D tʋmd ne a Zeova daar fãa!

1. Koe-moonegã sẽn yãk a toogo, bõe pʋgẽ me la d tõe n yɩ a Zeova tʋmd-n-taase?

A ZEOVA sẽn wa n naan ninsaalbã, a ra ratame tɩ b naag-a n tʋme, t’a raabã pidsi. Baa ne ninsaalbã sẽn lebg koangdbã, sẽn yaa-b wẽn-sakdbã ket n tõe n naaga a Zeova n tʋm daar ne a to fãa. Wala makre, d sẽn moond Rĩungã koɛɛgã la d zãmsd nebã Biiblã, d yaa “tʋmd-n-taas ne Wẽnnaam.” (1 Kor. 3:5-9) D sẽn paam tɩ d Naandã sẽn yaa pãng sẽn ka to soabã yãk tõndo, tɩ d naag-a n tʋmd tʋʋmd sẽn tar yõod wʋsg a nifẽ wã yaa zu-zẽkr meng-menga! La pa koe-moonegã pʋgẽ bal la d naagd a Zeova n tʋmdẽ ye. Sõs-kãnga na n sõngame tɩ d bãng tɩ d sã n get d zakã rãmb yell la d sõngd d tẽed-n-taasã, la d reegd nebã neere, n sakd ne yamleoog n tʋmd siglgã tʋʋmã, la d wɩngd ne tũudmã tʋʋm n paasdẽ, yaa a Zeova la d naagd n tʋmdẽ.—Kol. 3:23.

2. Bõe yĩng tɩ d pa segd n mak d sẽn tõe n maan a Zeova tũudmã pʋgẽ wã ne d taabã?

² La sõsgã sasa bɩ d gũus n da wa mak d sẽn tõe n maan a Zeova tũudmã pʋgẽ wã ne d taabã ye. Bala nebã pa yembr ye. D tẽeg tɩ d yʋʋmã, d keelmã, d yɛlã, d minimã bɩ d pãn-tõodã pa taab ye. Ad tʋm-tʋmd a Poll sẽn yeele: “Bɩ ned kam fãa ges a meng tʋʋmd sẽn yaa to-to, la woto, a na maan sũ-noog ne a meng tʋʋma, la a ka tog n makd a rẽndã ne neb a taabã rẽnd n maand sũ-noog ye.”—Gal. 6:4.

D GET D ZAKÃ RÃMB YELLE, LA D SÕNGD D TẼED-N-TAASÃ

3. Bõe yĩng tɩ d tõe n yeel tɩ ned sẽn get a zak rãmb yell naagda Wẽnnaam n tʋmdẽ?

³ A Zeova ratame tɩ d get d zakã rãmb yelle. Wala makre, tõe tɩ y tog n tʋma wʋsgo, n tõog tɩ y zakã rãmb paam sẽn yaa tɩlɛ ne-bã. Pagb wʋsg me paada zakẽ, n tʋmd zakã tʋʋm la b get kom-bõonegã yelle. Roagdb kẽer me pa le tõe n ges b mens yelle, tɩ lebg b kambã n segd n ges b yelle. Woto fãa yaa tɩlɛ. Biiblã yetame: ‘Ned sã n ka get a neb yelle, sẽn yɩɩd fãa yaa a zaka rãmba, yẽnda basa a tẽebã, la a yaa wẽng n yɩɩd ned ning sẽn ka-a tẽedã.’ (1 Tɩm. 5:8) Yãmb sã n tara zɩɩb woto, y tõe n getame tɩ y pa le tõe n paam sẽk wʋsg n tʋm Wẽnnaam tʋʋmã wa y sẽn dat ye. La ra n koms-y raood ye! Y sẽn get y zakã rãmb yellã nooma a Zeova.—1 Kor. 10:31.

