D Karen-saam-kãsengã zãmsa tõnd bũmb wʋsgo

MAM ROAGDBÃ KÕO TÕND MAK-SÕNGO

Yʋʋmd 1957 wã, mam roagdbã yii Itali n tɩ zĩnd Kĩndɛrsleyi sẽn be Saskatsewan sẽn yaa Kanada soolmẽ wã. Rẽ poor bilfu, b bãnga sɩdã, tɩ lebg bũmb ning sẽn tar yõod n yɩɩd ne d zakã rãmbã. Mam tẽrame tɩ m sẽn wa n yaa bilfã, tõnd zakã rãmb mi n moona koɛɛgã daarã tõre. Rẽ n so tɩ m mi n deemd n yetẽ tɩ m da yaa sõngr so-pakd m sẽn wa n tar yʋʋm a nii.

M baaba ne m ma nus ra pa zãad ye. La b ra sakd n mongda b mens bũmb wʋsg a Zeova yĩnga, tɩ yaa mak-sõngo. Wala makre, yʋʋmd 1963 b koosa b teed wʋsg sẽn na yɩl n paam ligd n kẽng tigis-kãseng sẽn tigim tẽns toɛy-toɛy neb Pasadena sẽn be Kaliforni sẽn yaa Etazĩni soolmẽ wã. Yʋʋmd 1972, d yikame n kẽng na maan kɩlo tusr zĩigẽ n na n tɩ sõng n moon neb nins sẽn gomd Italiyẽ beenẽ wã. Yɩɩ Treyill sẽn be Kolõmbi-britanik sẽn yaa Kanada soolmẽ wã la d kẽng-yã. M baaba ra tʋmda butig-bedr pʋgẽ, n get roogã yelle. B pʋlm-a-la naoor wʋsg tɩ b na n paas-a-la naam t’a zãgse, a sẽn dat n kell n lʋɩɩs a Zeova tʋʋmdã taoorã yĩnga.

Mam sũur yaa noog wʋsgo, m doagdbã sẽn kõ tõnd b kamb a naasã mak-sõngã yĩnga. B mak-sõngã sõnga maam tɩ m bãng bũmb sẽn tar yõod wʋsg a Zeova tʋʋmdã pʋgẽ. M bãngame tɩ m sã n lʋɩɩs Rĩungã yɛl taoore, a Zeova na n gesa m yelle.—Mat. 6:33.

M KẼESA M MENG ZÃNG A ZEOVA TƲƲMDÃ PƲGẼ

Yʋʋmd 1980 wã m kẽe kãadem ne a Debbie. Yaa pʋg-neer sẽn dat n tʋm a Zeova tʋʋmdã wʋsgo. D ra rat n kẽesa d meng zãng a Zeova tʋʋmdã pʋgẽ. Rẽ n so t’a Debbie lebg so-pakd kiuug a tãab d yi-kãadmã poore. Yʋʋmd d kãadmã poore, d yikame n na n tɩ sõng tigin-bil a ye neba, tɩ ma-me lebg so-pakda.

D wa n komsa raoodo, n yãk yam n na n looge. La d reng n goma rẽ yell ne d tigims sull yel-gɛtã. A goma ne tõnd ne nonglem la pʋ-peelem. A yeelame: “Yellã yita yãmb nengẽ me. Yãmb tagsda zu-loeesã yell wʋsgo. La y sã n tags n gese, y mikdame tɩ y paamda bark buud toor-toore.” Yaa saglg a woto bal la d ra rata. (Yɩɩn. 141:5) D tũu a saglgã zĩig pʋgẽ. Pa yã n kaoos la d bãng tɩ d sɩd paamda bark wʋsg ye. Tigingã neb wʋsg ra modgda a Zeova tʋʋmdã pʋgẽ, baa kom-bɩɩs la pagb sɩdb sẽn pa a Zeova Kaset rãmba. B ra kõta tõnd mak-sõngo. D wa n geta bũmb nins sẽn yaa sõma wã n yɩɩda, la d gũudẽ t’a Zeova wa maneg yɛl nins sẽn pa lebd be wã. (Mis. 7:7) D le wa n paama sũ-noogo, tɩ d zu-loeesã me booge.

