Bõe la a Zeova maan tɩ wilgdẽ t’a nonga tõndo?

1. Tʋm-tʋmd a Zã sagla kiris-nebã tɩ b maan bõe, la bõe yĩnga?

TƲM-TƲMD a Zã sagla kiris-nebã tɩ b tagsd a Zeova sẽn nong tõnd to-to wã yelle. A yeela 1 Zã 3:1 pʋgẽ woto: “Ges-y nonglem ninga d ba wã sẽn nong tõndã”! D sã n bʋgsd a Zeova sẽn nong tõnd to-to wã zugu, la bũmb nins a sẽn maan tɩ wilgdẽ t’a nonga tõndã zugu, tõnd ne yẽ zoodã pãng na n paasdame.

2. Bõe yĩng tɩ neb kẽer pa tagsd tɩ Wẽnnaam nong-b lame?

² La neb kẽer pa tagsd tɩ Wẽnnaam nonga ninsaalbã ye. Sã n yaa ne bãmba, d segd n zoee Wẽnnaam la d sak-a bala. B sẽn zãms sãnda bũmb wʋsg sẽn pa sɩd Wẽnnaam zugã kɩtame tɩ b tagsdẽ t’a yaa toolem soaba, la tɩ ned pa tõe n nong-a ye. La neb n be n tẽed tɩ Wẽnnaam nonga ninsaalbã fãa, la tɩ rẽ pa be ne b manesem wall b tʋm-tʋmdɩ ye. La yãmb sẽn zãms Biiblã, y bãngame t’a Zeova yaa nonglem, la tɩ yaa a sẽn nong tõndã yĩng la a sẽn tʋm a Bi-riblã t’a wa ki tɩ yɩ maoong tõnd yĩngã. (Zã 3:16; 1 Zã 4:8) Baasgo, d sẽn yã wubr ningã, wall zu-loees nins d sẽn segã tõe n kɩtame tɩ d pa mi a Zeova sẽn nong tõnd to-to wã sõma ye.

3. Sẽn na yɩl n bãng a Zeova sẽn nong tõnd to-to wã, bõe la d segd n tẽege?

³ La wãn to la a Zeova nong tõndo? Sẽn na yɩl n paam sok-kãngã leoore, d segd n tẽegame tɩ yaa Wẽnnaam a Zeova la Naandã. Yẽ n naan ninsaalbã fãa. (Karm-y Yɩɩn-sõamyã 100:3-5.) Yaa rẽ la Biiblã sẽn yeel tɩ d yaab a Ãdem “yaa Wẽnnaam biigã.” A Zeezi me yeelame tɩ d bool a Zeova tɩ “tõnd ba” sẽn be saasẽ. (Luk 3:38; Mat. 6:9) Sẽn yaa a Zeova n naan tõndã, a yaa d ba, n nong tõnd wa ba sẽn nong a kamb to-to wã.

4. a) Bõe n kɩt t’a Zeova yaa toor ne ba-rãmb a taabã? b) Bõe yell la d na n gom sõs-kãngã pʋgẽ, la sẽn pʋgd-a wã pʋgẽ?

⁴ La ninsaalbã sẽn pa zems zãngã, ba ka be n tõe n dɩk a Zeova togs-n-taar nonglmã wɛɛngẽ tɩ zems kɛpɩ ye. Sɩd me, neb kẽer ba-rãmb nams-b-la b yãadmẽ, tɩ hal baa masã bɩ b mi n tẽeg tɩ sãamd b sũuri. La a Zeova pa maand a kambã woto ye. A yaa ba sẽn ka to. (Yɩɩn. 27:10) A nonga tõnd wʋsgo, n maand bũmb toor-toor n get d yelle. D sã n bãng a Zeova sẽn nong tõnd to-to wã sõma n paase, tõnd me na n maneg n nong-a lame. (Zak 4:8) Sõs-kãngã pʋgẽ, d na n yãa bũmb a naas a Zeova sẽn maan tɩ wilgdẽ t’a nonga tõndo. Sõsg ning sẽn pʋgdã na n wilga bũmb a naas d sẽn tõe n maan n wilg tɩ tõnd me nong-a lame.