4. Bõe la roagdbã tõe n maan tɩ wilg tɩ b lʋɩɩsda Rĩungã tʋʋmã taoore, la baasda wãna?

⁴ Roagdb nins sẽn yaa kiris-nebã sã n sõng b kambã tɩ b yãk b sẽn na n wa maan a Zeova tũudmã pʋgẽ, b naaga a Zeova n tʋmdẽ. Roagdb wʋsg maana woto, tɩ b kambã sɩd yãk yam n kẽes b meng zãng Wẽnnaam tʋʋmdã pʋgẽ, hal tɩ kẽer meng tɩ be tẽn-zãrsẽ. B lebga misioneer-dãmba, so-pakdb sẽn tɩ sõngd zĩis koe-moondbã sẽn pa waooge, pa rẽ bɩ Betɛllẽ tʋm-tʋmdba. Yaa sɩd tɩ zãrmã kɩtame tɩ zakã rãmb pa le tõe n yãt taab tao-tao ye. La roagdbã sẽn pa baood n mens nafr balã, b kengda kambã raoodo, n dat tɩ b ket n wɩngd ne b tʋʋmdã. Bõe yĩnga? Bala, b sũy yaa noog wʋsgo, b sẽn mi tɩ b kambã lʋɩɩsda Rĩungã tʋʋmã taoor b vɩɩmã pʋgẽ wã. (3 Zã 4) B tagsda wa a Ana. A ra yeelame t’a rɩka a biig a Sãmwɛll n kõ a Zeova. Roagdbã sẽn paam n tõe n naag a Zeova n tʋmd woto wã, b getame tɩ yaa b zu-zẽkre!—1 Sãm. 1:28.

5. Bõe la y tõe n maan n sõng y tigingã neb kẽere? (Ges-y sõsgã sɩngrẽ fotã.)

⁵ La y zakã rãmb yell gesg sã n pa tolg n yaa zɩɩb woto? Y tõe n sõnga y tẽed-n-taas nins sẽn bẽed bɩ sẽn kʋʋle, wall sẽn dat sõngr buud a taaba, pa rẽ bɩ y maan bũmb n teel sẽn sõngd-b nin-kãensã. Tags-y n ges-y y tigingã neb nins sẽn baood sõngrã. Tõe tɩ saam-bi-poak n get a roagd sẽn kʋʋl yelle, tɩ yãmb tõe n mi n tɩ zĩnd ne a roagdã, tɩ saam-bi-poakã paam n maan bũmb a to. Nina me sã n paam tɩ y tũud n dɩkd-a n kẽnd tigissã, wall y mi n dɩk-a t’a tɩ ra a teedo, t’a tɩ yao a faktiir-dãmba, pa rẽ bɩ a tɩ ges ned sẽn be logtor yiri, sõngd-a lame. Y sã n maand woto n sõngd y tẽed-n-taasã, y naagda a Zeova n tʋmdẽ, tɩ sõngr ning b sẽn paamdã tõe n kell n yɩ b sẽn da pʋʋsd n kotẽ wã.—Karm-y 1 Korẽnt-rãmb 10:24.

D REEGD NEBÃ NEERE

6. Maan ned sãand rat n yeelame tɩ bõe?

⁶ Wẽn-sakdbã nong n maanda sãambã sãando. Biiblã pʋgẽ, gɛrk gom-biig ning b sẽn lebg ne moor tɩ “maan sãambã sãandã” võor yaa “maan sãambã neere.” (Ebre. 13:2) Kibay wʋsg n be Biiblã pʋgẽ, n wilgd tɩ d segd n nonga sãambã, n deegd-b sõma. (Sɩng. 18:1-5) Yɩta sõma tɩ d sã n paam segb fãa bɩ d maan d taabã neere, b yaa d tẽed-n-taas tɩ b pa d tẽed-n-taase.—Gal. 6:10.

7. Y sã n deegd y tẽed-n-taas nins sẽn kẽes b meng zãng a Zeova tʋʋmdã pʋgẽ wã sãando, a nafa wã yaa bõe?

⁷ Y sã n deegd y tẽed-n-taas nins sẽn kẽes b meng zãng a Zeova tʋʋmdã pʋgẽ wã sãando, y naagda a Zeova n tʋmdẽ. (Karm-y 3 Zã 5, 8.) Y maanda woto bɩ? Naoor wʋsgo, d sã n deeg-b sãando, d fãa ‘naagda taab n paam raood paasgo.’ (Rom. 1:11, 12) A Olaf kibarã wilgda rẽ. A sẽn wa n yaa bi-bɩɩga, tigims sull yel-gɛtã wa n na n kaaga b tigingã. Yel-gɛtã ra pa kẽ kãadem ye. La mikame tɩ tigingã ned baa a ye ra pa tar gãag zĩig n na n kõ-a ye. A Olaf soka a roagdbã sẽn da pa a Zeova Kaset rãmbã n ges b sã n na n sak n deega yel-gɛtã sãando. B sakame, la b yeelame tɩ sã n pa a Olaf na n gãanda fotɛy-wokã zugu. A Olaf sakame. A pa maand a bãngẽ ye. Ad a sẽn yeele: “Semennã fãa yɩɩ noogo! Daar fãa, maam ne yel-gɛtã yikda pĩnd n naag taab n sok d noor la d sõs sõma. A kenga mam raood wʋsgo, hal tɩ m yãk yam n kẽes m meng zãng Wẽnnaam tʋʋmdã pʋgẽ.” Yʋʋm 40 la woto a Olaf sẽn yaa misioneere. A zĩnda tẽns toor-toore.

