SEBRÃ GOM-ZUG SÕSGÃ | WÃN TO LA WẼNNAAM GET ZABÃ?
Wẽnnaam sẽn get zabã to-to nand t’a Zeezi wa tẽngã zugu
Neb la b ra tar n namsdẽ, tɩ b pʋʋs Wẽnnaam naoor wʋsg n kos sõngre, n pa paam leokr zĩig pʋgẽ ye. Nin-kãens ra yaa pĩnd wẽndẽ Israyɛllã neba. Bãmb n yaool n da yaa Wẽnnaam nin-buiidã. Yaa Ezɩpt nebã n da namsd-ba. (Yikri 1:13, 14) Maana yʋʋm tɩ Israyɛll nebã kot Wẽnnaam t’a fãag-b Ezɩpt nebã nugẽ. Wakat ning Wẽnnaam sẽn yãk n na n fãag-bã wa n taame. (Yikri 3:7-10) Biiblã yeelame tɩ yaa Wẽnnaam mengã n zab ne Ezɩpt nebã. Sɩd me, a kɩtame tɩ tood buud toor-toor paam-ba. Sẽn na n baase, a kʋʋ Ezɩpt rĩmã ne a tãb-biisã mog-miuugã pʋgẽ. (Yɩɩn-sõamyã 136:15) Wẽnnaam a Zeova zab n sõnga a nin-buiidã, n wilg t’a yaa “zabr gãndaoogo.”—Yikri 15:3, 4.
Wẽnnaam sẽn zab ne Ezɩpt nebã wilgdame tɩ pa zabr fãa n yaa wẽng a nifẽ ye. A kõo Israyɛll nebã sẽn da yaa a nin-buiidã sor naoor wʋsg tɩ b zab ne b bɛɛba. Wala makre, a kɩtame tɩ b zab ne Kanaã nebã sẽn da tʋʋmd tʋʋm-beed wʋsgã. (Tõodo 9:5; 20:17, 18) Kaoosg zugẽ, a kɩtame tɩ Israyɛll rĩm a Davɩɩd zab ne Filisti nebã sẽn da namsd-bã. Wẽnnaam pʋd n wilga a Davɩɩd a sẽn na n maan to-to n tõog-ba.—2 Sãmwɛll 5:17-25.
Biiblã kiba-kãensã wilgdame tɩ neb sã n da wa namsd Israyɛll nebã, wall b tʋmd tʋʋm-beedo, Wẽnnaam kɩtdame t’a nin-buiidã zab n fãag b mense, la b kogl tũudum hakɩkã. La zab nins Wẽnnaam sẽn kõ noor tɩ b zabã wɛɛngẽ, bũmb a tã la y segd n bãnge.
WẼNNAAM MENG N WILGD A SOAB NING SẼN SEGD N ZABÃ. Daar a yembre, Israyɛll nebã bɛɛb n wa n na n zab ne-ba, tɩ Wẽnnaam yeel-b woto: “Ka yãmb n na n zab zab-kãng ye.” Bõe yĩnga? Yaa yẽ mengã n da na n zab n sõng-ba. (2 Kibayã 20:17; 32:7, 8, Wẽnnaam Sebre, 1983) Sɩd me, a maana a buud naoor wʋsgo, wa a sẽn zab ne Ezɩpt nebã tɩ d gom rẽ yell sõsgã sɩngrẽ wã. La wakat kẽere, Wẽnnaam kõo Israyɛll nebã sẽn da yaa a nin-buiidã sor tɩ b zabe. Wala makre, a yeel-b lame tɩ b zab n deeg kãabg tẽngã, la b kogl-a.—Tõodo 7:1, 2; Zozoe 10:40.
