SOGSG BIIBLÃ SẼN LEOKDE
Ninsaalbã vɩɩm na n yɩɩ wãn beoog-daare?
A Zezi kũumã maasem yĩnga, neb n be n nong taab la b get taab yelle
Yaa vẽeneg tɩ ninsaalbã bãngr na n ket n tara paasg siãnsã wɛɛngẽ. La b na n wa tõog n kɩtame tɩ ned kam fãa get a to yell bɩ? Ayo. Rũndã-rũndã, ãdem-biisã yaa rat-m-ye rãmb la yão-beed rãmba. La Wẽnnaam pʋlmame t’a na n wa maana bõn-sõma ninsaalbã yĩnga.—Karm-y 2 Pɩɛɛr 3:13.
Wẽnnaam Gomdã wilgame tɩ wakat n wat tɩ nebã na n nong taab dũniyã gill zugu. Nebã na n vɩɩmda ne bãane, tɩ baa fʋɩ ka be n na n maan-b wẽng ye.—Karm-y Miise 4:3, 4.
Wãn to la Wẽnnaam na n kɩt tɩ rat-m-ye wã sa?
Wẽnnaam sẽn wa n naan ninsaalã t’a pa rat-m-ye soab ye. La a Ãdem sẽn kɩɩs Wẽnnaamã, a lebga ned sẽn pa zems zãnga. Tõnd sẽn yaa a yagensã, d mi n yaa rat-m-ye rãmba. La Wẽnnaam na n sõnga ninsaalbã ne a Zezi maasem tɩ b lebg neb sẽn zems zãnga.—Karm-y Rom dãmb 7:21, 24, 25.
A Zezi saka Wẽnnaam daabã n ki tɩ yɩ maoongo, n yẽes a Ãdem kɩɩsgã biisi. (Rom dãmba 5:19) Rẽnd a paka sor tɩ ninsaalbã na n wa paam b mens ne rat-m-ye wã, n pa le maand wẽng ye.—Karm-y Yɩɩl Sõamyã 37:9-11.