Bɩ y pẽg a Zeova a sõmblmã yĩnga, n paam barka

1. Bõe n kɩt tɩ d segd n pʋʋs a Zeova barka?

ZEMSAME tɩ d pʋʋs a Zeova barka, bala a yaa “bark sõma fãa la kũun-sõma fãa” kõta. (Zak 1:17) A sẽn yaa d Pe-kɩɩm sẽn nong-dã, a geta d yell sõma, n kõt-d bũmb nins fãa sẽn yaa tɩlae ne-dã. (Yɩɩl 23:1-3) A yaa “zĩ-soalgdg la pãng tõnd yĩnga,” sẽn yɩɩd fãa zu-loees wakate. (Yɩɩl 46:2) Rẽnd bũmb wʋsg n kɩt tɩ d segd n kõ yɩɩl-gʋlsdã bʋʋm, bala a yeela woto: “Bɩ y pʋʋs Zu-soabã bark tɩ b yaa sõma. Tɩ bõe, bãmb nonglem kaoosda wakat fãa.”—Yɩɩl 106:1.

2, 3. a) Bõe n tõe n wa kɩt tɩ d lebg zɩ-beoog rãmba? b) Sogs-bʋs la d na n leok sõs-kãngã pʋgẽ?

² Bõe yĩng tɩ d segd n pʋʋsd a Zeova bark bũmb nins a sẽn kõt-dã yĩnga? Wa Biiblã sẽn deng n togsã, rũndã-rũndã sẽn yaa yaoolem wakatã, nebã yaa zɩ-beoog rãmba. (2 Tɩm. 3:2) Wʋsg pa nand bũmb nins a Zeova sẽn kõt-bã ye. Lɛɛbdbã la piblisite wã rãmb kɩtame tɩ neb milyõ-rãmb rat teed sẽn pa tɩlae ne-ba, tɩ b sũyã pa noom ne bũmb nins b sẽn zoe n tarẽ wã ye. D sã n pa gũusi, d tõeeme n wa lebg zɩ-beoog rãmba, n yɩ wa Israyɛll nebã, n pa le nand tõnd ne a Zeova zoodã, wall bũmb nins a sẽn kõt-dã ye.—Yɩɩl 106:7, 11-13.

³ La d sã n wa tar zu-loees yẽ? Tõe n wa lebga zu-loeesã yell n pak-d n yɩɩda, tɩ d pa le tagsd bõn-sõma nins d sẽn tarã yell ye. (Yɩɩl 116:3) Bõe n tõe n sõng-d tɩ d ra wa lebg zɩ-beoog rãmba? Wãn to la d tõe n kell n tall sũ-noog baa d sã n wa tar zu-loeese? D na n goma rẽ yelle.

BŨMB NINS A ZEOVA SẼN MAAN TÕND YĨNGÃ YAA WƲSGO

4. Bõe la d tõe n maan n da wa lebg zɩ-beoog soaba?

⁴ Sẽn na yɩl n da wa lebg zɩ-beoog soab baooda modgre. Pipi, d gũus n ges bũmb nins a Zeova sẽn maand tõnd yĩngã. Rẽ poore, d tags n ges rẽ sẽn wilgd a Zeova sẽn nong tõndã to-to. Yɩɩl-gʋlsdã sẽn maan woto wã, yɩ-a-la noogo. Bala, a bãngame tɩ bõn-sõma nins a Zeova sẽn maan yẽ yĩngã yaa wʋsgo.—Karm-y Yɩɩl Sõamyã 40:6; 107:43.

