Yãmb mii Wẽnnaam sõma bɩ?

Neb wʋsg yetame tɩ b tẽeda Wẽnnaam. La y sã n sok-b bũmb nins b sẽn mi Wẽnnaam zugã, b sẽn na n leok to-to wã na n yɩɩ toor-toore. Neb kẽer tagsdame tɩ Wẽnnaam yaa bu-kaood sẽn yaa toaaga, t’a raabã yaa a sɩbg nebã b beegrã yĩnga. Sãnda yetame tɩ Wẽnnaam nonga nebã, la t’a kõta sugri, baa ne b sẽn maan fãa. Neb a taab me yetame tɩ Wẽnnaam zãra ne tõndo, la tɩ tõnd yell ka pak-a ye. Tagsa wã sẽn yaa toor-toor yel-kãngã wɛɛngẽ wã kɩtame tɩ neb wʋsg tagsdẽ tɩ ninsaal pa tõe n bãng Wẽnnaam sõma ye.

Bõe yĩng tɩ y tog n bao n bãng Wẽnnaam sõma? Y sã n bãng Wẽnnaam sõma, sõngd-y lame tɩ y bãng y sẽn na n tees y vɩɩmã neng ninga tɩ tall barka. (Tʋʋma 17:26-28) Yãmb sã n bãng Wẽnnaam n paasdẽ, a na n maneg n nong-y lame, la a sõngd-y-yã. (Zak 4:8) La sẽn yɩɩd fãa, y sã n bao n bãng Wẽnnaam sõma, y tõe n wa paama vɩɩm sẽn pa sɛtã.—Zã 17:3.

Bõe la y tõe n maan n bãng Wẽnnaam sõma? D rɩk makre. Yãmb tara y zoa, n mi-a sõma. La sɩnga a wãn tɩ yãmb zoodã wa paam pãnga? Yaa vẽeneg tɩ yãmb bao n bãnga a yʋʋre, a sẽn yaa ned ning buudã, a sẽn nong la a sẽn pa nonge, a sẽn zoe n maane, la a sẽn magd n na n wa maane, wall yɛl a taaba. Yaa yãmb sẽn bãng woto fãa nin-kãngã zugã n kɩt tɩ y lebg a zoa.

Woto me, y sã n bao n bãng sogsg nins sẽn pʋgdã leoore, y na n tõog n bãnga Wẽnnaam sõma. Ad sogsgã:

• WẼNNAAM TARA YƲƲR BƖ?

• WẼNNAAM ZƲG-KÃSEMSÃ LA BƲSE?

• BÕE LA WẼNNAAM ZOE N MAANE?

• BÕE LA WẼNNAAM NA N WA MAANE?

• Y SÃ N BAO N BÃNG WẼNNAAM SÕMA, WÃN TO LA NA N NAF-YÃ?

Seb-kãngã na n sõng-y lame tɩ y paam sogs-kãensã leoor Biiblã pʋgẽ. Sõssã na n sõng-y lame tɩ y bãng Wẽnnaam sõma. La na n sõng-y lame me tɩ y bãng rẽ sẽn na n naf yãmb to-to.