Yãmb sõngdame tɩ nebã yãt a Zeova ziirã bɩ?
“Tõnd fãa nems pilgame tɩ nebã ne Zu-soabã ziir . . . beenẽ wa neng-gɛtgẽ.”—2 KOR. 3:18, KÃAB-PAALGÃ KOE-NOOGO.
Y NA N LEOKAME TƖ BÕE?
Baa d sẽn yaa koangdbã, bõe yĩng tɩ d tõe n sõng nebã tɩ b yã a Zeova ziirã?
Wãn to la pʋʋsgã la tigissã kẽnd tõe n sõng-d tɩ d tõog tɩ nebã yã Wẽnnaam ziirã?
Bõe n tõe n sõng-d tɩ d ket n waoogd a Zeova?
1, 2. Bõe yĩng tɩ ninsaalbã tõe n dɩk a Zeova togs-n-taare?
BAA yaa bilfu, tõnd ned kam fãa wõnda a roagdba. Rẽ n so tɩ d sã n wʋm b sẽn yeel bi-ribl t’a ‘wõnda a ba,’ wall bi-pugl t’a ‘wõnda a ma,’ pa lingd-d ye. Sẽn paase, kambã wae n dɩkda b roagdbã togs-n-taare. La tõnd yẽ? D tõe n dɩka a Zeova sẽn yaa d saasẽ Ba wã togs-n-taar bɩ? Baa d sẽn zɩ n yã-a wã, d sã n get bũmb nins a sẽn naanã, d tõe n bãnga a sẽn yaa Wẽnnaam ning buudã. Sẽn paase, d sã n zãmsd Biiblã la d bʋgsd bũmb nins d sẽn karemd a pʋgẽ wã zugu, tõe n sõng-d lame tɩ d bãng-a. Sẽn yɩɩd fãa, d sã n bʋgsd a Zezi sẽn yaa a Bi-riblã sẽn yeel la a maan bũmb ninsã zugu. (Zã 1:18; Rom 1:20) Rẽnd tõnd me tõe n dɩka a Zeova togs-n-taar tɩ nebã yã a ziirã.
2 Nand tɩ Wẽnnaam naan a Ãdem ne a Hawa, a ra miime tɩ ninsaalbã na n tõog n maana a raabã, n dɩk a togs-n-taare, la b waoog-a. (Karm-y Sɩngr 1:26, 27.) D sẽn yaa wẽn-sakdbã, d segd n dɩka Wẽnnaam sẽn yaa d Naandã togs-n-taare. D sã n maand woto, nebã na n yãa Wẽnnaam ziirã. D sẽn yaa buud ning neda, d karmame tɩ d pa karme, d tõe n waooga Wẽnnaam. Bõe yĩnga? Bala, “Wẽnnaam ka tũusd neb ye. . . . Buud fãa sʋka, ned ning sẽn zoet bãmba la sẽn maand tɩrga, yẽ soab tata bãmb yam.”—Tʋʋ. 10:34, 35.
3. Nafa bʋg la kiris-nebã paamda, b sẽn maand a Zeova raabã?
3 Kiris-neb nins sẽn paam vʋʋsem sõng zaeebã sõngda nebã tɩ b ne a Zeova ziirã. Tʋm-tʋmd a Poll me sẽn paam zaeebã yeela woto: “Tõnd fãa nems pilgame tɩ nebã ne Zu-soabã ziir . . . beenẽ wa neng-gɛtgẽ, la Zu-soabã, sẽn ya-a Sɩɩgã, tedga tõnd tɩ wẽneg bãmba, n paamd ziir n paasdẽ.” (2 Kor. 3:18, Kãab-paalgã Koe-noogo) No-rɛɛs a Moiiz sẽn da wa n dʋ Sinayi tãngã n deeg kug-wals nins zug a Zeova sẽn gʋls tõod piigã n lebg n sigdã, a nengã ra pɩndame, a sẽn gom ne a Zeova wã yĩnga. (Yik. 34:29, 30) Yaa sɩd tɩ kiris-nebã pa gom ne Wẽnnaam wa a Moiiz ye. Sẽn paase, b sã n wa gomd a Zeova yell n wilgd nebã a sẽn yaa Wẽnnaam ning buudã, la raab ning a sẽn sɩng n tar ne ãdem-biisã, b nensã pa pɩnd ye. La nebã neeme tɩ b sũy yaa noogo. Woto yĩnga, d paama vʋʋsem sõngã zaeeb tɩ d yaa piis a taabã sʋk ned me, d yaa wa nin-getse, bala ne d sẽn vɩ to-to wã la ne d koe-moonegã maasem, d kɩtdame tɩ nebã ne a Zeova ziirã. (2 Kor. 4:1) Rẽ yĩnga, yãmb sakda Wẽnnaam a Zeova la y moond koɛɛgã wakat fãa sẽn na yɩl tɩ nebã yã a ziirã bɩ?
