Sogsg Biiblã sẽn leokde

Wãn to la a Zezi kũumã nafd tõndo?

Wẽnnaam sẽn wa n naan a Ãdem ne a Hawa wã, a ra ratame tɩ b vɩɩmd wakat sẽn kõn sa tẽngã zugu. B ra pa na n namse, n lʋɩ bãag wall b ki ye. La bʋko, d yaab a Ãdem kɩɩsa a Naandã, n kong vɩɩm sẽn pa satã. D sẽn yaa a yagensã yĩnga, tõnd me kiidame. (Rom dãmba 5:8, 12; 6:23) La Wẽnnaam a Zeova tʋma a biig a Zezi tẽngã zug t’a wa ki, tɩ d tõe n wa paam bũmb ning a Ãdem sẽn kongã.—Karm-y Zã 3:16.

A Zezi kũumã kɩtame tɩ d tõe n paam d yel-wẽnã sugri, la d wa paam n vɩɩmd wakat sẽn kõn sa. Biiblã sõngd-d lame tɩ d bãng tɩ vɩɩmã na n yɩɩ noog dũni-paalgã pʋgẽ, bala, kʋʋlem, kom la kũum pa na n le zĩnd ye.—Karm-y Ezai 25:8; 33:24; Wilgr 21:4, 5.

Wãn to la d segd n tẽegd a Zezi kũumã?

Yʋng ning b sẽn yõk a Zezi wã, a yeela a karen-biisã tɩ b tẽegd a kũumã yelle. A maana bũmb sẽn yaa nana n wilg b sẽn segd n tẽeg a kũumã to-to. Yʋʋmd fãa, d sã n tẽegd a Zezi kũumã, sõngda tõnd tɩ d tags a Zeova la a Zezi sẽn wilg to-to tɩ b nonga ninsaalbã hal wʋsgã yelle.—Karm-y Luk 22:19, 20; 1 Zã 4:9, 10.

Rõandã, a Zezi kũumã tẽegr na n yɩɩ tʋʋl-nif kiuug rasem 14 tẽne wã daare, wĩndgã kõom poore. A Zeova Kaset rãmbã boond-y lame tɩ y wa naag-b n maan tẽegrã.—Karm-y Rom dãmb 1:11, 12.