Kom-bɩɩse, bãng-y n yãk-y sẽn yaa sõma

1. Bõe la kom-bɩɩs wʋsg maand tɩ kõt-b sũ-noogo?

TÕND vɩɩ wakat sẽn pa reem wakate. Bala bũmb sẽn da zɩ n zĩnd n maand rũndã-rũndã. Tẽns toɛy-toɛy neb milyõ-rãmb n wat tũudum hakɩkã pʋgẽ. (Wil. 7:9, 10) Kom-bɩɩs wʋsg sõngda nebã tɩ b wʋmd Biiblã goamã sẽn fãagd yõyã, tɩ kõt bãmb mensã sũ-noogo. (Wil. 22:17) B zãmsda nebã Biiblã, sẽn na yɩl n sõng-b tɩ b vɩɩmã tall barka. Kẽer me kẽnda tẽn-zẽmse, n sõngd nebã tɩ b wʋmd koe-noogã b mensã buud-goamã pʋgẽ. (Yɩɩl 110:3; Ezai 52:7) Bõe la yãmb me tõe n maan n tõog n kẽes y toog tʋʋm-kãngã sẽn kõt sũ-noogã pʋgẽ?

2. Bõe yĩng tɩ d tõe n yeel t’a Tɩmote makrã wilgdame t’a Zeova rat n bobla kom-bɩɩsã tʋʋma? (Ges-y fotã sẽn be yĩngrã.)

² Kom-bɩɩse, bũmb wʋsg n be y sẽn tõe n zoe n yãk yam n maandẽ, tɩ wa sõng-y tɩ y paam n tʋm tʋʋm kẽer Wẽnnaam tũudmã pʋgẽ. Wala makre, a Tɩmote sẽn yãk yam ningã sõng-a lame t’a tõog n lebg misioneer a sẽn wa n zems yʋʋm 20. (Tʋʋ. 16:1-3) Wõnda yaa kiis a wãn poor la tʋm-tʋmd a Poll tʋm-a, t’a tɩ kaag Tesalonik saam-biisã n keng b raoodo. A Poll ra zĩnda be tɩ nebã wa yik n kɩɩsd-a, tɩ yɩ tɩlae t’a loog n bas tigingã b sẽn da lugl paalmã. (Tʋʋ. 17:5-15; 1 Tes. 3:1, 2, 6) Tags-y n ges-y a Tɩmote sũur sẽn yɩ noog to-to, a Poll sẽn wa n bobl-a tʋʋm-kãngã wã.

YAM-YÃKR NING SẼN TAR YÕOD N YƖƖDÃ

3. Yãmb vɩɩmã pʋgẽ bõe n tar yõod n yɩɩda, la wakat bʋg la y tog n yãk yam n maan rẽ?

³ Yaa bi-bɩɩlmã wakat la y tog n yãk y sẽn na n tees y vɩɩmã neng ninga. La y sẽn na n yãk yam n maan bũmb ninsã fãa sʋka, a ye n tar yõod n yɩɩda. Yaa y sẽn na n yãk yam n tũ a Zeova. Wakat bʋg la y segd n maan rẽ? Ad a Zeova sẽn yete: ‘Tẽeg f naandã yell f bi-bɩɩlem wakate.’ (Koɛ. 12:1) Y sẽn tõe n maan n wilg tɩ y tẽegda a Zeova yelle, yaa y tũ-a ne y sũur fãa. (Tõo. 10:12) Rẽ n tar yõod n yɩɩda. Yãmb vɩɩmã na yɩ sõma bɩ kõn yɩ sõma bee ne yãmb sẽn na n yãk yam ningã.—Yɩɩl 71:5.

