A Zeova ning-m-la bark tɩ yɩɩg m sẽn da tẽedã

Mam sẽn wa n tõog n bas sãmbsã n sɩng so-pakrã, m vɩɩmã toeema wʋsgo, hal tɩ bark nins m sẽn paamã yɩɩg m sẽn da tẽedã. (Efɛ. 3:20) La tõe tɩ yãmb dat n bãnga sẽn yɩ to-to. Bɩ m maneg n togs-y zãnga.

Mam doga Bɛrlẽ, Alemayn soolmẽ wã, yʋʋmd 1939. Rẽ tɩ dũni gill zabr a yiib-n-soabã sẽn sɩng zemsa kiis a wãn bala. Zabrã sẽn wa n sat yʋʋmd 1945 wã, sodaas n da kẽed sɩls n lobd bõmb-dãmb Bɛrlẽ tẽngã. Daar a ye, bõmb-dãmbã rʋʋga tõnd sakẽ wã, tɩ tõnd zakã rãmb zoe n kẽng zĩig nebã sẽn kẽnd n soondedẽ. Sẽn na yɩl n põsg d yõyã, d wa n kong n zoe n kẽnga Efoort, m ma sẽn dog tẽng ningã.

M ma ra baooda sɩdã ne a sũur fãa. A karma bũmb wʋsg filozof-rãmbã sẽn yiisi, la a toeem tũudum naoor ka tɛka, la baa a ye pa ta a yam ye. Yʋʋmd 1948 wã sẽnese, pagb a yiib sẽn yaa a Zeova Kaset rãmb n wa tõnd zakẽ wã. M ma reeg-b-la sõma, n sõs ne-ba, n sok-b sogsg wʋsgo. Pa yã n ta lɛɛr a ye la m ma yeel maam ne m yao bi-puglã yaa: “M bãnga sɩdã!” Rasem a wãn poor bala, maam ne m ma la m yao wã sɩnga tigissã kẽnd Efoort.

Yʋʋmd 1950 wã, d le leba Bɛrlẽ, n da tɩ naag Bɛrlẽ-Kurzbɛrg tigingã. D wa n yik n toeema zĩiga, n da tɩ be Bɛrlẽ-Tẽmpɛlhof tigingẽ wã. M ma wa n deega lisgu, la mam yẽ ra tagsdame tɩ m nan pa tõe n deeg lisg ye. Bõe yĩnga?

M TÕOGAME TƖ M YÃN-ZOEERÃ BOOGE

Ra yaa toog ne maam tɩ m yẽeg m meng n tũ a Zeova, bala m da zoeta yãnd wʋsgo. M da tũudame n yit koɛɛgã moonego, la maana yʋʋm a yiib tɩ m pa yaag m noorã n taas ned koɛɛgã ye. Ad bũmb ning sẽn wa n kɩt tɩ m na n toeeme: M sõsa ne saam-biis la saam-bi-pogs sẽn tall raood la b maan sɩd ne a Zeova zu-loees sasa. Kẽer paama namsg Nazi kã de kõnsãntrasiõ rãmbẽ, pa rẽ bɩ Alemayndelɛst bãens rotẽ. Sãnda me ra soosd n tallda d sɛbã n kẽnd Alemayndelɛste, n yaool n da mi tɩ b sã n yõk-ba, b na n kẽes-b-la bãens roogo. B sẽn maan woto wã kenga m pɛlg hal sõma. M yeela m meng yaa: Bãmb sã n sakame n gẽneg b yõyã, la b sak n na n kẽ bãens roogo, a Zeova la b tẽed-n-taasã yĩnga, dẽnd ma-me segd n modgame n boog m yãn-zoeerã.