5. Mak-sõng bʋg la tʋm-tʋmd a Poll kõ tõndo?

⁵ Tʋm-tʋmd a Poll kõo tõnd mak-sõngo. D miime t’a ra bʋgsda bõn-sõma nins a Zeova sẽn kõ-a wã zugu, bala, a ra wae n pʋʋsd-a-la bark ne a sũur fãa. A Poll ra miime t’a yɩɩ wẽn-kɩɩsa, n nams Wẽnnaam nebã la a sãam-ba. La a pʋʋsa Wẽnnaam ne Kiristã barka. Bala, b pa ges yel-wẽn nins a sẽn maanã ye. B zoe a nimbãaneg n kẽes-a b tʋʋmdã pʋgẽ. (Karm-y 1 Tɩmote 1:12-14.) A Poll sũur da nooma ne a tẽed-n-taasã me, n da mi n pʋʋsd a Zeova bark b zʋg-sõma wã la b sẽn tũud-a ne pʋ-peelmã yĩnga. (Fil. 1:3-5, 7; 1 Tes. 1:2, 3) A sã n da tar zu-loees t’a tẽed-n-taasã sõng-a, a yɩta tao-tao n pʋʋs a Zeova bark rẽ yĩnga. (Tʋʋ. 28:15; 2 Kor. 7:5-7) Rẽnd a Poll sẽn sagl kiris-nebã tɩ b ra yɩ zɩ-beoog rãmbã pa ling tõnd ye. A yeela woto: “Bɩ y yɩ neb sẽn mi beoogo. . . . Bɩ y . . . sagl taab ne yam fãa ne yɩɩl sõamyã, . . . la y yɩɩl n pẽg Wẽnnaam y sũyã pʋsẽ yãmb sẽn tar bãmb barka yĩnga.”—Kol. 3:15-17.

BƲGSGÃ LA PƲƲSGÃ TARA YÕODO

6. Bõn-sõma bʋs la a Zeova kõ yãmb tɩ noom-y wʋsgo?

⁶ Wãn to la d tõe n dɩk a Poll togs-n-taare? D ned kam fãa tõe n bʋgsa bõn-sõma nins a Zeova sẽn kõ-a wã zugu. (Yɩɩl 116:12) La bõn-sõma bʋs la a Zeova kõ yãmb tɩ noom-y wʋsgo? Ned sã n sok yãmb sok-kãnga, y na n leokame tɩ bõe? Tõe tɩ y na n goma yãmb ne a Zeova zoodã yelle. Pa rẽ bɩ y yeel tɩ yaa y sẽn paam tɩ Wẽnnaam kõ-y y yel-wẽnã sugr y sẽn tẽed Kiristã maoongã yĩnga. Tõe me tɩ y na n goma y tẽed-n-taas kẽer sẽn sõng-y y zu-loɛɛg sasa yelle. Yaa vẽeneg tɩ y pa na n yĩm y pagã wall y sɩdã yelle, pa rẽ bɩ y kambã yell ye. D sã n baood sẽk n bʋgsd bõn-sõma nins a Zeova sẽn kõ-dã zugu, d na n dat n pʋʋsd-a-la bark daar fãa.—Karm-y Yɩɩl Sõamyã 92:2, 3.

7. a) Bõe yĩng tɩ d segd n pʋʋsd a Zeova barka? b) Y sã n wae n pʋʋsd a Zeova barka, wãn to la na n naf-yã?

⁷ Bõn-sõma nins a Zeova sẽn kõ-dã sã n yaa vẽenes d yamẽ wã, d na n tʋll n pʋʋs-a-la barka. (Yɩɩl 95:2; 100:4, 5) Neb kẽer sã n wa pʋʋsd Wẽnnaam, yaa sẽn na n kos bũmb nins b sẽn datã bala. La d sã n mi n pʋʋsd a Zeova bark bũmb nins d sẽn tarã yĩng me, noom-a lame. Biiblã gomdã neb sẽn pʋʋs a Zeova bark ne b sũur fãa yelle. Wala makre, a Ann la a Ezekɩase. (1 Sãm. 2:1-10; Ezai 38:9-20) Bɩ y rɩk b togs-n-taare, n pʋʋsd a Zeova bark bũmb nins a sẽn kõ yãmbã yĩnga. (1 Tes. 5:17, 18) Y sã n maand woto, nafd-y lame. Na n kõ-y-la sũ-noogo, y na n maneg n nonga a Zeova, tɩ y zoodã pãng paase.—Zak 4:8.

