Siglgã taoor lʋɩtb sull paama nin-paalle

YƲƲMD 2018 yʋʋm-vẽkr kiuug rasem 24 sẽn yɩ arb daarã, b taasa Etazĩni Betɛllã ne Kanada Betɛllã neb koe-noogo. B yeelame tɩ saam-biig a Kenneth Cook lebga a Zeova Kaset rãmbã siglgã taoor lʋɩtb sullã neda.

Saam-biig a Kenneth Cook roga Pɛnsilvani, Etazĩni soolmẽ wã. A zĩnda be n tãag a bɩʋʋngo. A karen-bi-taag n sõng-a t’a bãng a Zeova. Rẽ tɩ keta bilf t’a baas kolɛɛsã. A reega lisg yʋʋmd 1980, sigr kiuug rasem a 7. A lebga wakat fãa so-pakd yʋʋmd 1982 bõn-bɩʋʋng kiuug pipi daarã. Yʋʋm a yiib poore, b bool-a-la Wallkill Betɛllẽ wã, Niuyork soolmẽ wã. A tɩ sɩnga tʋʋm beenẽ yʋʋmd 1984 zĩ-likr kiuug rasem 12.

Yʋʋm 25 pʋgẽ, saam-biig a Kenneth Cook tʋma tʋʋm toɛy-toɛy sɛbã ẽnpirimg zĩigẽ la biru ningẽ b sẽn get Betɛllã yellã. A kẽe kãadem yʋʋmd 1996. A pagã yʋʋr la a Jamie. A tɩ naaga a sɩdã tɩ b ra tʋmd Wallkill Betɛllẽ wã. Yʋʋmd 2009 yʋʋm-sar kiuugã, b kɩtame tɩ saam-biig a Cook ne a pagã na n tɩ zĩnd a Zeova Kaset rãmbã karen-do-kãsengã sẽn be Patɛrsõn, Etazĩni soolmẽ wã. Beenẽ wã, b kɩtame tɩ saam-biig a Cook ra tʋmd biru ning sẽn get lɛta-rãmbã yellã. Yʋʋmd 2016 tʋʋl-nif kiuugã, b le leba Wallkill Betɛllẽ wã. La pa yã n kaoos la b kɩt tɩ b kẽng Burkilin, Niuyork soolmẽ wã ye. Kiis a nu poor bala, b toeema biru-kãsengã zĩiga, tɩ lebg Warwik. Yʋʋmd 2017 yʋʋm-vẽkr kiuugã, b kɩtame tɩ saam-biig a Cook tɩ sõngd siglgã taoor lʋɩtb sull ning sẽn get sɛbã gʋlsg yellã.