A Zeova yaa tõnd sõangda, la d koagenda
“Mam na n fãaga yẽnda, tɩ bõe, yẽ nonga maam. Mam na n [“kogla,” MN] yẽnda, tɩ bõe, yẽ mii mam yʋʋre.”—YƖƖL 91:14.
1, 2. Bõe n kɩt tɩ d yaa toor-toore?
A ZEOVA n yaa sabab tɩ zak beẽ. (Ef. 3:14, 15, MN) La baa d sã n yaa zak a ye neba, d zʋgã la yɛl nins d sẽn segã pa yembr ye. Tõe tɩ y vɩɩmda ne y roagdbã hal y yãadmẽ n tãag y bɩʋʋngo. Tõe tɩ bãaga, sãmpogr bɩ bũmb a to n kʋ kẽer roagdb tɩ b ket n paoodẽ. Sãnda pa mi b roagdbã meng ye.
2 Tõnd sẽn yaa a Zeova zakã nebã, d sẽn bãng sɩdã to-to wã me pa yembr ye. Tõe tɩ y roagdbã zãms-y-la Wẽnnaam noyã hal y yãadmẽ. (Tõo. 6:6, 7) Pa rẽ bɩ y naaga neb tusa nins sẽn bãng sɩdã koe-moonegã maasem yĩngã sʋka.—Rom 10:13-15; 1 Tɩm. 2:3, 4.
3. Bõe n kɩt tɩ d fãa yaa a ye?
3 Baa bũmb nins yell d sẽn gomã sẽn kɩt tɩ d yaa toor-toorã, bũmb n kɩt tɩ d fãa yaa a ye. A Ãdem sẽn kɩɩs Wẽnnaamã kɩtame tɩ d fãa yaa koangdba, n maand yel-wẽn la d kiidẽ. (Rom 5:12) Baasgo, d sẽn yaa kiris-neb hakɩka, d tõe n boola a Zeova tɩ “tõnd Ba.” Ezai 64:7 wilgame tɩ Wẽnnaam pĩnd wẽndẽ nin-buiidã yeel-a-la woto: “Zu-soaba, yãmb yaa tõnd ba.” Sẽn paase, a Zezi sẽn wa n na n zãms a karen-biisã pʋʋsgã, a yeela woto: “Tõnd Ba sẽn be [“saasẽ,” MN], tɩ yãmb yʋʋr yɩ ne waoogre.”—Mat. 6:9.
4, 5. Sẽn na yɩl n maneg n nong d saasẽ Ba a Zeova, bõe yell la d na n gome?
4 D sẽn yaa d Ba sẽn be saasẽ wã Kaset rãmbã, a geta d yell la a kogend-do. Yɩɩl-gʋlsdã wilgame t’a yeela woto: “Mam na n fãaga [ned ning sẽn tũud maam], tɩ bõe, yẽ nonga maam. Mam na n [“kogla,” MN] yẽnda, tɩ bõe, yẽ mii mam yʋʋre.” (Yɩɩl 91:14) Tõnd Wẽnnaam a Zeova fãagda a nin-buiidã b bɛɛbã nusẽ la a kogend-ba, sẽn na yɩl tɩ b ra sãam-b ye.
5 Sẽn na yɩl n maneg n nong d saasẽ Ba a Zeova, d na n goma bũmb a tãab yelle: 1) D Ba wã yaa d Sõangda, 2) a yaa d Koagenda, la 3) a yaa tõnd Zoa hakɩka. D sã n wa gomd bõn-kãens yelle, yɩta sõma tɩ d bʋgs tõnd ne Wẽnnaam zoodã zugu, la d bao n bãng d sẽn tõe n waoog-a to-to. Yɩta sõma me tɩ d tagsd bark nins a Zeova sẽn pʋlem a zo-rãmbã yelle.—Zak 4:8.
A ZEOVA YAA D SÕANGDA
6. Bõe yĩng tɩ d tõe n yeel tɩ “kũun-sõma fãa” yita a Zeova nengẽ?
6 Karen-biig a Zak yeela woto: “Bark sõma fãa la kũun-sõma fãa yita yĩngr vẽenem Ba nengẽ n sigda.” (Zak 1:17) Wala makre, vɩɩmã yaa kũun sẽn yaa kãseng a Zeova sẽn kõ tõndo. (Yɩɩl 36:10) D sã n maan Wẽnnaam raabã d vɩɩmã tõre, d paamda bark wʋsg masã tɛka, la vɩɩm sẽn kõn sa dũni-paalgã pʋgẽ. (Yel. 10:22; 2 Pɩɛ. 3:13) La a Ãdem yel-wẽndã sẽn kɩt tɩ d lebg koangdb n beegdẽ la d kiidẽ wã, bõe la Wẽnnaam maan tɩ d tõe n paam bark-kãensã?
