Karemdbã sogsgo
Bõe yĩng tɩ ned pa tar sor n ning a Zeova Kaset rãmbã sẽn yiisd bũmb ninsã sɩt wɛɛb wall reezo sosiyall zugu?
A Zeova Kaset rãmbã sẽn yiisd bũmb ninsã sẽn pa koosdã yĩnga, neb kẽer tagsdame tɩ b sã n yãk bũmb be n ning sɩt wɛɛb zugu, wall reezo sosiyall zugu, yell kae ye. Yaool n pa zems ne noy nins sẽn kẽed-b tõnd sɩt wɛɛb rãmbã pʋgẽ wã sẽn segd n sakã ye.a Pʋd n waa ne zu-loeese. Noyã pʋgẽ, b wilga vẽeneg tɩ ned baa a ye pa tar sor n yãk imaaze, miziki, foto, video, bɩ bũmb a to sɩt-kãngã pʋgẽ n ning ẽntɛrnetã pʋgẽ, baa sẽn yaa sɩt ninga, wall reezo sosiyall ning ye. Bõe yĩng tɩ d yiis no-kãngã?
Ned pa tar sor n ning bũmb nins a Zeova Kaset rãmbã sẽn yiisdã sɩt wɛɛb a to zug ye
D tara dʋrwa-rãmb sẽn kogend bũmb nins fãa sẽn be d sɩt wɛɛb rãmbã zugã. Sɩdã kɩɩsdbã la neb a taab sẽn pa nong a Zeova nin-buiidã mi n yãka bũmb kẽer d sẽn yiisi, n ning bãmb sɩt wɛɛb rãmb zugu, n na n tudg a Zeova Kaset rãmb la neb a taaba. Bũmb nins sẽn be sɩt-kãens zugã yaa sẽn na n wa ne sãmbs nebã yamẽ. (Yɩɩn. 26:4; Yel. 22:5) Neb sãnda me wilgda bũmb kẽer d sẽn yiisi, wall gʋls-biis nins sẽn yaa JW wã b piblisite-rãmb pʋgẽ, pa rẽ bɩ n ning teed b sẽn koosd zugu, wall aplikasiyõ-rãmb pʋgẽ. D sẽn tar dʋrwa-rãmb sẽn kogend bũmb nins fãa d sẽn yiisdã kɩtame tɩ d tar sor n gɩdg sẽn maand-b woto wã. (Yel. 27:12) La d sã n sĩnd n getẽ tɩ nebã maand woto, baa d tẽed-n-taas menga, laloa wã rãmb tõeeme n pa le sõng-d tɩ d gɩdg lɛɛbdbã la sẽn pa nong-b tõndã tɩ b ra maan a buud ye.
Ned sã n kẽ sɩt sẽn pa tõnd sɩtẽ n telesarz bũmb d sẽn yiisi, tõe n wãa a soaba. Yaa tʋm-tʋmd sẽn tũud sɩdã bal la a Zeova yãk t’a kõt tõnd sẽn yaa tɩlɛ d tẽebã kengr yĩngã. (Mat. 24:45) Yaa ne www.jw.org, tv.jw.org, la wol.jw.org sẽn yaa tõnd sɩt wɛɛb rãmbã bal la tʋm-tʋmdã n tũnugd n maand woto. Sẽn paase, aplikasiyõ-rãmb nins siglgã sẽn maanã yaa bãmb b tãab bala. Yaa JW Language®, JW Library®, la JW Library Sign Language®. D tõe n basa d yam tɩ d sɩt wɛɛb rãmbã ne d aplikasiyõ-rãmbã pa naag ne piblisite-rãmb wall a Sʋɩtãan dũniyã yɛl ye. La bũmb d sẽn yiis sã n tɩ be sɩt a taab zugu, d pa tõe n kɩs sɩd tɩ b pa tek bũmbu, wall pa kalem ne ziri ye.—Yɩɩn. 18:27; 19:9.
Sẽn paase, ned sã n dɩk bũmb d sẽn yiis n ning sɩtẽ ned fãa sẽn tõe n kẽ n togs a tagsgo, kõta sɩdã kɩɩsdbã la wɩtb a taab weer tɩ b paamd n wɩt a Zeova siglgã, n dat tɩ nebã tẽ tɩ b pa tõe n teeg siglgã ye. D tẽed-n-taas n kẽed ẽntɛrnetã pʋgẽ n sõsd ne neba, n wẽed no-koɛɛma, tɩ rẽ maneg n wa ne a Zeova yʋʋrã sãoongo. Sõss a woto pa tõe n sõng tɩ d ‘dems no-koɛɛm-wẽedbã ne sũ-bʋgsem’ ye. (2 Tɩm. 2:23-25; 1 Tɩm. 6:3-5) Neb a taab me sẽn yaa zãmb dãmb n pak kõnt-rãmb reezo sosiyo rãmb zugu, bɩ n maan sɩt wɛɛb rãmba, n ning siglgã yʋʋre, wall siglgã taoor lʋɩtb sull neb yʋya. La bãng-y tɩ siglgã taoor lʋɩtb sull ned baa a ye pa tar a toorẽ sɩt wɛɛbe, b leb n pa be reezo sosiyall baa a yembr zugu.
D sã n wilgd nebã tõnd sɩtã sẽn yaa jw.org, sõngdame tɩ ‘koe-noogã’ ta zĩis wʋsgo. (Mat. 24:14) Siglgã getame tɩ ẽntɛrnetã tʋʋmd-teed nins a sẽn kõ-d koɛɛgã mooneg yĩngã sõmblem tar paasgo. D ratame tɩ ned kam fãa rɩ a yõodo. Rẽ n so tɩ d rat n tẽeg-y tɩ wa noyã d sẽn segd n sakã sẽn wilgã, sã n yaa bũmb d sẽn yiis tɩ be jw.org pʋgẽ la y rat n tool ned ne ẽntɛrnetã maasem, wall n wilg-a sor ning a sẽn na n tũ ẽntɛrnetã pʋgẽ n paam n yã bõn-kãnga, sor beeme. D sã n wilgd nebã tõnd sɩt wɛɛb rãmbã, na n sõngame tɩ b bãng tʋm-tʋmd sẽn tũud sɩdã. Bala, yaa ne tʋm-tʋmdã maasem bal la a Zeova kõt tõnd sẽn yaa tɩlɛ d tẽebã kengr yĩnga.