Siglgã taoor lʋɩtb Sull nin-paal a yiibu
YƲƲMD 2023 yʋʋm-vẽkr kiuug rasem 18 sẽn yɩ arb daarã, b yiisa koɛɛg jw.org pʋgẽ, n yeel tɩ b yãka saam-biig a Gage Fleegle ne saam-biig a Jeffrey Winder tɩ b lebg a Zeova Kaset rãmbã Siglgã taoor lʋɩtb Sull neba. Saam-bi-kãensã a yiibã sɩng n tũuda a Zeova ne b sũy fãa na maan yʋʋm wʋsg masã.
A Gage Fleegle ne a pag a Nadia
Saam-biig a Fleegle roga Pɛnsilvani sẽn be Etazĩni nug-goabg sẽnesã. A roagdbã ra yaa a Zeova Kaset rãmba. A sẽn wa n yaa bi-bɩɩgã, a zakã rãmb yikame n tɩ zĩnd tẽn-bil pʋgẽ, zĩig koe-moondb sẽn pa waooge. Rẽ poor bilfu, a reega lisg yʋʋmd 1988 sɩpaolg kiuugã rasem 20.
Saam-biig a Fleegle roagdbã ra sagend-a-la wakat fãa t’a kẽes a meng zãng a Zeova tʋʋmdã pʋgẽ. B ra wae n deegda tigims sull yel-gɛtb la Betɛllẽ tʋm-tʋmdb b zakẽ wã, tɩ saam-biig a Fleegle neẽ tɩ nin-kãensã sɩd tara sũ-noogo. A lisgã poor bilfu, a lebga wakat fãa so-pakd yʋʋmd 1989 bõn-bɩʋʋng kiuugã pipi daare. Yʋʋm a yiib poore, a paama bũmb a sẽn da sɩng n dat a sẽn wa n tar yʋʋm 12 tɛka. A lebga Betɛllẽ tʋm-tʋmda. A sɩnga tʋʋmdã Burkilin Betɛllẽ wã yʋʋmd 1991 zĩ-likr kiuugã pʋgẽ.
Betɛllẽ wã, saam-biig a Fleegle tʋma sɛbã yiisg zĩigẽ yʋʋm a nii. Rẽ poore b kɩtame t’a tɩ tʋmd biru ning sẽn get koɛɛgã mooneg yellã pʋgẽ. Wakat kãnga, a zĩnda tiging sẽn gomd Ris pʋgẽ yʋʋm a wãna. Yʋʋmd 2006, a kẽe kãadem ne a pag a Nadia tɩ b naag taab n tʋmd Betɛllẽ wã. B zĩnda tiging sẽn gomd Portigɛ pʋgẽ, la na maan yʋʋm piig la zak masã, b bee tiging sẽn gomd Ɛspayõll pʋgẽ. Saam-biig a Fleegle sẽn tʋm biru ning sẽn get koe-moonegã yellã pʋgẽ n kaoos yʋʋm wʋsg poore, b kɩtame t’a tɩ tʋmd Siglgã taoor lʋɩtb sullã sull ning sẽn get nebã zãmsgã yellã pʋgẽ, tɩ rẽ poor tɩ b yãk-a t’a tɩ naag sull ning sẽn get koe-moonegã yellã. Yʋʋmd 2022 tʋʋlg kiuugã, b yãk-a lame t’a lebg Siglgã taoor lʋɩtb sullã sull ning sẽn get koe-moonegã yellã sõangda.
A Jeffrey Winder ne a pag a Angela
B roga saam-biig a Winder Kaliforni sẽn be Etazĩni wã tẽng a ye b sẽn boond tɩ Miriyeta pʋgẽ. A roagdbã wub-a-la sɩdã pʋgẽ, t’a reeg lisg yʋʋmd 1986 tʋʋlg kiuug rasem 29 wã. Kiuug ning sẽn pʋglã bala a yãka yam n na n yɩ sõngr so-pakda. Yɩ-a-la noog hal t’a yãk yam n na n kell n yɩ sõngr so-pakda. A sẽn yɩ sõngr so-pakd kiuug a wãn poore, a lebga wakat fãa so-pakd yʋʋmd 1986 zĩ-likr kiuugã pipi daare.
Saam-biig a Winder sẽn wa n yaa bi-bɩɩga, a tɩ kaaga a kẽem-dãmb a yiib sẽn da tʋmd Betɛllẽ wã wakat kãnga. Rẽ kɩtame t’a yãk yam t’a sã n wa lebg kãsma, a na n kosame n tɩ tʋm Betɛllẽ wã. Yʋʋmd 1990 sig-noy kiuugã pʋgẽ, b bool-a lame t’a na n tɩ tʋm Wallkill Betɛllẽ wã.
Betɛllẽ wã, saam-biig a Winder tʋma tʋʋm buud toor-toore. Wala makre, rotã yẽesgo, koob la gʋʋlgo. A leb n tʋma biru ning sẽn get Betɛllẽ tʋm-tʋmdbã yellã pʋgẽ. A kẽe kãadem ne a pag a Angela yʋʋmd 1997. Wakat kãng tɛka, b naaga taab n tʋmd Betɛllẽ wã. Yʋʋmd 2014, b kɩtame tɩ b kẽng Warwik. Be, saam-biig a Winder sõng n tʋma biru-kãsengã rot meeb pʋgẽ. Yʋʋmd 2016, b kɩtame tɩ b kẽng a Zeova Kaset rãmbã karen-do-kãsengã sẽn be Patɛrsõnnã. Be, saam-biig a Winder tʋma odiyo-rãmbã la video-rãmbã yiisg zĩigẽ. Yʋʋm a naas poore, b kɩtame tɩ b lebg n wa Warwike, tɩ b yãk saam-biig a Winder t’a tʋmd sull ning sẽn get Betɛl-dãmbã tʋm-tʋmdb yellã pʋgẽ. Yʋʋmd 2022 tʋʋlg kiuugã pʋgẽ, b yãk-a lame t’a lebg Siglgã taoor lʋɩtb Sullã sull ning sẽn get Betɛl-dãmbã tʋm-tʋmdb yellã sõangda.
D pʋʋsda a Zeova, t’a ning nin-kãensã sẽn yaa “kũun sẽn yaa rapã” bark wʋsgo, tɩ b ket n tʋmd ne b sũur fãa Rĩungã yĩnga.—Efɛɛ. 4:8.