A ZEOVA KÕTA TÕND BŨMB FÃA NE NONGLEM

5. Bõe la tʋʋm-tʋʋmd a Poll yeel Atɛn nebã?

⁵ Tʋm-tʋmd a Poll sẽn wa n be Atɛn sẽn be Gɛrɛs soolmẽ wã, a gũusame n mik tɩ tẽngã pida ne bõn-naands nebã sẽn da maan n pʋʋsdẽ, la b tẽed tɩ yaa bõn-naands kãens n naan bãmba. Rẽ n so t’a Poll yeel-b woto: “Wẽnnaam ning sẽn naan-a dũni wã ne bũmb nins fãa sẽn be a pʋgẽ wã . . . n kõt ninsaalbã vɩɩm, la vʋʋsem, la bũmbã fãa. . . . Yaa bãmb pʋg la d tar vɩɩm, la d tõe n kẽne la d beẽ.” (Tʋʋ. 17:24, 25, 28) Vẽenega, yaa a Zeova sẽn nong tõndã la a sẽn kõ-d bũmb nins fãa d sẽn dat sẽn na yɩl tɩ d vɩɩmã yɩ noogã. D gom bũmb nins a sẽn kõ-dã kẽer yelle.

6. Bõe yĩng tɩ d tõe n yeel tɩ Wẽnnaam sẽn naan tẽngã to-to wã wilgdame t’a nonga tõndo? (Ges-y sõsgã sɩngrẽ fotã.)

⁶ D gom tẽngã yelle. A Zeova naan-a-la sõma n “kõ ninsaalbã.” (Yɩɩn. 115:15, 16) Siãnsã bãngdb yiisda ligd wʋsg n vaeesd ãndũniyã, n dat n bãng zĩis a taab sã n beeme n wõnd tẽngã. La hal baa rũndã, b pa yã zĩig sẽn wõnd tẽngã tɩ ninsaal tõe n vɩɩmd a zug ye. Ãndũniyã gill pʋgẽ, tẽngã pa tar to ye. A Zeova pa kõ tõnd bũmb nins sẽn yaa tɩlɛ ne d vɩɩmã bal ye. A naana tẽngã bũmb fãa tɩ zemse, tɩ d tõe n vɩɩmd a zug ne sũ-noogo, n pa yɛɛsdẽ me ye. (Eza. 45:18) D sã n tags a Zeova sẽn naan tẽngã to-to n kõ-dã yelle, d yãta vẽeneg t’a sɩd nong-d-la wʋsgo.—Karm-y Zoob 38:4, 7; Yɩɩn-sõamyã 8:4-6.

7. Bõe yĩng tɩ d tõe n yeel tɩ Wẽnnaam sẽn naan tõnd to-to wã wilgdame t’a nonga tõndo?

⁷ Baa a Zeova sẽn naan tẽngã t’a yaa sõma wʋsgã, a miime tɩ sẽn na yɩl tɩ d vɩɩmã sɩd yɩ noogo, rɩɩb la teed bal pa sek ye. Biig sã n miẽ t’a roagdbã nong-a lame n get a yelle, a yam gãee bãane. A Zeova naana tõnd a meng wẽnego, tɩ d tõe n bãng t’a nong-d lame, la d tõe n wilg tɩ tõnd me nong-a lame. (Sɩng. 1:27) Sẽn paase, a Zeezi yeela woto: “Ninsaal ka na n vɩ ne rɩɩb bal ye, la yaa ne goam nins fãa sẽn yit Wẽnnaam noorẽ wã.” (Mat. 4:4) A Zeova sẽn yaa tõnd ba sẽn nong-dã, a kõt-d-la “bũmb fãa tɩ seke, tɩ tõnd tõe n tall n maan sũ-noog ne.”—1 Tɩm. 6:17; Yɩɩn. 145:16.