7. Bõe la Wẽnnaam maan tɩ d tõe n yɩ a zoa?
7 A Zeova sẽn maan bũmb nins n sõng tõndã pa tõe n sõdg n sa ye. Wala makre, a sẽn yaa nimbãan-zoɛtã yĩng kɩtame t’a pa bas tõnd ye. Yaa sɩd tɩ tõnd fãa sẽn yaa a Ãdem ne a Hawa yagensã, d yaa koangdba, n maand yel-wẽna. (Rom 3:23) La a Zeova sẽn nong ninsaalbã yĩnga, a maana bũmb tɩ d tõe n yɩ a zoa. Tʋm-tʋmd a Zã yeelame: “Wẽnnaam sẽn tʋm bãmb Biigã sẽn ka to dũniyã pʋgẽ tɩ tõnd paam vɩɩm bãmb maasem yĩngã wilgdame tɩ bãmb nonga tõndo. La nonglem-kãng ka tõnd sẽn nong Wẽnnaam ye, yaa bãmb n nong tõndo, n tʋm bãmb Biigã tɩ b yɩ maoong tõnd yel-wẽnã yĩnga.”—1 Zã 4:9, 10.
8, 9. A Abrahaam la a Izaak wakatẽ wã, wãn to la a Zeova wilg t’a yaa Sõangda? (Ges-y sõsgã sɩngrẽ fotã.)
8 Na maan yʋʋm 1800 nand t’a Zezi roge, a Abrahaam maana bũmb tɩ wilgd bũmb ning a Zeova sẽn da na n wa maan tɩ wẽn-sakdbã fãa paam vɩɩm sẽn kõn sa. Hebre dãmb 11:17-19 yeela woto: “Ne tẽebo, a Abrahaam da paama kãabgo, la b sẽn mak yẽ t’a kõ a Izaak tɩ yɩ maoongã, a kõo a meng bi-yendã. Wẽnnaam da kãaba a Abrahaam n yeele: ‘Yaa a Izaak pʋgẽ la mam na n geelg fo yagensã.’ A Abrahaam tẽeme tɩ Wẽnnaam tara pãng tɩ vʋʋg kũum. Woto me, yẽ sẽn leb n deeg a biigã, wẽnda wa kũum vʋʋgre.” Wa a Abrahaam sẽn da sak n na n dɩk a bi-ribl a Izaak n kõ tɩ yɩ maoongã, a Zeova sak n dɩka a Bi-ribl a Zezi Kirist n kõ ninsaalbã fãagr yĩnga.—Karm-y Zã 3:16, 36.
9 A Zeova kõo pe-raoog tɩ b kʋ a Izaak zĩigẽ. Yaa vẽeneg t’a Izaak sẽn wa n bãng tɩ b pa na n kʋ-a wã, a sũur yɩɩ noogo. (Sɩng. 22:10-13) Pa lingr la a Abrahaam sẽn pʋd zĩ-kãng yʋʋr t’a “Zeova ziire,” sẽn dat n togs ne hebre t’a “Zeova na n gesame” wã ye.—Sɩng. 22:14, MN.
A ZEOVA PAKA SOR TƖ NEBÃ TÕE N MANEG B YELL NE-A
10, 11. Ãnd dãmb n lʋɩ taoor ‘paasg tʋʋmdã’ pʋgẽ, la tʋʋm-kãng yaa bõe?
10 D sã n bʋgs bũmb nins fãa a Zeova sẽn kõt tõndã zugu, d bãngdame tɩ sã n pa a Zezi sẽn ki tɩ yɩ maoongã, d ra pa tõe n lebg Wẽnnaam zo-rãmb ye. Tʋm-tʋmd a Poll yeelame yaa: “Tõnd sẽn mi sɩd tɩ yembr sã n ki nebã fãa yĩnga, dẽ, fãa yaa kũum. Bãmb kii nebã fãa yĩnga, tɩ neb nins sẽn vɩ wã kõn vɩ b mens yĩng yɛs ye, la b na vɩ sẽn ki-a bãmb yĩng n yaool n vʋʋgã yĩnga.”—2 Kor. 5:14, 15.