Yʋʋmd 1955 wã, m naaga koe-moondb n gilg n moon koɛɛgã, tɩ kell n tũ ne rẽ tɩ m yãn-zoeerã sɩng boogre. Siglgã lɛtr b sẽn yiis d sebr a ye pʋgẽ, (Informateur a) saam-biig a Nathan Knorr yeelame tɩ b sẽn sigl koe-mooneg ning wakat kãngã me naaga sẽn yɩ-b kãseng wʋsgã. A yeelame tɩ koe-moondbã fãa sã n da kẽes b toogo, “b sẽn da na n moonẽ koɛɛgã ki-kãng to-to wã buud ra kõn le zĩnd dũniyã zug ye.” Sɩd me, a gomdã yaa gõaag zugu! Rẽ poor bilfu, m dɩka m meng n kõ a Zeova. Yʋʋmd 1956, maam ne m baaba la m yao wã reega lisgu. La rẽ poor bilfu, m da segd n yãka m sẽn dat n tees m vɩɩmã neng ninga.

Na maan yʋʋm wʋsgo, m da miime tɩ m sẽn dat yaa m wa lebg so-pakda, la m da yeta wakat fãa tɩ m na n basame tɩ yɩ bilf n paase. M deng n yãka yam n na n zĩnd Bɛrlẽ n zãms nug-tʋʋmde. M zãmsa ned sẽn tõe n maan to-to n daad teed n kẽnd tẽn-zẽms n koosdẽ, la a raad teed beenẽ n wat n koosdẽ. Rẽ poore, m yãka yam n na n tʋm bilf n paam tʋʋmdã minim. Kɩtame tɩ yʋʋmd 1961 wã, m sakame n na n tɩ tʋm Hãmburg, Alemayn mogrã noor tẽn-kẽeng ning sẽn yɩɩd a taabã fãa wã. M tʋʋmdã ra paamda pãnga, tɩ m da lebsd so-pakrã poorẽ, n yetẽ tɩ m na wa n baoo wakat n sɩnge. Wa n baasa wãna?

M sũur yaa noog a Zeova sẽn tũnug ne m tẽed-n-taas sẽn nong maam, n sõng-m tɩ m tẽeg t’a tʋʋmdã la m segd n lʋɩɩs taoorã. Mam zo-rãmb wʋsg n da zoe n yaa so-pakdba, tɩ ra kõt-m mak-sõngo. Sẽn paase, saam-biig a Erich Mundt sẽn zĩnd kã de kõnsãntrasiõ pʋgẽ wã sõsa ne maam, n sagl-m tɩ m wee n teeg a Zeova. A yeelame tɩ kã de kõnsãntrasiõ wã pʋgẽ, saam-biis nins sẽn da teeg b mensã raood wa n komsa zãnga, la sẽn da teeg-b a Zeova ne b sũur fãa wã kell n maana sɩd ne-a, hal n tõog n maan bũmb wʋsg a Zeova siglgã pʋgẽ.

Sẽn paas me, saam-biig a Martin Poetzinger ra nong n kengda saam-biisã pels n yetẽ yaa: “Hakɩɩka, bũmb ning y sẽn tõe n paam tɩ sõng-y n tɩ yɩɩd yaa raoodo!” A wa n yɩɩ Siglgã taoor lʋɩtb Sull neda. M bʋgsa a gomdã zugu, tɩ rẽ kɩt tɩ m yãk yam n bas m tʋʋmdã, n sɩng so-pakrã yʋʋmd 1963 sigr kiuugã. Yam-yãkr a to kae sẽn da na n naf maam n yɩɩd ye! Kiis a yiib poor bala, b yãka maam tɩ m na n lebg zall so-pakda. Rẽ tɩ m pa yã n sɩng tʋʋmd a to baoob meng ye. Yʋʋm a wãn pʋgẽ bala, m yãame t’a Zeova ning-m-la bark hal tɩ yɩɩd m sẽn da tẽedã. Siglgã boola maam tɩ m wa naag Gileyaad lekoll 44 soabã.