D TƲLL N SÕNGA NEBÃ TƖ B YÃ A ZEOVA ZIIRÃ
4, 5. a) Zĩ-bʋg la ãdem-biisã fãa wõnd a Polle? b) Wãn to la yel-wẽndã namsd tõndo?
4 D sẽn tũud a Zeova sẽn yaa d Naandã yĩnga, yaa vẽeneg tɩ d tʋll n waoog-a-la bũmb fãa pʋgẽ, tɩ nebã yãt a ziirã. La naoor wʋsgo, d pa maand wa d sẽn datã ye. Ra yaa woto ne a Poll me. (Karm-y Rom dãmb 7:21-25.) A Poll wilga bũmb ning sẽn kɩt tɩ yaa toog ne-d tɩ d maan d sẽn datã, n yeel woto: “Fãa maana yel-wẽna, n kong Wẽnnaam waoogre.” (Rom 3:23) A Ãdem sẽn beegã tɛka, tõnd fãa rogda ne yel-wẽndã, tɩ tar tõnd n namsdẽ.—Rom 5:12; 6:12.
5 La yel-wẽnd pʋd n yaa bõe? Yaa bũmb ning fãa sẽn yaa kɛgr a Zeova nifẽ, rat n yeel tɩ sẽn pa zems ne a noyã la a raabã. Yel-wẽndã kɩtame tɩ nebã zãr ne Wẽnnaam. A kɩtame tɩ d pa tõe n ta Wẽnnaam yam zãnga, wa ned sẽn tõe n tão tãp tɩ pa ta bũmb ning a sẽn datã. Ned tõe n tudg n maana yel-wẽnde, wall a maan-a ne yamleoogo. (Sõd. 15:27-31) Ãdem-biisã rogda ne yel-wẽndã n wae n beegdẽ, n zãr ne b Naandã. (Yɩɩl 51:7; Ezai 59:2; Kol. 1:21) Sɩd me, nebã fãa la bal sẽn vɩ to-to wã kɩtame tɩ b zãr ne Wẽnnaam, n pa tõe n paam n sõng b taabã tɩ b yã a ziirã ye. Vẽenega, bũmb kae n namsd ãdem-biisã n ta yel-wẽndã ye.
6. Baa d sẽn yaa koangdbã, bõe yĩng tɩ d tõe n kɩt tɩ nebã yã a Zeova ziirã?
6 Baa tõnd sẽn dogd ne yel-wẽndã, a Zeova maana bũmb n kɩt tɩ d tõe n tẽ tɩ manegr n wate. (Rom 15:13) A tʋma a Zezi t’a wa ki tɩ yɩ maoongo, tɩ d tõe n paam d mens ne yel-wẽndã. D sã n tẽed maoon-kãnga, d pa le yaa “yel-wẽnã yembs” ye. D lebga a Zeova zo-rãmba, n tõe masã n kɩt tɩ nebã yã a ziirã. (Rom 5:19; 6:6; Zã 3:16) D sã n kell n tall zood kãnga, d na n paama bark masã menga. Sẽn paase, beoog-daare, d na n paam n zemsa zãnga, n vɩɩmd wakat kõn sa. Baa d sẽn ket n yaa koangdbã, Wẽnnaam get-d-la wa neb sẽn tõe n kɩt tɩ b taabã yã yẽ ziirã. Ad woto sɩd yaa zu-zẽkr tɛkẽ!
D SÕNGD NEBÃ TƖ B YÃT WẼNNAAM ZIIRÃ
7. Sẽn na yɩl n kɩt tɩ nebã yã Wẽnnaam ziirã, bõe la d segd n sak n deege?
7 Sẽn na yɩl n sõng nebã tɩ b yã Wẽnnaam ziirã, d segd n sak n deegame tɩ d rogda ne yel-wẽndã. (2 Kib. 6:36) Segdame tɩ d bao n bãng d pãn-komsem toor-toorã la d mao n tõog-ba. Rẽ la d na n tõogd n waoogd Wẽnnaam bũmba fãa pʋgẽ. Wala makre, ned sã n minim n geta yoobã yɛla, a tog n sak n deegame t’a rata kãsem-dãmbã sõngre, n kos tɩ b sõng-a. (Zak 5:14, 15) D sã n sɩd tʋll n waooga Wẽnnaam, woto maaneg yaa tɩlae. D sẽn yaa Wẽnnaam nin-buiidã yĩnga, segdame tɩ d feesd d mens n get d sã n sɩd tũuda a noyã sẽn yaa tɩrsã sõma. (Yel. 28:18; 1 Kor. 10:12) Baa d pãn-komsem sẽn yaa a soaba, d segd n mao n tõog-a lame, sẽn na yɩl n kɩt tɩ nebã yã Wẽnnaam ziirã.