11 Pipi kiris-nebã sẽn da paam n tũud Wẽnnaamã ra noom-b lame. Sẽn paase, b ra nong-a lame. Rẽ fãa kɩtame tɩ b sak ‘paasg tʋʋmdã’ sẽn yaa koe-moonegã ne yamleoogo. Koɛɛgã mooneg ne karen-biisã maaneg paka sor tɩ pʋ-peelem dãmbã tõog n maneg b yell ne Wẽnnaam, n lebg a zo-rãmba. B ra na n wa lebga a kamb saasẽ. Rũndã-rũndã, kiris-neb nins sẽn paam vʋʋsem sõng zaeebã tʋmda tʋʋm-kãnga. B yaa Wẽnnaam la Kirist tʋm-tʋmdba. B koe-moonegã kɩtame tɩ pʋ-peelem dãmbã wa a Zeova nengẽ, n maand a raabã.—Karm-y 2 Korẽnt dãmb 5:18-20; Zã 6:44; Tʋʋ. 13:48.
12, 13. Wãn to la d tõe n wilg tɩ d sũur nooma ne bũmb nins a Zeova sẽn kõt-dã?
12 Kiris-neb nins sẽn saagd n na n wa vɩɩmd tẽngã zugã sũur sẽn noom ne bũmb nins a Zeova sẽn maandã yĩnga, b sõngda sẽn paam-b vʋʋsem sõng zaeebã n moond koe-noogã. Biiblã sẽn yaa kũun sẽn yɩt Wẽnnaam nengẽ wã sõngda tõnd koe-moonegã pʋgẽ. (2 Tɩm. 3:16, 17) Koe-moonegã sasa, d sã n karemd Biiblã n wilgd a võor sõma, tõe n sõnga d kɛlgdbã tɩ b wa paam vɩɩm sẽn kõn sa wã. A Zeova kõta tõnd a vʋʋsem sõngã me. Koɛɛgã mooneg pʋgẽ, tõnd fãa baooda vʋʋsem sõngã sõngre. (Zak. 4:6; Luk 11:13) Tõnd koe-moonegã womda biis wʋsgo. Yʋʋmd fãa, b sã n yiis Annuaire des Témoins de Jéhovah wã, d nee rẽ vẽenega. D sẽn paam n naagd n tʋmd tʋʋm-kãngã sẽn waoogd d Ba la d Sõangdã pa noom-d sɩda?
13 Wẽnnaam sẽn maan bũmb wʋsg n kõ tõndã, yɩta sõma tɩ d ned kam fãa sok a meng woto: ‘Mam maanda m sẽn tõe fãa koɛɛgã mooneg pʋgẽ, n wilgd a Zeova tɩ m sũur nooma ne bũmb nins a sẽn kõt-dã bɩ? Bõe la m tõe n maan n paas m minimã koe-moonegã pʋgẽ?’ Yaa d sẽn na n lʋɩɩsd Rĩungã yɛl taoor la d wilgd tɩ d sũur nooma ne bũmb nins a Zeova sẽn kõt-dã. D sã n maand woto, a Zeova na n sõng-d lame tɩ d paam bũmb nins sẽn yaa tɩlae ne-dã. (Mat. 6:25-33) Wẽnnaam sẽn nong tõnd woto wã, tõnd me rat n maana d sẽn tõe n ta a yam, n noog a sũuri.—Yel. 27:11.
14. Wãn to la a Zeova wilg t’a yaa a nin-buiidã fãagda?
14 Yɩɩl-gʋlsd a Davɩɩd yeela woto: “Mam yaa naong soab la nimbãan-neda, la Zu-soabã tagsda mam yelle. Yãmb yaa mam sõangd la mam fãagda.” (Yɩɩl 40:18) A Zeova wilga naoor wʋsg t’a yaa a nin-buiidã sõangda, sẽn yɩɩd fãa, b bɛɛbã sã n wa namsd-ba. Zu-loees a woto wakate, a Zeova kõta tõnd bũmb nins fãa sẽn yaa tɩlae sẽn na yɩl tɩ d kell n sak-a. Y sũur pa noom ne rẽ sɩda?
