SOGSG BIIBLÃ SẼN LEOKDE

Wãn to la y tõe n sõng y kambã tɩ b nong Wẽnnaam?

Yaa yãmb sẽn na n sõng y kambã tɩ b kɩs sɩd tɩ Wẽnnaam beeme la t’a nong-b lame, la bãmb me na n nong-a. Sɩd me, yɩl tɩ b wa nong Wẽnnaam, rẽnda b reng n bãng-a. (1 Zã 4:8) Makre, y segd n sõng-b lame tɩ b paam sogs-kãensã leoore: Bõe yĩng tɩ Wẽnnaam naan ninsaala? Bõe yĩng t’a bas tɩ nebã namsdẽ? Bõe la Wẽnnaam na n maan beoog-daar n kõ ãdem-biisã?—Karm-y Filip rãmb 1:9.

Y sã n dat tɩ y kambã wa nong Wẽnnaam, y segd n maoome tɩ b ne vẽeneg tɩ yãmb mengã nonga Wẽnnaam. Woto, b na n tʋlg n dɩka y togs-n-taare.—Karm-y Tõod 6:5-7; Yelbũn 22:6.

Wãn to la y tõe n zãms y kambã Biiblã tɩ kẽ b sũyã?

Wẽnnaam Gomdã tara pãnga. (Hebre dãmba 4:12) Woto yĩnga, sõng-y y kambã tɩ b bãng Biiblã goam nins sẽn yaa tɩlae ne-b tɩ b bãngã. A Zezi ra wae n sokda a kɛlgdbã sogsgo, n kelgd-ba, la a wilgd-b Gʋlsg Sõamyã võore. Y sã n dɩk a Zezi togs-n-taare, y na n tõogame tɩ Biiblã goamã kẽ y kambã sũyã.—Karm-y Luk 24:15-19, 27, 32.

Sẽn paase, Biiblã kibay nins sẽn wilgd Wẽnnaam manesem sẽn yɩ to-to ne neb kẽerã tõe n sõnga kambã tɩ b bãng Wẽnnaam, la b nong-a. Rẽ wɛɛngẽ, y tõe n paama sɛb tõnd sɩtã www.jw.org zugu.—Karm-y 2 Tɩmote 3:16.