4. A Zeova tũubã sẽn yãk a toogo, bõe me la y na n maane?

⁴ Yaa sɩd t’a Zeova tũubã sẽn yãk a toogo, bũmb a taab me la y na n maan y vɩɩmã pʋgẽ. Wala makre, y na n yãka y sã n na n kẽe kãadem bɩ y pa na n kẽ. Y sã n na n kẽe kãadem, y na n yãka sẽn na n yɩ ne ned ningã. Y leb n na n yãka y sẽn na n tʋm tʋʋmd ning n ges y meng yelle. Woto fãa tara yõodo, la sẽn sõmb yaa y reng n yãk yam n na n tũ a Zeova ne y sũur fãa. (Tõo. 30:19, 20) Bõe yĩnga? Bala yam-yãkr kẽer tũuda taaba, la kẽer me pa tũud taab ye. Sɩd me, y sẽn na n yãk yam ning kãadmã la tʋʋmã wɛɛngẽ wã tõe n kɩtame tɩ y tõog n tũ a Zeova wa y sẽn datã, wall y pa tõog ye. Y sẽn na n yãk yam ning a Zeova tũubã wɛɛngẽ wã me tõe n sõng-y lame tɩ y bãng n yãk yam-sõng kãadmã la tʋʋmã wɛɛngẽ. (Ges-y Luk 14:16-20.) Dẽnd yãmb n segd n ges n bãng sẽn tar yõod n yɩɩdã, la y lʋɩɩs rẽ taoore.—Fil. 1:10.

BÕE LA Y NA N MAAN Y BI-BƖƖLMÃ WAKATE?

5, 6. Togs-y kibar sẽn wilgd tɩ d sã n bãng n yãk yam-sõma, d tõe n wa paam n tʋma tʋʋm a Zeova tũubã pʋgẽ.

⁵ Yãk-y yam n na n tũ a Zeova, la y tags masã n ges bũmb nins a sẽn dat tɩ y maanã, n yaool n yãk y sẽn na n maanegã takɩ. Saam-biig a Yuichiro sẽn yit Zapõ wã yeela woto: “Mam sẽn wa n tar yʋʋm 14, mam yii koɛɛgã mooneg daar a ye ne tigingã kãsem-soaba. A gũus n bãngame tɩ koɛɛgã mooneg pa noom maam woto ye. Ne bʋgsem, a yeela maam yaa: ‘Yuichiro, kuli. F sã n ta, bɩ f zĩnd n tags neer n ges a Zeova sẽn maan bũmb nins fo yĩngã.’ M sɩd maana wa a sẽn yeelã. Rasem a wãn poore, m da ket n bʋgsdame la m pʋʋsd a Zeova. Bilf-bilfã, mam toeema yam. M yãame t’a Zeova tũubã nooma maam masã. Misioneer-dãmbã kibayã kareng ra nooma maam, tɩ m sɩng n tagsd m sẽn na n maan to-to n tũ a Zeova sõma n paase.”

⁶ A Yuichiro paasa woto: “Rẽ tɛka, mam yãka yam n na n maan bũmb kẽer sẽn na n sõng-m tɩ m wa kẽng tẽng a to n tɩ sõng ne a Zeova tʋʋmdã. Wala makre, m yãka yam n na n zãms ãngilindã. M karengã poore, m lebga ãngilindã karen-saamba, tɩ kɩt tɩ m paam sẽk me n sɩng so-pakrã. M sẽn wa n tar yʋʋm 20, m sɩnga Mongoli buud-gomdã zãmsgo, la m paam n tɩ kaag koe-moondb sull sẽn gomd Mongoli buud-gomdã. Yʋʋm a yiib poore, rat n yeel tɩ yʋʋmd 2007 wã, m kẽnga Mongoli. M sẽn wa n moond koɛɛgã ne so-pakdbã, m mikame tɩ neb wʋsg rata ne b sũy fãa n bãng sɩdã. Kɩtame tɩ m tʋlg n na n wa zĩnd be n paam n sõng nebã. M lebg n kuila Zapõ n na n tɩ segl m menga. Yʋʋmd 2008 tʋʋl-nif kiuugã tɛka, m bee Mongoli n yaa so-pakda. Yaa sɩd tɩ beenẽ vɩɩmã pa nana ye. La nebã kelgda koe-noogã sõma, tɩ m paamd n sõngd-b tɩ b lebgd a Zeova zo-rãmba. Ne mam tagsgo, mam sẽn yãk yam n na n vɩɩmd to-to wã n yaa vɩɩm sẽn tar barka.”