A ZEOVA KOGENDA TÕNDO
15. Togs-y ba sẽn fãag a biig to-to.
15 Ba sẽn nong a kamb pa kõt-b bũmb nins sẽn yaa tɩlae ne-bã bal ye. A kogend-b lame me. B sã n wa be yell pʋgẽ, a yɩta tao-tao n fãag-ba. Saam-biig a ye tẽega a ba wã sẽn fãag-a to-to a sẽn wa n ket n yaa bi-bilfu. A yeelame tɩ yẽ ne a ba wã ra tɩ moona koɛɛgã n lebg n kuiisẽ, n wa ta kʋɩlg noore. Daar-n-kãng yibeoogo, saagã nii wʋsgo, tɩ kʋɩlgã koom puugi. Kug-bɛd n da be koomã pʋgẽ, tɩ b segd n tab n looge. La kugã ra zãra taab bilfu. Biigã lʋɩ a ba wã taoore, n yɩgd n longd kugã. A wa n salgame n lʋɩ koomẽ wã, n bõr n lebg n puk naoor a yi. A ba wã yɩɩ tao-tao n gãd a bãokã, n yiis-a koomẽ wã. Yaa vẽeneg tɩ biigã sũur yɩɩ noog a ba wã sẽn fãag-a tɩ koomã pa rɩ-a wã. Woto me, tõnd saasẽ Ba wã kogenda tõnd ne zu-loees nins dũni-kãngã ne a naabã sẽn yaa a Sʋɩtãanã sẽn wat ne wã. Ninsaal wall malɛk pa be n tõe n kogl tõnd wa a Zeova ye.—Mat. 6:13; 1 Zã 5:19.
16, 17. Israyɛll nebã sẽn wa n na n zab ne Amalɛk nebã, wãn to la a Zeova sõng-ba?
16 Yʋʋmd 1513 sẽn deng a Zezi rogmã, a Zeova fãaga a nin-buiidã. Rẽ t’a ra yiis-b-la Ezipt yembdẽ wã, n maan yel-solemd n kogl-b tɩ b pasg mog-miuugã. B sẽn wa n pasgd rasempʋɩɩgã n dabd Sinayi tãngẽ wã, b wa n taa Refidim.
17 A Sʋɩtãan sẽn da tagsd tɩ Israyɛll nebã pa tar koglgã, yaa vẽeneg t’a ra rata ne a sũur fãa n zab ne-b sẽn na yɩl tɩ Sɩngr 3:15 bãngr-gomdã ra pids ye. A tũnuga ne Amalɛk nebã sẽn da yaa Wẽnnaam nin-buiidã bɛɛbã, n zab ne-ba. (Sõd. 24:20) Wãn to la a Zeova tũnug ne a Zozue, a Moiizi, a Aarõ la a Huur n fãag a nin-buiidã? A kɩtame t’a Zozue lʋɩ Israyɛll sodaasã taoore, tɩ b tɩ zab ne Amalɛk nebã. Zabrã sasa, a Moiiz ne a Aarõ la a Huur da bee tãn-bil sẽn da pẽ be zugu. A Moiiz sã n da zẽk a nusã, a Zeova sõngda Israyɛll nebã tɩ b tõogd b bɛɛbã. A Moiiz sẽn wa n ya wã, a Aarõ ne a Huur gãda a nusã. Woto, ne a Zeova sõngre, “a Zozue tõoga Amalɛk nebã.” (Yik. 17:8-13) Rẽ poore, a Moiiz mee tẽn-kugr be, n pʋd a yʋʋr t’a “Zeova nisi,” sẽn dat n togs ne hebre t’a “Zeova yaa mam zĩ-lilldga.”—Karm-y Yikr 17:14, 15.a
A ZEOVA FÃAGDA A NIN-BUIIDÃ A SƲƖTÃAN NUGẼ
18, 19. Rũndã-rũndã, bõe la a Zeova maand n kogend tõndo?