BŨMB M SẼN BÃNG GILEYAAD LEKOLLÃ SASA TƖ SÕNG-M WƲSGO

Bũmb ka tɛk la m bãng lekollã sasa hal tɩ tar yõod wʋsgo. Sẽn yɩɩd fãa a Nathan Knorr ne a Lyman Swingle sẽn wilg tõnd tɩ d “pa segd n yɩ tao-tao n bas tʋʋmd ning b sẽn na n kõ-dã.” B wilga vẽeneg tɩ baa wa n yaa toog bɩ d ra bas ye. Ad saam-biig a Knorr sẽn yeele: “Bõe yell la y na n tagsd n yɩɩda? Yaa rẽgdã, zõosã, yalã, rũmsã la nebã naongã bɩ, bɩ y na n geta tɩɩsã, fɩlɛɛr-dãmbã la nebã nensã sẽn be laadã? Modg-y n nong-y nebã!” Daar a ye, saam-biig a Swingle ra wɛgsda sõsga, n gomd bũmb nins sẽn mi n kɩt tɩ kẽer yɩ tao-tao n bas tʋʋmdã. A sũurã wa n sãama wʋsg t’a nintãma yɩlsdẽ, tɩ goamã lebg toog ne-a, t’a kong n sĩnd tɩ yɩ bilf t’a yaool n na n le sɩng sõsga. Yellã kẽe maam hal tɩ m yeel m meng tɩ m kõn tol n sãam Kiristã wall a ba-biisã sũur ye.—Mat. 25:40.

B sẽn wa n togs ned fãa a sẽn na n kẽngẽ wã, Betɛllã tʋm-tʋmdb n sok d kẽer n na n bãng b sẽn tʋm-d zĩis ninsã. Ned fãa sã n togse, b gomdame n pẽge. La mam sẽn wa n yeel tɩ b tʋma maam Kõngo (Kinsasa) wã, b fãa sĩndame, n wa yeel bal tɩ: “Oh, Kõngo! A Zeova na zĩnd ne-fo!” Wakat kãng tɩ kibayã pʋgẽ, b ra gomda Kõngo nebã sẽn zabd n kʋʋd taabã yell wʋsgo. La m kell n tagsa bũmb nins m sẽn zãms lekollã sasa wã. D reega d dipolom-dãmbã yʋʋmd 1967 bõn-bɩʋʋng kiuugã. Rẽ poor bilfu, maam ne a Heinrich Dehnbostel la a Claude Lindsay saga d teed n kẽng Kõngo na-tẽngẽ wã, Kinsasa.

BŨMB WƲSG LA D BÃNG MISIONEEREMDÃ PƲGẼ

Tõnd sẽn ta Kinsasa wã, d zãmsa farend kiis a tãabo. Rẽ poore, d kẽnga Lubumbasi, b sẽn da boond zĩig ning tɩ Elizabɛtvɩllã. Yaa Kõngo nug goabg babgã. Pa zãr ne Zãmbi toadgã ye. D tɩ zĩnda misioneer-dãmb zak sẽn be galʋ-tẽngã pʋgẽ.

Sẽn mik tɩ b ra zɩ n moon koe-noogã Lubumbasi wã, d sũur da yaa noogo, d sẽn paam tɩ yaa tõnd n na n yɩ pipi n taas neb wʋsg koɛɛgã beenẽ wã. Tao-tao bal tɩ d paama Biibl karen-biisi, hal n da pa tõe n yã sẽk n zãms sẽn dat-bã fãa ye. D taasa koɛɛgã tẽngã neb kẽer me sẽn be goosneemã pʋgẽ, la polɩɩs-rãmbã taoor-dãmba. B wʋsg manesem wilgame tɩ b nanda Wẽnnaam Gomdã la d tʋʋmdã hal sõma. Nebã wʋsgã ra gomda Suwayili. Rẽ n so tɩ maam ne a Claude Lindsay zãms buud-gom-kãng me. Pa yã n kaoos la b kɩt tɩ d kẽng Suwayili buud-gomdã tiging pʋgẽ ye.

