Sogsg Biiblã sẽn leokde
Kiristã sẽn na n lebg n wa wã yaa bõe yĩnga?
Yʋʋmd 33 wã, nand t’a Zezi Kirist rʋ saasẽ, a pʋlmame t’a na n lebg n waame. A wẽe yel-bũnd sẽn wilgd tɩ yẽ yaa wa na-biig sẽn na n tog sor n kaoose, n tɩ reeg naam n lebg n wa. Dẽnd a Zezi sẽn na n lebg n wa wã yaa sẽn na yɩl tɩ ãdem-biisã paam goosneema sẽn yaa sõma.—Karm-y Luk 19:11, 12.
A Zezi na n waame tɩ ãdem-biisã paam goosneema sẽn yaa sõma
La Kiristã sã n lebg n wa, a na n yɩɩ ninsaal bɩ? A kũumã poore, a vʋʋgame n yaa sɩɩga, rat n yeel tɩ malɛka. (1 Korẽnt dãmba 15:44) Rẽ poore, a rʋʋ saasẽ n tɩ zĩnd Wẽnnaam rɩtgo. (Yɩɩl Sõamyã 110:1) La kaoosg zugẽ, b bool-a lame t’a wa Wẽnnaam a Zeova sẽn yaa “wakat fãa naabã” taoore, t’a kõ-a tõog t’a na n dɩ naam ãdem-biisã zugu. Dẽnd a Zezi sẽn na n lebg n wa wã, a pa na n yɩ ninsaal ye. A na n yɩɩ rĩm b sẽn pa tõe n yã ne nifu.—Karm-y Daniɛll 7:13, 14.
A Zezi sã n lebg n wa, bõe la a na n maane?
A Zezi sẽn na n lebg n wa ne a malɛgsã, d pa na n yã-b ne nif ye. Wakat kãnga, a na n kaoa ãdem-biisã bʋʋdo. A na n sãama nin-wẽnsã la a keo neb nins sẽn sakd a naamã, n kõ-b vɩɩm sẽn kõn sa.—Karm-y Matɩe 25:31-33, 46.
A Zezi naamã na n kɩtame tɩ tẽngã lebg arzãna. A na n vʋʋga neb nins sẽn ki wã tɩ b paam n vɩɩmd arzãnã pʋgẽ, tẽngã zugu.—Karm-y Luk 23:42, 43.