Bõe yĩng tɩ kẽer tagsdẽ tɩ Wẽnnaam pa zoet nebã nimbãanega?

YÃMB tagsdame tɩ Wẽnnaam pa zoet nebã nimbãaneg bɩ? Kẽer tagsda woto, tɩ sãnda maand sãmb-sãmbe. Bõe yĩnga?

Sabab-wẽng sã n kʋ neb wʋsgo, sẽn põs-bã kẽer sokda b mens yaa: “Bõe yĩng tɩ Wẽnnaam basdẽ tɩ yel-beed a woto maandẽ? A toog ka be ne tõnd bɩ, bɩ yaa nebã nimbãaneg la a pa zoeta?”

Sãnda yaa b sẽn wat n karemd Biiblã kibay kẽere. Wala makre, b sã n karemd a Nowe wakatẽ sa-kãsengã kibarã, b tagsda woto: ‘Wẽnnaam sã n yaa nonglem, bõe yĩng t’a sãam neb wʋsg woto? Nebã kũumã noom-a lame bɩ?’

Yãmb mi n sokda y meng woto bɩ, bɩ y mi n dat n leoka sẽn sokd-b woto wã n pa tõe? Sẽn yaa a soab fãa, y sã n bãng sokr ning sẽn pʋgdã leoore, tõe n sõng-y lame.

BÕE YĨNG TƖ NINSAAL KIS WẼNEM?

Koɛɛg-koɛɛga, yaa tõnd sẽn nong tɩrlmã yĩng la d sẽn kis wẽnemã. Zĩ-kãng wɛɛngẽ, tõnd yaa toor ne rũmsã. Wẽnnaam naan-d-la a meng “wẽnego.” (Sɩngre 1:27) Woto rat n yeelame t’a naana tõnd tɩ d tõe n dɩk a zʋg-sõma wã togs-n-taare, n nong a sẽn nonge, la d kis a sẽn kisi. Sã n yaa Wẽnnaam sẽn naan tõnd a meng wẽnegã yĩng la d sẽn nong tɩrlem la d kis wẽnemã, rẽ yĩnga yãmb pa tagsd tɩ Wẽnnaam me kisa wẽnem sɩda?

Wẽnnaam meng wilga rẽ Biiblã pʋgẽ, n yeel woto: “Mam soɛyã yɩɩda yãmb soɛyã, la mam tagsdã yɩɩda yãmb tagsdã.” (Ezai 55:9) D sã n tagsdẽ tɩ bũmb Wẽnnaam sẽn maan yaa wẽnem, yaa wa d sẽn yet tɩ d yaa tɩrg n yɩɩd-a. La d sẽn pa tõe n yeel tɩ d tɩrlem yɩɩda Wẽnnaamã yĩnga, sẽn são yaa d sẽn na n bao n wʋm yɛlã võor sõma. Tõe tɩ d segd n bao n bãnga bõe n kɩt tɩ yɛl kẽer Wẽnnaam sẽn maan wõnd yaa kɛg tõnd nifẽ. Bɩ d bao n bãng bõe n tõe n kɩt tɩ d yeel tɩ bũmb ned sẽn maan yaa wẽnem.

D sã n yeel tɩ ned yaa wẽnem soaba, d paoog-a lame. Bala, wẽnem soab sã n ne a taab sẽn namsde, noom-a lame, wall a maanda a toor kae. Wala makre, ned sã n sɩbgd a biig zaalem bala, d tõe n yeelame tɩ yaa wẽnem. La a sã n sɩbgd-a sẽn na yɩl t’a rɩk yam wall sẽn na yɩl n kogl-a, yaa sõma. B sã n zoe n ninga yãmb taal zaalem, y miime tɩ ned sã n maan bũmbu, pa wakat fãa la d tõe n bãng bũmb ning sẽn kɩt t’a maanã ye.

Bũmb wʋsg n mi n kɩt tɩ kẽer tagsdẽ tɩ Wẽnnaam pa nimbãan-zoɛtã. D na n goma bãmb b yiib yelle. Yaa sabab-wẽnsã, la Wẽnnaam sẽn sãam neb pĩnd wẽndẽ tɩ b gomd rẽ yell Biiblã pʋgẽ wã. D na n bãnga rẽ sẽn zãmsd tõnd bũmb ning Wẽnnaam zugu.