Yaa sɩd tɩ bũmb wʋsg n yɩ-d noogo, la d paama zu-loees me. Naoor wʋsgo, bi-bees sul sẽn tar bug-raad la sẽn tɩg rãam n rõd tõndo, n da rat n maan-d yelle. Wakat ning menga, polɩɩs-rãmb me sẽn dat n nams-d mi n dõd-d lame. Vugri, d ra maanda d tigsg misioneer-dãmbã zakẽ, tɩ polɩɩs-rãmb wʋsg wa ne bug-raad n yõg rapã n kẽng polɩɩs-rãmbã zakẽ. B kɩtame tɩ d zĩnd tomã pʋgẽ n tãag yʋng wakat 10 n yaool n na n bas-d tɩ d looge.

Yʋʋmd 1969 wã, siglgã kɩtame tɩ m na n gilgd n kaagd tigimsã. Tʋʋm-kãng yĩnga, m da segd n kẽna nao n zãage, n pãrg Afirik wet kẽere. Moogã mi n limame, tɩ sorã me yaa bɛgdo. Tẽn-bil a ye pʋgẽ la no-yãang ne a kamb ra wat n gãe mam gãagã tẽngre. M kõn tol n yĩm a sẽn sãt n nek maam ne a bʋʋrã, tɩ zĩigã nan ket n yaa libsg-libsgã ye. M nong n tẽegda maam ne saam-biisã sẽn da mi n tugl bugum ne zaabr n wootẽ la d sõsd Biiblã zugã.

Ad bũmb a ye sẽn yɩ zu-loe-kãseng meng-menga: Neb n da yet tɩ b yaa a Zeova Kaset rãmba, n yaool n da teend sull b sẽn boond tɩ Kitawala.b B kẽer tol n deega lisgu, n lebg tigingã kãsem-dãmb menga. Nin-kãensã sẽn yaa wa ‘kug-bɛd sẽn solg koom tẽngrã’ pa tõog n belg d tẽed-n-taas nins sẽn nong a Zeova ne b sũur fãa wã ye. (Ziid 12) Tarẽ-n-tarẽ, a Zeova wa n yɩlga tigingã. Rẽ tɛka, fɩɩgrã tolg n paama pãnga.

Yʋʋmd 1971 wã, b kɩtame tɩ m na n tɩ tʋm Kinsasa filiyallẽ wã. Bũmb wʋsg la m maan-yã. Wala makre, m gesa lɛta-rãmbã b sẽn toondã yelle, sɛbã komand-rãmb yelle, la m tʋm biru ning sẽn get koe-moonegã yellã pʋgẽ me. Betɛllẽ tʋʋmã sõnga maam tɩ m bãng m sẽn tõe n maan to-to, n sigl tʋʋmã tẽn-bed-kẽengã pʋgẽ baa ne bũmb kẽer paoong sẽn da yaa toogã. Sasa kẽere, sɛbã b sẽn toond ne sɩlgã mi n maana kiis n yaool n ta tigimsã pʋsẽ. Sã n wa, b ningda batayo-rãmbẽ. Batayo-rãmbã yaool n mi n maana semen-dãmb n pa tõe n looge, moogã sẽn yãmb koomã yĩnga. La baa ne zu-loe-kãensã fãa, d ra tõogd n tʋmda d tʋʋmã.

M sẽn yã saam-biisã sẽn maan to-to n sigl tigis-kãsems baa ne d ligdã sẽn da pa waoogã, ling-m-la wʋsgo. B tuu yaoor n wʋk a tãndã n maan ɛstaraadã, n wʋr kãnkã-wogd n gũbg wa lalse, la b tigim kãnkãyã kill-kill n maan zaoosã. B kɛɛ bãmbu wã n maan zãn-daadã, la b bao pĩy sẽn wʋg ne mood n pil sugrã la b maan taabl-dãmbã. Tɩɩs pagd la b pulg n maan tãand n sẽb zĩis kẽere, b sẽn pa tar poẽnt-rãmb yĩnga. M sẽn da ne b sẽn tʋmd ne yam to-to n na n tõog n maan woto fãa wã, m da get-b lame n pa tɩgd ye. Kɩtame tɩ m da nong-b wʋsgo. M sũur sãama b sẽn wa n kõ-m tʋʋmd zĩig a to tɩ m segd n loog n bas-bã!

