BAO-Y N PẼNEG-Y WẼNNAAM
“Gese, mam maanda bũmb fãa paalse”
Rẽ yĩnga, y pa rat tɩ yãmb ne y zakã rãmb paam laafɩ la yõ-wok sɩda? Y pa rat n wa paam n vɩ, tɩ toogo, namsg la kũum pa le be sɩda? Vɩɩmã na n wa yɩɩ woto. Pa belgr ye. Ka la bilfu, tẽngã na n pida ne tɩrlem. Bala Wẽnnaam a Zeova n pʋlem woto. Bɩ d ges vɩɩmã sẽn na n yɩ to-to, a pʋlengã sã n wa pidsi.—Karm-y Wilgr 21:3-5.
“[Wẽnnaam] na n yẽesa nintãmã fãa t’a ra le zĩnd bãmb ninẽ ye.” (Wilgri 21:4) Woto rat n yeelame tɩ Wẽnnaam na n yẽesa baa sũ-noog nintãm, la nintãm nins sẽn pekd tõnd ninã bɩ? Ayo! Yaa sũ-sãangã la namsgã sẽn kɩt tɩ d raagd nintãm ninsã la a na n yẽese. Wẽnnaam pa na n yẽes d nintãmã bal ye. A pʋd n na n kɩtame tɩ bũmb nins sẽn wat ne sũ-sãang la namsgã sa, tɩ d ra le raag nintãm rẽ yĩng ye.
“Kũum ka na n le zĩnd ye.” (Wilgri 21:4) Yell bee sẽn yãbsd ãdem-biisã n ta kũumã sẽn yaa d fãa bɛ wã sɩda? Ayo! La a Zeova na n wa kɩtame tɩ wẽn-sakdbã paam b mens ne kũumã. A na n maana wãna? Yaa a Ãdem yel-wẽndã n kɩt tɩ d kiidẽ. Wẽnnaam na n basa yel-wẽn-kãng taale, tɩ kũum sa. (Rom dãmba 5:12) A Zezi sẽn ki tɩ yɩ maoongã yĩnga, a Zeova na n kɩtame tɩ sẽn sakd-b yẽ wã lebg neb sẽn pa le maand yel-wẽnd ye.a Dẽ poore, a na n “sãama” kũumã sẽn yaa yaoolem bɛ wã. (1 Korẽnt dãmba 15:26) Nin-tɩrsã na n tõog n vɩɩmda ne laafɩ wakat sẽn kõn sa, wa Wẽnnaam sẽn da rat to-to hal sɩngrẽ wã.
“Toog kõn le zĩnd yɛs ye.” (Wilgri 21:4) Yel-wẽndã, n paas d sẽn pa zems zãngã sẽn wa ne naong ning fãa n kõ neb milyõ-rãmbã na n saame. Baa sẽn yaa toog ning fãa, yaa d yĩnsã pʋgẽ tɩ yaa d sũurã pʋgẽ me, na n saa fasɩ.
Ka la bilfu, d na n wa paam n vɩɩme, tɩ nintãm ne kũum la toog pa le beẽ ye. La tõe tɩ y sok tɩ na n yɩɩ yɛɛnẽ? Na n yɩɩ saasẽ bɩ? Ayo. Bõe yĩng tɩ d miẽ tɩ pa saasẽ? Pipi bʋʋmã yaa tɩ vɛrse wã sɩngrẽ b yeelame tɩ ‘Wẽnnaam yir bee nebã sʋka.’ Yaool n yaa tẽngã zug la nebã be. (Wilgri 21:3) Yiib-n-soaba, b yeelame tɩ “kũum ka na n le zĩnd ye.” Rat n yeel t’a pa na n le zĩnd zĩig ning a sẽn da be wã ye. La yaa tẽngã zug la kũum be. Sẽn be-b saasẽ wã pa kiid ye. Dẽnd yaa vẽeneg tɩ vɩ-noog ning Wẽnnaam sẽn pʋlmã na n yɩɩ tẽngã zug ka.
A Zeova ratame tɩ d sɩd tẽ dũni-paalgã a sẽn pʋlmã. A sẽn togs a sẽn na n wa maan bũmb ninsã poore, a yeela gomd sẽn wilgd tɩ pa tõe n vaal ye. A yeela woto: “Gese, mam maanda bũmb fãa paalse.” A paasame tɩ: “Gom-kãens yaa sɩda, la b zemsa reegre.” (Wilgri 21:5) Yɩta sõma tɩ y bao n bãng yãmb ne y zakã rãmb sẽn na n maan to-to, n paam n naag sẽn tũud-b Wẽnnaamã, n wa yã a pʋlemsã pidsgu.
Y tõe n karma Biiblã zĩ-kãnga
1 Pɩɛɛr 1-5; 2 Pɩɛɛr 1-3; 1 Zã 1-5; 2 Zã 1-13; 3 Zã 1-14; Ziid 1-25–Wilgri 1-22
[Tẽngr note]
a Y sã n dat n bãng bũmb a taab Kiristã maoongã zugu, bɩ y ges Biiblã sɩd yetame tɩ bõe? sebrã sak a 5 wã. A Zeova Kaset rãmbã n yiis seb-kãnga.
[seb-neng 30]
Wẽnnaam na n yẽesa nintãm nins fãa nebã sẽn daag namsgã la sũ-sãamsã yĩngã