7. Bõe la ned fãa tar sor n na n maane, la bõe la a Moiiz makrã wilgd tõndo?

⁷ Ned fãa n yãkd a sẽn na n tees a vɩɩmã neng ninga, la a sẽn na n maan bũmb ning a Zeova tũubã pʋgẽ. (Zoz. 24:15) D pa tõe n yeel yãmb tɩ y kẽ kãadem bɩ y ra kẽ ye. D pa tõe n yãk y sẽn na n kẽ kãadem ne a soabã, bɩ n wilg-y tʋʋmd ning takɩ y sẽn tog n yãk ye. Y na n yãka tʋʋmd sẽn pa baood tɩ y karem n zãag wʋsg bɩ? Bee ne ned fãa. Yãmb sʋkã, kẽer bee tẽns sẽn tar laog pʋsẽ, tɩ kẽer me be tẽns sẽn pa tar laog pʋsẽ. Y zʋgã, y minimã, y bãngrã, y sẽn nong bũmb ninsã la y sẽn magd n na n wa maan bũmb ning a Zeova tũubã pʋgẽ wã pa yembr ye. Ned fãa yɛl sɩd pa wõnd a to ye. Ra yaa woto me a Moiiz wakatẽ wã. A Moiiz ra vɩɩ naar pʋgẽ, bala a ra yaa rĩmã bi-pugl biiga, tɩ hebre kom-bɩɩs a taabã yaool n da yaa yembse, n vɩ far pʋgẽ. (Yik. 1:13, 14; Tʋʋ. 7:21, 22) La wa yãmba, bãmb me ra segd n yãka b sẽn na n maanegã takɩ. (Yik. 19:4-6) Ned fãa ra tog n yãka a sã n na n sak n tũu a Zeova. A Moiiz yãka yam-sõngo.—Karm-y Hebre dãmb 11:24-27.

8. Yɛ la y tõe n paam sõngre, n tõog n yãk yam-sõma?

⁸ A Zeova sõngda yãmb sẽn na yɩl tɩ y bãng n yãk yam-sõma y bi-bɩɩlmã wakate. Wãn to la a maand rẽ? Ne Biiblã maasem, a kõta yãmb sagls sẽn zems ne yãmba. (Yɩɩl 32:8) Sẽn paase, y roagdbã sẽn tũud a Zeova wã, la tigingã kãsem-dãmb tõe n sõnga yãmb tɩ y bãng n tũ saglsã. (Yel. 1:8, 9) Bɩ d tẽeg sagls a tãab sẽn na n sõng-y tɩ y bãng n yãk yam-sõma tɩ naf-yã.

BIIBLÃ SAGLS A TÃAB SẼN NA N SÕNG-YÃ

9. a) Bõe n wilgd t’a Zeova waooga tõndo, a sẽn bas tɩ d tõe n yãk d sẽn na n maanã? b) Y sã n deng n bao Rĩungã, wãn to la na n naf-yã?

