SEBRÃ GOM-ZUG SÕSGÃ | PƲƲSG TÕE N NAFA NED BƖ?
Bõe yĩng tɩ nebã pʋʋsdẽ?
“Mam da nonga parb wʋsgo. M da pʋʋsdame n kot arzɛka, la m zɩ n paam ye.”—A Sãmwɛlla sẽn be Kenya wã.
“Tõnd lekollẽ wã, b mi n kɩtame tɩ d pʋʋse. La pʋʋsgã yaa goam b sẽn wilg tõnd tɩ d rɩk ne zugu, n togsd n yɩlemdẽ bala.”—A Tereza sẽn be Filipinnã.
“M sã n wa tar zu-loeese, m pʋʋsdame. M mi n pʋʋsa Wẽnnaam n kos m yel-wẽnã sugri, la m kos-a t’a sõng-m tɩ m maneg n dɩk Kiris togs-n-taare.”—A Magdalɛn sẽn be Gãna wã.
A Sãmwɛll ne a Tereza la a Magdalɛn sẽn yeel bũmb ningã wilgdame tɩ nebã pʋʋsd n kota bũmb toor-toore. Kẽer sẽn kot bũmb ninsã kɩtame tɩ b zems ne pẽgre. La pa woto ne sãnda ye. Neb kẽer pʋʋsda ne b sũur fãa, tɩ sãnda pʋʋsdẽ bal n pa tagsd b goamã sẽn dat n yɛɛlg ye. Neb milyõ kobs n tagsd tɩ pʋʋsg tara yõodo. B kẽer pʋʋsda sẽn na yɩl n paam ɛgzame lekollẽ wã, tɩ sãnda rat tɩ ɛspoorã ekip ning bãmb sẽn nongã tõoge. Kẽer me n pʋʋsd n dat tɩ Wẽnnaam sõng-b tɩ bãmb ne b zakã rãmb zĩid-n-taarã yɩ noogo. Nebã sẽn pʋʋsd n kot bũmb ninsã sõor waoogame. Bãngdb n vaees n mik tɩ neb sẽn pa tar tũudum meng n wae n pʋʋsdẽ.
La yãmb wae n pʋʋsdame bɩ? Y sã n mi n pʋʋsdame, bõe la y kota? Y pʋʋsdame tɩ y pa pʋʋsd me, tõe tɩ y sok y meng woto: ‘Pʋʋsg sɩd nafda ned bɩ? D sã n pʋʋsdẽ, d gomda vɩʋʋgẽ bal bɩ?’ Seb-gʋlsd a ye yeelame tɩ pʋʋsg yõod pa waooge, la tɩ ned sã n pʋʋse, sõngd-a lame bal t’a yĩm a zu-loeesã yell wakat bilfu. Logtoɛɛmb me n yet woto. La ned sã n pʋʋsdẽ, a maanda bũmb sẽn pa tar yõod bɩ, bɩ yaa bũmb sẽn na n kɩt t’a yĩm a zu-loeesã yell bala?
Biiblã wilga vẽeneg tɩ pʋʋsg tara yõod wʋsgo. A wilgame tɩ d sẽn pʋʋsd to-to wã, la d sẽn kot bũmb ninsã sã n zemse, d paamda kelgre. D tõe n kɩsa sɩd ne Biiblã sẽn yeelã bɩ? Ad bũmb a wãn sẽn wilgd tɩ d tõe n kɩsa sɩd ne rẽ.
a D toeema yʋy kẽere.