Bõe yĩng tɩ nebã kiidẽ?

Biiblã sẽn yete

Zemsame tɩ d sok d mens bõe yĩng tɩ ninsaalbã kiidẽ, sẽn yɩɩd fãa, ned d sẽn nong sã n wa maan kaalem. Biiblã yetame: “Zẽnem ning sẽn wat ne kũumã yaa yel-wẽndã.”—1 Korẽnt-rãmbã 15:56, MN.

Bõe yĩng tɩ ninsaalbã maand yel-wẽna, la b kiidẽ?

D yaab a Ãdem ne a Hawa beega Wẽnnaam, tɩ rẽ kɩt tɩ b kong vɩɩmã. (Sɩngre 3:17-19) B sẽn kɩɩs Wẽnnaamã, waa ne kũum, bala ‘vɩɩm ko-bundum bee Wẽnnaam nengẽ.’—Yɩɩn-sõamyã 36:10; Sɩngre 2:17.

A Ãdem yel-wẽndã longa a yagensã fãa. Biiblã yetame: ‘Yel-wẽna . . . waa dũni ned a yembr maasem yĩnga, tɩ yel-wẽnã wa ne kũum, tɩ nebã fãa kiidẽ, b fãa sẽn maan yel-wẽnã yĩnga.’ (Rom-dãmbã 5:12) Ninsaalbã yaa kiidba, b fãa sẽn maand yel-wẽnã yĩnga.—Rom-dãmbã 3:23.

Kũum pa na n le zĩnd ye

Wẽnnaam pʋlmame tɩ wakat n wat t’a na n ‘sãam kũum pãng wakat sẽn ka sɛt yĩnga.’ (Ezayi 25:8) A na n menesa bũmb ning sẽn wat ne kũumã, rat n yeel tɩ yel-wẽnã. A na n tũnuga ne a Zeezi Kirist n ‘yiis dũni yel-wẽnã.’—Zã 1:29; 1 Zã 1:7.