B WA N TƲM-M-LA KENYA

Yʋʋmd 1974, b kɩtame tɩ m na n tɩ tʋmd Kenya filiyallã sẽn be Nayerobi wã. Tʋʋmã ra waoogame, bala Kenya filiyallã ra segd n gesa koɛɛgã mooneg yell tẽns piig pʋgẽ, tɩ b yaool n da gɩdg d tʋʋmdã tẽn-kãens kẽer pʋgẽ. B tʋma maam naoor wʋsg tɩ m tɩ kaag tẽn-kãens saam-biisã. Etiopi la m kẽng n yɩɩda. Wakat-kãng tɩ b ra tolg n namsda d saam-biisã beenẽ. B namsa b wʋsg ne toolem, n kẽes kẽer bãens roogo, la b kʋ sãnda menga. La b tõoga toog n kell n maan sɩda, b sẽn da tar zood sõma ne a Zeova la ne taabã yĩnga.

Yʋʋmd 1980 wã, bũmb sẽn kõt sũ-noog la m paam-yã. M paam n kẽe kãadem ne a Gail Matheson. A yita Kanada. D ra naaga taab n maan Gileyaad lekollã. Rẽ tɛka, d ra ket n gʋlsda taab lɛta. A ra yaa misioneer n be Bolivi. Yʋʋm 12 poore, d le wa n sega taab Niuyorke. Rẽ poor bilf la d kẽ kãadem Kenya. M pʋʋsda a Zeova bark m sẽn kẽ kãadem ne a Gailã, bala, bũmb fãa pʋgẽ a lʋɩɩsda a Zeova raabã taoore, la a maand sũ-noog ne bũmb nins bal a sẽn tarã. Hal ne rũndã, a ket n yaa m sõangd m sẽn nong wʋsgo.

Yʋʋmd 1986, siglgã kɩtame tɩ maam ne a Gail ra gilgd n kaagd saam-biisã. Mam yaool n da ket n naaga filiyallã taoor lʋɩtb sulli. M da segd n kẽnda tẽns wʋsg me Kenya filiyallã sẽn da get koɛɛgã mooneg yelle, n kaagd saam-biisã.

M ket n tẽra yʋʋmd 1992 d sẽn da segend n na n maan tigis-kãseng Asmara (sẽn be Eritre wã). Rẽ tɩ b nan pa gɩdg d tʋʋmdã beenẽ ye. Bʋko, d sẽn wa n tɩ paam roog ningã ra pa lebd be ye. A yɩngã meng sãoo a pʋgẽ wã. La tigsgã daare, m sẽn yã saam-biisã sẽn maneg pʋgẽ wã to-to tɩ d tõe n zĩnd be n waoog a Zeova wã, m sũur yɩɩ noog wʋsgo. Zagsã rãmb wʋsg waa ne fut tɩ b pil zĩis nins fãa sẽn da pa sakd gesgã, n maneg n nags hal tɩ be yamleoogo. Tigis-kãsengã yɩɩ noog wʋsgo. Nebã sõor taa 1 279.

Tʋʋmdã sẽn da yaa gilgrã, yɩɩ toeeng wʋsg ne-do, bala, d ra segd n toeemda gãag zĩig wakat fãa. Vugri, d tɩ zĩnda ro-neer sẽn be mogrã noore. La vugr me, d zĩnda tʋm-tʋmdb roogẽ. Yaa tolls bal la b ka, tɩ we-kɛɛngã zĩig be hal metr koabg zĩigẽ. La sẽn da yaa zĩig ning fãa la d be, sẽn noom tõnd n yɩɩdã yaa d sẽn da mi n naagd koe-moondb la so-pakdb sẽn tar yẽesem n tʋmd wʋsgã. Siglgã sẽn wa n kõ-d tʋʋmd a to tɩ d ra segd n loog n bas b wʋsg sẽn da lebg d zo-rãmbã, pa yɩ nana ye.

