Tõnd sit wɛɛbã yaa tõnd mengã la neb a taabã nafr yĩnga
A Zezi yeela tõnd tɩ d moon Rĩungã koe-noogã “dũniyã tɛk fãa tɩ yɩ kaset buud fãa yĩnga.” (Mat. 24:14) Sẽn na yɩl n sõng tõnd tɩ d tõog n tʋm d ‘tʋʋmdã neere,’ d rɩka watchtower.org ne jw-media.org la jw.org n fãoog taab tɩ lebg jw.org.—2 Tɩm. 4:5.
“Dũniyã tɛk fãa”: Dũniyã gill zugu, neb a tãab sʋka, nin-yend n tʋmd ne ẽntɛrnetã. Yaa be la neb wʋsg get n paamd kibayã, sẽn yɩɩd fãa kom-bɩɩsã. Tõnd sit wɛɛbã sõngda nebã tɩ b paamd b sogsg leoore. Wae n yaa sogsg b sẽn tar Biiblã goam zugu. Sõngd-b lame me tɩ b bãng a Zeova siglgã, la b tõe n kos tɩ d wat n zãmsd-b Biiblã zaalem. Woto, baa neb nins sẽn be zĩis kẽere, tɩ yaa toog ne-b tɩ b wʋm Rĩungã koe-noogã tõe n paam n wʋmame.
“Buudã fãa yĩnga”: Sẽn na yɩl n moon koe-noogã tɩ yɩ kaset “buudã fãa yĩnga,” yaa tɩlae tɩ d taas nebã Biiblã goamã buud-goam toor-toor pʋgẽ. Ned sã n pak jw.org, a tõe n paama kibay buud-goam 400 pʋgẽ faag-faaga. Sit wɛɛb sẽn kõt kibay ne buud-goam wʋsg woto kae ye.
D tʋm ne-a sõma: Sit wɛɛb kãngã pa sẽn na n sõng tõnd tɩ d taas koɛɛgã neb a taabã bal ye. Yaa tõnd a Zeova Kaset rãmbã me yĩnga. Yãmb sã n tõe n paam ẽntɛrnetã, bɩ y modg n pak jw.org sẽn yaa d sit wɛɛbã n gese. Ad y sẽn tõe n maan to-to n paam kibay be:
[Foto seb-neng a 3]
(Yaa sebrã meng pʋgẽ la y tõe n yã fãa)
Mak-y n ges-y
1 Y sã n pak ẽntɛrnetã bɩ y gʋls www.jw.org adɛrs rãmbã gʋlsg zĩigẽ.
2 Rẽ poor bɩ y yãk y sẽn datã n kiliki.
3 Y tara ordinatɛɛr bɩ yaa telefõn n tõe n kẽ ẽntɛrnetẽ wã, bɩ y pak jw.org sitã. Y tõe n boogame wall y paas a yalmã tɩ zems y sẽn datã, tɩ sẽn be be wã pa toeem ye.