A ZEOVA SÕNGDA TÕND TƖ D BÃNGD SƖDÃ

8. Bõe yĩng tɩ d rat t’a Zeova zãms-do?

⁸ Ba-rãmbã nonga b kambã, n pa rat tɩ ned belg-ba, wall a tudg-b ye. La rũndã-rũndã, roagdb wʋsg pa tũud noy nins Biiblã sẽn kõ sõma ne wẽngã wɛɛngẽ wã ye. Rẽ kɩtame tɩ b pa tõe n wilg b kambã sor tɩ zems ye. Woto mi n waa ne zũnd-zãnd la sũ-sãams zagsã pʋsẽ. (Yel. 14:12) La a Zeova “yaa sɩd Wẽnnaam.” (Yɩɩn. 31:6) A nonga a kambã, n sõngd-b ne yamleoog tɩ b bãngd sɩdã, la a wilgd-b sor b vɩɩmã nens fãa pʋsẽ, sẽn yɩɩd fãa, tũudmã wɛɛngẽ. (Karm-y Yɩɩn-sõamyã 43:3.) La bõe la a Zeova sõng tõnd tɩ d bãnge? Wãn to la rẽ wilgd t’a nonga tõndo?

9, 10. a) Bõe yĩng t’a Zeova sõng tõnd tɩ d bãng sɩdã yẽ mengã zugu? b) Bõe la a sõng tõnd tɩ d bãng tõnd mengã zugu?

⁹ Pipi, a Zeova sõngda tõnd tɩ d bãngd sɩdã yẽ mengã zugu. A ratame tɩ d bãng-a sõma, n tõog n lebg a zo-rãmba. (Zak 4:8) Rẽ n so t’a wilg tõnd a yʋ-peellã. Sɩd me, yʋy nins sẽn be Biiblã pʋgẽ wã sʋka, Zeova wã sõor n yɩɩda. A Zeova wilga tõnd a sẽn yaa Wẽnnaam ning buudã me. D sã n maag d yĩng n ges bũmb nins a sẽn naanã, d bãngdame t’a yaa pãn-kãseng soaba, la yam soaba. (Rom. 1:20) D sã n karemd Biiblã, d yãtame t’a Zeova yaa tɩrga, la t’a sɩd nonga tõnd hal wʋsgo. D sã n bãngd a Zeova n paasdẽ, tõnd ne yẽ zoodã pãng me na n paasdame.

¹⁰ A Zeova leb n sõnga tõnd tɩ d bãng sɩdã tõnd mengã zugu. A yeelame tɩ tõnd tara yõod a siglgã pʋgẽ. Rẽ kɩtame tɩ d tõe n sõng tɩ laafɩ la bãan zĩnd a zakã rãmb fãa sʋka. Biiblã wilga vẽeneg tɩ Wẽnnaam pa naan tõnd tɩ d tõe n bãng n yãk sẽn yaa sõma la sẽn yaa wẽng d toor ye. (Yel. 20:24) A Zeova n mi bũmb ning sẽn na n naf tõndã n yɩɩda. Rẽnd yaa d sã n sak t’a soog-do, la d maand a raabã bal la d na n tõog n vɩɩmd ne laafɩ, tɩ d vɩɩmã me tall barka. Yaa a Zeova sẽn nong tõndã yĩng la a sẽn sõng tõnd tɩ d bãng rẽ wã.

11. Bõe la a Zeova pʋlem tõnd tɩ wilgdẽ t’a nonga tõndo?

¹¹ Ba sẽn nong a kamb tagsda b beoog vɩɩmã yelle, n dat tɩ b wa paam vɩɩm sẽn tar barka. Zu-bʋko, nebã fãa la bal maanda yɩɩr ne beoog yelle, wall b sãamd b sẽkã, n baood bũmb toor-toor sẽn pa na n naf-b n kaoos ye. (Yɩɩn. 90:10) Tõnd sẽn yaa Wẽnnaam a Zeova kambã, d miime t’a nonga tõndo. Bala, a pʋlma tõnd vɩ-noogo. Rẽ kɩtame tɩ d vɩɩmã tar bark rũndã-rũndã menga.