Tõnd sẽn wa n na n maan so-pakrã tʋʋmd lekollã pipi wã, karen-saam-dãmbã yɩɩ neb sẽn zĩnd tẽn-zẽms n moone. B wilga tõnd fot-rãmba, la b gom zu-loees nins b sẽn mao ne la bark nins b sẽn paamã yelle, tɩ misioneer tʋʋmdã yamleoog yõk-do. Rẽ kɩtame tɩ d yãk yam n na n modg n wa lebg misioneer-dãmba.

Sẽn na yɩl n wa tõog n lebg misioneer-dãmba, d yika yʋʋmd 1984 n kẽng Kebɛk sẽn be kɩlo tus a naas la zak zĩigẽ ne Kolõmbi-britanikã. Be b gomda Farende. D ra segd n minimã tẽngã neb minundã la b buud-gomdã. Zu-loɛɛg a to me yaa tɩ d ra mi n pa tar ligd ye. Wakat n zĩnd tɩ yɩ tɩlɛ tɩ d kẽnd n yiisd pomdetɛɛr pʋtẽ wã sẽn na yɩl n paam rɩɩbo. A Debbie ra segenda rɩbd toor-toor ne pomdetɛɛrã hal tɩ noome. Baa ne zu-loeesã, d kell n tõoga toog ne sũ-noogo. Sẽn paase d ra neeme t’a Zeova geta tõnd yelle.—Yɩɩn. 64:10.

Daar a ye, ned n bool tõnd ne telefõn hal tɩ ling-du. B boola tõnd tɩ d wa tʋm Kanada Betɛllẽ wã. Rẽ tɩ d ra gʋlsa demand n na n kẽng Galaad lekollã. Rẽ n so tɩ d yamã ra yood ne kẽng n tɩ tʋm Betɛllẽ wã. La d sakame n kẽnge. D sẽn ta wã d soka saam-biig a Kenneth Little sẽn da yaa filyallã taoor lʋɩtb sull nedã yaa: “B sã n bool-d Galaad lekollã d maanda wãna?” A leokame: “B sã n wa bool-yã, d na yaool n gom rẽ yelle.”

Semen poore, b boola maam ne a Debbie Galaade. D ra segd n yãka d sẽn na n maan a soaba. Saam-biig a Little yeela tõnd yaa: “Yãmb sẽn yãk a soab fãa, tõe tɩ daar n na n wa zĩnd tɩ y yeel tɩ y sã n da yãk a to wã n são. Y sẽn yãk a soab fãa yaa sõma. A Zeova na n ning-y-la barka.” D sak n kẽnga Galaade, la yʋʋm wʋsg poore, d yãame tɩ saam-biig a Little sẽn da togsã yaa sɩda. Neb a taab sã n wa segd n yãk yam tʋʋmd ning b sẽn na n tʋmã wɛɛngẽ, d wae n togsd-b-la a goamã.

D LEBGA MISIONEER-DÃMBA

D sũur yɩɩ noog d sẽn paam n maan Galaad lekollã pis-nii la a tãab-n-soabã. D ra yaa karen-biis pis-yi la a naase. Lekollã sɩnga yʋʋmd 1987 tʋʋl-nif kiuugã pʋgẽ, Burkilin sẽn be Niuyork soolmẽ wã. Saam-biig a Ulysses Glass ne saam-biig a Jack Redford n da yaa d karen-saam-dãmba. Kiuug a nu wã looga tao-tao, tɩ d reeg d dipolom-dãmbã yʋʋmd 1987 bõn-bɩʋʋng kiuug rasem a yoobã. B tʋma tõnd Haiti ne a John la a Marie Goode.

B ra riga misioneer-dãmbã n yiis Haiti yʋʋmd 1962, tɩ rẽ tɛka b ra pa le tʋmd misioneer-dãmb be ye. D sẽn ta Haiti wã, b kɩtame tɩ d tɩ naag tigin-bil sẽn tar koe-moondb pis-tã la a nu, n be soolem sẽn yaa tãens pʋgẽ. D taa be semen a tãab d sẽn deeg d dipolom-dãmbã poore. D ra yaa kom-bɩɩs n pa tar minim, tɩ yaool n da yaa tõnd d yiibã bal n be misioneer-dãmbã zakẽ. Tẽngã neb ra yaa naong rãmba, tɩ wʋsg pa mi kareng ye. D sẽn ta be wã poor bilfu, politikã zu-loeesã waa ne nen-kɛglem tẽngã pʋgẽ. Sodaas n mak n na n deeg naamã, tɩ nebã ra yõogd bugum soayã zut n wilgd b sũ-pa-noaanga. Sob-kãsems me n zĩndi.

