Y sẽn tõe n mao ne sũ-sãang to-to

Yel-kãngã wɛɛngẽ, y tõe n paama sagls wʋsgo, la pa fãa n yaa sõma ye. Wala makre, kẽer tõe n sagl-y lame tɩ y ra yãbe, wall b yeel tɩ y ra wilg y sũ-sãangã ye. Sãnda yẽ na n sagl-y lame tɩ y maan y sẽn tõe fãa tɩ nebã yã tɩ y sũur sãama wʋsgo. La Biiblã sẽn kõt sagls ninsã yaa sõma. Bãngdbã meng sẽn yet bũmb ningã zemsa ne Biiblã sẽn yetã.

Buud kẽer pʋgẽ, b yetame tɩ rao pa segd n yãb ye. La rẽ yĩnga ned tog n zoeya yãnd n pa rat n yãb neb sʋk bɩ? Logtoɛɛmbã wilgame tɩ f ned sã n maan kaalem tɩ f yãbe, pa wẽng ye. B pʋd n paasame tɩ tõe n booga toogã, la tɩ f sã n yõk f meng n pa yãbe, pa sõma ye. Bala, tõe n wa nams-f-la wʋsgo. Biiblã pa wilg tɩ f ned sã n maan kaalem tɩ f tõog f meng n pa yãbe, rẽ la sõma ye. Tẽeg-y-yã a Zeezi yelle. Baa a sẽn da tõe n vʋʋg kũumã, a zoa a Lazaar sẽn maan kaalmã, a yãba nebã sʋka.—Zã 11:33-35.

Nina ned sã n maan kaalem, a sũur yikdame. Sẽn yɩɩd fãa, sã n yɩɩ kũ-lingdem. La bũmb wʋsg n tõe n kɩt tɩ ned sũur yik a ned kaalem sasa. Wala makre, ned a sẽn nand tõe n goma goam sẽn pa zemse. A Mike sẽn be Afirikdisiidã yeela woto: “Mam ba wã kaalem sasa tɩ m tara yʋʋm 14 bala. A kʋʋrã daare, egiliizã taoor soab yeelame tɩ yaa Wẽnd n boond nin-tɩrsã, la tɩ yaa rẽ n so t’a reegd b yõorã pĩnd-pĩnda.a Gom-kãensã yika mam sũuri, bala, tõnd da ket n data d ba wã. Yʋʋm 63 la woto, la a gomdã ket n namsda maam.”

Kẽer tõe n ningda b meng taale. Naoor wʋsgo, ned y sẽn nong sã n tiig n maan kaalem, y tõe n wa tagsdame tɩ y sã n da maanẽ woto bɩ woto, a ra kõn kiẽ ye. Pa rẽ bɩ tõe tɩ yãmb ne sẽn maan-a kaalmã sẽn yã taab yaoolem, y moorã yõsga taaba. Rẽ fãa tõe n wa kɩtame tɩ y ningd y meng taale.

Y sã n ningda y meng taale, pa rẽ bɩ y sũur sã n yikdẽ, pa segd tɩ y sĩnd wa yell kae ye. Gom-y ne ned sẽn yaa y zoa, tɩ y miẽ t’a na n kelg-y-la sõma la a sõng-y tɩ y bãng t’a buud paama neb a taaba. Biiblã yeta woto: “F zoa ning tõe n nong-f lame n yɩɩd f ma-biiga.”—Yel-bũnã 18:24.

Wẽnnaam a Zeova n yaa zoa sẽn ka to. Y ned sã n maan kaalem bɩ y pelg y pʋg n pʋʋs-a n togs y sũ-sãangã, bala, a ‘geta yãmb yelle.’ (1 Pɩyɛɛre 5:7) Sẽn paase, a pʋlmame tɩ ned sã n dɩk a yell n togs yẽ, a na n kɩtame tɩ yẽ “laafɩ wã sẽn yɩɩd ninsaalbã bãngr fãa wã” gũ a sũurã la a tagsgã. (Filip-rãmbã 4:6, 7) Yɩta sõma me tɩ y sak tɩ Wẽnnaam sõng-y ne a Gomdã maasem, n sigs y sũurã. Bao-y sebr n gʋls vɛrse-rãmb sẽn keng y raoodo. (Ges-y zĩ-gũbrã.) Y sã n tõe bɩ y rɩk vɛrse-kãens ne zugu. Woto, y sã n wa yaa y yembr yʋngo, n makd gõeem n kongdẽ, y tõe n bʋgsa vɛrse-kãens zug tɩ sõng-yã.—Ezayi 57:15.

A Jack yaa rao sẽn tar yʋʋm 40. Sẽn nan pa kaoose, kãnsɛɛr n kʋ a pagã. A yeelame tɩ yẽ sẽn lebg a yembrã mi n sãamda a sũuri. La a wilgame tɩ pʋʋsgã sõngd-a lame. Ad a sẽn yeele: “M sã n wa pʋʋsd a Zeova, m neeme tɩ m pa m yembr ye. Naoor wʋsgo, m mi n neka yʋngo, n pa le tõe n gũs ye. La m sã n karem vɛrse-rãmb sẽn kengd raood la m bʋgs b goamã zugu, n pelg m pʋg n pʋʋse, m paamda laafɩ tɩ m yamã gãand bãane, tɩ m le tõog n gũsi.”

Pag yʋʋr sẽn boond t’a Vanessa ma n bẽ n wa baas n maan kaalem. A Vanessa me yeelame tɩ pʋʋsgã sõnga yẽ wʋsgo. Ad a sẽn yeele: “Yellã sã n wa namsd-ma, m pʋʋsda Wẽnnaam ne nintãm. A Zeova reegda m pʋʋsgã, n kõ-m pãng tɩ m tõog n mao ne m sũ-sãangã.”

Bãngdbã kẽer sagenda neb nins sẽn be sũ-sãang pʋgẽ wã tɩ b sõngd b taabã, la b naagd n tʋmd tʋʋm sẽn nafd nebã fãa. Bala, tõe n kõ-b-la sũ-noogo, la boog b sũ-sãangã. (Tʋʋmã 20:35) Kiris-neb wʋsg yãame tɩ b sã n sõngd b taabã, b sɩd paamda belsgo.—2 Korẽnt-rãmbã 1:3, 4.