A ZEOVA SAGENDA A KAMBÃ, LA A KIBIND-BA

12. Wãn to la a Zeova sẽn sagl a Kayẽ la a Barukã wilg t’a ra nong-b lame, n dat b neere?

¹² A Zeova sẽn wa n yã t’a Kayẽ rat n maana bũmb sẽn yaa wẽng wʋsgã, a baoome n na n sõng-a, n soka woto: “Yaa bõe tɩ fo puugd f sũur woto tɩ f neng gãneme? Fo sã n maan sẽn yaa sõama, f na n tõog n zẽka f zugu.” (Sɩng. 4:6, 7) Zu-bʋko, a Kayẽ pa reeg a Zeova saglgã ye. A maana wẽnga, n paam zu-loeese. (Sɩng. 4:11-13) Kaoosg zugẽ, a Zeova wa n yãame t’a Zeremi tʋmd-n-taag a Baruk komsa raoodo, la tɩ yaa tags-kɛg n wa ne rẽ. A Zeova yeela a Baruk t’a tagsa wã pa zemse, la t’a segd n toeemame. A Baruk reega a Zeova saglgã, tɩ yɩ sabab t’a põs kũum.—Zer. 45:2-5.

13. Bõe yĩng t’a Zeova mi n bas tɩ toog paam ned sẽn tũud-a?

¹³ A Poll yeela woto: “Zu-soabã sɩbgda [“kibinda,” MN] ned ning bãmb sẽn nonge, la b sɩbgda biig ning fãa bãmb mengã sẽn sak n deeg wa b biigã ne dasaare.” (Ebre. 12:6) La kiblg pa sɩbgr bal ye. Bũmb toor-toor la b tõe n maan n kibl neda. Biiblã gomda wẽn-sakdb sẽn seg zu-loe-kɛgems yelle, t’a Zeova tũnug ne rẽ n kibl-ba, tɩ b paam zʋg-sõma. Wala makre, a Zozɛfe, a Moyiizi, la a Davɩɩde. D sã n karemd b kibayã, d yãtame t’a Zeova kell n zĩnda ne-ba. Sẽn paase, d yãtame tɩ b rɩka yam b zu-loeesã pʋgẽ, tɩ sõng-b tɩ b tõog n tʋm tʋʋm-kãsems a Zeova sẽn wa n bobl-ba. Woto fãa wilgdame t’a Zeova nonga a nin-buiidã, n get b yelle.—Karm-y Yel-bũn 3:11, 12.

14. Ned sẽn tũud a Zeova sã n wa maan yel-wẽnde, bõe la a Zeova maand tɩ wilgdẽ t’a nonga tõndo?

¹⁴ Bũmb a to me n kɩt tɩ d neẽ t’a Zeova sẽn kibind tõndã yaa a sẽn nong-dã yĩnga. Ned sẽn tũud a Zeova sã n wa maan yel-wẽnde, a kibinda a soabã, t’a sã n tek yam n kos sugri, bɩ a zoe a nimbãanega, n kõ-a sugri. (Eza. 55:7) A Davɩɩd sẽn gom a Zeova sẽn kõt sugr to-to wã yellã wilgdame t’a yaa ba sẽn zoet d nimbãanega. A yeela woto: “Bãmb n kõt maam sugr m beegrã fãa yĩnga, bãmb n maagd mam bãasã fãa. Bãmb n fãagd maam ne yaoogo, la b wilgd maam b nonglem ne b nimbãan-zoeere. Yaang ne nin-taoor sẽn zãr ne taab to-to wã, Sẽn-Ka-Saab zãagda tõnd ne d beegrã me a woto.” (Yɩɩn. 103:3, 4, 12) Bɩ d fãa kelgd a Zeova saglsã, tɩ baa a sã n wa kibl-d bɩ d sak n deege, n wilg tɩ d miime tɩ rẽ yaa kaset t’a nonga tõnd wʋsgo.—Yɩɩn. 30:6.