D rɩka yam Haiti saam-biisã sẽn kell n tall raood la sũ-noog to-to wã pʋgẽ. Vɩɩmã ra yaa toog ne b sʋkã neb wʋsgo, la b ra nonga a Zeova la koe-moonegã. Saam-bi-poak a ye yʋʋm sẽn da vẽsg n da pa mi karengo, la a ra rɩka vɛrse-rãmb na maan koabg la pis-nu ne zugu. Yɛlã sẽn da pa nana wã kɩtame tɩ d maneg n dat n moon koɛɛgã, n sõng nebã tɩ b bãng tɩ yaa Wẽnnaam Rĩungã bal n tar ninsaalbã zu-loeesã tɩɩm. D pipi Biibl karen-biisã sʋka, kẽer wa n lebga wakat fãa so-pakdba, zall so-pakdba, la kãsem-dãmba. D sã n tagsd rẽ yelle, noogda d sũur wʋsgo.

M sẽn wa n be Haiti wã, m sega bi-bɩɩg yʋʋr sẽn boond t’a Trevor. A ra yaa Mormo-rãmbã misioneere. D sega taab naoor wʋsg n gom Biiblã yelle. Yʋʋm a wãn poore, a gʋlsa lɛtr n tool-m hal tɩ ling-ma. Lɛtrã pʋgẽ a yeelame yaa: “Tigis-kãseng ning sẽn watã, m na n deega lisgu. M dat n leba Haiti, n tɩ yɩ zall so-pakd zĩig ning m sẽn da be n yaa Mormo-rãmbã misioneerã.” A sɩd maana woto yʋʋm wʋsg pʋgẽ, yẽ ne a pagã.

D KẼNGA EROP LA AFIRIK

B ra gɩdga Rĩungã koe-moonegã Erop babg a ye tẽns pʋsẽ n wa base, tɩ b tʋm tõnd be. Yʋʋmd 1992, tõnd taa Lubliyana sẽn be Sloveni sẽn yaa tẽng sẽn pa zãr ne zĩig ning m roagdbã sẽn da be nand tɩ b kẽng Itali wã. Wakat kãng tɩ Yugoslavi zabrã nan pa sa ye. Rẽ tɩ yaa Otris filyallã sẽn be Vɩɛnnã n paas biru nins sẽn da be Zagrɛɛb sẽn be Korowasi wã la Bɛlgraad sẽn be Sɛrbi wã n da get koɛɛgã mooneg yell bab-kãnga. La tẽng fãa ra segd n talla a toorẽ Betɛll masã.

Yɩɩ tɩlɛ tɩ d zãms buud-gom-zẽnga, la d minim tẽngã neb minundã. Tẽngã neb ra wae n yetame tɩ “buud-gomdã yaa toogo.” Sɩd ra yaa toog me! D sũur da nooma ne saam-biisã, bala b sak n teela bũmb nins b sẽn toeem siglgã wɛɛngẽ wã ne yamleoogo. D yãame t’a Zeova ning-b-la barka. D le yãame tɩ wakat fãa, a Zeova remsda yɛlã ne nonglem, la a wakate. D sẽn zĩnd Sloveni wã kɩtame tɩ d maneg n kɩs sɩd ne bũmb wʋsg d sẽn bãnge, la kɩt tɩ d bãng bũmb a taab n paase.

La b le wa n toeem-d-la zĩiga. Yʋʋmd 2000 soabã pʋgẽ, b kɩtame tɩ d kẽng Kodivoaar sẽn be Afirik deluwɛstã. La yʋʋmd 2002 sɩpaolg kiuugã pʋgẽ, yɩɩ tɩlɛ tɩ b tall tõnd n kẽng Siera Leonne, zabrã sẽn da be tẽngã pʋgẽ wã yĩnga. Rẽ tɩ zabrã sẽn zĩnd Siera Leon n kaoos yʋʋm piig la a yembrã saa sẽn nan pa kaoose. Pa yɩ nana ne tõnd tɩ d tiig n yi Kodivoaar ye. La bũmb nins d sẽn da bãngã sõng-d lame tɩ d kell n tall sũ-noogo.