18 A Zeova kogenda neb nins sẽn nong yẽ la b sakd-a wã. Wa Israyɛll nebã sẽn teeg Wẽnnaam Refidimã, tõnd me bɛɛbã sã n wa zabd ne-do, d teegd-a lame. Sɩd me, a Zeova wae n kogend-d lame, n fãagd-d a Sʋɩtãan nugẽ. Naoor wʋsgo, b sã n wa namsd tõnd saam-biis b sẽn pa sak n kẽes b toog dũniyã politikã la a zabã pʋsẽ wã, a kogend-b lame. Yɩɩ woto wakat ning nazi-rãmbã sẽn wa n dɩt naam Alemayn la tẽns a taab pʋsẽ wã. Gũusg Gasgã, Réveillez-vous ! wã la aniyɛɛr-dãmbã pʋsẽ, kibay n wae n be be n togsd Wẽnnaam sẽn kogl d tẽed-n-taas to-to. D sã n karemd kiba-kãens la d bʋgsd rẽ zugu, na n kɩtame tɩ d maneg n kɩs sɩd t’a Zeova yaa d zĩ-lilldga.—Yɩɩl 91:2.
A Zeova tõe n tũnuga ne d tẽed-n-taasã n sõng tõnd toog wakate (Ges-y sull 18-20)
19 A Zeova tũnugda ne a siglgã la sɛb nins siglgã sẽn yiisdã, n kõt-d sagls tɩ kogend-do. Y pa ne tɩ sagl-kãens nafda tõnd rũndã-rũndã sɩda? Dũniyã neb maneg n kẽeda yoobã, rãamã yũub la yoobã yɛl gesg pʋgẽ. La a Zeova kõta tõnd sagls sẽn zems b wakate, tɩ sõngd tõnd tɩ d pa maand bũmb sẽn sãamd a sũur ye. Wala makre, yʋʋmã noorã, d saasẽ Ba wã sagend-d lame tɩ d sã n wa kẽ ẽntɛrnetã pʋgẽ bɩ d gũus n da wa yõg zood ne nin-wẽns ye.b—1 Kor. 15:33.
20. Wãn to la d paamd koglg la sor-wilgr d tigimsã pʋsẽ?
20 Wãn to la d tõe n wilg tɩ d sɩd yaa a Zeova karen-biisi? Yaa d sẽn na n tũud a noyã. (Ezai 54:13) D tigimsã pʋsẽ, d paamda koglg la sor-wilgri. Kãsem-dãmbã sõngda tõnd la b kõt-d sagls sẽn yit Biiblã pʋgẽ. (Gal. 6:1) Ne nin-kãensã sẽn yaa “kũun sẽn yaa nebã” maasem, a Zeova geta tõnd yell sõma. (Ef. 4:7, 8, MN) Woto wã, kãsem-soab sã n kõ-d saglga, d manesem segd n yɩɩ wãna? D segd n saka ne yamleoogo. D sã n maan woto, a Zeova na n ning-d-la barka.—Heb. 13:17.
21. a) Bõe la d na n modg n maane? b) Bõe yell la d na n gom sõsg ning sẽn pʋgdã pʋgẽ?
21 Bɩ d modg n sak vʋʋsem sõngã sor-wilgrã, tɩ rẽ la d tũud d saasẽ Ba wã sor-wilgri. D segdame me n bʋgsd a Bi-ribl a Zezi Kirist vɩɩmã zugu, la d modg n dɩk a togs-n-taare. A sẽn kell n sak a Ba wã n tãag kũumã, a paama keoor sẽn yaa kãsenga. (Fil. 2:5-11) Tõnd me sã n teeg a Zeova ne d sũur fãa, d na n paama barka. (Yel. 3:5, 6) Bɩ d kell n teeg-a wakat fãa, a sẽn yaa d Sõangd la d Koagend sẽn pa tar mak-n-taagã. D sẽn paam n tũud-a wã noom-d-la wʋsgo. La wãn to la a Zeova yaa tõnd zoa hakɩka? D na n leoka sok-kãngã sõsg ning sẽn pʋgdã pʋgẽ. Rẽ na n kɩtame tɩ d maneg n nong-a.
a Traduction du monde nouveau wã pʋgẽ, Yikr 17:15 yeta woto: “Dẽ, a Moiiz mee tẽn-kugri, n pʋd a yʋʋr t’a Zeova nisi.”
b Wala makre, y tõe n gesa yʋʋmd 2011 sa-sik kiuug rasem 15 Gũusg Gasgã neng a 3-5, n karem sõsg ning gom-zug sẽn yaa: “ Bien utiliser Internet. ” Y tõe n gesa yʋʋmd 2012 sa-sik kiuug pipi daar Gũusg Gasgã neng 23-32 me, n karem sõs nins gom-zut sẽn yaa: “Gũus-y ne a Sʋɩtãan bẽdsã!” la “Modg-y n gil-y-yã a Sʋɩtãan bẽdsã!”