⁹ Bɩ y reng n bao Wẽnnaam soolem ne bãmb tɩrlem. (Karm-y Matɩe 6:19-21, 24-26, 31-34.) A Zeova waooga tõndo, a sẽn bas tɩ d tõe n yãk d sẽn na n maanã. A pa yeel tɩ d kẽes d sẽkã fãa Rĩungã koɛɛgã mooneg pʋgẽ ye. La a Zezi kõo saglg sẽn sõngde. A yeelame tɩ d reng n bao Rĩungã. Y sã n tũ a saglgã, y paamd n tʋma tʋʋm n wilg Wẽnnaam tɩ y nong-a lame, n wilg y taabã tɩ b yell pak-y lame, la y wilg tɩ y sũur nooma Wẽnnaam sẽn kãab vɩɩm sẽn kõn sa wã. Kãadmã la tʋʋmã wɛɛngẽ, y sẽn na n yãk yam ningã na n wilga sã n yaa Rĩungã la yãmb dengd n baoodẽ, bɩ yaa arzɛkã wall yɛl a taab n pak yãmb n yɩɩda.

10. Bõe n kɩt t’a Zezi ra tar sũ-noogo, la bõe n na n kɩt tɩ yãmb me paam sũ-noogo?

¹⁰ Sõng-y neb a taabã tɩ rẽ kõta sũ-noogo. (Karm-y Tʋʋm 20:20, 21, 24, 35.) Gom-kãngã yaa sɩda, tɩ ned pa tõe n kɩɩs ye. A Zezi ra mii rẽ. Yaa rẽ yĩng la a sẽn maan a Ba wã raab la a sõng nebã tɩ b wʋm koe-noogã. Woto kõ-a-la sũ-noogo. (Luk 10:21; Zã 4:34) Tõe tɩ yãmb mengã zoe n sõnga neba, n bãng tɩ sɩd kõta sũ-noogo. Bɩ y modg tɩ y yam-yãkr fãa pʋgẽ bɩ y tũ a Zezi sagl-kãensã. Y sã n maan woto, y na n paama sũ-noogo, a Zeova me sũur na n yɩɩ noog ne-yã.—Yel. 27:11.

11. Bõe n kɩt t’a Baruk ra pa le tar sũ-noogo, la saglg bʋg la a Zeova kõ-a?

¹¹ Tʋm n sõng t’a Zeova tʋʋmdã kẽng taoorã n kõt sũ-noog n yɩɩda. (Yel. 16:20) Wõnda a Baruk sẽn da yaa a Zeremi seb-gʋlsdã wa n yĩma rẽ. Wakat n zĩnd t’a Zeova raabã maaneg ra pa le noom-a ye. La a Zeova yeel-a-la woto: “Fo baooda bõn-kãsems f meng yĩng la? Base, ra bao bũmb a woto ye. Tɩ bõe, gese, mam na n kɩtame tɩ toog paam ninsaalbã fãa. . . . La mam na n gũu fo vɩɩm fo sẽn na n kẽng zĩig ninga fãa tɩ f põse.” (Zer. 45:3, 5) Ne yãmb tagsgo, bõe n da na n kõ a Baruk sũ-noogo? Yaa bõn-kãsemsã baoob bɩ, bɩ yaa a sẽn da na n kell n maan a Zeova raabã, n wa paam n põs Zerizalɛm sãoongã?—Zak 1:12.

12. Yam-bʋg la a Ramiro yãk tɩ kõt-a sũ-noogo?

¹² A Ramiro yaa saam-biig sẽn sõngd neb a taabã, tɩ kõt-a sũ-noogo. Ad a sẽn yeele: “Mam roagdbã ra yaa naong rãmba. Tõnd ra vɩɩ Amerikdisiid tẽn-bil a ye sẽn boond tɩ Bolivi. Mam kẽem n da rat n yao mam karengã inivɛrsite. Woto ra yaa zu-no-kãsenga. La rẽ tɩ mam deega lisgu, n lebg a Zeova Kaset soab sẽn nan pa kaoose. Tẽn-bil a to saam-biig sẽn da yaa so-pakd n bool maam tɩ m wa tɩ d moon koɛɛgã beenẽ. M sɩd kẽngame. M tɩ zãmsa zut wõrsgo. M wa n paka m toorẽ zĩig sẽn na yɩl n paamd m noorã rɩɩbo. Koe-moonegã sasa, tõnd sã n yeel nebã tɩ d rat n sõng-b lame tɩ b zãms Biiblã, wʋsg sakdame. Pa yã n kaoos la b lugl tiging sẽn gomd tẽngã buud-gomde, tɩ mam tɩ naage. Sẽn na maan yʋʋm piig la woto m sẽn yaa so-pakda. Tʋʋmd a to kae sẽn da na n kõ-m sũ-noogo, n ta m sẽn sõngd nebã tɩ b bãngd koe-noogã b buud-gomdã pʋgẽ wã ye.”