A ZEOVA KOGENDA TÕNDO

15. Bõe n wilgd t’a Zeova nin-buiidã tara yõod wʋsg ne-a?

¹⁵ Rao sẽn nong a zak rãmb maanda a sẽn tõe fãa n kogend-ba. Tõnd ba a Zeova me kogenda tõndo. Yɩɩn-gʋlsdã goma a Zeova yelle, n yeel woto: “Bãmb kogenda b nin-nongdsã vɩɩm, la b fãagd bãmb nin-wẽns nusẽ.” (Yɩɩn. 97:10) D rɩk makre. Bũmb sã n dat n tuk y nifu, y na n yɩɩ tao-tao n pĩ nifã, bala y nifã tara yõod wʋsg ne-yã. Bũmb sã n dat n paam a Zeova nin-buiidã, yẽ me yɩta tao-tao n kogl-ba, b sẽn tar yõod wʋsg ne-a wã yĩnga.—Karm-y Zakari 2:12.

16, 17. Bõe la a Zeova maan pĩnd wẽndẽ n kogl a nin-buiidã, la bõe la a maand rũndã-rũndã n kogend-ba?

¹⁶ A Zeova mi n tũnuga ne a malɛgsã n kogl a nin-buiidã. (Yɩɩn. 91:11) Yʋn-yɛnga, malɛk n kʋ Asiiri tãb-biis 185000 sẽn da wa n na n zab n deeg Zeruzalɛm. (2 Rĩm. 19:35) Pipi kiris-nebã wakatẽ, malɛgs n yiis a Pɩyɛɛre, a Poll la neb a taab bãens rotẽ. (Tʋʋ. 5:18-20; 12:6-11) Sẽn nan pa kaoose, zabr n zĩnd Afirik tẽng a ye pʋgẽ. Zabrã sasa, b ra zaeeda nebã teedo, n yõgd pagbã la b kʋʋd nebã yaare. La tõnd tẽed-n-taag baa a ye pa ki ye. Baasgo, b wʋsg n bõn b paoongo. La b fãa kɩsa sɩd t’a Zeova nong-b lame, la t’a geta b yelle. Baa b sẽn nams wʋsgã, b sũy ket n yaa noogo. Tõnd biru-kãsengã tʋma saam-biig t’a tɩ kaag-ba. A yeelame tɩ yẽ sã n da seg d tẽeg-n-taag fãa n sok-a a keelem, a leokda woto: “Ne a Zeova sõngre, bũmb fãa yaa sõma!”

¹⁷ Yaa sɩd t’a Zeova mi n basame tɩ b kʋ ned sẽn sakd yẽ ne a sũur fãa, wa sẽn yɩ to-to ne karen-biig a Etɩɛnnã. La a kogenda a nin-buiidã fãa. A sõngd-b lame tɩ b bãngd a Sʋɩtãan sɩlmã, a sẽn pa rat t’a tõog n belg-bã yĩnga. (Efɛ. 6:10-12) Yaa ne a Gomdã, n paas sɛb nins a siglgã sẽn yiisdã maasem la a sõngd tõnd zĩ-kãng wɛɛngẽ. Wala makre, b sagend-d lame tɩ d gũus ne ẽntɛrnetã, ligdã nonglem, la ne filim-dãmba, sɛb la reem sẽn naag ne yoob yɛl la ne nen-kɛglmã. Rẽnd yaa vẽeneg t’a Zeova nonga tõndo, n dat n kogl-do.

BŨMB D SẼN PAAM TƖ YAA ZU-ZẼKRE

18. Yãmb tagsg yaa wãn ne y sẽn paam t’a Zeova nong-y-yã?

¹⁸ D sẽn yã bũmb a wãn a Zeova sẽn maan tɩ wilgdẽ t’a nonga tõndã poore, tõnd me tõe n yeela bũmb ning a Moyiiz sẽn da yeelã. A tagsa yẽ sẽn tũ a Zeova n kaoosã yelle, n yeel woto: “Kɩt-y tɩ tõnd tɩg ne yãmb nonglmã yibeoog fãa. Woto, tõnd na n kaasa ne sũ-noog d vɩɩmã tɛka.” (Yɩɩn. 90:14) D sẽn paam t’a Zeova nong-dã, n paas d sẽn mi a sẽn wilgd to-to t’a nonga tõndã yaa zu-zẽkre. Tõnd me tõe n yeela wa tʋm-tʋmd a Zã sẽn da yeelã. A ra yeela woto: “Ges-y nonglem ninga d ba wã sẽn nong tõndã”!—1 Zã 3:1.