8. Bõe yĩng tɩ d segd n maan nebã neere, baa sã n wõnd b pa nande? Togs-y kibare.

⁸ Bũmb nins d sẽn tõe n maane, n maan sãambã neerã waoogame, baa sɩngrẽ wã b sã n pa wilg tɩ b nandame. Wala makre, saam-bi-poak sẽn be Ɛspayn ra zãmsda pag sẽn yit Ekoatɛɛr Biiblã. Pagã yʋʋr la a Yesika. Daar a ye, pagã wa n sɩnga yãbr zãmsgã sasa, n pa tõe n sĩnd ye. Saam-bi-poakã sok-a-la a yãbrã võore. A Yesika yeelame tɩ nand t’a yik n wa Ɛspayn wã, farã ra namsd-a-la wʋsgo. Daar a ye menga, a ra pa tar baa fʋɩ n dɩtẽ ye. Koom bal la a ra tar n na n kõ a biigã. A ra pʋʋsda Wẽnnaam n na n kos sõngre, la a gorsd a biigã sẽn na yɩl t’a gũsi. Sẽn yɩ bilfu, pagb a yiib sẽn yaa a Zeova Kaset rãmb n wa a nengẽ, n kãab-a sebre. A gom-b-la põaasa, n deeg sebrã n pãrse, n bas n yeel yaa: “Rɩɩb yãmb sẽn dat tɩ m kõ m biigã la woto?” Saam-bi-pogsã maana b sẽn tõe n na n bels-a, la pa yãk neng ye. B wa n tɩ baoo rɩɩb ne tɛɛg n wa rɩgl a roogã noore. B sẽn maanã yɩɩ a Yesika noogo, la a pa tõog n bãng meng tɩ yaa Wẽnnaam n da tũnugd ne saam-bi-pogsã n na n leok a pʋʋsgã ye. Yaa rẽ la a sẽn yãbdã. La a yãka yam masã n na n tũ a Zeova. Hakɩɩka, saam-bi-pogsã maan-neerã woma biisi!—Koɛ. 11:1, 6.

D SAKD N TƲMD SIGLGÃ TƲƲMÃ

9, 10. a) Segb bʋs la Israyɛll nebã paam-yã, n sõng n tʋm a Zeova tʋʋmã ne yamleoogo? b) Bõe la rapã tõe n maan n sõng ne tigingã tʋʋmã?

⁹ Pĩnd wẽndẽ, Israyɛll nebã paama segb buud toor-toore, n sõng n tʋm a Zeova tʋʋmã ne yamleoogo. (Yik. 36:2; 1 Kib. 29:5; Nee. 11:2) Rũndã-rũndã, tõnd me tara segb buud toor-toore, n tõe n kẽes d sẽka, d paoongo, d bãngr la d minim a Zeova tʋʋmã pʋgẽ n sõng d tẽed-n-taasã. D sã n sak ne yamleoog n maan woto, d paamda sũ-noog wʋsgo, la bark ka tɛka.

¹⁰ Wẽnnaam Gomdã sagenda rapã sẽn be tigimsã pʋsẽ wã tɩ b bao n lebg kãsemb-sõngdb la kãsem-dãmba, n paam n naag a Zeova n tʋm n sõng b taabã. (1 Tɩm. 3:1, 8, 9; 1 Pɩy. 5:2, 3) Sẽn tũud-b sagl-kãngã rat n sõnga b tẽed-n-taasã tũudmã wɛɛngẽ, la bũmb a taab pʋgẽ. (Tʋʋ. 6:1-4) Kãsem-dãmbã kosa yãmb tɩ y reegd sãambã, wall y sõngd n get sɛbã yelle, pa rẽ bɩ y get moonegã zĩis yelle, wall y sõngd n get Rĩungã roog yelle, pa rẽ bɩ y maand bũmb a to bɩ? Saam-biis nins sẽn sõngd ne tʋʋm-kãensa wã yetame tɩ kõt-b-la sũ-noog wʋsgo.

