Bõe yĩng t’a Zeezi nams la a ki?

B sã n sok yãmb y sã n dat n vɩɩmda wakat sẽn kõn sa, y na n leokame tɩ bõe? Yaa vẽeneg tɩ wʋsg na n leokame tɩ b ratame, la tɩ b pa tẽed tɩ yaa bũmb sẽn tõe ye. Sã n yaa ne bãmba, sẽn vɩ fãa wat n kiime. B yetame tɩ d pa tõe n vɩ bal n pa kiidẽ ye.

La b sã n sok-y masã n dat n bãng y sã n dat n kiime, y na n leokame tɩ bõe? Nebã fãa la bal na n leokame tɩ ayo. Bõe yĩnga? Yaa tɩ baa d sẽn segd zu-loeesã, d pa rat n ki ye. Biiblã wilgame tɩ Wẽnnaam naana ninsaal t’a nong vɩɩmã. Sɩd me, a yeelame tɩ Wẽnnaam “ninga wakat sẽn ka sɛt tagsg ninsaal sũur pʋgẽ.”—Koɛɛg soaba 3:11.

La yellã yaa tɩ ninsaal pa vɩ wakat sẽn kõn sa ye. Bõe n kɩt tɩ lebg woto? Wẽnnaam maana bũmb sẽn na yɩl tɩ d paam yel-kãngã tɩɩm bɩ? Biiblã sẽn leokd sogs-kãensã to-to wã kengda raoodo, la wilgd a Zeezi sẽn nams la a ki wã võor me.

SƖNGA WÃN TƖ NINSAAL WA KIIDẼ?

Sɩngr sebrã sẽn be Biiblã pʋgẽ wã tõe n sõng-d lame tɩ d bãng yɛlã sẽn sɩng to-to. A pipi sags a tãabã wilgdame tɩ Wẽnnaam naana d yaab a Ãdem ne a Hawa tɩ b ra tõe n vɩɩmd wakat sẽn kõn sa. Wẽnnaam wilg-b-la b sẽn da tõe n maan to-to n paam vɩ-kãnga. Kibarã wilga b sẽn kɩɩs Wẽnnaam to-to, n kong vɩɩm sẽn kõn sa wã. B sẽn bilg yɛlã nana-nana to-to wã kɩtame tɩ neb kẽer yetẽ tɩ yaa solemde. La Sɩngr sebrã me togsda yɛlã vẽenes wa evãnzill-dãmbã, tɩ d sã n karemdẽ bɩ d yãt kaset wʋsg sẽn wilgd t’a sẽn gomd bũmb nins yellã sɩd zĩndame.

A Ãdem sẽn kɩɩs Wẽnnaamã waa ne bõe? Biiblã yeela woto: “Rao a yembr n wa ne yel-wẽnã dũniyã tɩ kũum wa yel-wẽnã yĩnga. Rẽ n kɩt tɩ kũum yõkd nebã fãa, fãa sẽn maand yel-wẽnã yĩnga.” (Rom-dãmbã 5:12, Wẽnnaam Sebre, 1983) A Ãdem sẽn kɩɩs Wẽnnaamã, a maana yel-wẽnde. Rẽ kɩtame t’a bõn vɩɩm sẽn kõn sa wã, n wa baas n ki. Tõnd sẽn yaa a yagensã, d rogda ne yel-wẽndã, n lʋɩt bãase, n kʋʋndẽ la d kiidẽ. Biiblã sẽn bilg bũmb ning sẽn kɩt tɩ d kiidẽ wã zemsa ne siãnsã bãngdb sẽn vaees n bãng sẽn sɩngd to-to tɩ bãag wall bũmb a to tũnug ne biig roagd n long-a wã. La bõe la Wẽnnaam maan sẽn na yɩl tɩ d paam yel-kãngã tɩɩm?

WẼNNAAM SẼN MAAN BŨMB NINGÃ

Wẽnnaam maana bũmb toor-toor sẽn na yɩl t’a Ãdem yagensã lebs n paam bũmb ning a Ãdem sẽn bõnã, rat n yeel tɩ vɩɩm sẽn kõn sa wã. Wãn to la Wẽnnaam maan dẽ?

Rom-dãmb 6:23 yeelame tɩ “yel-wẽnã yaood yaa kũum.” Woto rat n yeelame tɩ yaa yel-wẽndã n wa ne kũumã. Yaa a Ãdem sẽn maan yel-wẽndã yĩng la a sẽn ki wã. Tõnd me yaa yel-wẽn-maandba, n segd ne yel-wẽndã yaood sẽn yaa kũumã. La tõnd sẽn dogd ne yel-wẽndã pa d yell ye. Rẽ n so tɩ Wẽnnaam sẽn nong tõndã yĩnga, a tʋma a Bi-ribl a Zeezi, t’a reeg “yel-wẽnã yaood” tõnd zĩigẽ. La bõe yĩng t’a Zeezi tõog n ki tõnd yĩnga?

Yɩ a Ãdem sẽn da yaa ned sẽn zems zãngã kɩɩsg n wa ne yel-wẽndã. Rẽnd yaa ned sẽn zems zãng n segd n sak Wẽnnaam n tãag kũum, n tõog n fãag tõnd ne yel-wẽndã. Biiblã yeela woto: “A wa ned a yembr tãa kɩɩsg yĩng sẽn kɩt tɩ neb wʋsg lebg yel-wẽn maandba, woto me, ned a yembr tãa sakr yĩnga, b na n kɩtame tɩ neb wʋsg lebg tɩrse.” (Rom-dãmbã 5:19) A Zeezi n yɩ nin-kãnga. A yii saasẽ, n wa rog n yɩ ned sẽn zems zãnga,a n ki tõnd yĩnga. Rẽ paka sor tɩ tõnd tõe n yɩ nin-tɩrs Wẽnnaam nifẽ, n tõe n wa paam n vɩɩmd wakat sẽn kõn sa me.

