SOGSG BIIBLÃ SẼN LEOKDE
Bõe n kɩt tɩ neb wʋsg tẽed tɩ Naand n be?
Bi-pɛɛlg sẽn bɩt to-to wã pa yel-solemd sɩda?
Na maan yʋʋm 3000, rao a ye yeela Wẽnnaam woto: “Mam wẽnda bõn-bãnde, yãmb tʋʋmã yaa bõn-bãna.” (Yɩɩl Sõamyã 139:14) Y sã n tags bi-pɛɛlg sẽn bɩt a ma pʋgẽ to-to wã, y pa ne tɩ yaa yel-solemd sɩda? Neb wʋsg kɩsa sɩd tɩ bõn-vɩɩlɩ wã sẽn naan sõma to-to wã wilgdame tɩ Naand n be.—Karm-y Yɩɩl Sõamyã 139:13-17; Hebre dãmb 3:4.
Yaa sẽn naan-a ãndũni wã, la a kɩt tɩ tẽngã yaa vɩɩm zĩigã n naan bõn-vɩɩlɩ wã me. (Yɩɩl Sõamyã 36:10) A wilga ninsaalbã a sẽn yaa a soaba.—Karm-y Ezai 45:18.
Yaa rũms n wa n lebg ninsaalbã bɩ?
Yaa sɩd tɩ tõnd yĩngã wil kẽer wõnda rũmsã rẽndã. La rẽ yaa Naandã sẽn naan ninsaalbã ne rũmsã fãa tɩ b vɩɩmd tẽngã zugã yĩnga. Pa rũng la a rɩk n kɩt tɩ lebg pipi ninsaalã ye. A yãka tẽngã tom n naan-a.—Karm-y Sɩngr 1:24; 2:7.
Bõn-kãsems a yiib n kɩt tɩ ninsaalbã ne rũmsã pa wõnd taab ye. Pipi, ninsaalbã tõe n bao n bãnga Naandã, n nong-a la b waoogd-a. Yiibu, a naana ninsaalbã tɩ b vɩɩmd wakat fãa yĩnga, tɩ yaool n pa woto ne rũmsã ye. La rũndã-rũndã, ninsaalbã fãa yaa kiidba, bala d yaab a Ãdem kɩɩsa Naandã.—Karm-y Sɩngr 1:27; 2:15-17.