komã ye.—Mark 6:41-44.

A sõnga neb tɩ b toeeme, la a yols-ba

Bõe yĩng t’a Zezi tʋlg n sõng nebã tɩ b toeem la a yols-ba, n pa bao n na n toeem siglsã wall a menes bũmb nins fãa sẽn namsd nebã? A ra miime tɩ Wẽnnaam na n wa tũnuga ne a Rĩungã n sãam ninsaalbã goosneema-rãmbã fãa, la a menes bũmb nins fãa sẽn wat ne namsgã. (Luk 4:43; 8:1) Rẽ n so tɩ daar a ye, a Zezi karen-biisã sẽn wa n yeel-a t’a maag bãad-rãmb n paasã, a leok-b woto: “Wa-y tɩ d kẽng tẽn-kɩrems tɩ m tɩ moon koɛɛg beenẽ me. Yaa rẽ yĩng la mam wa-yã.” (Mark 1:32-38) A Zezi yolsa neb wʋsg sẽn da namsde, la sẽn da pak-a n yɩɩd yaa moon Wẽnnaam koɛɛgã la a zãms nebã.

A Zeova Kaset rãmbã maood n dɩkda a Zezi naoor b koe-moonegã pʋgẽ. B tʋllame n yols nebã, n sõngd-ba. La b pa baood n na n menes wẽgbã ye. B kɩsa sɩd tɩ Wẽnnaam Rĩungã na n wa menesa bũmb nins fãa sẽn wat ne namsgã. (Matɩe 6:10) B maanda wa a Zezi, n sõngd nebã tɩ b toeemdẽ, la b pa baood n na n toeem politikã sigls ye. B sẽn maand woto wã zemsame. Bala, yaa ninsaalbã sẽn pa tũud Wẽnnaam noyã n wat ne b zu-loeesã, pa politikã bal ye.

B tʋmda b tẽnsã neer yĩnga

A Zeova Kaset rãmbã kɩsa sɩd me tɩ b sẽn yaa kiris-nebã, b segd n tʋma b tẽnsã neer yĩnga. Rẽ n so tɩ b sakd goosneema-rãmbã noyã. Ne b sɛbã la b koe-moonegã maasem, b sagenda nebã tɩ b sak no-kãense. La goosneema sã n yiis noor tɩ kɩɩsd Wẽnnaam noore, a Zeova Kaset rãmbã pa sakd no-kãng ye. B sakda “Wẽnnaam n yɩɩd nebã.”—Tʋʋma 5:29; Rom dãmba 13:1-7.

A Zeova Kaset rãmbã kẽeda zak-zaka, n wilgd nebã tɩ b tõe n paamame tɩ b zãms-b Biiblã tɩ pa tũ ne yaood ye. B tʋʋmdã sõnga neb milyõ-rãmb tɩ b toeeme. Yʋʋmd fãa, b sõngda neb tus-kobs tɩ b basd minim-wẽns wala sɩgaarã yũubu, rã-tɩgre, dorg la yoobo. Nin-kãensã lebga tɩrse, b sẽn tũud Biiblã noyã yĩnga.

Sẽn paase, Biiblã zãmsg sõnga zags rãmb tɩ b maneg n waoogd taaba. Sõng-b lame tɩ b maneg n yẽsd ne taab sõma. Woto fãa paasda zagsã neb ne taab zems-n-taarã. La sak pʋgẽ, zagsã neb sã n zemsd taaba, kɩtdame tɩ zems-n-taar be sakã pʋgẽ.

Yãmb sẽn karem bũmb nins fãa b sẽn wilg sõs-kãensã pʋgẽ wã, y tagsg yaa wãna? Rẽ yĩnga Biiblã wilgame tɩ wẽn-tũud tõe n kẽesa a toog politikã pʋgẽ bɩ? A leoorã yaa vẽenega. Woto pa sakd ye. La rẽ yĩnga kiris-neb hakɩkã segd n tʋma b tẽnsã neer yĩng bɩ? N-ye. Wãn to la b tõe n maan dẽ? Yaa b sẽn na n tũ a Zezi saglgã, n yaa wa yamsem la vẽenem dũniyã pʋgẽ.

Sẽn modgd-b n tũud Kiristã saglsã nafda b mense, b zags rãmba, la b sagsã nebã. Y sã n dat n bãng a Zeova Kaset rãmbã sẽn zãmsd nebã Biiblã to-to wã bɩ y kos b rãmb nins sẽn moond yãmb sakẽ wã, tɩ b na n sõng-y lame.a

[Tẽngr note]

[Goam sẽn tar pãnga seb-neng a 7]

A Zezi bao n na n sõnga nebã tɩ b toeeme, a pa bao n na n toeem politikã sigls ye

[Goam sẽn tar pãnga seb-neng a 8]

A Zeova Kaset rãmbã miime tɩ b segd n tʋma b tẽnsã neer yĩnga