8. Bõe n tõe n wa kɩt tɩ d pa le nand bũmb nins a Zeova sẽn kõt-dã?

⁸ D sã n pa gũusi, d tõeeme n wa pa le nand bũmb nins a Zeova sẽn kõt-dã ye. Bõe yĩnga? D yaa a Ãdem la a Ɛɛv sẽn yɩ zɩ-beoog rãmbã yagense, n yaa neb sẽn pa zems zãnga. Tẽeg-y t’a Zeova sẽn wa n ning d yaab a Ãdem ne a Ɛɛv Edɛnnã, baa fʋɩ ra pa paoog-b ye. Sẽn paase, b ra tõe n vɩɩmda bãan pʋgẽ wakat sẽn kõn sa yĩnga. (Sɩng. 1:28) La b ra pa nand bũmb nins b sẽn tarã ye. B bas n baooda sẽn yɩɩd rẽ. Woto kɩtame tɩ b bõn fãa. (Sɩng. 3:6, 7, 17-19) Dũniyã neb sẽn yaa zɩ-beoog rãmbã, d sã n pa gũusi d tõe n wa lebga wa bãmba, n pa le nand bũmb nins a Zeova sẽn kõt-dã ye. D tõeeme n wa pa le getẽ tɩ d sẽn paam n yaa a Zeova zoa, wall d sẽn paam n tar tẽed-n-taas dũniyã gill zugã tara yõod wʋsg ye. Tõe n wa lebga bũmb nins sẽn be dũniyã pʋgẽ wã yell bal n pak-do. (1 Zã 2:15-17) Sẽn na yɩl t’a buud ra wa paam-do, d segd n bʋgsda bõn-sõma nins a Zeova sẽn kõt-dã zugu, la d pʋʋsd-a bark d sẽn paam n tũud-a wã yĩnga.—Karm-y Yɩɩl Sõamyã 27:4.

D SÃ N WA TAR ZU-LOEESE

9. D sã n wa tar zu-loeese, bõe yĩng tɩ d segd n bʋgs bõn-sõma nins d sẽn tarã zugu?

⁹ D sũur sã n noom ne bõn-sõma nins a Zeova sẽn kõt-dã, na n sõng-d lame tɩ d tõog toog zu-loees sasa. Zu-loɛɛg ning tõe n wa tiig n paam-d lame, tɩ d pa mi d sẽn maandg ye. Wala makre, d pag bɩ d sɩd sã n zãmb-do, d sã n lʋɩ ba-kɛgenga, d ned sã n maan kaalem, pa rẽ bɩ sabab-wẽng sã n nams-do. Zu-loees a woto sasa, d sã n bʋgs bõn-sõma nins d sẽn tarã zugu, tõe n bels-d lame, la keng d raoodo. Ad kibay a wãn sẽn wilgd rẽ.

10. A Irina sẽn tagsd bõn-sõma nins a Zeova sẽn kõt-a wã yellã, wãn to la naf-a?

¹⁰ A Irinaa yaa wakat fãa so-pakd n be Etazĩni. A ra kẽe kãadem ne kãsem-soaba. La a sɩdã wa n zãmb-a lame, la a zoe n bas-a ne b kambã. Bõe n sõng a Irina t’a kell n tũ a Zeova ne a sũur fãa? A yeelame: “M sũur nooma ne a Zeova sẽn get m yell to-to wã. Daar fãa, mam tagsda bõn-sõma nins a sẽn kõt-mã yelle. Rẽ kɩtame tɩ m neẽ tɩ d saasẽ Ba wã sẽn kogend a nin-buiidã mi-m lame la a nong-ma, la tɩ rẽ yaa bark m sẽn tare. Mam miime t’a pa na n tol n bas-m ye.” Baa a Irina sẽn seg zu-loees wʋsgã, a sẽn kell n tall sũ-noogã sõng-a lame t’a tõog toogo, la a keng neb a taab raoodo.