8. Baa tõnd sẽn pa zems zãnga, bõe la d segd n maane?
8 A Zezi a ye bal n yɩ ninsaal sẽn kɩt tɩ nebã yã Wẽnnaam ziirã a vɩɩmã tõre, n pa tol n beeg-a ye. La tõnd pa neb sẽn zems zãng wa a Zezi ye. La baasgo, d tõe n d dɩka a togs-n-taare, la d pʋd n segd n maana woto. (1 Pɩɛ. 2:21) A Zeova geta d sẽn modgd n dat n tũ a noyã a waoogr yĩngã. A ningda modg-kãng bark me.
9. Wãn to la Biiblã tõe n sõng-d tɩ d tõog tɩ nebã yã Wẽnnaam ziirã?
9 Biiblã tõe n sõng-d lame tɩ d bãng d sẽn tõe n maneg d vɩɩmã to-to, tɩ nebã yã Wẽnnaam ziirã. D segd n zãmsd-a-la sõma la d bʋgsd a goamã zug neere. (Yɩɩl 1:1-3) D sã n karemd Biiblã daar fãa, sõngd-d lame tɩ d bãng d sẽn tõe n maneg n dɩk Kiristã togs-n-taar to-to. (Karm-y Zak 1:22-25.) Bãngr ning d sẽn paamd Biiblã pʋgẽ wã kengda d tẽebã. A kɩtdame tɩ d tʋll ne d sũur fãa n gil yel-wẽn-kãsemse, la d noog a Zeova sũuri.—Yɩɩl 119:11, 47, 48.
10. Wãn to la pʋʋsgã tõe n sõng-d tɩ d maneg n tũ a Zeova sõma?
10 D sã n dat n sõng nebã tɩ b yã Wẽnnaam ziirã, d segd n ‘pʋʋsdame n da basdẽ ye.’ (Rom 12:12) D segd n pʋʋsda a Zeova n kotẽ t’a sõng-d tɩ d tõog n tũ-a sõma. D tõe n kos-a-la a vʋʋsem sõngã tɩ sõng-d tɩ d paam tẽebã sẽn tar pãnga, n tõe n mao ne kʋɩɩbg buud fãa, la d “togsd sɩd koɛɛgã tɩrga.” (2 Tɩm. 2:15; Mat. 6:13; Luk 11:13; 17:5) D segd n teega d saasẽ Ba a Zeova, wa biig sẽn teeg a ba to-to wã. D sã n kos-a t’a sõng-d tɩ d tõog n tũ-a sõma, d tõe n kɩsa sɩd t’a na n sõng-d lame. D ra tol n tags t’a yam na n wa yii ne d pʋʋsgã ye! Bɩ d pʋʋsd-a n pẽgd-a la d wilgd-a d mi-beoogo, n kot-a sor-wilgri, sẽn yɩɩd fãa d sã n wa tar zu-loeese. D kot-a me t’a sõng-d tɩ d tõe n maan a raabã a yʋʋrã waoogr yĩnga.—Yɩɩl 86:12; Zak 1:5-7.
11. Wãn to la tigissã sõngd tõnd tɩ kɩtdẽ tɩ nebã yãt Wẽnnaam ziirã?
11 A Zeova rɩka a nin-buiidã sẽn yaa wa a piisã n bobl “tʋm-tʋmd sẽn tũud sɩd la sẽn tar yamã.” (Mat. 24:45-47; Yɩɩl 100:3) Tʋm-tʋmdã tʋll n sõnga tõnd ned kam fãa t’a tõog tɩ nebã yã a Zeova ziirã. Bũmb a ye tʋm-tʋmdã sẽn tũnugd n sõngd tõnd yaa tigissã. Tigissã sõngda tõnd tɩ d paamd zʋg-sõma, tɩ d zĩid-n-taar be yamleoogo, wa tayɛɛr sẽn tõe n maneg d fuug tɩ d sã n ning bɩ a gesg be yamleoogã. (Heb. 10:24, 25) Yaa rẽ n kɩt tɩ d segd n tat d tigissẽ wã pĩndã. D sã n minim n tat tigissã sɩngr poore, d pa na n paamd n dɩt b yõodã tɩ pitẽ ye.