13. Bõe yĩng tɩ yaa masã meng la y segd n tʋm a Zeova tʋʋmã ne y sũur fãa?

¹³ Sɩng-y masã menga. (Karm-y Koɛɛg Soab 12:1.) Ra tags-y tɩ y segd n deng n paama tʋʋm-sõng n yaool n sɩng so-pakrã ye. Sɩng-y a Zeova tʋʋmã y bi-bɩɩlmã wakat tɩ rẽ la sõma n yɩɩda. Kom-bɩɩs wʋsg nan pa tar zak rãmb n segd n ges b yell ye. B leb n tara pãng la keelem, n tõe n tʋm tʋʋm sẽn pa nana. Bõe la y rat n wa maan a Zeova tũubã pʋgẽ? Tõe tɩ y rat n lebga so-pakda, bɩ n tɩ moon koɛɛgã zĩig nebã sẽn gomd buud-gom-zẽnga. Tõeeme me tɩ y rat n tʋma y tigingã tʋʋm n paase. Sẽn yaa a soab fãa, yaa tɩlae tɩ y bao nug-tʋʋmd n tõog n ges y meng yelle. Bɩ y sok y meng woto: ‘Tʋʋm-bʋg la m na n yãke? Tʋʋmdã zãmsg na n yɩɩ yʋʋm a wãna?’

TŨ-Y BIIBLÃ SAGLSÃ N BÃNG N YÃK Y SẼN NA N MAANEGA

14. Tʋʋmã baoob wɛɛngẽ, bõe yĩng tɩ y segd n maan gũusgu?

¹⁴ Biiblã sagls a tãabã d sẽn yã wã na n sõng-y lame tɩ y bãng tʋʋmd ning y sẽn tõe n yãke. Karen-saam-dãmb bɩ neb a taab tõe n mii y sẽn tõe n maan to-to n paam tʋʋmde. B tõe n sõnga yãmb tɩ y bãng tʋʋmd ning y sẽn tõe n paam y sẽn beẽ wã, wall zĩig ning yãmb sẽn dat n kẽng n tɩ yɩ so-pakdã. Tõe tɩ b saglsã tõe n sõng-y lame, la maan-y gũusgu. Neb nins sẽn pa tũud a Zeova wã tõe n dat n pirsa yãmb tɩ y nong dũniyã. (1 Zã 2:15-17) La ra yĩm-y tɩ y sã n bas tɩ bũmb nins y sẽn ne dũniyã pʋgẽ wã yamleoog kẽ-yã, y sũurã tõe n belg-y lame ye.—Karm-y Yelbũn 14:15; Zer. 17:9.

15, 16. Tʋʋmã baoob wɛɛngẽ, ãnd dãmb n tõe n sõng yãmb n yɩɩda?