11. Wãn to la zo-rãmb nins saam-bi-poak a ye sẽn paam siglgã rotã meeb zĩisẽ wã sõng-a?

¹¹ Neb nins sẽn sõngd n tʋmd siglgã tʋʋmã ne yamleoogã wae n paamda zo-rãmb n paasdẽ. D gom a Margi yelle. Yaa saam-bi-poak sẽn sõng ne Rĩungã rot meeb na maan yʋʋm 18. Meebã zĩisẽ, a ra nong n sõngda saam-bi-pogs sẽn pa ta yẽ sẽn na yɩl tɩ b paam minim. A yeelame tɩ tʋʋmdã sasa, tʋm-tʋmdbã fãa paamdame n kengd taab raoodo. (Rom. 1:12) A Margi wa n paama zu-loees hal tɩ pa yɩ nana ne-a ye. La zo-rãmb nins a sẽn paam meebã zĩisẽ wã kenga a raoodo. Yãmb zoe n tɩ sõng n mee Rĩung roog wall siglgã roog a to bɩ? Baa y pa tar minim meebã pʋgẽ, y tõe n tɩ sõngame.

12. Sabab-wẽng poore, bõe la y tõe n maan n sõnge?

¹² Sabab-wẽng sã n wa maane, yaa segb me d sẽn paam n tõe n naag a Zeova n tʋme, n sõng d tẽed-n-taas nins yellã sẽn paamã. Wala makre, d tõe n kõo ligd n sõnge. (Zã 13:34, 35; Tʋʋ. 11:27-30) D leb n tõe n sõng n manega rotã sẽn sãamã. Daar a ye, sa-kẽeng n sãam Poloyn saam-bi-poak a ye roogo. A yʋʋr la a Gabriyela. A tẽed-n-taas sẽn be tigims sẽn pa zãr ne be n wa n na n sõng-a. A sẽn yã-bã, a sũur yɩɩ noog wʋsgo. Ad a sẽn yeele: “Pa bũmb nins m sẽn bõnã yell la m na n gom ye. Bala, yaa teed bala. M na n goma bũmb ning m sẽn paamã yelle. M sẽn paam sõngr a woto wã kɩtame tɩ m maneg n kɩs sɩd tɩ m sẽn paam n naag kiris-neb tigingã yaa zu-zẽkr meng-menga, la sũ-noog bũmbu.” Sẽn paam-b sõngr sabab-wẽns sasa wã wʋsg yeela bũmb sẽn wilgd tɩ bãmb me tagsg yaa woto. La sẽn naagd-b a Zeova n tʋmdẽ, n sõngd d tẽed-n-taas nins sabab-wẽns sẽn paamã me sũ-noog pa tõe n bãng n bilg ye.—Karm-y Tʋʋm 20:35; 2 Korẽnt-rãmb 9:6, 7.

13. D sã n sõngd ne siglgã tʋʋmã, wãn to la kɩtd tɩ d maneg nong a Zeova? Togs-y kibare.

¹³ Saam-bi-poak yʋʋr sẽn boond t’a Ɛstefani ne koe-moondb a taab n paam n naag Wẽnnaam n tʋme, n sõng b tẽed-n-taas sẽn zoe n bas b tẽns zab yĩng n wa be Etazĩni. B sõng-b lame tɩ b paam roto, gãase, la rotã teed a taaba. Ad a Ɛstefani sẽn yeele: “B nensã sẽn da be laado, la b sẽn da wilgd tɩ b sũur nooma ne b tẽed-n-taasã sẽn be dũniyã gill zugã sẽn maand n kõt-bã yɩɩ tõnd noog wʋsgo. B ra tagsdame tɩ yaa tõnd n sõng bãmba, la sɩd-sɩdã, bãmb n sõng tõnd n yɩɩda.” A paasame: “D yãame tɩ nonglem la zems-n-taar n sɩd be a Zeova nin-buiidã sʋka, la tɩ b tẽed-a-la ne b sũur fãa n teeg-a zãng-zãnga. Woto fãa kɩtame tɩ d maneg n nong a Zeova, tɩ d sũur me maneg n noom ne bũmb nins fãa a siglgã sẽn maand n kõt tõndã.”

D WƖNGD NE TŨUDMÃ TƲƲM N PAASDẼ

14, 15. a) Bõe n wilgd tɩ no-rɛɛs a Ezayi ra tara yam-sõngo? b) Wãn to la Rĩungã koe-moondb tõe n dɩk a Ezayi togs-n-taare?