D RƖK WẼNNAAM TOGS-N-TAARE
12. Wãn to la d tõe n dɩk Wẽnnaam togs-n-taare?
12 D sã n dat tɩ nebã yã Wẽnnaam a Zeova ziirã, d segd n ‘yɩ a togs-n-taase.’ (Ef. 5:1) Bũmb a ye d sẽn tõe n maan n dɩk a Zeova togs-n-taar yaa d sẽn na n modgd n get yɛlã wa a sẽn get-b to-to wã. D sã n pa maand woto, paoogd-a lame. Sẽn paase, tõe n wã-d lame. Dũniyã sẽn be a Sʋɩtãan nugẽ wã yĩnga, yɩl n tõog n kisg bũmb nins a Zeova sẽn kisã, la d nong b rãmb nins a sẽn nongã pa nana ye. (Yɩɩl 97:10; 1 Zã 5:19) D segd n kɩsa sɩd tɩ yaa d sẽn na n maand bũmba fãa Wẽnnaam waoogr yĩng bal la d tat a yam.—Karm-y 1 Korẽnt dãmb 10:31.
13. Bõe yĩng tɩ d segd n kisg wẽnga, la rẽ baooda bõe maanego?
13 D segd n kisga wẽng maanego, bala a Zeova kisa yel-wẽna. D sã n kis wẽnga, d na n laka d meng fasɩ ne bũmb ning fãa sẽn tõe n kɩt tɩ d maan yel-wẽnde. D pa na n deem ne baa fʋɩ sẽn tõe n wa kɩt tɩ d beeg Wẽnnaam ye. Wala makre, d segd n zãaga d mens ne sɩdã kɩɩsgo, bala a tõe n kɩtame tɩ d wa pa le waoogd Wẽnnaam ye. (Tõo. 13:7-10) Woto yĩnga, d segd n zãaga d mens ne sɩdã kɩɩsdba, la ned ning fãa sẽn yet t’a yaa tõnd tẽed-n-taaga, n yaool n maand yɛl sẽn paoogd Wẽnnaam. Baa sã n yaa tõnd roagda. (1 Kor. 5:11) Pa tar yõod tɩ d bao n wilg sɩdã kɩɩsdb la neb nins sẽn wɩt a Zeova siglgã tɩ b goamã pa sɩd ye. D pʋd n pa segd n bao n bãng bũmb nins b sẽn yet b sɛbã pʋsẽ wall ẽntɛrnetã pʋgẽ wã ye. Bala, tõe n sãama zood ning d sẽn tar ne a Zeova wã.—Karm-y Ezai 5:20; Matɩe 7:6.
14. Sẽn na yɩl tɩ nebã yã Wẽnnaam ziirã, zʋg-sõng bʋg la d segd n tall n yɩɩda, la bõe yĩnga?
14 Bõn-kãseng a ye d sẽn tõe n maan n dɩk d saasẽ Ba wã togs-n-taar yaa d sẽn na n tall nonglem. Bala, Wẽnnaam yaa nonglem. (1 Zã 4:16-19) Sɩd me, yaa tõnd sẽn nong taabã n wilgd tɩ d yaa a Zezi karen-biisi, la a Zeova nin-buiidu. (Zã 13:34, 35) D sẽn yaa koangdbã yĩnga, wakat ninga, yaa toog tɩ d wilg d taabã tɩ d nong-b lame. La d segd n maanda modgr wakat fãa. D sã n maand woto la d baood zʋg-sõma a taaba, na n sõng-d lame tɩ d ra maan yɛl sẽn na n sãam b sũyã, bɩ n maan yel-wẽn ye.—2 Pɩɛ. 1:5-7.
15. D sã n nong d taabã, manesem bʋg la d na n tall ne-ba?
15 D sã n nong nebã, d na n tʋll n maan-b-la neere. (Rom 13:8-10) Wala makre, rao ne a pag sã n sɩd nong taaba, b ned baa a ye pa na n sak n zãmb a to ye. D sã n nong kãsem-dãmbã la d nand b tʋʋmdã, d na n sakd-b lame la d reegd b saglsã. Kamb nins sẽn nong b roagdbã sakd-b lame, n waoogd-ba, n pa wɩt-b ye. D sã n nong nebã, d na n nand-b lame, n pa gomd n paoogd-b ye. (Zak 3:9) Kãsem-dãmbã sẽn nong Wẽnnaam piisã yĩnga, b geta b yell ne bʋgsem.—Tʋʋ. 20:28, 29.