¹⁵ Y sã n paam n bãng tʋʋm nins y sẽn tõe n yãkã, bɩ y bao sagls a taab n paase. (Yel. 1:5) Ãnd dãmb n tõe n sõng yãmb tɩ y tũ Biiblã saglsã n bãng n yãk tʋʋmd takɩ? Kelg-y neb nins sẽn nong a Zeova, n nong yãmb la b mi yãmb sõma wã. B na n sõnga yãmb tɩ y tags n bãng y sẽn tõe n maan bũmb ningã, la sã n zemsa ne y sẽn sɩd ratã. Tõe tɩ b saglsã sõng-y tɩ y maneg n tags y sẽn dat n wa maanã zug neere. Y roagdbã sã n tũuda a Zeova, b tõe n sõnga yãmb wʋsgo. Y tigingã kãsem-dãmb me tõe n sõng-y lame. Y tõeeme me n sõss ne so-pakdbã la tigims sul ne distrik yel-gɛtbã, tɩ b togs-y bũmb ning sẽn kɩt tɩ b yãk yam n kẽes b meng zãng a Zeova tʋʋmdã pʋgẽ wã, b sẽn maan to-to n sɩnge, b sẽn maand bũmb ning n get b mens yelle, la tʋʋmdã sẽn kõt-b sũ-noog ninga.—Yel. 15:22.

¹⁶ Neb nins sẽn mi yãmb sõma wã tõe n bãng n kõ-y-la sagls sẽn na n sɩd naf-yã. Wala makre, tõe tɩ y rat n basa karengã n lebg so-pakda, bala y tagsdame tɩ karengã yaa toogo. Ned sẽn nong yãmb tõe n gũusame n bãng rẽ, n sõng-y tɩ y bãng tɩ y sã n kell n wɩng ne karengã baa sẽn yaa toogã, na n wa sõng-y lame tɩ y tõog toog a Zeova tʋʋmdã pʋgẽ me.—Yɩɩl 141:5; Yel. 6:6-10.

17. Tʋʋmã yãkr wɛɛngẽ, y segd n gũusa ne bõe?

¹⁷ Ned ning fãa sẽn tũud a Zeova na n yãa makr toor-toor sẽn tõe n sãam a tẽebã, n zãag-a ne a Zeova. (1 Kor. 15:33; Kol. 2:8) Tõe tɩ y sã n yãk nug-tʋʋmd ninga, y na n yãa makr n yɩɩd sã n da yaa nug-tʋʋmd a to. Yãmb menga tõe n mii neb kẽer tẽeb sẽn sãame, nug-tʋʋmd ning b sẽn yãkã yĩnga. (1 Tɩm. 1:19) Dẽnd yɩta sõma tɩ y tall yam, n gũus y mens n da wa yãk tʋʋmd sẽn na n sãam y zoodã ne a Zeova ye.—Yel. 22:3.

MAAN-Y SŨ-NOOG Y SẼN TŨUD A ZEOVA WÃ

18, 19. Sã n mik tɩ so-pakrã yamleoog ket n pa tar yãmba, bõe la y tõe n maane?

¹⁸ Tʋʋm wʋsg la a Zeova rat n bobl kom-bɩɩsã. Yãmb sã n sɩd rat ne y sũur fãa n tũ a Zeova y bi-bɩɩlmã wakate, bɩ y sak tʋʋm-kãense. Yaa masã la y segd n yãk yam-sõma sẽn na n sõng-y tɩ y wa paam sũ-noog a Zeova tũubã pʋgẽ.—Yɩɩl 148:12, 13.

¹⁹ La sã n mik tɩ so-pakrã yamleoog ket n pa tar yãmba, bõe la y tõe n maane? Bɩ y ket n modgd sẽn na yɩl n bɩɩs y tẽebã. Tʋm-tʋmd a Poll yeelame: “Yãmb sã n tar tagsg a to, Wẽnnaam na vẽneg yãmb ne bõn-kãng me. La baoosgo, tõnd sẽn tõog tɛka, bɩ d kell n kẽn wa sẽn zemse.” (Fil. 3:15, 16) Yaa woto la yẽ mengã maan sẽn na yɩl n paam a Zeova barkã. Ra yĩm-y t’a Zeova nonga yãmb ye. A saglsã me ka to ye. Bɩ y bas t’a sõng-y tɩ y bãng n yãk yam-sõma y bi-bɩɩlmã wakate.