11. Bõe n sõng a Kyung-sook t’a tõog n mao ne bã-kɛgenga?

¹¹ A Kyung-sook bee Aazi soolmẽ wã, tɩ yẽ ne a sɩdã yaa so-pakdb na maan yʋʋm 20 la zaka. A wa n tiig n lʋɩɩ bãaga, tɩ logtoɛɛmbã ges-a n wilg tɩ fulfuud kãnsɛɛr n tar-a. B yeelame t’a pa le tõe n vɩɩmd tɩ yɩɩg kiis a tã bɩ kiis a yoob ye. Sẽn deng rẽ, yẽ ne a sɩdã sega zu-loees wʋsgo. La b ra pa tar zu-loɛɛg laafɩ wã wɛɛngẽ ye. A Kyung-sook yeelame t’a sẽn wa n bãng tɩ kãnsɛɛr n tar-a wã, a sũur sãama wʋsgo. A ra tagsdame t’a magbã fãa lebga zaalem, n maand rabeem wʋsgo. Bõe n sõng-a t’a tõog n mao ne a zu-loɛɛgã? A yeela woto: “Yʋng fãa, nand tɩ m tɩ gãande m dʋʋda tõnd roogã zugu, n zẽk m koɛɛg n pʋʋs a Zeova n gom bõn-sõma a nu m sẽn paam daarã pʋgẽ tɩ noom-m yelle. Rẽ poore, m yam gãandeda bãane, tɩ m maneg n dat n wilg a Zeova tɩ m nong-a lame.” Wãn to la a Kyung-sook sẽn minim n pʋʋsd yʋng fãa wã naf-a? A yeelame: “Mam bãngame tɩ d sã n tar zu-loeese a Zeova teend-d lame, la tɩ bõn-sõma nins d sẽn paamdã yɩɩda d zu-loeesã.”

12. A Jason pagã kũum poore, bõe la a maan tɩ sõng-a?

¹² A Jason sẽn kẽes a meng zãng a Zeova tʋʋmdã pʋgẽ wã yʋʋm 30 la zak la woto. Rũndã-rũndã, a tʋmda Afirik Betɛll a ye pʋgẽ. A yeelame: “Mam pagã sẽn maan kaalem yʋʋm a yopoe la woto, tɩ sũ-sãangã mi n dat n loog m nugu. M sã n tags kãnsɛɛrã sẽn nams m pagã to-to wã yelle, m sũur sãamda wʋsgo.” Bõe n sõng a Jason a zu-loɛɛgã pʋgẽ? Ad a sẽn yeele: “Daar a ye, m tẽega bũmb maam ne m pagã sẽn naag taab n maan tɩ yɩ-d noogo. Mam pʋʋsa a Zeova bark rẽ yĩnga. M sẽn maan woto wã kɩtame tɩ m yam gãand bãane. Rẽ tɛka, m sã n tẽeg bũmb maam ne m pagã sẽn maan tɩ yɩ-d noog yelle, m pʋʋsda a Zeova barka. Mam sẽn wae n tagsd bõn-sõma nins m sẽn paamã yellã kɩtame tɩ m sũurã pa le sãamd wa pĩndã ye.” A paasame tɩ baa a pagã kaalmã sẽn ket n namsd-a wã, a sẽn pʋʋsd a Zeova bark bõn-sõma nins a sẽn paamã yĩngã kɩtame t’a sũurã pa le sãamd wʋsg ye. Wala makre, a paama pag sẽn da nong a Zeova ne a sũur fãa tɩ b naag taab n tũ-a. Sẽn paase, b kãadmã ra yaa noogo.