¹⁴ Yãmb datame n tʋm tũudmã tʋʋm n paas bɩ? Y na n sak n yik n kẽnga zĩig koe-moondb sẽn pa waooge, n tɩ sõng bɩ? Yaa sɩd tɩ pa tɩlɛ tɩ d yik n kẽng zĩ-zãrgẽ n tɩ tʋm tũudmã tʋʋm ye. La d tẽed-n-taas kẽer gesame tɩ b tõe n maana woto. B rɩkda no-rɛɛs a Ezayi togs-n-taare. Daar a ye, a Zeova sokame yaa: “Ãnda la mam na n tʋme? Ãnda n na n kẽng tõnd yʋʋr yĩnga?” A Ezayi leokame tɩ: “Ad maam, tʋm-y maam!” (Eza. 6:8) Yãmb me getame tɩ y tõe n sak n tɩ tʋma zĩig ning fãa a Zeova siglgã sẽn dat tɩ y kẽng bɩ? Bõe la y tõe n tɩ sõng n maane?

¹⁵ A Zeezi ra goma koɛɛgã mooneg la karen-biisã maaneg yell n yeel yaa: “Koodã sẽn dat tigsgã yaa wʋsgo, la tigsdbã sõor paoodame. Dẽ yĩnga, kos-y tigsgã soab tɩ b tʋm tʋmtʋmdb b pʋʋgẽ wã.” (Mat. 9:37, 38) Y tõe n kẽnga zĩig koe-moondb sẽn pa waooge, n tɩ yɩ so-pakd be, wall y sõng ned t’a maan woto bɩ? D tẽed-n-taas wʋsg yeelame tɩ f sã n yik n kẽng zĩig koe-moondb sẽn pa waooge, n tɩ yɩ so-pakd be, yaa segb meng-meng f sẽn paam n tõe n wilg tɩ f nonga Wẽnnaam la f taabã. Y nee bũmb a taab y sẽn tõe n maan n paas Wẽnnaam tʋʋmdã pʋgẽ bɩ? Y sã n yãk bũmb n maane, y sũ-noogã na n yɩɩ wʋsgo.

16, 17. Bõe me la y tõe n maan a Zeova tʋʋmdã pʋgẽ?

¹⁶ Y na n sak n tɩ sõnga ne Betɛllẽ tʋʋmã, wall siglgã rot meeb bɩ? Tõe n yɩɩ wakat y sẽn yãke, wall vugr bɩ rasem a wãn semen fãa. Wakat fãa, a Zeova siglgã rata neb sẽn na n sak n tɩ tʋʋm zĩig ning fãa raab sẽn beẽ, la sẽn na n sak n tʋm tʋʋmd ning fãa b sẽn na n yeel-b tɩ b tʋme, baa sã n pa tʋʋm-kãng pʋgẽ la b tar minim. A Zeova sũur nooma ne ned ning fãa sẽn sakd n mong a meng bũmb kẽer sẽn na yɩl n kẽng zĩig raab sẽn beẽ n tɩ sõnge, baa sẽn yaa zĩig ning fãa.—Yɩɩn. 110:3.

¹⁷ Y ratame n paam minim la bãngr n paase, n tõog n tʋm a Zeova tʋʋmã sõma n paas bɩ? Sã n yaa woto, y tõe n kos n kẽnga Rĩungã koe-moondb lekolle. Lekoll-kãng sõngda saam-biis la saam-bi-pogs tẽeb sẽn bɩ, la sẽn kẽes b mens zãng a Zeova tʋʋmdã pʋgẽ, tɩ b tõe n paam minim n tõog n tʋm tũudmã tʋʋm n paase. Neb nins sẽn kot n na n kẽng lekoll-kãngã segd n sakame n na n kẽng zĩig ning fãa siglgã sẽn na n tʋm-b lekollã poorã. Yãmb datame n kẽng Rĩungã koe-moondb lekolle, n wa paam n tʋm a Zeova tʋʋmã n paas bɩ?—1 Kor. 9:23.

18. D sã n tʋmd ne a Zeova daar fãa, bark bʋs la d paamda?

¹⁸ D sẽn yaa a Zeova nin-buiidã, d yaa kõatba, n nong d taabã, la d maand-b neere. Daar ne a to fãa, d wilgdame tɩ d taabã yell pak-d lame. D sẽn maand woto wã kɩtame tɩ d tar sũ-noogo, la sũur pʋgẽ bãane. (Gal. 5:22, 23) Baa y vɩɩmã sẽn yaa to-to fãa, y sã n dɩkd a Zeova togs-n-taar n yaa kõata, la y naagd-a n tʋmdẽ, y na n paama sũ-noogo.—Yel. 3:9, 10.