Y sẽn tõe n maan tɩ Biiblã zãmsg maneg n yɩ sõma la noog n paase

A Zozuwe sẽn karemd tõogã; Zeriko lalsã fãa sẽn lʋɩ n kell a Rahaab roogã; A Zozuwe sẽn zẽk a nus n tees yĩngr n pʋʋsdẽ

A ZOZUWE ra segd n maana bũmb sẽn pa nana. Yẽ n da segd n tall Israyɛll nebã n tɩ kẽ kãabg tẽngẽ wã. Zu-loeesã na n yɩɩ ka tɛka. La a Zeova yeel-a lame t’a bas a yam t’a na n tõogame. A yeel-a lame yaa: ‘Fo we n keng f meng n paam daood bala. Mao n sak m tõogã. Karem m tõogã wĩndg la yʋngo, n sak n maan wa bũmb nins sẽn gʋls a pʋgẽ wã. Yaa woto la f na n tõog n tʋm f tʋʋmã tɩ yɩ sõma.’—Zoz. 1:7, 8.

Tõnd me sẽn be dũniyã yaoolem wakatã, d maooda ne zu-loees ka tɛka, hal tɩ pa nana ye. (2 Tɩm. 3:1) Yaa tõnd me sã n tũ saglg ning a Zeova sẽn kõ a Zozuwe wã la d na n tõog n mao ne zu-loeesã. D karemd Biiblã daar fãa, la d bʋgsd neer n get a saglsã sẽn tõe n sõng-d to-to d zu-loeesã pʋgẽ.

La wʋsg na n sak n deegame tɩ b pa nong sebr zãmsgo, wall tɩ b pa mi zãmsgã sõma ye. Baasgo, Biiblã zãmsg tara yõod wʋsgo. Ges-y sagls nins sẽn be zĩ-gũbrẽ wã, tɩ y na n yãa y sẽn tõe n maane, tɩ y sẽn zãmsd Biiblã to-to wã yɩ sõma la noog n paase.

Yɩɩn-gʋlsdã ra yeelame yaa: ‘Kɩt-y tɩ m kẽn yãmb noyã sor zugu! Bala, mam sũur nooma ne-ba.’ (Yɩɩn. 119:35) Y tõe n sɩd paama sũ-noog Wẽnnaam Gomdã zãmsg pʋgẽ. Y sã n zãmsd Wẽnnaam Gomdã neere, y na n bãnga bũmb wʋsg y sẽn da pa mi, hal tɩ naf-yã.

Yaa sɩd tɩ y pa segd n tall nin-buiid n tɩ kẽes tẽngẽ wa a Zozuwe ye. La yãmb me tara y zu-loeese. Woto wã, rɩk-y a Zozuwe togs-n-taare, n karemd Wẽnnaam Gomdã, la y tũud bũmb nins b sẽn yet be wã. Rẽ, yãmb me na n tõog n maana bũmb fãa tɩ yɩ sõma.

AD Y SẼN TÕE N MAANE

Reng-y n pʋʋs-y-yã. Yaa Wẽnnaam sẽn ka-to wã goam n be Biiblã pʋgẽ. A kɩtame tɩ b gʋls rẽ tõnd nafr yĩnga. Dẽnd y sã n wa karemd Biiblã bɩ y kos-a t’a sõng-y tɩ y wʋm a võore, la y ra yĩmi, la y tõog n tũ.—Ɛsd. 7:10.
Sokd-y y meng sogsgo. Yaa Biiblã tɩ yaa sebr sẽn wɛgsd a goamã la y karemda, bɩ y mi n sok y meng yaa: ‘M sẽn karemdã wilgda maam bõe a Zeova zugu? Bõe n wilgd tɩ goam nins m sẽn karemdã zemsa ne koɛɛg ning Biiblã sẽn taasdã? Wãn to la m tõe n dɩk m sẽn bãngã n sõng neb a taaba?’
Bʋgsd-y y sẽn karemdã zugu. Y sã n karemdẽ bɩ y mi n yals n tagse. Sok-y y meng yaa: ‘M tagsg yaa wãn ne mam sẽn karemdã? Bõe yĩng tɩ mam tagsg yaa woto? Zu-loe-bʋg la m paam pĩndã, tɩ m sẽn bãngã ra tõe n sõng-ma? Wãn to la tõe n sõng-m rũndã-rũndã, la beoog sẽn wate? Wãn to la m tõe n tũ noy la sagls nins m sẽn bãngã?’ (Zoob 23:5; Yɩɩn. 49:4) Ges-y y sã n tõe n wilga a Zeova sẽn yeel a nin-buiidã tɩ b ra maan bũmb kẽerã võore, wall rẽ kɩɩsg sẽn na n wa ne biis ninsã.—Tõo. 32:28, 29.
Mamsd-y kibayã y yamẽ. D rɩk makr ne a Zozɛf ba-biisã sẽn wa n koosd-a ne Ismayɛll buudã nebã. (Sɩng. 37:18-28) Y tõe n mamsa rẽ y yamẽ bɩ? Bõe la yãmb ne? Y wʋmda bʋʋr bɩ? Bõe yũug la y wʋmda? Ning-y yãmb mengã neb nins yell b sẽn gomdã zĩigẽ. B tagsg la b manesem yaa wãna? Yãmb sã n maand a woto, Biiblã zãmsg na n maneg n kẽ-y lame, la naf-yã.
Tũnugd-y ne tʋʋm-teedã n maand vaeesgo. Siglgã yiisa sɛb la bũmb a taab sẽn be ẽntɛrnetã pʋgẽ, tɩ tõe n sõng-d tɩ d maan vaeesg sõma. Bao-y n bãng-y y sẽn tõe n tũ ne rẽ n maan vaeesg to-to. Y tõe n kosa ned t’a sõng-y menga. Wala makre, yell ning wɛɛngẽ y sã n dat n bãng siglgã sɛbã sẽn yete, wall b sẽn wɛgs Biiblã gomd ning to-to, ẽndɛgs-rãmbã la Guide de recherche pour les Témoins de Jéhovah wã tõe n sõng-y lame. Guide d’étude de la Parole de Dieu sebrã me tõe n sõng-y lame tɩ y bãng zĩis nins yell b sẽn gomd Biiblã pʋgẽ wã n paase, wall yɛl kẽer sẽn yɩ wakat ningã, pa rẽ bɩ nebã sẽn da magd teedã woglem la b zɩslem to-to wã.
Kʋmsd-y y sẽn bãngã. Rẽ na n sõng-y lame tɩ y tẽegd y sẽn zãmsã. La sẽn na n sõng-y n yɩɩda, yaa y sẽn na n gom y sẽn bãngã yell ne neb a taaba. Wala makre, y bãnga bũmb y sẽn tõe n wilg ned koe-moonegã sasa bɩ? Y sã n maand woto, y pa na n yĩm y sẽn bãngã, la y na n tõogdame me n sõngd neb a taab tɩ b rɩt a yõodo