D ra neeme tɩ neb wʋsg n dat n bãng sɩdã, la tɩ d tẽed-n-taasã tõoga toog zabrã sẽn kaoos yʋʋm wʋsgã sasa, n da tagsd rẽ yell n yɩɩda. D tẽed-n-taasã ra yaa naong rãmba, la b ra yaa kõatba. Saam-bi-poak a ye n wa ne fut n na n kõ a Debbie. A Debbie ra pa rat n deege, tɩ saam-bi-poakã yeel yaa: “Zabrã sasa, tẽns a taab saam-biis n sõng tõndo. Masã yaa tõnd n segd n sõng d taabã.” D yãka yam n na n dɩkd b togs-n-taare.

D wa n leba Kodivoaare, la zabr n le wa n yik yɛsa. Rẽ n so tɩ yʋʋmd 2004 sɩpaolg kiuugã, yɩɩ tɩlɛ tɩ b rɩk tõnd ne elikoptɛɛr n yi tẽngã. D ned kam fãa korg zɩslem ra pa segd n yɩɩd kɩlo piig ye. Ne yʋngã d gãanda Fãrens sodaasã kãẽ wã tẽnga, tɩ b rɩk tõnd vẽkembeoogã n kẽng Sʋwɩs. D taa filyallẽ wã yʋn-sʋka, la filyallã taoor lʋɩtb sull nebã n paas Wẽnnaam tʋʋmdã zãmsg lekoll karen-saam-dãmbã ne b pagbã reega tõnd sõma. B mobga tõndo, n bao rɩɩb n kõ-do, la b kõ-d sokola wʋsgo. Yɩɩ tõnd noog wʋsgo.

B kɩtame tɩ d kẽng Gãna wakat bilfu, tɩ rẽ poor tɩ d leb Kodivoaar zabrã sẽn wa n kolg weoogã. Saam-biisã ne saam-bi-pogsã sẽn maan tõnd neerã sõngame tɩ d tõog toogo, sẽn wa n yɩ tɩlɛ tɩ d zoe n yɩ tẽngã n tɩ zĩnd zĩis a taab wakat bilf pʋgẽ wã. Baa saam-biir nonglmã sẽn be zĩig fãa a Zeova siglgã pʋgẽ wã, maam ne a Debbie sak n deegame tɩ d pa segd n deem ne-a a bada. Sɩd-sɩda, baa yel-kãensã sẽn pa yɩ nana wã, b sõnga tõnd tɩ d bãng bũmb wʋsg sẽn tar yõodo.

B TƲM-D-LA MOYẼNORIYÃ

Yʋʋmd 2006, d paama lɛtr sẽn yi d biru-kãsengẽ wã sẽn yeel tɩ d kẽng Moyẽnoriyã. So-kãng me yɩɩ tɩlɛ tɩ d mao ne zu-loees a taaba, n zãms buud-goam a taaba, la d minim bab-kãng nebã minundã. Zu-loees wʋsg n be bab-kãnga, politikã la tũudmã yĩnga. D sẽn zĩnd be wã kɩtame tɩ d bãng bũmb wʋsgo. Tigimsã neb buud-goamã sẽn yaa toor-toorã ra noom-d-la wʋsgo. D yãame me tɩ d sã n tũud a Zeova siglgã saglsã, zems-n-taar na n zĩnda d sʋka. D sũur nooma ne d saam-biisã, bala b wʋsg zags rãmba, b karen-bi-taase, b tʋmd-n-taas la b yags namsd-b-la b tũudmã yĩng tɩ b tõogd toog ne raoodo.

Yʋʋmd 2012, d maana tigis-kãseng sẽn yaa zall Tɛll Aviiv sẽn be Israyɛllã. Yʋʋmd 33 Pãntekotã tɛka, a Zeova nin-buiidã ra zɩ n tigim taab bab-kãng tɩ b sõorã ta woto ye. Yaa bũmb d sẽn pa na n tol n yĩmi!