A ZEOVA NINGA D TƲƲMDÃ BARK ETIYOPI

Yʋʋmd 1987 n tãag 1992, tẽns nins Kenya filiyallã sẽn da get koɛɛgã mooneg yellã sʋka, wʋsg paama sor n tõe n tʋm d tʋʋmdã. Woto kɩtame tɩ b lugl filiyall la biru-rãmba. Yʋʋmd 1993, b kɩtame tɩ d na n tɩ tʋmd biru a ye sẽn be Adis-Abeba, Etiyopi soolmẽ wã. B ra gɩdga d tʋʋmdã be yʋʋm wʋsg tɩ ra yaa soosg ne d tẽed-n-taasã, la b ra kõ-d-la sor masã.

A Zeova ninga d tʋʋmdã bark Etiyopi tẽngẽ wã. D tẽed-n-taas wʋsg n lebg so-pakdba, pagb la rapa. Yʋʋmd 2012 tɛka, yʋʋmd fãa, d tẽed-n-taas koabg sʋka, bãmb pisi la zak n yaa wakat fãa so-pakdba. Sẽn paase, d tẽed-n-taas n paam n kẽng siglgã lekoll-dãmba. Rĩung rot bãmb 120 la zak la d tõog n me. Siglgã mee ro-paala, tɩ Betɛllã zak rãmb yik n kẽng be yʋʋmd 2004. Tigis-kãseng roog me la b me n yɛgl Betɛllã, tɩ rẽ me yaa a Zeova barka.

Yʋʋm-kãensã fãa maam ne a Gail sẽn zĩnd Etiyopi wã, d paam n yõga zood sõma ne d tẽed-n-taase, pagb la rapa, hal tɩ d sũur noom wʋsgo. D nong-b-la wʋsgo, bala b sõnga tõnd sõma, la b wilg tɩ b nong-d lame. Yʋʋma noorã, d pa le tar laafɩ woto ye. Rẽ n so tɩ b kɩt tɩ d tɩ be Eropsãntrall filiyallẽ wã. B geta d yell sõma beenẽ. La d ket n tagsda d zo-rãmb nins sẽn be Etiyopi wã yell wʋsgo.

A ZEOVA N KƖT TƖ BƖ

Tõnd yãa a Zeova sẽn ning a tʋʋmdã bark to-to wã. (1 Kor. 3:6, 9) Wala makre, mam sẽn na n moon koɛɛgã neb sẽn da yi Ruwãnda n wa Kõngo n na n bao zũudã, rẽ tɩ koe-moond baa a ye ka be Ruwãnda ye. Masã, Ruwãnda koe-moondbã sõor yɩɩda 30 000. Yʋʋmd 1967 wã, Kõngo (Kinsasa) koe-moondbã sõor ra zemsa 6 000. La masã, b yɩɩda 230 000. Yʋʋmd 2018 wã, neb milyõ la zak n wa a Zeezi kũumã tẽegre. Kenya filiyallã sẽn da get koe-moonegã yell tẽns nins fãa pʋsẽ wã koe-moondb sã n naag taaba, fɩɩgrã taa 100 000 la zaka.

Sẽn yɩɩd yʋʋm 50 la woto a Zeova sẽn tũnug ne saam-biis toor-toore, n sõng maam tɩ m tõog n kẽes m meng zãng a tʋʋmdã pʋgẽ. Yaa sɩd tɩ m yãn-zoeerã pa sa fasɩ ye. La m yãa bũmb wʋsg sẽn sõng-m tɩ m teegd a Zeova zãng-zãnga. Mam sẽn yã bũmb nins Afirikã sõnga maam tɩ m bɩɩs sũ-mare, la m maand sũ-noog ne bũmb nins bal m sẽn tarã. Maam ne a Gail nanda d tẽed-n-taasã sẽn wilg tɩ b nonga sãamba, la b tõog toog baa ne zu-loeesã, la b kell n teeg a Zeova wã. M pʋʋsda a Zeova bark a lohormã yĩnga. A ning-m-la barka, hal tɩ yɩɩg m sẽn da tõe n tẽ wã.—Yɩɩn. 37:4.