WẼNNAAM MENG N WILGD WAKAT NING B SẼN SEGD N ZABÃ. Tẽns a taab neb sã n da wa namsd Wẽnnaam nin-buiidã la b tʋmd tʋʋm-wẽnse, b segd n maaga b yĩng n gũ tɩ Wẽnnaam wa kõ-b sor tɩ b zab n fãag b mense. B ra pa segd n tɩ zab tɩ Wẽnnaam pa kõ-b sor ye. B sã n kɩɩs n kẽnge, Wẽnnaam pa sõngd-b ye. Sɩd me, Biiblã tara kibay sẽn wilgd rẽ. Israyɛll nebã sã n da kẽng zabr tɩ Wẽnnaam pa kõ-b sore, baasda wẽnga.a
Baa Wẽnnaam sẽn kɩt tɩ b sãam Kanaã nebã, a fãaga a Rahaab ne a ba wã zak rãmba, la neb a taaba
BAA NIN-WẼNG KŨUM PA NOOM WẼNNAAM YE. Yaa a Zeova n naan ninsaalbã la bõn-vɩɩsã fãa. (Yɩɩn-sõamyã 36:10) Woto yĩnga, a pa rat tɩ ned ki ye. Bʋko, neb n maand sɩlem n wẽgd b taaba, la b kʋʋd b taab menga. (Yɩɩn-sõamyã 37:12, 14) Sẽn na yɩl tɩ yɛl a woto sa, Wẽnnaam da mi n kɩtame tɩ b zab ne nin-wẽnsã. La baa a sẽn da mi n kõ Israyɛll nebã sor tɩ b zab ne nin-wẽnsã, a kell n wilgame t’a yaa “nimbãan-zoeer soaba,” la “sũ-maasem soaba.” (Yɩɩn-sõamyã 86:15) Wala makre, Wẽnnaam da yeela Israyɛll nebã tɩ nand tɩ b zab ne tẽnga, b tog n wilga tẽngã rãmb b sẽn segd n maaneg tɩ b ra zab ne-b ye. Rẽ kõta b bɛɛbã weer tɩ b tõe n bas b tʋʋm-wẽnsã, n põs zabrã. (Tõodo 20:10-13) Woto wilgdame tɩ Wẽnnaam pa rat tɩ nin-wẽng ki ye. A ratame t’a “tek yam n bas a manesem-wẽngã n paam n vɩɩmde.”—Ezekɩyɛll 33:11, 14-16.b
Kibay nins yell d sẽn gomã wilgdame tɩ pĩnd wẽndẽ, Wẽnnaam tũnuga ne zab n kɩt tɩ wẽgb la wẽnem buud toor-toor sa. La yaa yẽ mengã n da wilgd wakat ning zabrã sẽn segd n zabã, la a soab ning sẽn segd n zabã. Pa ninsaal ye. La Wẽnnaam sẽn da mi n zab ne a bɛɛbã, pa a sẽn nong zɩɩm daagr yĩng ye. Wẽnnaam kisa nen-kɛglem. (Yɩɩn-sõamyã 11:5) La a Zeezi Kiris sẽn wa n sɩng a koe-moonegã tẽng zugã, Wẽnnaam sẽn get zabã to-to wã toeemame bɩ?
a Wala makre, daar a ye, Israyɛll nebã yikame n na n tɩ zab ne Amalɛk nebã, la Kanaã nebã tɩ Wẽnnaam yeel-b tɩ b ra kẽng ye. B sẽn kɩɩs n kẽngã, b bɛɛbã tõog-b lame. (Sõdbo 14:41-45) Kaoosg zugẽ, rĩm a Zozɩas sẽn yɩ wẽn-sakdã kẽnga zabre, tɩ Wẽnnaam yaool n da pa kõ-a sor ye. A sẽn maan woto wã, tũu ne a yõore.—2 Kibayã 35:20-24.
b Israyɛll nebã sẽn wa n na n zab ne Kanaã nebã, b pa reng n wilg-b b sẽn tõe n maan to-to tɩ b ra zab ne-b ye. Bõe yĩnga? Wẽnnaam da basa Kanaã nebã yʋʋm 400 tõr sẽn na yɩl tɩ b toeeme. Israyɛll sẽn wa n na n zab ne-bã tɩ tẽngã nebã ra maneg n lebga wẽns wʋsgo. (Sɩngre 15:13-16) Woto kɩtame tɩ b ra segd n sãam-b zãng fasɩ. La b sʋkã neb kẽer sẽn sak n toeem paam n põsame.—Zozoe 6:25; 9:3-27.