A ZEEZI SẼN NAMS LA A KI WÃ VÕORE

Bõe yĩng tɩ yɩ tɩlɛ t’a Zeezi ki sẽn na yɩl n fãag ãdem-biisã? Wẽnnaam Sẽn-tõe-a-fãa wã ra pa tõe n yeel bal t’a Ãdem kambã la a yagens nins sẽn na n sak yẽ wã na n vɩɩmda wakat sẽn kõn sa sɩda? A ra tõe n yeela rẽ. La sã n da yɩ woto, a ra na n kɩɩsa yẽ mengã noore. A yeelame tɩ yel-wẽnã yaood yaa kũum. No-kãng pa gomd a sẽn yeel bala, tɩ sã n wa yaa tɩlɛ bɩ a toeem ye. Yaa a sẽn nong tɩrlmã yĩng la a sẽn lugl no-kãngã.—Yɩɩn-sõamyã 37:28.

Wẽnnaam sã n da pa tũ noy nins a sẽn gãneg tɩrlmã wɛɛngẽ wã yel-kãngã pʋgẽ, nebã ra tõe n sãmbda a sã n na n maana woto yɛl a taab wɛɛngẽ me. Wala makre, b ra tõe n sãmbda a sã n na n yãka neb nins sẽn segd ne vɩɩm sẽn kõn sa wã ne tɩrlem. Sẽn paase, ra na n yɩɩ toog tɩ d kɩs sɩd t’a na n pidsa a pʋlemsã fãa. Rẽnd Wẽnnaam sẽn tũ noy nins a sẽn gãneg tɩrlmã wɛɛngẽ n maan bũmb n na n fãag ninsaalbã, wilgdame tɩ bũmb fãa pʋgẽ, a maanda sẽn yaa tɩrga.

A Zeezi sẽn ki tɩ yɩ maoongã maasem, Wẽnnaam paka sor tɩ d tõe n wa paam n vɩɩmd wakat sẽn kõn sa arzãnã pʋgẽ tẽngã zugu. A Zeezi yeela woto: “Wẽnnaam nonga dũniyã wʋsgo, hal tɩ b kõ b Bi-ribl yendã, tɩ ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.” (Zã 3:16) Rẽnd a Zeezi kũumã pa wilgd bal tɩ Wẽnnaam nonga tɩrlem ye. Sẽn yɩɩd fãa, wilgdame t’a nonga ninsaalbã wʋsgo.

La bõe yĩng tɩ yɩ tɩlɛ t’a Zeezi nams la a ki wa evãnzill-dãmbã sẽn bilgdã? A Zeezi sẽn tõog toog nams-toaag pʋgẽ n kell n sak Wẽnnaamã, a wilgame t’a Sʋɩtãan sẽn yeel tɩ ninsaal pa na n sak Wẽnnaam toog pʋgẽ wã yaa ziri. (Zoob 2:4, 5) A Sʋɩtãan sẽn wa n tõog t’a Ãdem sẽn da yaa ned sẽn zems zãngã kɩɩs Wẽnnaamã, ra wõnda a gomdã yaa sɩda. La a Zeezi sẽn da yaa ned sẽn zems zãng wa a Ãdmã kell n saka Wẽnnaam baa a sẽn nams wʋsgã. (1 Korẽnt-rãmbã 15:45) A sẽn maan woto wã, a wilgame t’a Ãdem sã n da rata, a tõe n saka Wẽnnaam. A Zeezi sẽn tõog toog namsg taoorã, a basa mak-sõng d sẽn segd n tũ. (1 Pɩyɛɛr 2:21) Wẽnnaam keo a Bi-riblã sẽn sak-a n tãag kũumã. A vʋʋga a Zeezi t’a tɩ vɩ saasẽ, n pa le tõe n ki ye.

BÕE LA Y TÕE N MAAN T’A ZEEZI KŨUMÃ NAF-YÃ?

A Zeezi sɩd kiime. A paka sor tɩ d tõe n wa paam vɩɩm sẽn kõn sa wã. Yãmb dat n vɩɩmda wakat sẽn kõn sa bɩ? A Zeezi wilga bũmb ning d sẽn segd n maane, n yeele: “Vɩɩm sẽn kõn sa wã yaa tɩ nebã na bãng yãmb sẽn yaa y yembre, n yaa sɩd Wẽnnaamã, la b bãng a Zeezi Kirisi, yãmb sẽn tʋm a soabã.”—Zã 17:3.

Seb-kãngã yiisd-bã sagend-y lame tɩ y bao n bãng a Zeova sẽn yaa Wẽnnaam sɩd-sɩdã, la y bãng a Zeezi Kiris sẽn yaa a Bi-riblã me. Y sã n data, a Zeova Kaset rãmb nins sẽn be yãmb babgẽ wã na n sak n sõng-y-la ne yamleoogo. Y leb n tõe n kẽe www.jw.org sẽn yaa tõnd sɩt wɛɛbã pʋgẽ, n paam kibay a taaba.