Yãmb makda bũmb nins y tũudmã neb sẽn tẽedã ne Biiblã sẽn yetã bɩ?

YÃMB yaa kiris-ned bɩ? Y sã n yaa kiris-neda, bɩ y bãng tɩ neb sẽn yet tɩ b yaa kiris-neb waoogame. Dũniyã gill zugu, b sõorã yɩɩda milyaar a yiibu. Rũndã-rũndã, tũudum nins sẽn yet tɩ b yaa Kirist tũudmã waoogame. La b taoor dãmbã sẽn zãmsd nebã bũmb ninsã kɩɩsda taaba. Woto yĩnga, tõe tɩ yãmb tũudmã neb sẽn tẽed bũmb ninsã yaa toor fasɩ ne tũudum a taab sẽn yet tɩ b yaa Kirist tũudum. La rẽ yĩnga, tara yõod tɩ y bao n bãng y tũudmã taoor dãmb sẽn zãmsd-y bũmb ninsã sã n yaa sɩd bɩ ziri bɩ? N-ye, tara yõodo. Bala, rẽ n na n kɩt tɩ y bãng y tũudmã sã n sɩd yaa Kirist tũudum ning yell b sẽn gomd Biiblã pʋgẽ wã.

B wa n boonda a Zeezi Kirist pipi karen-biisã tɩ ‘kiris-neba.’ (Tʋʋmã 11:26) Sẽn yaa Kirist tũudum a ye tãa n da be wã, ra pa weel tɩ yʋyã yaa toɛy-toɛy ye. Kiris-nebã fãa ra tũuda bũmb nins a Zeezi Kirist sẽn yaa b tũudmã lugundã sẽn zãms nebã. La yãmb tũudmã yẽ? Yãmb kɩsa sɩd tɩ taoor dãmbã sẽn zãmsd nebã yaa bũmb nins Kiristã sẽn yeelã bɩ? Y kɩsa sɩd tɩ yaa pipi kiris-nebã sẽn da tũud bũmb ninsã bɩ? Y maanda wãn n bãng rẽ? Bũmb a ye tãa n tõe n sõng-yã. Yaa Biiblã. Bõe yĩng tɩ d yet woto?

A Zeezi ra nanda Biiblã hal wʋsgo, n kɩs sɩd tɩ yaa Wẽnnaam sebre. A wilgame t’a sũur pa noom ne neb nins sẽn pund Wẽnnaam goamã wall b basd-a kɛɛng n sakd ninsaalb minindã ye. (Mark 7:9-13) Dẽnd d tõe n yeelame tɩ Kirist tũudum hakɩɩkã sẽn zãmsd nebã bũmb ninsã tog n zemsa ne Biiblã sẽn yetã. Yɩta sõma tɩ kiris-ned fãa sok a meng woto: ‘B sẽn zãmsd maam bũmb nins m tũudmã pʋgẽ wã zemsa ne Biiblã sẽn yetã bɩ?’ Sẽn na yɩl n leok sok-kãngã, bɩ y mak b sẽn zãmsd yãmbã ne Biiblã sẽn yetã.

A Zeezi yeelame tɩ Wẽnnaam Goamã la sɩda, la tɩ d sẽn tũud Wẽnnaam to-to wã segd n zemsa ne rẽ. (Zã 4:24; 17:17) Tʋm-tʋmd a Poll me yeelame tɩ yaa neb nins sẽn na n “tõog n bãng sɩdã” n na n wa paam fãagre. (1 Tɩmote 2:4) Rẽ n so tɩ yaa tɩlɛ tɩ d bao n bãng d sẽn tẽed bũmb ninsã sã n zemsa ne Biiblã sẽn yetã. Yaa yõor yelle!

D MAANDA WÃN N BÃNG D SẼN TEEDÃ SÃ N ZEMSA NE BIIBLÃ SẼN YETÃ?

Karm-y sogsg a yoobã, la Biiblã sẽn leokd-b to-to wã. Rɩk-y Biiblã meng n lak n karem vɛrse-rãmbã b sẽn wilgã, la y maag y yĩng n tags b sẽn yetã zugu. Rẽ poor bɩ y sok y meng woto: ‘Bõe la tõnd wẽnd-doogã karen-saam-dãmbã yeta? Yaa a ye ne Biiblã sẽn yetã bɩ?’

Y sã n maan woto, na n sõng-y lame tɩ y mak bũmb nins y wẽnd-doogã neb sẽn tẽedã ne Biiblã sẽn yetã. Sogsg a taab n kete, tɩ y tõe n bao b leoorã Biiblã pʋgẽ, n mak ne b sẽn yet yãmb y wẽnd-doogẽ wã. Y sã n dat n bãng Biiblã sẽn yet bũmb ninsã, a Zeova Kaset rãmbã na n sõng-y lame. Y tõe n baoo b zĩig tɩ b sõng-y tɩ y zãms Biiblã. Pa yaood ye. Y sã n dat me y tõe n kẽe jw.org sẽn yaa tõnd sɩtã pʋgẽ.

1 SOKRE: Wẽnnaam yaa ãnda?

LEOORE: A Zeova n yaa Wẽnnaam. Yẽ la a Zeezi Ba. A pa tall sɩngre, a pa na n tall saab me ye. Yẽ la pãng sẽn ka to soabã, sẽn naan-a bũmba fãa wã.