16. D sã n nong Wẽnnaam la d taabã, wãn to la na n sõng-d koe-moonegã pʋgẽ?
16 D koe-moonegã pʋgẽ me, segd n yɩɩ vẽeneg tɩ d nonga nebã. Wala makre, baa nebã sã n pa kelgd koɛɛgã, d sẽn nong a Zeova ne d sũur fãa wã yĩnga, d na n ket n moondame, n da koms raood ye. D sã n nong nebã, d na n segenda d koe-moonegã sõma, tɩ d goamã kẽed d kɛlgdbã. D sã n sɩd nong Wẽnnaam la d taabã, d pa na n get koe-moonegã wa tʋʋmd d sẽn segd n tʋm bal ye. D na n get-a-la wa zu-zẽkr bũmbu, n tʋmd-a ne sũ-noogo.—Mat. 10:7.
D KET N WAOOGD A ZEOVA
17. Bõe yĩng tɩ d sã n sak n deeg tɩ d mi n tara tʋls-wẽns bɩ na n naf-do?
17 Dũni-kãngã neb wʋsg pa mi yel-wẽnd sẽn tõe n sãam ned vɩɩm to-to wã sõma ye. La tõnd yẽ mii rẽ. Woto kɩtame tɩ d miẽ tɩ d segd n maoa ne d tʋls-wẽnsã. D miime me tɩ d segd n kibla d sũur-kasetã, tɩ bũmb sã n wa rat n kɩt tɩ d maan wẽnga, bɩ a tẽeg-d tɩ pa segd ye. (Rom 7:22, 23) Yaa sɩd tɩ d yaa pãn-komsem dãmba, la Wẽnnaam tõe n kõ-d-la pãng tɩ d maan sẽn yaa tɩrg wakat fãa.—2 Kor. 12:10.
18, 19. a) Bõe n sõngd tõnd tɩ d pa sakd a Sʋɩtãan ne a zĩn-dãmbã raabo? b) Bõe la d segd n yãk yam n maane?
18 Sẽn na yɩl n waoog Wẽnnaam, d segd n maoa ne a Sʋɩtãan ne a zĩn-dãmbã me. Zab-teed nins Wẽnnaam sẽn kõt-dã tõe n sõng-d lame tɩ d ra sak b raabã ye. (Ef. 6:11-13) A Sʋɩtãan maanda a sẽn tõe fãa sẽn na yɩl tɩ nebã waoog-a ne waoogr ning a Zeova a ye bal sẽn segd ne wã. A maooda a pãng tɛk n dat n sãam zood ning d sẽn tar ne a Zeova wã me. La baasgo, pagba, rap la kamb na maan milyõ-rãmb n ket n sakd Wẽnnaam la b waoogd-a, baa ne b sẽn pa zems zãngã. Ad woto sɩd wilgdame t’a Sʋɩtãan maoorã yaa faoore! Woto yĩng bɩ d rɩk malɛgsã togs-n-taare, n pẽgd a Zeova. B yeta woto: “Tõnd Zusoab la tõnd Wẽnnaam, yãmb n zems tɩ reeg pẽgr la waoogr la pãnga. Tɩ bõe, yãmb n naan bũmb fãa, la yaa yãmb daabã yĩng la yãmb naan bãmb tɩ b beẽ.”—Wil. 4:11.
19 Bɩ d fãa yãk yam n ket n waoogd a Zeova baa sẽn wa n yaa a soaba. Vẽenega, a sã n ne neb ka tɛk sẽn maand b sẽn tõe fãa n dɩkd a togs-n-taar bũmb fãa pʋgẽ tɩ b taabã yãt a ziirã, noogda a sũuri. (Yel. 27:11) D tog n talla a Davɩɩd tagsgã buudu. A ra pẽga a Zeova n yeel woto: “Zusoaba, mam Wẽnnaam, mam pʋʋsda yãmb bark ne m sũur fãa, la mam na n waooga yãmb yʋʋr wakat fãa.” (Yɩɩl 86:12) Wẽn-sakdbã na n wa lebga neb sẽn zems zãnga, n tõe n sõng b taabã tɩ b yã a Zeova ziirã sõma la b tõog n waoog-a wakat sẽn kõn sa yĩnga. D gũuda wakat kãng ne yãgbo! Yãmb kɩtdame tɩ nebã yãt Wẽnnaam a Zeova ziirã rũndã-rũndã, la y saagd n na n wa maand woto wakat sẽn kõn sa yĩng bɩ?
[Foto rãmba, seb-neng 31]
Yãmb maanda woto tɩ nebã yãt a Zeova ziirã bɩ?