13. Bõe n sõng a Sheryl a zakã rãmb kũum poore?

¹³ Yʋʋmd 2013 sɩpaolg kiuugã, sa-kẽeng n ni Filipin soolmẽ wã. B boola sa-kãng t’a Haiyan. A Sheryl sẽn da tar yʋʋm 13 wakat kãngã wilgame tɩ koomã looga ne bãmb roogã, n paas bãmb zakã neb fãa la bala. A ma wã ne a ba wã, n paas a yaop a tã n ki. Bõe n sõng a Sheryl t’a zu-loeesã pa kɩt t’a lebg sũ-to-neda? A sũur da ket n nooma ne a Zeova, bala a ra bʋgsda bõn-sõma nins a sẽn tarã zugu. A yeela woto: “Mam yãa d tẽed-n-taasã sẽn maan bũmb nins fãa n sõng neb nins sẽn namsdã la b keng b raoodã. Mam miime tɩ saam-biisã sẽn be dũniyã gill zugã pʋʋsda m yĩnga.” A paasame: “Mam sẽn paam n tũud a Zeova wã noom-m-la wʋsgo, bala, a kõt-d-la bũmb nins sẽn yaa tɩlae ne-dã wakat fãa.” Vẽenega, d sũur sã n noom ne bõn-sõma nins d sẽn tarã, tõe n sõng-d lame tɩ d tõog toog zu-loees sasa. Leb n tõe n sõng-d lame tɩ d ra sãam d sũur tɩ loog nug ye.—Ef. 5:20; karm-y Filip rãmb 4:6, 7.

‘MAM NA N KELL N MAANA SŨ-NOOGO’

14. Bõe la a Zeova pʋlem tɩ noom-do? (Ges-y sõsgã sɩngrẽ fotã.)

¹⁴ Hal pĩnd wẽndẽ n tãag rũndã, a Zeova nin-buiidã wilgdame tɩ b sũur nooma ne bõn-sõma nins a sẽn maand b yĩngã. Wala makre, a sẽn wa n fãag Israyɛll nebã a Faraõ ne a tãb-biisã nugẽ Mog-miuugẽ wã, b naaga taab n yɩɩl n pẽg-a la b pʋʋs-a barka, n wilg tɩ b sũur noomame. (Yik. 15:1-21) Rũndã-rũndã, bũmb a ye a Zeova sẽn maan tɩ noom-d wʋsgo, yaa a sẽn pʋlem t’a na n menesa bũmb nins fãa sẽn wat ne tood la sũ-sãamsã. (Yɩɩl 37:9-11; Ezai 25:8; 33:24) Mams-y n ges-y d sũur sẽn na n yɩ noog to-to, a Zeova sã n wa sãam a bɛɛbã fãa, la a kẽes-d dũni-paalgã pʋgẽ, tɩ d vɩ laafɩ la bãan pʋgẽ. Wakat kãnga, d pa na n pʋʋs a Zeova bark sɩda?—Wil. 20:1-3; 21:3, 4.

15. Yʋʋmd 2015 wã pʋgẽ, bõe la y na n maane?

¹⁵ D kɩsa sɩd t’a Zeova na n kõ-d-la bõn-sõma wʋsg yʋʋmd 2015 wã pʋgẽ, n gũud rẽ ne d sũur fãa. Yaa sɩd tɩ d tõe n sega zu-loees me. La baa sẽn wa n yaa a soaba, d miime t’a pa na n tol n bas-d ye. (Tõo. 31:8; Yɩɩl 9:10, 11) A na n ket n kõt-d-la bũmb nins sẽn yaa tɩlae sẽn na yɩl tɩ d tõog n sak-a ne d sũur fãa. Bɩ d rɩk no-rɛɛs a Habakuk togs-n-taare. A yeelame: “Baa kankams sã n ka le ning puudu, tɩ sĩb me ka wome, tɩ oliiv tɩɩs me ka wome, tɩ pʋtã me ka wom koodo, tɩ piis ne niig me ka le be bãgr pʋgẽ, mam na n kell n maana sũ-noog Zu-soab a Wẽnnaam sẽn yaa mam fãagdã yĩnga.” (Hab. 3:17, 18) Yʋʋmdã tõre, bɩ d bʋgsd bõn-sõma nins d sẽn paamdã zugu, la d tũ yʋʋmd 2015 vɛrse wã sẽn yeel bũmb ningã. A yetame: ‘Bɩ y pʋʋs a Zeova bark t’a yaa sõma.’—Yɩɩl 106:1.