D sẽn wa n be Moyẽnoriyã wã, b tʋma tõnd tɩ d kẽng n tɩ kaag saam-biis sẽn be tẽng b sẽn gɩdg d tũudmã pʋgẽ. D zãa sɛb n tɩ kõ-ba, n naag-b n moon koɛɛgã, la d maan tigis-kãsems sẽn tigim neb a wãn bala. Zĩig fãa d ra nee sodaas sẽn zãad bug-ra-bɛda. B gɩda soay zĩis wʋsgo. La tõnd ne koe-moondbã sõor sẽn da pa waoogã sẽn da maand gũusgã kɩtame tɩ d ra pa yɛɛsdẽ ye.

D LEBG N WAA AFIRIK

Yʋʋmd 2013, b tʋma tõnd tẽng sẽn yaa toor fasɩ. B kɩtame tɩ d kẽng Kõngo Betɛllã sẽn be Kĩnsasa wã. Kõngo yaa tẽng sẽn yaa neere, la naongã yaa wʋsgo, tɩ zab me wae n be be. D sẽn wa n wʋm tɩ d na n kẽnga be wã, d yeelame yaa: “D zoe n mii Afirik. D segl n saame.” La bũmb wʋsg la d ra pa mi Kõngo wɛɛngẽ. Wala makre, d ra segd n togda sore, tɩ soayã yaool n da pa sõma ye. La bõn-sõma n da be tɩ d tagsd rẽ yelle. Wala makre, saam-biisã ra tõogda toog la b tar sũ-noog baa ne talemdã. B nonga koe-moonegã, la b modgd wʋsg sẽn na yɩl n kẽnd tigissã la tigis-kãsemsã. D yãa vẽeneg tɩ yaa ne a Zeova sõngr la a barkã yĩng bal la Rĩungã koɛɛgã sẽn womd biisã. D sẽn zĩnd Kõngo wã yɩɩ sabab tɩ d bãng bũmb wʋsg sẽn tar yõodo, la kɩt tɩ d paam zo-rãmb n paase.

Yʋʋmd 2017 wã baasgẽ, b kɩtame tɩ d kẽng tẽng a to. Yaa Afirikdisiid. D ra nan zɩ n tʋm filyall sẽn yaa bedr wa Afirikdisiid filyallã pʋgẽ ye. D ra nan zɩ n tʋm tʋʋmd ning b sẽn kõ-d be wã me ye. So-kãng yɛsa, yɛlã ra yaa toore. La bũmb nins d sẽn bãng pĩndã sõng-d lame. Saam-biis la saam-bi-pogs wʋsg n be be, n sɩng n tũud a Zeova ne b sũy fãa hal sẽn kaoose. D nong-b-la wʋsgo. D sã n get bãanã sẽn be a Zeova nin-buiidã sʋk b sẽn yeelg nin-paalgã la b sẽn tũud Biiblã saglsã yĩngã, d nee vẽeneg t’a Zeova ningd-b-la barka.

Yʋʋm wʋsgã pʋgẽ, b kõo maam ne a Debbie tʋʋm sẽn be yamleoogo. Yɩɩ tɩlɛ tɩ d minim tẽns toɛy-toɛy neb minundu, la d zãms buud-gom-zẽna. Pa wakat fãa la yɩ nana ye. La d ra neeme t’a Zeova tũnugda ne a siglgã la d tẽed-n-taasã, n wilgd tõnd a nonglmã. (Yɩɩn. 144:2) D kɩsa sɩd tɩ d sẽn kẽes d meng zãng-zãng a Zeova tʋʋmdã pʋgẽ wã kɩtame tɩ d bãng bũmb wʋsgo. Rẽ sõng-d lame tɩ d bɩɩs zʋg-sõma.

Mam sũur yaa noog m doagdbã sẽn wub-m sõma wã, m pag a Debbie sẽn teend-ma, la mak-sõng ning m tẽed-n-taasã sẽn be dũniyã gill zugã sẽn kõtã. Maam ne m pagã sẽn gũud sẽn watã, d yãka yam n na n ket n sakdẽ tɩ d Karen-saam-kãsengã zãmsd tõndo.