SEBRÃ GOM-ZUG SÕSGÃ | WÃN TO LA WẼNNAAM GET ZABÃ?
Wẽnnaam sẽn get zabã to-to a Zeezi sẽn wa n be tẽng zugã
A Zeezi wakatẽ wã, Rom nebã ra tara zʋɩf-rãmbã n namsdẽ. Sãmbg sẽn ka be, bãmb me maana wa b yaab-rãmbã, n kos Wẽnnaam naoor wʋsg t’a fãag-ba. B wa n wʋmame tɩ b gomd a Zeezi yelle. Neb kẽer da tẽedame tɩ yẽ n yaa Mesi ning Wẽnnaam sẽn da pʋlmã. Rẽnd pa zaalem la neb wʋsg sẽn da tẽed tɩ yaa a Zeezi n ‘na n fãag Israyɛllã’ ye. (Luk 24:21) Baa ne rẽ, b pa paam yolsg ye. Yʋʋmd 70 soabã, Rom sodaasã pʋd n sãama Zeruzalɛm ne a wẽnd-doogã.
Bõe n kɩt tɩ yɩ woto? Bõe yĩng tɩ Wẽnnaam pa zab n sõng zʋɩf-rãmbã wa a sẽn da maan pĩndã? Bõe yĩng t’a pa kõ-b sor tɩ b zab ne b bɛɛbã n fãag b mense? Wẽnnaam sẽn da get zabã to-to wã toeemame bɩ? Ayo. La bũmb n toeem zʋɩf-rãmbã yɛl pʋgẽ. B pa sak n deeg tɩ Wẽnnaam Bi-ribl a Zeezi n yaa Mesi wã ye. (Tʋʋmã 2:36) Woto kɩtame tɩ Wẽnnaam me raag-b n bas tɩ b pa le yaa a nin-buiid ye.—Matye 23:37, 38.
Wẽnnaam ra pa le kogend zʋɩf-rãmbã la kãabg-tẽngã ye. Zʋɩf-rãmbã ra pa le tõe n paam tɩ Wẽnnaam kõ sor tɩ b zab ne b bɛɛba, wall a teel-b zabr sasa ye. Wẽnnaam bas-b-la wa a Zeezi sẽn da togsã, n yãk neb n zae ne a vʋʋsem sõngã, tɩ b lebg a bu-paalga. Nin-kãens la b sẽn bool Biiblã pʋgẽ tɩ “Wẽnnaam Israyɛllã.” (Galat-rãmbã 6:16; Matye 21:43) Kiris-neb nins sẽn paam vʋʋsem sõngã zaeebã n sɩd yaa Wẽnnaam Israyɛllã. Rẽ n so tɩ pipi kiris-nebã wakatẽ, b yeel nin-kãens woto: ‘Moasã, yãmb yaa Wẽnnaam neba.’—1 Pɩyɛɛr 2:9, 10.
Pipi kiris-nebã sẽn lebg “Wẽnnaam nebã,” a zabame n fãag-b Rom nebã nugẽ, wall a kõ-b sor tɩ b zab n fãag b mens bɩ? Ayo. Bõe yĩnga? Wa d sẽn yã sõsg ning sẽn loogã pʋgẽ wã, Wẽnnaam sã n na n kõ sor tɩ b zab zabre, yaa yẽ mengã n wilgd wakat ning b sẽn segd n zabã. Wẽnnaam pa zab n sõng pipi kiris-nebã ye. A pa kõ-b sor me tɩ b zab ne b bɛɛbã ye. Rẽnd yaa vẽeneg tɩ sasa kãng pa wakat Wẽnnaam sẽn yãk n na n kɩt tɩ b zab n menes wẽnemã la wẽgbã ye.
Pipi kiris-nebã me ra segd n maaga b yĩng n gũ tɩ wakat ning Wẽnnaam sẽn yãk n na n menes wẽnemã la wẽgbã ta, wa sẽn yɩ to-to ne Wẽnnaam nin-buiidã nand t’a Zeezi wa tẽngã zugã. La nand tɩ wakat kãng ta, Wẽnnaam pa kõ-b sor tɩ b zab ne b bɛɛbã ye. A Zeezi Kiris wilga rẽ vẽenega. A pa yeel a karen-biisã tɩ b zab ye. A pʋd n yeel-b-la woto: ‘Nong-y y bɛɛbã la y pʋʋs neb nins sẽn maand yãmb wẽngã, la sẽn namsd yãmbã yĩnga.’ (Matye 5:44) A Zeezi sẽn wa n wilgd a karen-biisã tɩ wakat n wat tɩ Rom sodaasã na n sãam Zeruzalɛmmã, a pa yeel tɩ b yals n zab ye. A wilg-b-la bãnde, n yeel tɩ b sã n wa yã rẽ bɩ b zoe n yi tẽngã. B sɩd maana woto.—Luk 21:20, 21.
Wẽnnaam vẽnega tʋm-tʋmd a Poll me t’a yeele: “Da rok-y y sũy y toor ye. . . . Bala, b gʋlsame yaa: Zu-soabã yetame tɩ sũ-dokr yaa bãmb n so, la yaa bãmb n na n keo nebã.” (Rom-dãmbã 12:19) Yaa goam Wẽnnaam sẽn togs nand t’a Zeezi wa tẽng zug la tʋm-tʋmd a Poll sẽn lebs n togsã. Gom-kãens bee Maan-kʋʋr 19:18, la Tõod 32:35 pʋgẽ. Wa d sẽn yã sõsg ning sẽn loogã pʋgẽ wã, bũmb Wẽnnaam sẽn maan n dok a nin-buiidã sũur yaa a sẽn da mi n sõng-b tɩ b zab ne b bɛɛbã n tõogã. Dẽnd a Poll sẽn yeelã wilgdame tɩ pipi kiris-nebã wakatẽ tɩ Wẽnnaam sẽn get zabã to-to wã pa toeem ye. Wẽnnaam nifẽ, zabr da ket n yaa bũmb a sẽn tõe n tũnug n dok a sũur ne a nin-buiidã bɛɛba, la a kɩt tɩ wẽgbã la wẽnemã sa. La wa sẽn yɩ to-to nand t’a Zeezi wa tẽng zugã, ket n yaa Wẽnnaam n yãkd wakat ning a sẽn na n kɩt tɩ b zab ne nin-wẽnsã, la a soab ning sẽn na n zab ne-bã.
D bãngame tɩ Wẽnnaam pa kõ pipi kiris-nebã sor tɩ b zab ne b bɛɛbã ye. La rũndã-rũndã yẽ? Neb n be tɩ Wẽnnaam kõ-b sor tɩ b tõe n zab ne b bɛɛbã bɩ? Wakat taame tɩ Wẽnnaam na n zab n sõng a nin-buiidã bɩ? Wãn to la Wẽnnaam get zabã rũndã-rũndã? Sõsg ning sẽn pʋgdã na n leoka sogs-kãensã.