SEBRÃ GOM-ZUG SÕSGÃ | A SƲƖTÃAN SƖD BEEME BƖ?
D segd n zoe a Sʋɩtãan bɩ?
F pa tõe n yã gaaz monoxyde de carbone ne nif ye. A yaool n kʋʋdame. D tõe n maka a Sʋɩtãan ne gaaz-kãngã
D rɩk makre: Gaaz buud n be (monoxyde de carbone) n tõe n kẽ ned t’a soab pa bãng ye. A pa tar yũugu, f pa tõe n yã-a ne nif me. Dũniyã gill zugu, wõnda neb nins zẽnem bɩ pozõnem buud toor-toor sẽn kʋ wã sʋka, sẽn yɩɩd pʋɩ-sʋkã fãa yaa gaaz-kãng n kʋ. La ra maan-y rabeem ye. Bũmb n be ned sẽn tõe n maan n kogl a meng ne gaaz-kãngã. Neb wʋsg ningda masĩn bõones b rotẽ wã, tɩ gaazã sã n kẽ bɩ masĩn-kãens maan bʋʋr tɩ b bãnge.
D tõe n maka a Sʋɩtãan ne gaaz-kãngã. Ninsaal pa tõe n yã a Sʋɩtãan ye. A tõe n maana ned wẽng t’a pa bãng ye. A wẽnemã me pa tõe n bãng n bilg ye. La Wẽnnaam maaname tɩ ne yẽ sõngr bɩ y tõe n mao t’a Sʋɩtãan da tõog-y ye. Y sã n sak a sõngrã, y pa tar bʋʋm n na n le zoe a Sʋɩtãan ye. Ad bũmb kẽer Wẽnnaam sẽn maan n na sõng-do:
A maaname tɩ ned fãa tõe n yãk a toorẽ yam: Zak 4:7 yeta woto: “Kɩɩs-y Sʋɩtãanã, la yẽ na zoe n bas yãmba.” Baa ne a Sʋɩtãan sẽn tar pãng wʋsgã, a pa tõe n modg-y tɩ y maan y sẽn pa rat ye. Yãmb n yãkde. Pipi Pɩɛɛr 5:9 yetame: “Bɩ y kɩɩs yẽnda [a Sʋɩtãan] n yals kãn-kãe tẽeb pʋgẽ.” Tẽeg-y t’a sẽn mak a Zezi naoor a tãab n pa tõogã, a loogame. (Matɩe 4:11) Yãmb me tõe n kɩɩsa a Sʋɩtãan t’a loog la a bas-yã.
Wẽnnaam kɩtame tɩ d tõe n paam a zoodo: Zak 4:8 sagenda tõnd tɩ d “kolg Wẽnnaam.” Dẽnd a Zeova yeta yãmb tɩ y bao yẽ zoodo. Y maanda wãn n lebg a zoa? Yaa y sẽn na n zãms Biiblã n bãng Wẽnnaam sõma. (Zã 17:3) Bũmb nins y sẽn na n bãngã na n kɩtame tɩ y nong-a, tɩ nonglem kãng kɩt tɩ y maan sẽn noom-a. (1 Zã 5:3) Y sã n modgd n dat n kolg Wẽnnaam, bõe la a na n maane? A Zak yeelame t’a ‘na n kolga yãmba.’
Wẽnnaam maana bũmb wʋsg n na n sõng-d t’a Sʋɩtãan ra tõog-d ye
A pʋlmame t’a na n kogla tõndo: Yelbũn 18:10 yetame: “Zu-soabã yʋʋr yaa wa gasg sẽn tar pãnga. Nin-tɩrg tõe n kẽe be tɩ bũmb da paam-a ye.” Woto pa rat n yeel tɩ Wẽnnaam yʋʋrã yaa wa tɩɩm buud sẽn tõe n kogl-y ye. Rat n yeelame tɩ sẽn yaa wakat ning fãa, sẽn waoogd-a Wẽnnaam yʋʋrã ne a sũur fãa tõe n bool-a lame t’a wa kogl-a.
A kõo makr tɩ be Biiblã pʋgẽ: Tʋʋm 19:19 togsda bũmb Efɛɛz neb sẽn lebg kiris-neb sẽn maane. Be b yetame: “Bãmb bag-bʋgdb wʋsg waa ne bãmb sɛb n wa yõog bugum nebã fãa taoore. La b geelga sɛbã ligdi n mik t’a yaa wanzuri ligd tus pis-nu.”a B sãama teed nins fãa b sẽn da tar n tʋmd zĩn-dãmb tʋʋmã, baa ne ligdã sẽn da pa zem-zemã. Yãmb me sã n maan wa bãmba, na n sõng-y-la wʋsgo. Dũniyã pida ne zĩn-dãmb tʋʋma. Baa teed bɩ yel-maandɩ sẽn wõnd ka tar yelle, n yaool n yaa zĩn-dãmb yɛl tõe n kɩtame tɩ zĩn-dãmbã paam-do. Yaa tɩlae tɩ y sãam te-kãensã, baa sẽn na n yɩ a soaba.—Tõodo 18:10-12.
A Rogelio yell d sẽn gom pipi sõsgã pʋgẽ wã taa yʋʋm 50 n ket n pa tẽed t’a Sʋɩtãan beeme ye. La a wa n toeema yam. Bõe yĩnga? A yeelame: “Yɩɩ wakat kãng la mam yaool n paam Biibli. Mam sẽn karem bũmb nins Biiblã pʋgẽ wã kɩtame tɩ m bãng vẽeneg t’a Sʋɩtãan beeme. Yaa m sẽn bãng rẽ wã me n kogend-m rũndã-rũndã, t’a Sʋɩtãan pa tõe n paam-m ye.”
“Mam sẽn karem bũmb nins Biiblã pʋgẽ wã kɩtame tɩ m bãng vẽeneg t’a Sʋɩtãan beeme. Yaa m sẽn bãng rẽ wã me n kogend-m rũndã-rũndã, t’a Sʋɩtãan pa tõe n paam-m ye.”
Yãmb datame n wa vɩ t’a Sʋɩtãan pa le beẽ bɩ? Tõeeme. Biiblã yetame tɩ wakat n wat tɩ b na n lob a Sʋɩtãan sẽn belgd neb wʋsgã “bugum mogr sẽn dɩt kidbr pʋgẽ.” (Wilgri 20:10) D miime tɩ bugum pa tõe n dɩ malɛk sẽn ka tar yĩn-nems wa ninsaalã ye. Dẽnd yaa makr sẽn wilgd bal tɩ b na n sãam-a-la wakat fãa yĩnga. A Sʋɩtãan na n menema fasɩ. Wakat kãnga, neb nins sẽn nong Wẽnnaamã na n vɩɩmda ne sũ-noogo.
La nananda, kell-y n bao-y n bãng-y-yã a Zeova la a raabã sõma.b Tags-y n ges-y! Wakat n wat tɩ y na n tõog n yeel t’a “Sʋɩtãan kae,” hal tɩ sɩd yaa sɩd me.
a Sã n yaa Rom tẽngã ligd b sẽn boond tɩ denie wã, dẽnd taa wakat kãng neb 50000 daar a ye tʋʋmd yaoodo. Sɩd yaa wʋsgo.
b Y sã n dat n bãng Wẽnnaam sẽn yet bũmb ning a Sʋɩtãan ne zĩn-dãmbã yɛlã wɛɛngẽ, bɩ y ges Biiblã sɩd yetame tɩ bõe? sebrã sak 10. A Zeova Kaset rãmbã n yiis seb-kãnga. Kos-y a Zeova Kaset soab t’a wa kõ-y sebrã.