BIIBLÃ SẼN YETE:

“Tõnd pʋʋsda tõnd Zu-soab a Zeezi Kiris ba a Wẽnnaam barka, la d pʋʋsd yãmb yĩng n ka basdẽ ye.”—Koloos-rãmbã 1:3.

“Tõnd Zu-soab la d Wẽnnaam, yãmb n zems tɩ reeg ziiri, la waoogre, la pãnga. Bala, yãmb n naan bũmb fãa, la yaa yãmb daab yĩng la y naan-b tɩ b beẽ.”—Vẽnegre 4:11.

Y leb n tõe n karma Rom-dãmb 10:13; 1 Tɩmote 1:17.

2 SOKRE: A Zeezi Kirist yaa ãnda?

LEOORE: A Zeezi yaa Wẽnnaam Bi-ribl-kãsengã. Yaa Wẽnnaam n naan-a. Rẽnd a talla sɩngre. A Zeezi sakda Wẽnnaam, n maand Wẽnnaam raabã.

BIIBLÃ SẼN YETE:

“M ba yɩɩda maam.”—Zã 14:28.

“Kirist yaa Wẽnnaam sẽn ka tõe n yã wẽnego, la Bi-kãseng sẽn yɩɩd bõn-naandsa fãa.”—Koloos-rãmbã 1:15, Wẽnnaam sebre, 1983.

Y leb n tõe n karma Matye 26:39; 1 Korẽnt-rãmb 15:28.

3 SOKRE: Vʋʋsem sõngã yaa bõe?

LEOORE: Vʋʋsem sõngã yaa Wẽnnaam pãngã a sẽn tar n pids a raabã. Pa ned ye. Wẽnnaam tõe n kɩtame tɩ ned pid ne a vʋʋsem sõngã, n paam pãnga.

BIIBLÃ SẼN YETE:

“A Elizabɛt sẽn wʋm a Maari pʋʋsgã, biiga sẽn be yẽ pʋgẽ wã lebgame, la a Elizabɛt pida ne Sɩɩg Sõngo.”—Luk 1:41.

“La Sɩɩg Sõng sã n wa yãmb zutu, yãmb na reeg pãnga.”—Tʋʋmã 1:8.

Y leb n tõe n karma Sɩngr 1:2; Tʋʋm 2:1-4; 10:38.

4 SOKRE: Wẽnnaam soolmã bɩ a Rĩungã yaa bõe?

LEOORE: Wẽnnaam Rĩungã yaa goosneema sẽn be saasẽ. A Zeezi la Wẽnnaam Rĩungã Rĩmã. Ka la bilfu, Rĩungã na n sooga tẽngã tɩ Wẽnnaam raabã maan dũniyã gill zugu.

BIIBLÃ SẼN YETE:

“Malɛk a yopoe soabã peeba baorgo. La koe-kãsems zĩnda arzãn pʋgẽ n yeele: ‘Dũniyã soolem fãa lebga tõnd Zu-soabã la bãmb Kirist dẽnda, la bãmb na n dɩɩ naam wakat sẽn ka sɛta.’ ”—Vẽnegre 11:15.

Y leb n tõe n karma Dãniyɛll 2:44; Matye 6:9, 10.

5 SOKRE: Nin-tɩrsã fãa na n kẽnga saasẽ bɩ?

LEOORE: Ayo. Yaa wẽn-sakdb sõor bilf bal la Wẽnnaam yãk tɩ b na n kẽng saasẽ, n tɩ naag a Zeezi n dɩ naam dũniyã gill zugu. B bool-b lame tɩ ‘wubr pa zem bũmbu,’ rat n yeel tɩ bãg-bila.

BIIBLÃ SẼN YETE:

“Da zoe-y rabeem ye, wubr pa zem bũmbu, tɩ nooma y Ba tɩ b kõ yãmb b Rĩungu.”—Luk 12:32, Sebr Sõngo.

“Bãmb na n yɩɩ Wẽnnaam ne Kirisã maan-kʋʋdba, la b na n dɩɩ naam ne Kirisã.”—Vẽnegre 20:6.

Y leb n tõe n karma Vẽnegr 14:1, 3.

6 SOKRE: Wẽnnaam datame tɩ tẽngã zug vɩɩm yɩ wãn-wãna?

LEOORE: Wẽnnaam Rĩungã sã n wa so tẽngã, dũniyã gill na n lebga arzãna, tɩ wẽn-sakdbã fãa vɩɩmd a zug wakat sẽn kõn sa ne sũ-noogo, laafɩ la bãane.

BIIBLÃ SẼN YETE:

“Sik-m-mens rãmbã n na n soog tẽngã, la b na n paama vɩ-bãane, ne sũ-noog meng-menga.”—Yɩɩn-sõamyã 37:10, 11.

“Wẽnnaam na n yẽesa nintãm fãa sẽn be b ninẽ wã. Kũum kõn leb n zĩnd ye, la sũ-sãang wall yãbre, wall toog kõn leb n zĩnd ye. Bala, dẽenem bũmbã fãa loogame.”—Vẽnegre 21:3, 4.

Y leb n tõe n karma Yɩɩn-sõamyã 37:29; 2 Pɩyɛɛr 3:13.